Радуйся, огнь божественный неопально держащая:
Радуйся, христиан к благодеянию тем воспламеняющая.
Радуйся, Радосте наша, покрый нас от всякаго зла честным Твоим омофором.
Проповедник скорый Твоея благодати, явися Роман сладкопевец, егда во сне от Тебе, в снедь прия свиток книжный: тем бо умудрен, нача разумно пети Тебе, святым же писати похвальная, и от сего разумев Тя истинную быти Матерь, премудрость Божию, взываше: Аллилуиа.
Возсияла еси от истиннаго Солнца Правды заря, Дево Отроковице, просвещающая всех, и всех в познание приводящая, Ты бо Пречистая Дево, премудростию Божиею вразумлявши верных угодников Твоих, зовущих:
Радуйся, премудрости Соломоновой высшая:
Радуйся, тайная и неудобь предвиденная знающая.
Радуйся, избытия словес и решения гаданий сказующая:
Радуйся, зерцало непорочное Божия деяния.
Радуйся, богатство всего мира безценное:
Радуйся, древняя и будущая прорицающая.
Радуйся, мудрость века сего посрамившая:
Радуйся, Божию силу и Божию премудрость Христа породившая.
Радуйся, отверзающая уста немым:
Радуйся, достоинства всякаго подательнице.
Радуйся, благодатнаго учения наставнице:
Радуйся, всякий чин довольно благодеянием исполняющая.
Радуйся, Радосте наша, покрый нас от всякаго зла, честным Твоим омофором.
Хотя долготерпеливый Всевидец Господь явити Своего человеколюбия неизследимую щедрот бездну, избра Тебе Едину в Матерь Себе, и сотвори Тя людем непреодоленное защищение. Да аще кто от них и праведным судом Божиим осуждения достоин явится: Твоим обаче державным покровом сохраняется, Сыну же Твоему и Богу нашему, зовет: Аллилуиа.
Дивная показал еси дела Твоя в Пречистей Матери Твоей, Господи, дивный омофор светящийся паче илектра, имже покрываше люди, сущия в церкви Влахернстей: вси убо узревше милосердное, паче надеяния, Ея заступление, ужасом одержими бывше, сия глаголаху:
Радуйся, омофор аки об лак распростершая:
Радуйся, превечнаго Архиереа знамение держащая.
Радуйся, омофором люди просвещающая:
Радуйся, новое знамение Тебе в церкви являющася.
Радуйся, столпе облачный, путь Христа показующий:
Радуйся, столпе огненный, мрак греха отгонящий.
Радуйся, крове, обнаженнаго мя добрых дел покрывающий:
Радуйся, церковь осветившая Твоим явлением.
Радуйся, растерзающая вретище скорби нашея:
Радуйся, одевающая нас вечною радостию.
Радуйся, Радосте наша, покрый нас от всякаго зла, честным Твоим омофором.
Странно Тя от небес во Влахернстей церкви явльшуюся, Ангели воспета, Апостоли прославиша, лик святителей и преподобных и жен святых сословие восхвалиша, Предтеча с Богословом поклонишася. Людие же, сущии в церкви с веселием вопияху: Аллилуиа.
Всеми вышними и нижними владычествуя Господь, узрев Тя в церкви Матерь Свою стоящу: и разумев со умилением к Нему молящуюся рече: проси Мати Моя, ибо не отвращу ся от Тебе. Но исполню вся прошения Твоя, и благодарственная сице Тебе всех пети научу:
Радуйся, престоле царский премудраго Соломона:
Радуйся, руно прообразованное от славнаго Гедеона.
Радуйся, Юдифь непреборимая, стершая главу лютаго Олоферна:
Радуйся, всех под кров Твой прибегающих покрывающая.
Радуйся, избавляющая от тартара' преисподняго:
Радуйся, примирение наше с Богом.
Радуйся, Бога с человеки соединившая: Радуйся, далечайшее спасение от грешник близ устроившая.
Радуйся, смиренное наше естество поднесшая: Радуйся, жестокость сердца нашего умилившая. Радуйся, отчаянных к Богу возводящая: Радуйся, сосуды смертныя, на нас уготованнии, сокрушившая.
Радуйся, Радосте наша, цокрый нас от всякаго зла, честным Твоим омофором.
Все естество Ангельское похвальная приносит Тебе, истинней Божией Матери, и Заступнице всех, припадающих к Тебе: ведуще яко твердым и крепким покровом Твоим праведных возвеселявши, грешных заступавши и от бед избавлявши, и молишися о всех верных, зовущих: Аллилуиа.
Ветия многовещанныя, яко рыбы безгласныя, недоумевают восхвалити великаго покрова Твоего праздник: ибо вся о Тебе глаголанная от нас грешных, и от скверных устен наших приносимая Тебе похвала, несть довольна к похвалению Твоея благости: мы обаче Твоя неисчетная благодеяния видяще, душею же и сердцем радующеся, глаголем:
Радуйся, хлебом жизни нас питающая: Радуйся, от губительства смертнаго нас соблюдающая.
Радуйся, от труса начальником тишины нас сохраняющая:
Радуйся, от потопа греховнаго рукою Твоею крепкою нас возводящая.
Радуйся, от огня росою молитв Твоих нас восхищающая:
Радуйся, от глада душевнаго же и телеснаго сильным Твоим предстательством всех верных снабдевающая.
Радуйся, от меча смертнаго силою Твоею нас избавляющая:
Радуйся, от нашествия иноплеменник одождением камык нас спасающая.
