Битва на Калке стала прологом почти 300-летнего ордынского ига. Но волей судьбы именно в этих местах, на Калке, спустя полтора столетия потерпел окончательное поражение всесильный темник Мамай, бежавший сюда после Куликовской битвы в надежде собрать новое войско для похода на Русь. Действительно, история повторяется. И об этом не стоит забывать в Киеве.
Приложения
[С. 61] «В лѣто 6732 […] Том же лѣтѣ, по грѣхомъ нашимъ, придоша языци незнаеми, ихъ же добрѣ никто же не вѣсть, кто суть и отколе изидоша, и что за языкъ ихъ, и котораго племени суть, и что вѣра ихъ; а зовуть я Татары, а инии глаголють Таурмены, а друзии Печенѣзи; инии же глаголють, яко се суть, о них же Мефодии, Патомьскыи епископъ, съвѣдѣтельствуеть, яко си суть ишли ис пустыня Етриевьскыя, суще межи въстокомь и сѣверомъ. Тако бо Мефодии глаголеть, яко скончанию врѣменъ явитися тѣмъ, яже загна Гедеонъ, и поплѣнять всю земьлю от въстокъ до Ефранта и от Тигръ до Поньскаго моря, кромє Ефиопия. Богъ единъ [С. 62] вѣсть, кто суть и отколѣ изидоша; прѣмудрии мужи вѣдять я добрѣ, кто книгы разумѣеть; мы же ихъ не вѣмы, кто суть; нъ сде въписахомъ о нихъ памяти ради рускыхъ князь и бѣды, яже бысть от нихъ имъ. Слышахомъ бо, яко многы страны поплѣниша, Ясы, Обезы, Касогы и Половьчь безбожьныхъ множьство избиша, а инѣхъ загнаша, и тако измроша убиваеми гнѣвомь божиемь и пречистыя его матере; много бо зла створиша ти оканьнии Половчи Русьскои земли, того ради всемилостивыи богъ хотя погубити безбожныя сыны Измаиловы Куманы, яко да отмьстять кръвь крестьяньску, еже и бысть над ними безаконьными. Проидоша бо ти Таурмени всю страну Куманьску и придоша близъ Руси, идеже зоветься валъ Половьчьскы. И прибегоша оканьнии Половчи, избьеныхъ избытъкъ, Котянь с ынѣми князи, а Данилъ Кобяковиць и Гюрги убьена быста, с нимь множьство Половьчь; сь же Котянь бѣ тьсть Мьстиславу Галицьскому. И приде съ поклономь съ князи
Половьцьскыми къ зяти въ Галичь къ Мьстиславу и къ всемъ княземъ русьскымъ, и дары принесе многы: кони и вельблуды и буволы и дѣвкы, и одариша князь русьскыхъ, а рекуче тако: „нашю землю днесь отъяли, а ваша заутро възята будеть“; и възмолися Котянь зяти своему. Мьстислав же поця молитися княземъ русьскымъ, братьи своеи, рекя тако: „оже мы, братье, симъ не поможемъ, тъ си имуть придатися к нимъ, тъ онѣмъ больши будеть сила“. И тако думавъше много о собе, яшася по путь, и поклона дѣля и молбы князь половьчьскыхъ. И начаша вое пристраивати, кожьдо свою власть; и поидоша, съвъкупивъше землю всю Рускую противу Татаромъ, и быша на Днѣпрѣ на Зарубе. Тъгда же увѣдавше Татари, оже идуть русстии князи противу имъ, и прислаша послы, къ русскымъ княземъ: „се слышимъ оже идете противу насъ, послушавше Половьць; а мы вашеи земли не заяхомъ, ни городъ вашихъ, ни селъ вашихъ, ни на васъ придохомъ, нъ придохомъ богомъ пущени на холопы и на конюси свое