Велиции же князи Георгии и Ярославъ Всеволодичи не быша на брани тои, но кождо въ своеи дръжавѣ».
Список первой половины 1560-х гг.
[Стб. 27] «На Калцѣ побоище. Въ лѣто 6734 прїидоша Татарове на землю Половечьскую и на вежи ихъ, а Котянъ князь Половечьскыи бѣ тесть Мьстиславу князю Черниговьскому и посла Котянъ къ зятю своему Мьстиславу съ поклономъ и дары многы злато, кони, паволокы и рыкыи (sic) сице: „шли дары по Русскымъ княземъ, днесь насъ не будетъ, а вас заутра“. И съвокупишася князи Роусстїи съ силою многою и се слышавше Татарове прислаша 10 мужъ съ поклономъ: „мы васъ не заимаемъ, ни градовъ вашихъ, нъ идемъ на свои конюси, на Половци“. И не послушаша ихъ князи Роусстїи, а ту 10 мужъ оубиша. И поидоша Русь противу съ силою своею 17 днїи и се оувѣдавше Татарове прислаша къ кня[земъ] роусскымъ глаголюще: „мы на васъ не посягли ни чимже [а вы] на насъ идете, да судитъ Богъ между вами и намї“ и по[идоша] Татарове противу имъ и съступившимься [Стб. 28] [имъ обоимъ] и бысть побоище страшно на рецѣ Калцѣ и [побїени б] ыша Половци отъ Татаръ и потомъ Русь и [князей па]де множество, а людїи бес числа, а иныхъ […изы]маша. Тогда оубиша Александра Попо[вича. Сїе зло бысть] июнїа 16».
Список второй четверти XV в.
[Стб. 49] «В лѣто 6732. […] И того же лѣта пріидоша Татарове на землю Половецкую и на вежи ихъ. Акотянъ, князь Половецкый, бѣ тѣсть Мьстиславу, князю Черниговьскому, и посла Акотянъ къ зятю своему Мьстиславу с поклономъ и съ многыми дарми: злато, кони, паволокы, а ркя тако, „шли дары по Рускымъ княземъ: днесь [Стб. 50] насъ не будетъ, а утро васъ“. И совокупишася Рускыи князи съ многою силою, и се слышавше Татарове прислаша 10 мужь с поклономъ: „мы вас не заимаемъ, ни вашихъ градовъ Рускыхъ, но идемъ на своихъ конюховъ, на Половци“. И не послуша ихъ Рускыи князи, а ту 10 мужь побиша, и поидоша Русь противу съ силою своею, 17 дній. И се увѣдавше Татарове, прислаша къ княземъ Рускымъ: „мы на васъ не посягли ничимъ, а вы на насъ идете, ти судитъ Богъ межи нами и вами“. И поидоша татарове противу имъ, и снемшимся полкомъ обоимъ, и бысть побоище велико зѣло на рецѣ Калкѣ. И побіени быша Половци отъ Татаръ, а потомъ Руси 11 князей паде, и множество людій бещислено, оныхъ избыша, а инія изымаша. Сіе зло бысть Іюня 16».
Список конца 60-х — начала 70-х гг. XV в.
