Царице моя Преблагая, Надеждо моя Пресвятая, Споручнице грешных!
Се, бедный грешник предстоит Тебе! Не остави мене, всеми оставленнаго, не забуди мене, всеми забытаго, даждь ми радость, неведущему радования. О, тяжки мои беды и скорби! О, безмерны мои грехопадения! Яко тьма нощная – житие мое. И несть в сынех человеческих ни единаго сильнаго ми помощи. Ты – Единая моя Надежда. Ты – Единый мой Покров, Прибежище и Утверждение.
Дерзновенно простираю к Тебе немощныя мои руце и молю: умилосердися о мне, Всеблагая, пощади искупленнаго Кровию Сына Твоего, утоли болезни многовоздыхающия души моея, укроти ярость ненавидящих и обидящих мя, возстави силы моя увядающия, обнови, яко у орляте, юность мою, не попусти ослабнути в делание заповедей Божиих. Огнем небесным коснися смущенныя души моея и исполни ю веры непостыдныя, любве нелицемерныя и надежды известныя. Да всегда пою и славлю Тебе, Преблагословенную мира Заступницу, Покров наш и Споручницу всех нас грешных, и покланяюся Сыну Твоему и Спасу нашему, Господу Иисусу Христу, со Безначальным Его Отцем и Жизнеподательным Духом Святым во веки веков. Аминь.
От воровства и о возвращении утраченного. Божией Матери пред Ее иконой «Трех радостей»
26 декабря (8 января)
О, Пресвятая Дево, Всеблагаго Сына Мати Всеблагая, царствующего града и святаго храма сего покрове, всем верная предстательнице и заступнице!
Не презри моления нас, недостойных раб Твоих, но умоли Сына Твоего и Бога нашего, да всем нам, с верою и умилением пред чудотворным образом Твоим покланяющимся, по коегождо потребе радость дарует: грешником вседейственное вразумление, покаяние же и спасение; сущим в скорбех и печалех утешение; в бедах и озлоблении пребывающим совершенное сих избытие; малодушным и ненадежным надежду и терпение; в радости и изобилии живущим непрестанное Богу благодарение; сущим в болезни исцеление и укрепление.
О, Госпоже Пречистая! Умилосердися ко всем чтущым всечестное имя Твое, и всем яви всемощный покров Твой и заступление; от враг видимых и невидимых люди Твоя защити и сохрани. Супружества в любви и единомыслии утверди; младенцы воспитай, юныя уцеломудри, отверзи им ум к восприятию всякаго полезнаго учения; от домашния свары единокровныя люди миром и любовию огради, и всем нам подаждь друг ко другу любовь, мир и благочестие и здравие со долгоденствием. Да вси на Небеси и на земли ведят Тя, яко твердую и непостыдную Предстательницу рода христианскаго, и сие ведущие, славят Тя и Тобою Сына Твоего, со Безначальным Его Отцем и Единосущным Его Духом, ныне и присно и во веки веков. Аминь.
Прорись иконы Божией Матери «Троеручица». Дни празднования 28 июня (11 июля);
12 (25) июля
При болях в руках или при увечьях рук. Божией Матери пред Ее иконой «Троеручица»
О, Пресвятая и Преблагословенная Дево, Богородице Марие!
Припадаем и покланяемся Тебе пред святою иконою Твоею, воспоминающе преславное чудо Твое исцелением усеченныя десницы преподобнаго Иоанна Дамаскина, от иконы сей явленное, егоже знамение доныне видимо есть на ней во образе третия руки, к изображению Твоему приложенныя.
Молимся Ти и просим Тя, Всеблагую и Всещедрую рода нашего Заступницу: услыши нас, молящих Тебе, и, якоже блаженнаго Иоанна, в скорби и болезни к Тебе возопившаго, услышала еси, так и нас не презри, скорбящих и болезнующих ранами страстей многоразличных, и к Тебе от души сокрушенныя и смиренныя усердно прибегающих.
Ты зриши, Госпоже Всемилостивая, немощи наша, озлобление наше, нужду, потребу нашу в Твоей помощи и заступлении, яко отвсюду врагами окружени есмы и несть помогающаго, ниже заступающаго, аще не Ты умилосердишися о нас, Владычице. Ей, молимтися, вонми гласу болезненному нашему и помози нам святоотеческую Православную веру до конца дней наших непорочно сохранити, во всех заповедех Господних неуклонно ходити, покаяние истинное о гресех наших всегда Богу приносити и сподобитися мирныя христианския кончины и добраго ответа на Страшнем суде Сына Твоего и Бога нашего, Егоже умоли за нас Матернею молитвою Твоею, да не осудит нас по беззакониям нашим, но да помилует нас по велицей и неизреченной милости Своей.
О, Всеблагая! Услыши нас и не лиши нас помощи Твоея державныя, да Тобою спасение получивше, воспоем и прославим Тя на земли живых и рождшегося от Тебе Искупителя нашего, Господа Иисуса Христа, Емуже подобает слава и держава, честь и поклонение, купно со Отцем и Святым Духом всегда, ныне и присно, и во веки веков. Аминь.
Прорись иконы Божией Матери «Утоли моя печали».
День празднования 25 января (7 февраля)
В скорбях и напастях, об избавлении от болезней, от греховных страстей. Божией Матери пред Ее иконой «Утоли моя печали»
Надеждо всех концев земли, Пречистая Дево, Госпоже Богородице, утешение мое!
