вичь, князь Михаило Всеволодичь, князь Всеволодъ Мьстиславичь киевьскыи и инии мнози князи. Тогда же князь половетьскыи кр(е)стися Басты. [Стб. 278] Василка же не бѣ в Володимерѣ, млад. И совокупивше землю Рускую всю противу татаромъ, и приидоша къ рецѣ Днѣпру на зарубъ къ острову Варежескому. Тогда увѣдавше татарове, что идуть князи рустии противу имъ, и прислаша послы къ княземъ рускым: „Се слышымъ, оже противу намъ идете, послушавше половець. А мы вашеи земли не заяхомъ, ни городовъ ваших, ни селъ, ни на вас приидохомъ, но приидохомъ, б(о)гомъ попущени, на холопы наши и на конюси свои, на поганыя половци. А възмите с нами миръ, а намъ с вами рати нѣту. Оже бѣжать к вамъ половци, а вы беити оттоле, а товаръ емлите себѣ, занеже слышахомъ, яко и вамъ много зла творять. Того же ради мы ихъ отселе бьемъ“. Князи ж(е) рустии того не послушааше и послы татарьскыя избиша, а сами поидоша противу имъ, и не дошедше Олешья, и сташа на Днѣпрѣ. И прислаша татарове второе послы, гл(аголю)ще: „Аще есте послушали половець, а послы наши есте избили, а идете противу намъ, то вы поидете, а мы вас не заимаемъ ничимъ, то всѣмъ намъ б(о)гъ“. И отпустиша послы ихъ. И прииде ту вся земля Половетьская и вси ихъ князи, а ис Киева князь Мьстислав съ всею силою, а из Галича князь Мстислав съ всею силою, Володимеръ Рюриковичь с черниговци, и вси князи рустии, и вси князи черниговьскыи, а из Смоленьска нарубъ 400 муж и инѣм странамъ. Тогда же князь Мьстиславъ галицькии перебродися Днѣпръ в 1000 мужь на сторожи татарьскыя и побѣди я, а останокъ ихъ побѣже с воеводою с Гемябѣком. И ту имъ не бѣ помощи, и погребоша воеводу своего Семябѣга жива в [Ст. 279] землю, хотяще жива ублюсти. И ту наидоша его, и испросиша и половци, и убиша и его. Слышавше же се князи рустии, поидоша вси за Днѣпръ на множествѣ людеи, а галичане и волынци кииждо съ своими князьми, а куряне и трубчане, и путивлици кииждо съ своими князьми. И приидоша кънми, а выгоньци галическии приѣхаша в лодьяхъ по Днѣпру и поидоша в море, бѣ бо лодии 1000. И поидоша в рѣку Днѣпръ, и възведоша пороги, и сташа у реки Хортици на бродѣ, на протолъчии. Бѣ бо с ними Домамеричь Юрьи, Дръжикраи Володиславичь. Пришедше вѣсти въ станы, яко пришли суть предъвидѣти, оляди рускыя. Слышав же Д(а)в(ы)дъ Романовичь и гнавъ, всѣд на кони, и сущии с нимъ коньници, и инии мнозии князи с нимъ гнаша видѣти рати. Онѣмъ же отшедшемъ, Юрьи же имъ сказавше, яко стрѣлци суть. Инии же молвяху, яко простии люди суть, пуще и половець. Юрьи же Домамеричь молвяше: „Ратници суть и добрая вои“. Приѣхавше, сказаша Мьстиславу, Юрьи же все сказа. И рекшимъ молодымъ княземъ: „Мьстиславе, и другыи Мьстиславе! Не стоита, поидемъ противу имъ“. Преидоша ж(е) вси люди, князи вси и Мстиславъ Черниговскыи рѣку Днѣпръ, и поидоша на конех въ поле половецкое. И устрѣтоша татарове полки руския, и стрѣлци же руския побѣдиша ихъ, и гнаша в поле далече, сѣкущи я, и взяша скоты ихъ, а съ стады утекоша, яко всим воемъ наполнитися скотом. И оттуда же идоша по нихъ 8 дни [Стб. 280] до рѣки Калки, и ту устрѣтоша сторожеве татарове, и удариша на полци руския. Сторожем же бившимся с полки рускими, и убиенъ быс(ть) ту Иоан Дмитреевич и иная 2 с нимъ. Тат(а)ром же от(ъ)ехавшимъ на прочнѣ рѣцѣ Калецѣ, устрѣтоша татарове половецкыя полки и рускии. Князь же Мьстиславъ Мьстиславич повелѣ предии переити рѣку Калку Данилови с полкы и инѣмъ полкомъ с нимъ, а самъ по нихъ переиде. И заидоша за рѣку за Калку, и послаша въ сторожехъ Яруна с полци, с половци, и сами станомъ сташа ту, а князь Мьстиславъ сам ѣха въборзѣ послѣ. Видѣвши же ему полки татарьския, приехавъ, реч(е): „Въружитися!