Радуйся, честная телеса дщерей твоих с радостными слезами погребшая.
Радуйся, три дни гробу их приседевшая и сном смерти о Господе почившая:
Радуйся, аще и не плотию, обаче сердцем за Христа страдавшая.
Радуйся, яко три добродетельныя дщери, сими веру, надежду и любовь к Богу явивши, в дар Пресвятей Троице принесла еси:
Радуйся, яко чадородия ради спаслася еси. Радуйся, дивная мати, благия памяти достойная:
Радуйся, дщери твоя, да кровь свою за Христа пролиют, молившая.
Радуйся, умудряющая ны, да блюдем непреложно добродетели веры, надежды и любве:
Радуйся, Животворящей Троице за ны молящаяся.
Радуйтеся, Веро, Надеждо и Любы купно с Софиею, материю вашею премудрою!
Вси Ангели див ляху ся о страданиих ваших, святыя мученицы, и победу вашу над диаволом торжествующе, душы же ваша к небеси провождающе, воспеваху Христу Богу: Аллилуиа.
Ветии велеречивии вся страдания ваша за Христа не возмогут изрещи, дивящеся же толиким подвигом, во младых летех подъятым, немотствуют. Мы же о честней кончине вашей Бога прославляюще, величаем вас сице:
Радуйтеся, Веро, Надеждо и Любы, поющыя хвалу Богу, на небо небесе возшедшему:
Радуйтеся, щите веры, броне надежды и светилниче любве.
Радуйтеся, зрением пресветлаго лица Божия нас лаждающыяся:
Радуйся, Софие, благочестивыя матери на мудрое воспитание чад их наставляющая.
Радуйтеся, поучающыя ны, да взыщем Господа, и жива будет душа наша:
Радуйтеся, с верою, надеждею и любовию прибегающих к вам теплыя молитвенницы.
Радуйтеся, наказующыя ны, яко вся сладость и прелесть мира сего яко дым изчезает, яко прах от ветра разметается и в персть обращается:
Радуйся, Софие, всем сердцем Господа Бога возлюблыная.
Радуйтеся, аки трие светлии ключи, ко единому Источнику жизни притекшии:
Радуйтеся, аки трие благовоннии цвети, на единей благоплодней ветви прозябшии.
Радуйтеся, аки три зерцала, безпредельную красоту Божию в себе отражающая:
Радуйся, Софие, аки маслина, три ветви, отягченныя изобильными плоды даров Божиих, произрастшая.
Радуйтеся, Веро, Надеждо и Любы, купно с Софиею, материю вашею премудрою!
Спасти хотяща душы своя святыя мученицы, любве ради Христовы ласкания царева богатства мира сего тленнаго презреша и радостно кончину мученическую за Христа прияша, поюща Ему: Аллилуиа.
Стенами веры, надежды и любве являются святыя мученицы всем, прибегающым к ним с теплою и усердною молитвою, и сице в печалех и напастех к ним взывающым:
Радуйтеся, язв греховных добрыя целительницы: Радуйтеся, во тме печали нашея светом упования ны озаряющыя.
Радуйтеся, посреде напастей и скорбей дивный покой нам посылающыя:
Радуйся, Софие, о нас, в злостраданиих поверженных, мудрое попечение являющая.
Радуйся, Веро, крест спасения пред нами воздвизающая:
Радуйся, немощи наша по молитвам к тебе изцеляющая.
Радуйся, Надеждо, якорь избавления нам подающая:
Радуйся, уныние сердец наших благостно отъем лющая.
Радуйся, Любы, твоим ко Господу ходатайством в злей напасти от нечаянныя смерти ны ограждающая:
Радуйся, изнемогающыя силы наша на бодрость возставляющая.
Радуйся, Софие, прилежная о нас к Богу молитвеннице:
Радуйся, в добрых делех наших мудрая наставнице.
Радуйтеся, Веро, Надеждо и Любы, купно с Софиею, материю вашею премудрою!
Пение сие похвальное, аще бы и тмочисленное приношахом вам святыя мученицы, не бы довлело ко прославлению добродетелей и подвигов ваших: обаче хвалу Богу возсылающе за вся, яже во святых Своих нам являет, Тому поем: Аллилуиа.
Светом небесным пред Господем горящым свещам подобны являются Вера, Надежда и Любы, купно с материю их Софиею, к нимже припадаем, моляще, да просветят ны, омраченныя печальми и из глубины сердец зовущыя:
Радуйтеся, ризы ваша в крови Агнчей на земли убелившыя:
Радуйтеся, живота вечнаго нам ходатаицы. Радуйтеся, душ, ищущих покоя в милосердии Божии, утверждение и хранение:
Радуйся, Софие, от суеты мирския ны ограждающая.
Радуйся, Веро, доброценная кадилнице, фимиам хвалы Богу возносящая:
Радуйся, нас грешных верою просвещающая. Радуйся, Надеждо, в скорби утешение и прибежище наше:
Радуйся, в печалех наших лучезарная вестнице избавления.
Радуйся, Любы, незлобие и кротость в сердца наша вливающая:
Радуйся, таинственная звездо, от тесноты земныя горе ны возносящая.
Радуйся, Софие, мудрая и пречестная детоводителнице:
Радуйся, Богомудраго жития молящимся ти устроителнице.
Радуйтеся, Веро, Надеждо и Любы, купно с Софиею, материю вашею премудрою!
