[137], да сорочицу, да кафтан, да фота по плечем, да другою опояшет, а тротеею голову увертит; а се оло, оло, абрь оло ак, олло кером, олло рагим.
А в том Чюнере хан у меня взял жеребца, а уведал, что яз не бесерменянин[138], русин, и он молвит: «Жеребца дам да тысящу златых дам, а стань в веру нашу /л. 445 об./ в Махмет дени;[139] не станеш в веру нашу в Махмат дени[140], и жеребца возму и тысячю златых на голове твоей возму». А срок учинил на четыре дни, в оспожино говейно на Спасов день. И господь бог смиловался на свой честный праздник, не оставил милости своеа от меня грешного и не велел погибнути в Чюнере с нечестивыми; и канун Спасова дни приехал хозяйочи Махмет хоросанець, и бил есми ему челом, чтобы ся о мне печаловал; и он ездил к хану в город, да меня отпросил, чтобы мя в веру не поставили, да и жеребца моего у него взял. Таково осподарево чюдо на Спасов день. Ино, братие русстии християня, кто хощет поити в Ындейскую землю, и ты остави веру свою на Руси, да воскликнув Махмета да поити[141] в Гундустанскую землю.
Мене залгали псы бесермены, а сказывали[142] всего много[143] нашего товара, ано нет ничего на нашу землю; все товар белой на бесерменьскую землю, перец да краска, то и дешево; ино возят аче и морем, ини пошлины не дают. А пошлин много, а на море разбойников много. А разбивают все кафары, ни[144] крестияне, не[145] бесермене; а молятся каменым /л. 446/ болваном, а Христа не знают.
А ис Чюнеря есмя вышли на оспожин день к Бедерю к болшому их граду. А шли есмя месяц до Бедеря; а от Бедеря до Кулонкеря 5 дни; а от Кулонгеря до Кольбергу 5 дни. Промежу тех великих градов много городов; на всяк день по три городы, а иной по четыре городы; колко ковов, толко градов. От Чювиля до Чюнеря 20 ковов, а от Чюнеря до Бедеря 40 ковов, а от Бедеря до Кулонгеря 9 ковов.
В Бедере же торг на кони, на товар, да на камки, да на шелк и на всей иной товар, да купити в нем люди черные; а иные в нем купли нет. Да все товар их гундустанской, да съестное все овощь, а на Рускую землю товару нет. А все черные люди, а все[146] злодеи, а жонки все бляди, да ведмы[147], да тать[148], да ложь, да зелие, осподарев морят зелием.
В Ындейской земли княжат все хоросанцы[149], и бояре все хоросанцы[150], а гундустанцы все пешеходы, а ходят перед хоросанцы на конех, а иные все пеши, ходят борзо, а все наги да боси, да щит в руце, а в другой мечь, а иные с луки великими с прямыми да стрелами[151]. А бой их все слоны, да пеших пускают наперед, а хоросанцы на конех да в доспе/л. 446 об./сех, и кони и сами; а к слоном вяжут к рылу да к зубом великие мечи по кентарю кованых, да оболочат их в доспехи булатные, да на них учинены городкы, да в городкех по 12 человек в доспесех, да все с пушками да с стрелами.
Есть у них одно место, шихб олудин пир ятыр базар алядинанд, на год един базар, съежается вся страна Индийская торговати, да торгуют 10 дни; от Бедеря 12 ковов, приводят кони до 20[152] тысящь коней[153] продавати, всякый товар свозят. В Гундустаньской[154] земли тот торг лучьший, всякый товар продают и купят на память шиха Аладина, а на русскый на Покров святые богородица. Есть в том Алянде и птица гукукь, летает ночи, а кличет: «кук-[155]кукь», а на которой хоромине седит, то тут человек умрет; и кто[156] хощет еа[157] убити, ино у ней изо рта огонь выйдет. А мамоны[158] ходят нощи[159] да имают куры, а живут в горе или в каменье. А обезьяны то те живут по лесу, а[160] у них есть[161] князь обезьяньскый, да ходит ратию своею, да кто замает, и они жалуют[162] князю своему, и оны, пришед на град, дворы разваляют и людей побьют. А рати их, сказывают, велми много, и язык[163] у них есть[164] свой, а детей родят много; /л. 447/ да которой родится ни в отца[165], ни в матерь, ини тех мечют по дорогам; ины гундустанцы тех имают, да учат их всякому рукоделию, а иных продают ночи, чтобы взад не знали бежать, а иных учат базы[166] миканет.