Радуйся, от междоусобныя брани истинным миром ограждающая:
Радуйся, от смертоносныя раны словом Твоим нас исцеляющая.
Радуйся, от належащаго праведнаго прещения Божия Твоим молением нас свобождающая:
Радуйся, от всяких нас бед Твоим честным покровом изымающая.
Радуйся, Радосте наша, покрый нас от всякаго зла честным Твоим омофором.
Спасти хотя род человеческий от прелести вражия, человеколюбец Господь Тебе, Матерь Свою, дарова земным в помощь, покров и защищение, яко да будеши печальным утешение, скорбящим радование, обидимым Заступница, и да всех из глубины греховныя воздвигнеши, поющих: Аллилуиа.
Царю небесный, глаголаше в молитве на воздусе с Ангелы святыми стоящая всенепорочная Царица: приими всякаго человека, славящаго Тя, и призывающаго имя Твое на всяком месте и стране, и деже бывает память святаго имени Твоего, такожде прославляющих Мя имени Твоего ради, не отрини от лица Твоего: но благоволи о них, приемляй от них всякое моление и обет. Сию молитву слышавше, лики святых, праведных и преподобных, благодарно вси возопиша, зовуще: Радуйся, паче солнечных луч светлейшая: Радуйся, всем родом имя Твое ныне открывающая.
Радуйся, обеты наша пред Богом похваляющая: Радуйся, сосуде златый, в немже сияет наше недостоинство.
Радуйся, наше нечестие Твоею красотою украшающая:
Радуйся, моления наша Твоим благостроением исправляющая.
Радуйся, брение наше тленное, в нетленное обращающая:
Радуйся, немжение наше утверждающая. Радуйся, плоть и кровь нашу в царскую багряницу одевающая:
Радуйся, Еяже молитвою всегда от зол избавляемся.
Радуйся, Еяже сильным прошением исполнение желаний обретаем.
Радуйся, Радосте наша, покрый нас от всякаго зла честным Твоим омофором.
Пение всеу ми ленное слышаще и умиленную Твою о нас молитву внемлюще, просим Тебе, Дево Богородице: не презри гласа раб Твоих, преблагословенная Мати: к Тебе бо в напастех и скорбех прибегаем, и пред Тобою в бедах слезы проливаем, приятна убо да будет жертва рабов зовущих: Аллилуиа.
Светоприемную Тя свещу, в молитве горящую, видящи Влахернская церковь, согласно хваления Тебе со множеством людей воздающи, глаголаше: откуду мне сие, да прииде Мати Господа моего ко мне и вся мне благопотребная устрой? Тем с умилением всенародно вопияше сице:
Радуйся, свеще неугасимою любовию к людем горящая:
Радуйся, свещниче, незаходимаго света, прекрасно светящийся.
Радуйся, златая кадильнице мысленных и чудных аромат:
Радуйся, престоле царский, тьмою Ангел и Архангел окруженный.
Радуйся, жертвенниче, хлеб жизни содержащий:
Радуйся, чаше, напаяющая верных кровию непорочнаго Агнца.
Радуйся, священнаго чина благолепное одеяние:
Радуйся, верных гласов скорое услышание.
Радуйся, грешным благополучное прибежище:
Радуйся, плавающим легкое прехождение.
Радуйся, Радосте наша, покрый нас от всякаго зла честным Твоим омофором.
Благодать Божественную испроси нам у Сына Твоего и Бога, простри нам руку помощи на благодеяние. Покрый нас кровом крилу Твоею, отжени от нас всякаго врага и супостата, и умири нашу жизнь, да не погибнем люте, но приими нас в вечная селения, Покровительнице наша, да радующеся Тебе зовем: Аллилуиа.
Поюще Твой державный покров, хвалим Тя вси, яко твердую предстательницу нашу, и покланяемся Тебе, с умилением о нас молящейся. Веруем бо и надеемся, яко испросиши нам благая вечная и временная, имамы бо в Тебе сию надежду: темже освяти, прослави и научи нас всех, вопити Тебе сице:
Радуйся, всего мира светлое хранилище: Радуйся, поднебесным всем ходатаице. Радуйся, всей вселенней крепкое защищение: Радуйся, небесе и земли преславное торжество. Радуйся, потопляемым невлаемое пристанище: Радуйся, пренемогаемым непреодоленная крепосте.
Радуйся, в бранех крепкая поборнице: Радуйся, скорая Помощнице бедствующим. Радуйся, безконечнаго царствия начальнице: Радуйся, всех благих подательнице. Радуйся, вечныя муки потребление: Радуйся, Едина вечнаго моего спасения надеж до и заступление.
Радуйся, Радосте наша, покрый нас от всякаго зла честным Твоим омофором.
О, всепетая Мати, Пречистая Госпоже Дево Богородице: к Тебе возвожду душевныя и телесныя очи, нынешнее приими от мене малое приношение. К Тебе простираю руце оскверненныя, и к Тебе чистей и нескверней голубице от сердца вопию: от всякия мя избави напасти, бед, скорбей, и вечнаго осуждения, и грядущаго изми мучения, и сподоби мя раба Твоего в вечных селениях водворитися, зовуща: Аллилуиа.
МОЛИТВА КО ПРЕСВЯТЕЙ БОГОРОДИЦЕ
Приими, Всеблагомощная, Пречистая Госпоже Владычице Богородительнице, сия честныя дары, Тебе Единей прикладныя от нас недостойных рабов Твоих, от всех родов избранная, всех тварей небесных и земных вышшая явльшаяся. Понеже бо Тебе ради бысть Господь сил с нами, и Тобою