Не гнушайся мене, грешнаго, на Твою бо милость уповаю. Угаси ми пламень греховный и покаянием ороси изсохшее мое сердце, очисти ум мой от греховных помыслов; приими мольбу, от души и сердца со воздыханием приносимую Тебе. Буди о мне Ходатаица к Сыну Твоему и Богу, и укроти гнев Его Матерними Твоими молитвами. Душевныя и телесныя язвы исцели, Госпоже Владычице, утоли болезни души и тела, утиши бурю злых нападений вражеских; отъими бремя грехов моих и не остави мене до конца погибнути, и печалию сокрушенное сердце мое утеши, да славлю Тя до последняго издыхания моего. Аминь.
Об исцелении от различных болезней. Божией Матери пред Ее иконой «Целительница»
18 сентября (1 октября)
Приими, о Всеблагословенная и Всемощная Госпоже Владычице Богородице Дево, печальныя сия молитвы, со слезами Тебе приносимыя от нас, недостойных рабов Твоих, к Твоему цельбоносному образу пение возсылающих со умилением, яко Тебе Самой сущей и внемлющей молению нашему. По коемуждо бо прошению исполнение твориши, скорби облегчавши, немощным здравие даруеши, разслабленныя и недужныя исцеляеши, от бесных бесы прогоняеши, обидимыя от бед избавляеши, прокаженныя очищаеши и малыя дети милуеши; еще же, Госпоже Владычице Богородице, от уз и темниц свобождаеши и всякия многоразличныя страсти врачуеши; вся бо суть возможна ходатайством Твоим к Сыну Твоему, Христу Богу нашему.
О, Всепетая Мати, Пресвятая Богородице! Не престай молитися о нас, недостойных рабех Твоих, славящих Тя и почитающих Тя, и покланяющихся со умилением пречистому образу Твоему, и надежду имущих невозвратну и веру несумненну к Тебе, Приснодеве Преславней и Непорочней, славящих и чтущих Тя и вопиющих во веки веков. Аминь.
Об избавлении от голода и об изобилии плодов земных. Божией Матери пред Ее иконой «Экономисса (Домостроительница)»
5(18) июля
О, Пречестная Владычице Богородице, Всечестная наша Мати Игумение всех православных обителей иноческаго жития, во святей горе Афонстей и по всей вселенней сущих!
Приими смиренныя моления наша и принеси я ко Всещедрому Богу нашему, да спасет души наша Своею благодатию. Воззри на ны милосердным Твоим оком и соверши Сама о Господе наше спасение, понеже без милости
Спаса нашего и Твоего святаго о нас ходатайства, мы, окаянныя, не возможем совершити свое спасение, яко окаляхом житие наше в суетах мирских, ибо время приближается жатвы Христовой и день Страшнаго суда приспе. Мы же, окаянныя, погибаем в бездне греховней, нерадения ради нашего, по реченному от святых отцев, первоначальников ангельского по плоти жития: яко последний монаси нерадением жития своего уподобятся мирским людем, еже и сбыстся днесь, ибо иночество наше плавает житием своим на море житейстем среди великия бури и непогоды, ибо наши святыя обители в прахе пребывают грехов ради наших, Всеправедный Господь наш Иисус Христос тако благоволи, мы же, недостойнии, не имеем где главы подклонити.
О, сладчайшая наша Мати Игумение! Собери ны, разсеянное стадо Христово, во едино и спаси всех православных христиан, сподоби райския жизни со Ангелы и всеми святыми во Царствии Христа Бога нашего, Емуже честь и слава со Безначальным Его Отцем и со Пресвятым и Благим и Животворящим Духом во веки веков. Аминь.
От насилия в отношении девственности или супружеского целомудрия. Преподобному Моисею Угрину, Печерскому
26 июля (8 августа)
Тропарь: Труды и подвиги со страстьми по чистоте твоей видя, святе, кто не удивится? Глад бо, темницу и раны приемля, не поработился еси сластем ляховицы, но, яко царь, страстьми обладаяй, ныне и тогда воспрославился еси от Всевидящаго человеческая сердца, от Негоже во искушениих всем пособствовати благодать прием, пособствуй и нам, твою память чтущим, Моисее преподобие.
Мученицам Домнине и дщерям ее Виринее и Проскудии
4(17) октября
О, многострадальные и премудрые мученицы Христовы Домнина, Виринее и Проскудие!
Вы душею на небеси у престола Господня предстоите, на земли же данною вам благодатию различная совершаете исцеления. Призрите убо милостивно на нас, просящих вашея помощи; прострите ко Господу святыя молитвы ваша о нас и испросите нам оставление согрешений наших, недужным исцеление, скорбящим и бедствующим скорую помощь; умолите Господа, да подаст всем нам христианскую кончину и добрый ответ на Страшнем суде Своем, да сподобимся и мы купно с вами славити Отца и Сына и Святаго Духа во веки веков. Аминь.
Мученикам Александру и Антонине
10 (23) июня
Боже святый и во святых почиваяй, трисвятым гласом на небеси от Ангел воспеваемый, на земли от человек во святых Своих хвалимый, давый Святым Твоим Духом коемуждо благодать по мере дарования Христова, и тою поставивый Церкви Твоей Святей овы апостолы, овы пророки, овы же благовестники, овы пастыри и учители, ихже словом проповеди, Тебе Самому действующему вся во всех, мнози совершишася святии в коемждо роде и роде, различными добродетельми благоугодившии Тебе, и к Тебе, нам образ добрых подвигов своих оставивше, в радости прешедшии, готови, в немже сами искушени быша, и нам напаствуемым помогати.