«В лѣто 6732. [С. 202] Приидоша Тотари на землю Половечкоую и на вежи ихъ. Котянъ, князь Половецкіи, бѣ тесть Мьстіславу, князю Черніговьскому, и посла Котянъ к зятю своемоу с поклономъ дары многы, злато и коні, паво[ло]кы, а глаголюще тако: „шли дары по Рускымъ княземъ; днесь насъ не боудеть, а вас заутра“. И съво[ку]пішася князи Рустіи съ силою многою, и, се слышавше, Тотари прислаша 10 моужи с поклономъ: „мы васъ не заимаимъ, ні градовъ вашихъ Роустихъ, но идемъ на свои конюсѣ, на Половци“. И не послушася ихъ Роустіи князи, а тую 10 моужъ побиша, а идоша Русь противоу 17 дніи, и, се оуви дѣвше, Тотари прислаша къ княземь Рускимъ: „мы на васъ не посягли ні чѣмъ, а вы на насъ идете; то судить Богъ межь вами и нами“. И снемъшимся полкомъ обоимъ, и бысть на Калкахъ брань веліка; и побѣдиша поганіи Тотари Половець и князеи [С. 203] Роускыхъ, и Роускаа сіла падѣ. Тогда оубиенъ отъ Татарь надъ рѣкою над Калкомъ великии князь Киевьскіи Мьстиславъ Романовичь, княживъ лѣтъ 10, а иныхъ князеи 10; оубиша Александра Поповича, а с нимъ богатырь 70, и людеи множество, не бѣ числа, а иныхъ князеи руками яша. То первое выхожденіе Тотарьское на Русь; се же зло здѣяше іюня 16».
Список последней четверти XV в.
«В лѣто 6732. […] Калоч[ское] побо[ище]. Приидошя тотарове на землю Половецкую и на вежи их. А Котян, князь Половецкыи, бѣ тесть Мстиславу, князю Черниговскому, и посла Котянь к зятю своему с поклоном дары многы: злато, кони, паволокы, а ркя тако: „Шли дары по рускымъ князем, днесь нас не будет, а вас заутра“. И съвокупишяся князи руские съ силою многою, и се слышав татари, прислашя 10 муж с поклоном: „Мы вас не заимаем, ни градовъ ваших рускых, но идем на свои конюси на половци“. И не послушаше их руские князи, а тѣх 10 муж побиша. И идошя Русь противу 17 днии. И се увѣдѣвше, тотари прислаша княземь рускым: „Мы на вас не посягли ничим, а вы на нас идете, то судить Богъ межи вами и нами“. И снесшимься плъкомъ обоимъ, и бысть на Калках велика брань, и побѣдиша погании тотари половець и князеи рускых, и рускаа сила паде. Тогда убиен бысть от татаръ над рѣкою над Калкомъ князь великыи Киевскыи Мстислав Романович, княжив лѣт 10, а иных князеи 10 избиша, и Олександра Поповича, а с ним богатырь 70, а люди не бѣ числа, а иных князеи руками яшя. То первое выхожение тотарское на Русь, се же зло сдѣася июня 16».
Список конца XV — начала XVI в.
«В лѣто 6732. […] Приидоша татаро на землю Половецкую и на вежи их. А Котян, князь Половецкыи, бѣ тесть Мстиславу, князю Черниговскому, и посла Котян к зятю своему с поклономъ дары многи, злато и кони, паволоки, а рка тако: „Шли дары по рускымъ княземъ днесь, но нас [не] будеть, а вас заутро“. И совокупишася князи рускии съ силою многою, и се слышавше татарове, прислаша 10 муж с поклоном: „Мы вас не заимаемъ ни градов руских, но идемъ на свою конюсь, на половци“. И не послуша их руския князи, а ту 10 муж побиша. И идоша русь противу 17 днии. И сѣ и увидѣвше, тотари прислаша ко княземъ рускимъ: „Мы на вас не посягли ничим, а вы на нас идете; ту судитъ Богъ меж вами и нами“. И снемшемъся полком обоимъ, и бысть на Калках брань велика; и победиша погании татарии половецъ и князеи руских, и руская сила паде. Тогда убьен бысть от татар великии князь Киевскии Мстислав Романович над рекою над Калкомъ, княживъ лѣтъ 10, а иных князеи 10 убиша; Александра Поповича, а с нимъ богатырь 70, и люди множество, безчисла, а иных князеи руками яша. То 1-е выхожение татарское на Русь. Се же зло дѣяся июня 16».
Список 90-х гг. XVI в.
«В лѣто 731 брань бысть велика на Калкахъ всѣмъ княземъ Русскимъ с погаными Половци. И побиша поганіи много князей Русскыхъ и воиньство истопиша в рецѣ безчислено множество. Тогда же оубиша Александра Поповича и иныхъ многыхъ такихъ же богатыревъ».
