Возсия свет Твой, Христе Боже наш, на седящыя во тьме и сени смертней и во аде сущыя, Тебе взывати не могущыя.
В преисподняя земли снисшед, изведи, Господи, во отраду грехми с Тобою разлученныя, но не отрекшыяся от Тебе чада Твоя, страждут бо л юте, помилуй я:
Согрешиша бо на небо и пред Тобою, безмерно тяжки грехи их, милость же Твоя безмерна есть.
Посети горькую нищету душ от Тебе отдаленных, помилуй, Господи, истину по неведению гнавшыя, буди им любовь Твоя не огнем палящим, но райскою прохладою.
Господи, Любы Неизреченная, помяни усопшыя рабы Твоя.
Помощь подати десницею Своею тщашеся усопшым рабом Своим, явися им, Господи, в видениих таинственных, ясновидно, на молитву их вдохновляя, да поминая отшедшыя, благая дела и подвизи за ня творят, взывая: Аллилуиа.
Церковь Христова вселенская непрестанно ежечасно молитвы за почившыя по всей земли возносит, грехи бо мира Пречистою Кровию Божественнаго венца смываются, от смерти к животу и от земли к небеси души усопшых силою молитв за ня пред олтари Божии.
Буди, Господи, ходатайство Церкви умершим лествицею к небеси:
Помилуй я, Господи, предстательством Пресвятыя Богородицы и всех святых.
Остави им согрешения, верных Твоих ради, день и ночь к Тебе вопиющих.
Незлобивых ради младенцев помилуй, Господи, родителей их, и матерей слезами искупи согрешения чад их.
За молитвы безвинных страдалец, за кровь мученик пощади и помилуй грешницы.
Приими Господи, молитвы наша и милостыни, яко воспоминание добродетелей их.
Господи, Любы Неизреченная, помяни усопшыя рабы Твоя.
Мир весь общая могила священная есть, на всяком бо месте прах отец и братий нашых. Единый неизменно возлюбивый ны, Христе Боже наш, прости вся, еже от начала и до ныне умершыя, да воспоют любовию безмерною: Аллилуиа.
Грядет быти день, яко пещь горящая, день велий и страшный Суда последняго, тайны человеческия открыются, книги совестныя разгнутся… «Примиритеся с Богом! м — вопиет апостол Павел: «Примиритеся прежде того страшнаго дне», — Помози нам, Господи, слезами живых недостающее умерших восполнити.
Да будет им, Господи, звук трубы ангельской спасения благовестием и в час суда Твоего радостнаго помилования их сподоби.
Увенчай, Господи, славою за тя пострадавшыя и покрый благостию Твоею прегрешения немощных.
Господи, вся по имени ведый, помяни во иночестем чине спасавшыяся, помяни благословенныя пастыри со чада их.
Господи, Любы Неизреченная, помяни усопшыя рабы Твоя.
Благословите скоротекущее время. Каждый бо час, мгновение каждое к вечности приближает. Новая скорбь, седина новая суть вестницы мира грядущаго, свидетелие тленности земныя, яко вся мимотечет возвещают, яко Царство вечное приближися, идеже несть ни слез, ни воздыхания, но отрадная пения: Аллилуиа.
Яко древо по времени листвий своих лишается, тако и дние нашы по коликих летех оскудевают. Увядает и юности празднество, светильник радования угасает, близится старости отчуждение. Друзи и сродницы умирают. Где вы юныя ликующыя? Безмолвны гробы их, но душы их в деснице Твоей. Мыслим взоры их из мира невещественнаго.
Господи, Ты еси солнце пресветлое, озари и согрей усопших селения.
Да прейдет навеки горькаго разлучения время.
Сподоби ны радостнаго свидения на небесех.
Сотвори, Господи, да вси едино будем с Тобою.
Возврати, Господи, отшедшим детства чистоту и юности благодушие и праздником Пасхи да будет им живот вечный.
Господи, Любы Неизреченная, помяни усопшыя рабы Твоя.
Проливая тихия слезы на могилах сродников наших, молимся с надеждою и с упованием взываем: Скажи нам, Господи, яко оставил еси грехи их! Даждь о сем откровение таинственное духу нашему, да воспеваем: Аллилуиа.
Весь путь прешедшыя жизни нашея вижу озирался, колико множество людей, от перваго дне и до ныне отшедшия, и мнози их благая ми содеявшыя. Любовию своею должная сим воздавая, вопию Ти:
Сподоби, Господи, славы небесная родители моя и ближняя моя, над ложем моим младенческим бодрствовавшыя, возрастившыя и воспитавшыя мя.
Прослави, Господи, пред Ангелы святыми, всех благовествовавшых ми слово спасения, добру и правде, святым примером жизни своея учившыя мя.
Услади, Господи, тех, иже во дни скорби моея, манною сокровенною послужыша ми.
Вся добродетели и благодетели вознагради и спаси.
Господи, Любы Неизреченная, помяни усопшыя рабы Твоя.
Где ты, смерте жало, где же и мрак и страх твой прежде бывающий? Отныне ты желанная, неразлучно с Богом сочетавши. Покою великий, субботства таинственнаго. Желание имам умрети и со Христом быти, взывает Апостол. Темже и мы, взирая на смерть, яко на стезю к вечней жизни, воззовем: Аллилуиа.