Весна же у них стала с Покрова[167] святыа богородица; а празднуют шигу Аладину, весне две недели по Покрове, а празднуют 8 дни; а весну дрьжат 3 месяцы, а лето 3 месяца, а зиму[168] 3 месяцы.
Бедер же их стол Гундустану бесерменскому. А град есть велик, а людей много велми; а салтан невелик - 20 лет, а держат бояре, а княжат хоросанцы, а воюют все хоросанцы.
Есть хоросанець Меликтучар боярин, ино у него двесте тысящь рати своей, а у Фаратхана 20 тысяч; а много тех ханов по 10 тысящь рати. А с салтаном выходят триста тысящь рати своей. А земля людна велми, и пышна[169] велми; а все их носят на кровати своей на сребряных, да пред ними водят кони в санех златых до 20; а на конех за ними 300 человек, а пеших пятьсот человек, да трубников 10 человек, да варганников 10 человек, да свирелников 10 человек. Салтан же выезжает на потеху с матерью да з женою, ино с ним человек на конех 10 тысящь[170], а пеших пятьдесят тысящ[171], /л. 447 об./ а слонов выводят двесте наряженых в доспесех золоченых, да пред ним трубников сто человек,[172] да плясцов сто человек[173], да коней простых 300 в санех золотых, да обезьян за ним сто, да блядей сто, а все гаурокы.
В салтанове же дворе семеры ворота, а в воротех седит по сту сторожев да по сту писцов кафаров; кто поидет, ини записывают, а кто выйдет, ини записывают; а гарипов не пускают в град. А двор же его чюден велми, все на вырезе да на золоте, и последний камень вырезай да златом описан велми чюдно; да во дворе у него суды розные.
Город же Бедер стерегут в нощи тысяща человек кутоваловых, а ездят на конех в доспесех, да у всех по светычю. А яз жеребца своего продал в Бедери, да наложил есми у него шестьдесят да осмь футунов, а кормил есми его год. В Бедери же змеи ходят по улицам[174], а длина ее две сажени.
В четвертые человек, а образом лютого зверя, а являлся им хвостом[175], а вырезан на камени, а хвост через него[176] сажени. К бухану же съежается вся страна Индийская на чюдо Бутово; да у бутхана[177] бреются старые и молодые жонки и девочки, а бреют[178] на себе все воло/л. 448/сы[179], и бороды, и головы, и хвосты, да пойдут к бутхану; да со всякие головы емлют по две шешькени пошлины на Бута, а с коней по четыре футы; а съезжается к бутхану всех людей бысты азарълек вах башет сат азаре лек. В бухане же Бут вырезан ис камени ис черного, велми велик, да хвост у него через него, да руку правую поднял высоко да простер ее, аки Устенеян царь Цареградскы, а в левой руце у него копие, а на нем нет ничего, а гузно у него обязано ширинкою, а видение обезьянино, а иные Буты наги, нет ничего, кот ачюк, а жонки Бутовы нагы вырезаны и с соромом и з детми, а перед Бутом же стоит вол велми велик, а вырезай ис камени ис черного, а весь позолочен, а целуют его в копыто, а сыплют на[180] него цветы.
Индеяне же не едят никоторого же мяса, ни яловичины, ни боранины, ни курятины, ни рыбы, ни свинины, а свиней же у них велми много; ядят же в день двожды, а ночи не ядят, а вина не пиют, ни сыты; а з бесермены не пиют, ни ядят. А ества же их плоха, а один с одным ни пьет, ни есть, ни з женою; а едят брынец, /л. 448 об./ да кичири с маслом, да травы розные ядят, а варят с маслом, да с молоком, а едят все[181] рукою правою[182], а левою не приимется ни за что; а ножа не дрьжкат, а лжицы не знают; а на дорозе кто же варит себе кашу, а у всякого по горньцу. А от бесермен крыются, чтоб не посмотрил ни в горнець, ни в еству; а толко посмотрит, ино тое ествы не едят, а едят, покрываются платом, чтобы никто не видел его.