«В лѣто 6732. Бишася суздальцы с Татары на Калках, и избиша Тотарове суздалцевъ, месяца маия 31 день. От втораго пренесения мощеи святую новоявленную мученику Бориса и Глѣба до взятия Киевъского 87 лѣтъ. От взятия Киевского до Калковъ лѣт 20. От Калков а до потрясения земли 8 лѣт».
Список XVII в.
«В лѣто 6732. Бишася соуздалци с Татары на Калках, и избиша соуздалцев маиа 31».
Список середины 80-х гг. XV в.
«В лѣто 6732. Бишася соуздалци с Тотары на Калках, и избиша соуздалцовъ мая 31 день. А от втораго принесениа до взятья Киевскаго 87 лѣт. А от взятья Киевскаго до Калковъ лѣт 20. А от Калковъ до потрясениа земли 8 лѣт».
Список времени около 1560 г.
«В лѣто 6731. […] Того же лѣта бысть всѣмъ княземъ Руским бои на рецѣ на Калкѣ с Половци; Олександра Поповича убиша, иных багатыреи многыхъ, и Киевъ взяша. Си злоба стася мѣсяца маия 30».
Список XVI в.
[В составе летописи дошла только первая часть повести о битве на Калке]
[С. 83] «О поб[о]ище, иже на Калках. В лето 6731 по грехом нашим приидоша языцы незнаемы при великом князе киевском Мстиславе Романовиче, внуце Ростиславле Мстиславича. Приидоша бо неслышании безбожни моявитяне, рекоми татаровя, их же добре ясно ничто же съвесть, кто суть и откуду приидоша, и что язык ихь, и которого племени суть, и что вера их; зовут же я татарове, а ини глаголют таурмени, а други — печенези, инии глаголют, яко си суть, о них же Мефодий, епископ паторомский, сведетельствует, яко вси суть вышли ис пустыня Етривския, сущи межди востоком и севером, по скончанию времени явитися им; их же загна Гедеон; и попленят всю землю от востока и до Ефрата и от Тигр до Понтъскаго моря, кроме Ефиопия. При сих же слышахом, яко многи страны поплениша: Ясы, Обезы и Косаги. Приидоша же на землю Половецкую, и половцем ставшим, а Юрьи Кончакович болии всех половец не може стати противу лицу их, но бегающи ему; а половцы не може противитися им, побегоша, и мнози избиении быша; и гониша их до реки Днепра, а иных загониша по Дону и в лукомория, и тамо изомроша, убиваеми гневом божиим и пресвятыя его матере, много бо ти половцы зла сотвориша Руской земле. Богь же отмщение сотвори над безбожными куманы, сыны Измайловы, победиша их татари, инехь язык 7, проидоша землю Куманскую и придоша близ Руси. А Котяк, половецкий князь, со инеми князи и со останком половец прибегоша, иде же зоветца вал Половецкий. А Данил Кобякович и Юрьи Кончакович убиена быста. А иных мнози половцы прибегоша в Рускую землю. Сей же Котяк бысть тесть князю Мстиславу Мстиславичю галическому. И прииде с поклоном со князи половецкими къ зятю князю Мстиславу в Галич и ко всем князем руским, и дары принесе умноги: кони и велблюды, буйволы и девки. И одари всех князей русских, глаголаше к ним сице: „Нашю землю днесь отъяли татаровя, а вашу заутро возьмут, пришедше; то пообороните; аще ли не поможете нам, то мы ныне изсечени будем, а вы наутри изсечени будете“. И нача молитися къ зятю своему о пособии. Мстислав нача молитися братием своим князем руским, река: „Аще мы, братие, сим не поможем, то предадятся им же, то больши будет сила их“. И тако думавше много, яшася пособити Котяку, слушающе же моления половецких князей.