“ Повелѣ вборзѣ, а князю Мьстиславу и другому Мьстиславу, сѣдящама има въ стану, невѣдущима. Мьстиславъ же не повѣда има завѣсти ради, бѣ бо котора межди ихъ велика. Сразившим- 174 ся полкомъ на мѣсто, Данилъ же выѣха напередъ и Семьюнъ Олюевичь, и Василко Гавриловичь, и разишася в полкы татарьскыя. Василкови же сбодену бывшу, а Данилу бодену бывшу в перси и младеньству ради и буести не чюяше раны, бывши на телеси его, бѣ бо възрастомъ 18 лет, бѣ бо силенъ, Данилови же крѣпко избивающе татары. Видѣвъ то Мьстиславъ Нѣмыи, мнѣвъ, яко Данилъ збоден быс(ть), и потече и самъ вне. Бѣ бо мужь тои крѣпокъ, понеже ужика сы Роману от племени Володимеря, прирокомъ Манамаха. Бѣ бо велику любовь имѣя къ о(т)цю его, ему ж(е) поручивши по см(е)рти свою [Стб. 281] волость, дая князю Данилови. Татаром же бѣгающимъ, Данилови же избивающи я своимъ полком, и Олгови Курьскому крѣпко бьющеся, тогда же Ярунъ и инии полци половецьстии ступишася с ними, хотяще битися. И полоци побѣгоша, и потопташа, бѣжаща, станы рускых князь, а князи не успѣша ополчитися противу имъ, и смятошася вси полци рустии, и быс(ть) сѣча зла и люта. Грѣх ради нашихъ рускымъ полком побѣженымъ бывшимъ, Данил же видѣвъ, яко крѣпчая брань татарьская належить, и обрати конь свои, бѣжа от устремления противных. И вжада воды, и пии, и почюти рану на телеси своемъ. Въ брани не позна ея крѣпости ради мужества възрастаѣ своего, бѣ бо дръзъ и храбръ, от главы и до ногу его не бѣ на немъ порока. И быс(ть) побѣда на вси князи рустии, ака же не бывала от начала Рускои земли никогда же. Сам бо великии князь Мьстиславъ киевьскыи, видя се зло, не движеся никако же с мѣста, стал бо бѣ на горѣ надъ рѣкою Калкою, бѣ бо мѣсто каменисто, и туто учиниша городъ с кольемъ, и бися с ними из града по 3 дни, а ини же татарове поидоша послѣ рускыхъ князеи, бьюще ихъ и до Днѣпра, а у города осталися два воеводы, Чегирканъ и Тешуканъ, на князя Мьстислава и на зятя его Андрѣя и Александра дубравьскаго. Бѣста бо ту два князя съ Мьстиславомъ, ту ж(е) и бродницы быша старые, и воевода ихъ Плоскина. И тъи окаанныи, целовавъ кр(е)стъ къ князю Мьстиславу и обѣма князема, како ихъ не избити и пустити ихъ на искупъ, и солгавъ окаанныи, предасть ихъ, связавъ, татаромъ, а городъ взяша, а люди посѣкоша, а князеи има и зда[Стб. 282]виша, и подкладше под дъскы, а сами верху сѣдоша обѣдати, и тако князи животъ свои скончаша, и много убииство бесчисленное створися. А иных князеи, гонячи до Днѣпра, 6 убиша: князя Мьстислава яневьскаго, 175 Изя слава инговорьскаго, С(вя)тослава шумьскаго, Мьстислава черниговьскаго съ с(ы)номъ, Юрья несвѣжскаго. А иного воя когождо десятыи прииде. И Александръ Поповичь ту убиенъ быс(ть) с инѣми 70 храбровъ. И тогда же князь Мьстиславъ Мьстиславичь преди перебѣже Днѣпръ, и прииде к лодиямъ, повелѣ жещи я, а иныя сѣщи и отринути от брега, бояся по себѣ погони от татаръ, а самъ едва убѣжа в Галичь. А молодыи князи прибѣжали в малѣх людии, а князь Володимеръ Рюриковичь прибѣже в Киевъ и сѣде на столѣ. Сии же злоба створися от татаръ м(е)с(я)ца июня въ 16 д(е)нь. Татаромъ же побѣдившимъ рускыя князи за прегрѣшение хр(и)стьяньское. И дошедъшимъ татаромъ до Новагорода С(вя)тополчьскаго, не вѣдущим же Руси льсти татарьскыя, исходяаху противу имъ съ кр(е)сты, они же избиша вся. И ожидааше б(о)гъ покаяния хр(и)стияньскаго, и обрати татаръ въспять от рѣкы Днѣпра на землю въсточьную, и повоеваша землю Тагоньскую и ины страны. Тогда же и Чагонизъ канъ ихъ убьенъ быс(ть). Се же быс(ть) намъ за грѣы наша, б(о)гъ вложи недоумѣние в нас, и погыбе бес числа много люди, и быс(ть) вопль, и въздыхание, и печаль по всѣмъ градомъ и по волостемъ. Сих же злых татаръ таурменъ не свѣдаемъ, откуду были пришли на нас и гдѣ ся дѣли опять, толко б(о)гъ вѣсть».