на поганыя Половче; а вы възмите с нами миръ; аже выбежать къ вамъ, а биите ихъ оттолѣ, а товары емлите к собе: занеже слышахомъ, яко и вамъ много зла створиша; того же дѣля и мы биемъ“. Того же русстии князи не послушаша, нъ послы избиша, а сами поидоша противу имъ; и не дошьдъше Ольшья, и сташа на Днѣпрѣ. И прислаша к нимъ второе послы Татари, рекуще так: „а есте послушали Половьчь, а послы наша есте избили, а идете противу нас, тъ вы поидите; а мы васъ не заяли, да всѣмъ богъ“; и отпустиша прочь послы ихъ. Тъгъда же [С. 63] Мьстислав перебродяся Днѣпрь, прѣиде в 1000 вои на сторожи татарьскыя, и победи я, а прокъ ихъ въбѣже съ воеводою своимь Гемябѣгомь въ курганъ Половьчьскыи, и ту имъ не бы мочи, и погрѣбоша воеводу своего Гемябега жива въ земли, хотяще животъ его ублюсти; и ту и налезоша, испросивъше Половьци у Мьстислава, и убиша и. Слышавъше же то князи русстии, поидоша за Днѣпрь и поидоша вси въкупѣ, по нихъ же идоша 9 днии, и заидоша за Калакъ рѣку, и послаша въ сторожихъ Яруна с Половьци, а сами станомь сташа ту. Тъгда же Ярунъ съступися с ними, хотя битися, и побегоша не успѣвъше ничтоже Половци назадъ, и потъпташа бежаще станы русскыхъ князь, не успѣша бо исполчитися противу имъ; и съмятошася вся, и бысть сѣця зла и люта. Мьстиславъ же, Кыевьскыи князь, видя се зло, не движеся съ мѣста никамо же; сталъ бо бѣ на горѣ надъ рѣкою надъ Калкомъ, бѣ бо мѣсто то камянисто, и ту угоши городъ около себе въ колехъ, и бися с ними из города того по 3 дни. Ини же Татари поидоша по русскыхъ князихъ, бьюче до Днѣпря; а у города того оста 2 воеводѣ Цьгырканъ и Тешюканъ на Мьстислава и на зяти его на Андрѣя и на Ольксандра Дубровьцьскаго: беста бо 2 князя съ Мьстиславом. Ту же и бродници съ Татары быша, и воевода Плоскына, и тъ оканьныи воевода цѣловавъ крестъ честьныи къ Мьстиславу и къ обѣма князема, око ихъ не избити, нъ пустити ихъ на искупъ, и сълга оканьныи: прѣда ихъ, извязавъ, Татаромъ; а городъ възяшь, и люди исѣкоша, и ту костью падоша; а князи имъше, издавиша, подъкладъше подъ дъскы, а сами вѣрху сѣдоша обѣдати, и тако животъ ихъ концяша. А иныхъ князь до Днѣпрѣ гоняче, убиша 6: Святослава Яневьскаго, Изяслава Ингворовиця, Святослава Шюмьскаго, Мьстислава Церниговьскаго съ сыномь, Гюргя Невѣжьскаго. Тъгда же Мьстислав Мьстислалиць преже перебегъ Днѣпрь, отрѣя от берега лодье, да не идуть Татари по нихъ, а самъ одва убежа; а прочии вои десятыи приде кождо въ свояси; а иныхъ Половци побиша ис коня, а иного ис порта. И тако за грѣхы наша богъ въложи недоумение въ нас, и погыбе много бещисла людии; и бысть въпль и плачь и печяль по городомъ и по селомъ. Си же злоба сътворися мѣсяця маия въ 31, на святого Ерѣмья. Татари же възвратишася от рѣкы Днѣпря; и не съвѣдаемъ, откуду суть пришли и кдѣ ся дѣша опять: богъ вѣсть, отколе приде на нас за грѣхы наша».
Список второй половины XIII в.