Воскреснут мертвии и востанут сущии во гробех и возвеселятся живущии на земли, яко востанут телеса духовныя, светло прославленныя, нетленныя. Кости сухия, слышыте слово Господне: «Се Аз введу в вас дух живота и дам на вас жилы и возведу на вас плоть и простру по вам кожу». Возстаньте из древле прошедшаго времене, искупленнии кровию Сына Божия, оживлени смертию Его, возсия бо на вы свет воскресения.
Отверзи им, Господи, ныне всю бездну совершенств Твоих.
Ты сиял еси им светом солнца и луны, да узрят они и славу лучезарных ликов ангельских.
Ты услаждал еси я великолепием востока и запада светил небесных, да узрят же они и свет невечерний Божества Твоего.
Господи, Любы Неизреченная, помяни усопшия рабы Твоя.
Плоть и кровь Царствия Божия не наследят, доколе во плоти живем, отлученнии от Христа. Аще же и умрем, но оживем для вечности. Подобает бо тленному телу нашему в нетление облекшись и мертвенному сему безсмертием просияти, дабы во свете невечерняго дне воспети: Аллилуиа.
Чаем сретения со Господем, чаем ясной зари воскресения, чаем пробуждения из гробов сродников наших и знаемых и оживления в благоговейнейшей лепоте жизни умершых. И грядущее преображение всея твари торжествуем и Возсоздателю нашему вопием:
Господи, к торжеству радости и доброте мир создавый, нас к святости из глубины греховныя возставивый, даждь умершым царствовати посреде бытия новаго, да возсияют яко светила на небеси в день славы их.
Да будет им Агнец Божественный светом невечерним.
Даждь, Господи и нам с ними Пасху нетления праздновати.
Соедини умершыя и живыя в нескончаемей радости.
Господи, Любы Неизреченная, помяни усопшыя рабы Твоя.
О, Премилосердный Отче Безначальный, всем хотяй спастися, Сына к погибшим ниспославый и Духа Животворящаго изливаяй! Помилуй, прости и спаси родныя и близкия нам усопшыя и всех от века скончавшихся и предстательством их, посети нас, да вместе с ними вопием Тебе, Спасителю Богу, победную песнь: Аллилуиа.
Боже духов и всякия плоти, смерть поправый и диавола упразднивый, и живот миру Твоему даровавый! Сам, Господи, упокой душы и усопших раб Твоих: святейших патриархов, преосвященных митрополитов, архиепископов и епископов, во священническом церковном и монашеском чине Тебе послуживших; создателей святаго храма сего, православных праотец, отец, братий и сестер, зде и повсюду лежащих; вождей и воинов за веру и отечество живот свой положивших, верных убиенных в междуусобной брани, утонувших, сгоревших, на мразе замерзших, растерзанных зверьми, без покаяния внезапно скончавшихся и не успевших примиритися с Церковью и со своими враги; в изступлении ума самоубиенных, тех, о коих заповедали и просили ны молитися, о коих несть кому молитися и верных, погребения христианскаго лишенных (имя рек) в месте светле, в месте злачне, в месте покойне, отнюдуже отбеже болезнь, печаль и воздыхание. Всякое согрешение, содеянное ими словом или делом или помышлением, яко благий Человеколюбец Бог прости, яко несть человек, иже жив будет и не согрешит. Ты бо еси един кроме греха, правда Твоя — правда во веки, и слово Твое — истина.
Яко Ты еси воскресение, и живот и покой усопшых раб Твоих (имя рек) Христе Боже наш, и Тебе славу возсылаем со безначальным Твоим Отцем, и Пресвятым, и Благим, и Животворящим Твоим Духом, ныне и присно и во веки веков. Аминь.
Часть IV.
Акафист преподобному Сергию игумену Радонежскому, Чудотворцу
Возбранный от Царя сил Господа Иисуса, данный России воевода и чудотворче предивный, преподобный отче Сергие! Прославляюще мы прославльшаго тя славы Господа, благодарственное пение воспеваем ти: ибо молитвами твоими от нашествия иноплеменник и скорбных обстояний нас присно избавлявши, яко имея дерзновение ко Господу, от всяких нас бед свободи, да зовем ти: Радуйся, Сергие, скорый помощниче и преславный чудотворче.
Ангелов Творец, предуведевый, по самовластному чистого сердца твоего изволению, всеусердствующее Его воли исполнение, еще во чреве материи трикратным возглашением, показа тя миру истиннаго служителя быти Святыя Троицы, и научи всех вопити ти сице:
Радуйся, прежде век, яко имаши верный раб Христов быти, предусмотренный:
Радуйся, во оно же время во блаженное и небесное жилище предуставленный.
Радуйся, от чрева материя на службу Небеснаго Царя, яко воин, хотящий верен Ему быти, призванный:
Радуйся, яко благодатию Божиею оправданный.
Радуйся, не точию России, но и всей вселенней прославленный:
Радуйся, трикратным твоим во чреве возглашением родителей и всех удививый.