Список второй половины 70-х — начала 80-х гг. XV в.
«Въ лѣто 6733… [С. 89]
* О Кальскомъ побоищи.
Того же лѣта по грѣхомъ по нашимъ пріидоша языци незнаеми безбожніи Амовитеня, рекоміи Татари, ихже извѣстно никтоже вѣсть кто суть, и откуду пріидоша, и что языкъ ихъ, вѣра же ихъ, и Таурмены зовутся, а друзіи Печенѣзи, иніи же глаголютъ, яко сіи суть, о нихъ же Мефодій, епископъ Патарскій, свидѣтелствуетъ, яко вышли суть изъ пустыни Евтріийскіа, сущи межъ востока и сѣвера, идѣже Геонъ; а явитися имъ въ скончаніи лѣтъ и времянъ, и поплѣнять всю землю отъ востока до Ефрата и отъ Тигра до Понтьскаго моря, кроме Ефіопіи.
Слышахомъ же о сихъ, яко многи страны поплѣниша: Ясы, Обязы, Касаги,
* В списках: Акад. XIV, Обол., Акад. XV, Арх. II, Пуб. (Строг.) и Троицк. III.
** О Калкахъ, о избіеніи Русскихъ князей.
Того же лѣта по грѣхомъ нашимъ пріидоша язы цы незнаеми, при великомъ князи Кіевъскомъ Мстиславѣ Романовичѣ, вну цѣ Ростиславлѣ Мстиславичя, пріидоша бо неслыханніи безбожніи Моавитяне, рекоміи Татарове, ихъ же добрѣ ясно никто же свѣсть, кто суть, и откуду пріидоша, и что языкъ ихъ, и которого племени суть, и что вѣра ихъ, зовутъ же я Татары, а иніи глаголютъ Таурмены, а друзіи Печенѣзи, иніи же глаголютъ яко си суть, о нихъ же Мефодій, епископъ Патаромскый, свѣдѣтельствуетъ, яко сіи суть вышли ис пустыня Етривскыа, сущіи межу въстокомъ и сѣверомъ, къ скончанію времени явитися имъ, ихъ же загна Гедеонъ, и по плѣнятъ всю землю отъ востока и до Ефрата и отъ Тигръ до Понтьскаго моря, кроме Ефіопіа. Про сихъ же слышахомъ, яко мнози страны поплѣниша: Ясы, Обезы и Касогы,
** В списке Пуб. VI (Лаптев.).
и пріидоша на землю Половетцкую; Половци же не могоша противитися, бѣжаша, а иніи изъбіени быша, а иніи загнани быша по Дону въ луку моря, и тамо изомроша, а иныхъ гониша до рѣки Днѣпра; а Котякъ князь Половецкій со инѣми князи прибѣже, идѣже зовется валъ Половецкій, а Данило Кобяковичь и Юрьи Кончяковичь убіени быша. И иде Котякъ къ зятю своему ко князю Мстиславу Мстиславичю Галичскому, и принесе дары многи: кони, и верблуды, буволы и прочаа, и одари всѣхъ князеи Русскихъ, кланяяся имъ, глаголя: „днесь землю нашу отняли Татари, а вашу заутра пришедъ возмуть, и мы сіа возвѣстихомъ вамъ, и вы сицевая разумѣвше помозите намъ“. Мстиславъ же Мстиславичь Галичскій посла къ братьи своей, глаголя: „поможемъ симъ; аще ли сіи со онѣми сложатся, то намъ будетъ тяготнѣе“. [С. 80]