[Стб. 445] «В лѣто 6731 […] Того же лѣта. Явишася языци. ихже никтоже добрѣ ясно не вѣсть кто суть и отколѣ изидоша. и что языкъ ихъ. и которого племени суть. и что вѣра ихъ. и зовуть я Татары. а инии глаголють Таумены. а друзии Печенѣзи. ини глаголють яко [Стб. 446] се суть о нихже Мефодии Патомьскыи епископъ свѣдѣтельствует. яко си суть ишли ис пустыня Етриевьскы суще межю встоком и сѣвером. тако бо Мефодии рече. яко къ скончанью временъ явитися тѣм. яже загна Гедеонъ. и поплѣнять всю землю. от встока до Ефранта. и от Тигръ до Понетьскаго моря. кромѣ Ефиопыя. Бог же един вѣсть ихъ кто суть и отколѣ изидоша. премудрии мужи вѣдять я. добрѣ кто книгы разумно умѣеть. мы же их не вѣмы кто суть. но сдѣ вписахом о них памати ради. Русскых князии бѣды. яже бысть от них. и мы слышахом яко многы страны поплѣниша. Ясы. Обезы. Касогы. и Половець безбожных множство избиша. а инѣхъ загнаша. и тако измроша оубиваеми гнѣвом Божьимь. и пречистыя его Матере. много бо зла створиша ти оканнии Половци Рускои земли. того ради всемилостивыи Бог хотя погубити. и наказати безбожныя сыны Измаиловы Куманы. яко да отмьстять кровь хрыстияньску. еже и бысть над ними безаконьными. придоша бо ти Таурмению всю страну Куманьску. и придоша близь Руси. идеже зовется валъ Половечьскыи. и слышавше я Русстии князи. Мстиславъ Кыевськыи. и Мстиславъ Торопичскыи. и Черниговьскыи и прочии князи. здумаша итии на ня. мняще яко ти поидуть к ним. и послашася в Володимерь к великому князю Юргю. сыну Всеволожю. прося помочи у него он же посла к ним благочестиваго князя Василька сыновца своего. Костянтиновича с Ростовци. и не оутяну Василко прити к ним в Русь. А князи Русстии идоша и бишася с ними. и побѣжени быша от них. и мало ихъ избы от смерти. ихже остави судъ жити. то ти оубѣжаша. а прочии избьени быша. Мьстиславъ старыи добрыи князь ту оубьен бысть. и другыи Мстиславъ. и инѣх князии 7 избьено бысть. а боляръ и прочих вои много множство. глаголю бо тако яко-Кыянъ [Стб. 447] одинѣх изгыбло на полку том 10 тысячь. и бысть плачь и туга в Руси. и по всеи земли. слышавшим сию бѣду. се же ся зло сключи. месяца. мая. въ. 30. на память святаго мученика Еремиа. Се же слышавъ Василко приключьшееся в Руси възвратися от Чернигова схраненъ Богомъ и силою креста честнаго и молитвою отца своего Костянтина и стрыя своего Георгия и вниде в свои Ростовъ славя Бога и святую Богородицу».
Список 1377 г.
* При изучении летописей чаще всего пользуются не оригиналом, а уже переложенным в печатный вариант древнерусским текстом с разбивкой предложений, слов по смыслу и установкой знаков препинания согласно современным правилам. В этом случае печатный вариант отличается от оригинала летописи. Поэтому наиболее ранние из сохранившихся — Лаврентьевскую и Ипатьевскую летописи — публикуют в соответствии с принятой тогда грамматикой, то есть без знаков препинания и разделительных промежутков между словами и предложениями. В некоторых случаях для выделения смыслового значения отдельного отрезка текста использовались точка или три точки, проставленные по центру между буквами.
[Стб. 740] «Въ лѣто 6732. Приде неслыханая рать. безбожнии Моавитяне. рекомыи Татаръве. придоша на землю Половецькоую. Половцемь же ставшимъ. Юргии Кончакович бѣ болиише всихъ Половець. не може стати. противоу лицю их бѣгающи же емоу. и мнози избьени быша. до рѣкы Днепра Татаром же возвратившися идоша в вежа своя. прибѣгшимъ же Половцемь в Роускоую землю. глаголющимъ же имъ. Роускимъ княземь. аще не поможе[Стб. 741]та намъ. мы ныне исѣчени быхомъ. а вы наоутрѣе исѣчени боудете. бывшю же свѣтоу. всих князѣи. во градѣ Кыевѣ. створиша свѣтъ сице. лоуче ны бы есть прияти я на чюжеи землѣ. нежели на своеи. Тогда бо бѣахоуть. Мьстиславъ Романовичь в Кыевѣ. а Мьстиславъ в Козельскѣ и в Черниговѣ. а Мьстиславъ Мьстиславичь. в Галичѣ. то бо бѣахоу старѣишины в Роускои земли. Юрья же князя великого Соуждальского. не бы в томъ свѣтѣ. се же паки млади князи. Данилъ Романовичь. Михаилъ Всеволодичь Всеволодъ Мьстиславичь. Кыевьскыи. инии мнозии князи. тогда же великыи князь Половецкыи крестися Басты. Василка же не бѣ. бѣ бо в Володимерѣ млад. оттоудоу же придоша месяца априля. и пріидоша к рѣцѣ Днѣпроу. ко островоу Варяжьскомоу. и приѣха тоу к нимъ. вся земля Половецкая. и Черьниговцемь приѣхавшимъ. и Кияномъ и Смолняномъ. инѣм странамъ. вся намъ по соухоу же Днѣпръ перешедшимъ. яко же покрыти водѣ быти. от множества людии. а Галичане и Волынци. киждо со своими князьми. а Коуряне и Троуб[Стб. 742]чане и Поутивлици. и киждо со своими