Благодать Божию прияти сподобившыяся молите о нас, мвятыя мученицы, Пречистаго Владыку Христа, да милостив будет к нам грешным, с верою, надеждею и любовию Ему Единому, Господу и Спасу нашему, смиренно поющым: Аллилуиа.
Поем ваша крепкия подвиги, верою, надеждею и любовию проникновенныя, почитаем страдания ваша презельная, хвалим дивное терпение ваше, ублажаем кончину, за Христа вами радостно подъятую, величаем необоримое мужество ваше, святыя мученицы Веро, Надеждо и Любы, и мудрая мати Софие, и прославляюще вас, взываем сице:
Радуйтеся, аки три струи молниины, от восток
даже до запад добродетельми своими просиявшыя: Радуйтеся, фиали веры, надежды и любве, животворным питием душы наша напаяющии.
Радуйтеся, трие светозарнии путие, ко престолу славы Господни нас ведущии:
Радуйся, Софие, чад ради твоих от лика святых похваленная.
Радуйся, Веро, цвете веры, паче снега белейший:
Радуйся, услаждение страждущих. Радуйся, Надеждо, угнетенных сердец возношение:
Радуйся, аки поток цельбоносный, жажду скорбящих душ утоляющая.
Радуйся, Любы, венче, из мира, радования и благости соплетенный:
Радуйся, умная зарнице вечности. Радуйся, Софие, жезле силы, кротце и мудре чада наказуяй:
Радуйся, Боговедения пресветлая луче, душам нашым возсиявающая.
Радуйтеся, Веро, Надеждо и Любы, купно с Софиею, материю вашею премудрою!
О, святыя и достохвальныя мученицы, Веро, Надеждо и Любы, и мудрая мати Софие, ныне приемша малое сие моление наше, от всяких ны бед, болезней и скорбей молитвами вашими избавите, да сподобившеся во Царствии Небесном зрети безсмертнаго Господа Иисуса, с вами вкупе воспоем Ему: Аллилуиа.
О, святыя и достохвальныя мученицы Веро, Надеждо и Любы, и доблестных дщерей мудрая мати Софие, к вам ныне притецем со усердною молитвою, что бо паче возможет предстательствовати за ны пред Господем, аще не вера, надежда и любы, три сия краеугольныя добродетели, в нихже образ нареченныя, самою вещию тыя явисте! Умолите Господа, да в скорбех и напастех неизреченною благодатию Своею покрыет ны, спасет и сохранит, яко благ есть и Человеколюбец. Того славу, яко солнце незаходимое, ныне зряща светолепну, споспешствуйте нам во смиренных молениих наших, да простит Господь Бог грехи и беззакония наша, и да помилует нас грешных и недостойных щедрот Его. Молите убо о нас, святыя мученицы, Господа нашего Иисуса Христа, Емуже славу возсылаем со Безначалным Его Отцем и Пресвятым и Благим и Животворящим Его Духом, ныне и присно и во веки веков. Аминь.
Акафист Святой великомученице Варваре
Избранной Богом от идолослужительнаго рода, и призванной во язык свят, в люди обновления, невесте Христовой, яко избавляющийся тобою от различных зол и обстояния, благодарственная пения и хваления восписуем ти, молитвенницы твои, святая и всехвальная великомученице: ты же, имущи дерзновение ко Господу, от всяких нас бед свободи, да с радостию зовем ти: Радуйся, Варваро, невесто Христова прекрасная.
Ангелом честную и вселюбезную чистоту непорочно сохраниши, честная Варваро, Ангелом сожительница быти сподобилася еси: с нимиже егда поеши троическую песнь Богу на небеси, услыши нас поющих тебе на земли похвальная пения сия:
Радуйся, отроковице, Богом Отцем предуставленная быти сообразна в страдании образу Сына
Его:
Радуйся, Сыном Божиим, Светом от света, призванная из тмы в чудный свет веры и благодати Его.
Радуйся, яко позвавшему тя Святому Духу, и сама телом и духом свята еси:
Радуйся, рожденному от Девы Жениху Христу, деву тя чистую обручившая:
Радуйся, земнаго обручника паче небеснаго знати не восхотевшая.
Радуйся, крине девства, посреде терния идольскаго прорастший доле:
Радуйся, цвете чистоты, в неувядаемой славе цветущей горе.
Радуйся, в небесном вертограде Христова благоухания наслаждающаяся:
Радуйся, краснейшаго паче сынов человеческих зрением тамо утешающаяся.
Радуйся, убелившая ризы твоя в крови агнчей на земли:
Радуйся, в лице девственном последующая Божиему Агнцу на небеси.
Радуйся, Варваро, невесто Христова прекрасная.
Видяще святая Варвара себе на высоком столпе от отца постав лену, помышляше себе манием Божиим к небеси быти возводиму: разумная убо восхождения в сердце своем положши, теми от тмы ко свету, и от прелестных идолов ко истинному Богу у мне восхождаше, поюще Ему: Аллилуиа.
Разум неразуменный о Едином, всея твари Творце, разумети дева святая Варвара ищущи, беседоваше со своим си разумом, глаголя: от темных кумиров чудным светилам небесным како бе создатися мощно, рцы ми; к нейже он со псаломником рече: вси бози язык — бесове, Един же есть Бог и Господь, иже небеса и вся светила их сотвори. Таковому твоему, мудрая дево, разуму дивящеся, глаголем:
Радуйся, паче старец идолослужительных разумнейшая: