итися Котякъ зятю своему о пособіи, а Мстиславъ нача мо[С. 130]литися братіи своей, княземъ Рускымъ, река: „аще мы, братіе, симъ не поможемь, то предатся имъ же, да болши будетъ сила ихъ“; и тако думавше много, и яшася пособити Котяню, слушающе моленіа Половецкых князей. Бывшу же совѣту всѣхъ князей во граде Кіевѣ, сотвориша сице совѣтъ: „лучше бы намъ срѣсти ихъ на чюжей земли, нежели на своей“; и начаша вои строити, кійждо свою власть. Тогда бѣ въ Кіевѣ князь Мстиславъ, сынъ Романовъ Ростиславича, а въ Чръниговѣ Мстислав Святославичь Козельскій, а въ Галичѣ Мстиславъ Мстиславичь, ти бо бяху старѣйшіи въ Руской земли, князя же великого Юрья Всеволодича Суздальскаго въ томъ совѣтѣ не было; съ ними же князи молодіи: князь Данило Романовичь сынъ Мстиславича, князь Михайло Всеволодичь Чръниговьскій внукъ Святослава Олговича, князь Всеволодъ сынъ Мстислава Кіевьскаго, и иніи князи мнози; тогда князь великій Половецкій крестися Басты, а Василка же не бѣ, въ Володимери младъ. И съвокупиша землю Руськую всю противу Татаромъ, и пріидоша къ рѣцѣ Днѣпру на Зарубъ ко острову Варяжьскому. Увѣдаша же Татарове, яко идутъ князи Рустіи противу имь, и послаша послы ко княземь Рускымъ, ркуще: „се слышимъ, оже противу насъ идете, послушавше Половець, а мы вашей земли не заяхомъ, ни городовъ вашихъ, ни селъ, ни на васъ пріидохомъ; но пріидохомъ, Богомъ попущени, на холопы наша и на конюси своя, на поганыа Половци, а вы возмите съ нами миръ, зане рати съ вами намъ нѣтъ; а аще побѣжать къ вамъ Половци, а вы ихъ бейте отъ себе, а товаръ емлите себѣ, слышахомь бо яко много зла и вамъ творятъ, того деля мы ихъ отъ себе бьемь“. Князи же Рустіи того не послушаше, но и послы Татарьскіа избиша, а сами поидоша противу; и не дошедше Ошелья, сташа на Днѣпрѣ. И послаша Татарове другия послы, глаголюще: „аще есте послушали Половець и послы есте наши избили, а идете противу намь, то вы поидите; а мы васъ не замали ничемъ, а всѣмъ намъ Богъ“; и отпустиша послы ихъ. И пріиде же ту вся земля Половецкаа и вси князи, а изъ Кіева князь Мстиславъ со всею силою, а Володимеръ Рюриковичь со Смолняны, и вси князи Рустіи, и вси князи Чръниговьстіи, и Смолняне и иніи страны. Тогда же князь Мстиславъ Галичьскій перебродися Днѣпръ въ тысящи вой на сторожи Татарьскі, и побѣди а, а останокъ ихъ побѣже съ воеводою съ Гемебякомъ, и ту имь не бѣ помощи; погребоша же воеводу своего Гемебяка живаго въ землю, хотяще живаго ублюсти, и ту наидоша его; испросивше же Половци, убиша его. Слышавше же то князи Рустіи, поидоша вси вкупѣ за Днѣпръ на множество лодій, а Галичане и Волынци кіиждо со своими князи, а Куряне, и Трупчане и Путивльцы пріидоша кіиждо со своими князи; пріидоша же и выгонцы Галичьскіе въ лодьяхъ по Днѣстру, и выидоша въ море, бѣ бо лодій 1000, и войдоша въ рѣку Днѣпръ, и возведоша пороги, и сташа у рѣки Хортици на бродѣ на протолчьи; бѣ же с ними Домарѣчичь Юрьи и Дръжикрай Володиславичь. Пришедши же вѣсти во станы, яко пришли суть подсмотрити олядіи Рускія, слышавше Данилъ Романовичь, и всѣдъ на конь гна, и сущіи конници и иніи мнози князи съ нимъ гнаша, видѣти рати; онѣмъ же шедшимъ, Юрьи же имъ сказаша, яко стрѣлци суть, пуще и Половець; [С. 131] иніи же млъвяху, яко прости людіе суть; Юрьи же Домарѣчичь млъвяше: „ратници суть и добра воя“. И пріѣхавше сказаша Мстиславу, Юрьи же все сказа, и рекшимъ молодымъ княземъ: „Мстиславе и другій Мстиславе! Не стоите, поидемъ противу имъ“. Преидоша же вси князи рѣку Днѣпръ, и поидоша на конихъ въ поле Половецкое, и усретоша Татарове полкы Рускыя; стрѣлци же Русскія побѣдиша ихъ и гнаша въ поле далече, сѣкуще ихъ, и взяша скоты ихъ, а со стады утекоша, яко всѣмъ воемъ наплънитися скота. Оттуду же идоша по нихъ 8 дній до рѣкы Калкы, и ту срѣтоша сторожеве Татарьстіи, и удариша на пълци Рустіи, сторожеве же бишася съ полкы Рускыми, и убіенъ бысть ту Іоанъ Дмитреевичь и ина два съ нимъ; Татаромь же отъѣхавшимъ, и на прежереченней рѣцѣ Калцѣ усрѣтоша Татарове Половецкія полки и Рускія. Князь же Мстиславъ Мстиславичь повелѣ преди переити рѣку Калку Данилови съ полкы и инѣмъ полкомъ съ нимь, а самъ по нихъ переиде; и зашедше за рѣку за Калку, и послаша во сторожехъ Яруна съ полки и съ Половци, а сами станомъ сташа ту, а князь Мстиславъ ѣха вборзе послѣ. Видѣвшу же ему полки Татарьскіа, и пріѣхавъ вооружитися повелѣ вборзѣ; а княземь Мстиславу и другому Мстиславу, сѣдящимъ во стану, а не вѣдущимъ того, не повѣда бо има Мстиславъ Мстиславичь зависти ради, бѣ котора межи има велика. Сшедшимъ же ся полкомъ въ мѣсто, Данилъ же выѣха напередъ, и Семенъ Олюевичь и Василко Гавриловичь, и разыдошася въ полкы Татарьскыа. Василкови же сбодену бывшу, а Данилу бодену бывшу въ перси, не чюяше же раны младеньства ради и буести, бывшей на тѣлеси его; бѣ бо лѣтъ 18, но крѣпокъ бѣ на брань. Избивающу же ему Татары мужественѣ, видѣвъ же то Мстиславъ Нѣмый, мнѣвъ яко Данило прободенъ бысть, и потече тъй на нихъ; бѣ бо той мужь крѣпокъ, понеже ужика сы Роману, отъ племене Володимеря Манамаша: бѣ бо велику любовь имѣя ко отцю его, яко по смерьти своей власть свою дая князю Данилови. Татаромъ же бѣгающимъ, Данилови же избивающи ихъ своимъ полкомъ, и Олгови Курьскому крѣпко бьющуся съ ними, тогда же Ярунъ и иніи полци Половечьстіи съступишася съ ними, хотяще битися; пакы же воскорѣ побѣгоша Половци, и потопташа бѣжаще станы Рускыхъ князь, а князи не успѣша оплъчитися противу ихъ, и смятошася вси полци Рустіи, и бысть сѣча зла и люта, грѣхъ ради нашихъ Рускымъ полкомъ побѣжденомъ бывшимъ. Данилъ же видевъ, яко крѣпчае брань Татарьскаа належитъ, обрати конь свой и побѣже от устремленіа противныхъ, и вжада воды и пій, и почюти рану на тѣлеси своемъ, во брани же не позна ея крѣпости ради мужества возраста своего; бѣ бо дръзъ и храборъ, и не бѣ ни въ чемъ же ему зарока. И бысть побѣда на вси князи Рускіе, ака же не бывала отъ начала Руской земли никогда же. Видевъ же се великій князь Кіевьскій бывшее зло, и не движеся никамо же съ мѣста; сталъ бѣ на горѣ надъ рѣкою Калкою, бѣ бо мѣсто каменисто, и ту учиниша городокъ с кольемъ, и бися съ ними изъ города по 3 дни. А иніи Татарове поидоша послѣ Рускыхъ князей, бьющее их и до Днѣпра, а у города осташася два воеводы, Чегырканъ и Тешуканъ, на князя Мстислава, и на зятя его на Андреа, на Александра Дубровьского; бѣста [С. 132] бо ту 2 князя со княземъ Мстиславомъ. Ту же и Бродници быша старыи, и воевода ихъ Плоскиня, и ту окаанній даша роту ко князю Мстиславу и обѣма князема, яко не избити ихъ, но пустити ихъ на искупъ, и солгалъ окаанній предасть ихъ, связавъ, Татаромъ, а городъ взяша, людей же изсѣкоша, а князей подкладоша подъ дскы, и сѣдоша връху ихъ обѣдати, и тако ту скончаша князи животъ свой. А инѣхъ князей гонячи до Днѣпра 6 убиша: князя Святослава Каневьского, Изя слава Инговорьского, Святослава Шумьскаго, Мстислава Чръниговьского со сыномъ, Юрья Несвѣжьскаго, а вой только 10-й пріиде; и Александръ Поповичь ту убіенъ бысть со инѣми 70-ю храбрыхъ. Князь же Мстиславъ Мстиславичь тогда преже всѣхъ пребѣже Днѣпрь и перевезся за нь, повелѣ ладіи жещи, а иные сѣщи и отринути отъ брега, бояся по себѣ погони отъ Татаръ, а самъ едва убѣже отъ Татаръ въ Галичь; а молодіи князи прибѣжали въ малѣлюдіи, а князь Володимеръ Рюриковичь прибѣгъ въ Кіевъ, всѣдъ на столъ. Си же сключися отъ Татаръ мѣсяца іюня 16. Татаромъ же побѣдившимъ Рускіа князи, за прегрѣшеніе христіаньское, и дошедшимъ имъ до Новагорода Святоплъчскаго, Русь же, не вѣдяху злобы и льсти Татарьскіе и ненависти на христіянъ, исхождаху противу имъ со кресты, они же избиваху всѣхъ. Милостивый человѣколюбець Богъ, ожидая покаяніа христіаньскаго, обрати Татаръ воспять отъ рѣкы Днѣпра на землю восточную, и повоеваша землю Таногутскую и ины страны; тогда же и Чаногизъ канъ убіенъ бысть. Се же бысть намъ за грѣхы наша, Богъ вложи недоумѣніе въ насъ, и погибе множество людій, и бысть вопль и воздыханіе и печаль по всѣмъ градомъ и по волостемъ; и глаголаху же сице, яко единѣхъ Кіанъ изгибе тогда 10 000. Егда же почаша князи съвокупляти полкы своя противу безбожныхъ Татаръ, тогда же и въ Володимерь послашася ко князю Юрью Всеволодичю помощи просяще; онъ же посла къ нимъ сыновца своего Василька Костянтиновича съ Ростовци и съ прочими вои. Василко же поиде воскорѣ, но не успѣ пріити къ нимъ, но бывшу ему у Чрънигова и слыша зло, створившееся надъ Рускыми князи, и возвратися воспять, сохраненъ Богомъ и силою креста честнаго, и пріиде во свой Ростовъ, славя Бога и святую Богородицю. Сихъ же злыхъ Татаръ Таурменъ не свѣдаемъ откуду быша пришли на насъ и камо ся дели опять».
Список 50-х — 60-х гг. XVI в.
[С. 87] «О побоищи иже на Калкахъ. В лѣто 6731, по грѣхомъ нашимъ, пріидоша языци незнаемии, при великомъ князи Мстиславѣ Романовиче, внуце Ростиславлѣ Мстиславича, пріидоша бо неслыханіи безбожніи Моавитяне, рекоміи Татарове, ихже добрѣ ясно никтоже съвѣсть, кто суть и откоудоу пріидоша и что языкъ ихъ и которого племене соуть и что вѣра ихъ. Зовуть же ся Татарове, а ины глаголють Таоурмены, а друзіи Печенѣзи, инии же глаголють, яко си суть, о нихже Мефодий, епископъ Паторомскій, свидѣтельствуеть, яко си суть вышли ис пустыня Етровскіа, сущии межи встокомъ и севѣромъ, къ скончанію времяни явитися имъ, ихже загна Гедеонъ, и поплѣнять всю землю отъ встока и до Ефрата и отъ Тигръ до Понтьскаго моря, кроме Ефеопіа. Про сихъ же слышахомъ, яко многи страны поплѣниша: Ясы, Обезы и Косагы, пріидоша же на землю Половецьскоую, [С. 88] и Половцемъ ставшемъ, а Юрьи Кончаковичь бѣ болий всѣхъ Половець, не може стати противу лицю ихъ, но бѣгающу ему, а Половцы, не возмогше же противися имъ, побѣгоша, и мнози избьени быша. И гониша ихъ до рѣкы Днѣпра, а иныхъ загнаша по Дону и в лоукоу моря, и тамо измроша, оубиваеміи гнѣвомъ Божиимъ и пречистыа его Матере. Много бо ти Половци зла сътвориша Роуской земли. Богъ же отмщеніе сътвори надъ безможными Куманы, сынъми Измаиловы: победиша ихъ Татари и инѣхъ языкъ 7, проидоша всю страну Коуманскую и пріидоша близъ Руси. А Котякъ, Половецьскій князь, съ инѣми князми и съ останкомъ Половець прибѣгоша, идеже зовется валъ Половецкій, а Данилъ Кобяковичь и Юрьи Кончаковичь оубиена быста, а ини Половци мнози прибѣгоша в Рускоую землю. Сей же Котякъ бысть тесть князю Мстиславу Мстиславичю Галичьскому. И пріде с поклономъ съ князи Половецкими к зятю князю Мстиславу в Галичь и къ всемъ княземъ Роускымъ и дары принесе многы: кони и вельблуды, боуволы и дѣвкы и одари все князи Роускіа, глаголаша к нимъ сице: „Нашю землю днесь отъяли Татарове, а вашю заоутра возмуть, пришедъ, то побороните насъ; аще ли не поможете намъ, то мы нынѣ иссечени будемъ, а вы на оутрее иссечени будете“. И нача молитися Котякъ зятю своему о пособи. А Мстиславъ нача молитися братии своей, княземъ Русскимъ, река: „Аще мы, братіе, симъ не поможемъ, то предадятся им же, боудеть то болши сила ихъ“. И тако думавше много и яшася пособити Котяню, слушающе же моленіа Половецьскихъ князей. Бывшу же съвѣту всѣхъ князей въ градѣ Киевѣ, створиша сиць совѣтъ: „Лоучшіи бо намъ стрѣтити ихъ на чюжой земли, нежели на своей“. И начаша вои строити, кыйждо свою власть. Тогда бѣ в Киевѣ князь Мстиславъ, сынъ Романовъ Ростиславича, а в Черниговѣ Мстиславъ Святославичь Козельскій, а в Галиче Мстиславъ Мстиславичь. Тии бо бѣяху старѣйшіи в Роусской земли,