Великокняжескому величеству, всякого счастия от Господа Бога желающая,
Марина царица Московская
III
ЛИСТ
за королевскою рукою и за печатью, на чом договор был и присегал король боярину Михаилу Глебовичу Салтыкову с товарищи
Наияснейшаго Жикгимонта третьего, Божиею милостию короля Полского и великого князя Литовского, Московского господарьства бояром, околничим, дворяном и дьяком думным и всем станом, на артикулы и прозьбы их.
Написали есте, когда даст Бог великий господарь король его милость на Московском господарьстве и на всех преславных и великих господарьствах россииских захочет великим господарем царем и великим князем учинити сына своего Владислава, абы его милость великий господарь царь и великий князь на Московское господарьство коруновался коруною, або венчался венцом царским диадимою в Москве от руки патриарха Московского стародавным звычаем, яко прошлые великие господари московские на преславное господарьство Московское коруновались: на то его королевская милость позволяти рачит, кгды Господь Бог волю и час Свой за успокоением досконалым того господарьства пошлет.
2. Абы святая православная вера греческого закону и святая апостольская церковь мела свою целость и красоту по першему, и во апостольских и вселенских научителех науце и поданью ни в чом не нарушена была, и абы учители римские и лютарские и инных вер, разорванья церковнаго нечинили. А которые римские веры захочут приходить до церкви греческие, тые абы приходили зо страхом, як пристоит православным христианом, а не гордостию и не в шапках, и псов бы с собою в церковь не водили, и не водлуг часу в церквы не сидели: на то его королевская милость позволяти рачит, ведже их для людей римское веры потреба меть костел, яко о том еще за Бориса мови были, а при том костеле капланов, або попов ляцких, и о том с патриархою и зо всем духовенством и с бояры с думными намова быти мает. Абы для людей католические веры костел хотя один мог быти в месте столичном Москве для набоженства людей полских и литовских, при которых естьли бы с руских людей кому быти трафилось, абы с таковоюж учтивостью в костеле яко и в руских церквах справовалсе; отводити теж от греческое веры в римскую веру и ни в которую иную, король его милость и сын ево королевские милости некажет, кгдыж вера есть дар Божий, и никого до веры силою отвадити, або примушанье негодитсе, але русину руская, а полским и литовским ляцкая вера волна быти мает. А жидом в Московском господарьстве с торгом и никоторыми делы бывать непозволят о овсем закажут.
3. Целбоносные гробы и тела святых король его милость, яко истинный господарь христианскии, с сыном своим в великой учтивости мети хочет; патриарха теж Московского, также митрополитов, архиепископов, епископов и весь духовный стан хочет шановать и в милости ховать, так яко римского костела архиепископы и епископы и вси каплапы и слуги Божия шануют и милуют; в справы теж духовные вдаватьсе небудет, и в духовные дела мимо уставы отцов святых и апостольской церкви вступатисе нехочет; а хто чего недостоин, и инных вер на духовный стан еписковства, государь его милость подавати небудет.
4. Наданья всех прошлых государей московских и боярские и всяких людей наданья на церкви Божья и на монастыри в целости при церквах и монастырех зоставовати будут, ни вчом их не нарушаючи; такж до которых церквей священником и дьяконом и всяким церковным слугам звычаю и щодробливости давано с господарьских росходов и оброки, то господарь его милость росказати рачит давать завжды с господарьских расходов, и надто спобожности своее для хвалы Божьей, церквам Божьим и монастырем отчин и оброков прибавляти будет.
5. Бояр, окольничих и всяких думных и ближних и приказных людей господарь его милость хочет мети вучтивости и власце своей господарьской, яко кто годен и яко было спочатку, и звычаи все давные добрые хочет заховать, и жалованья, денежные оброки и поместья и отчизны хто что мел передтым, тое и вперед мети мает, а господарь его милость зласки и щодробливости своей и надто водлуг заслуг каждого прибавляти и причиняти будет рачит.
6. Служилым людям, дворяном и детям боярским, господарь его милость, господарьское жалованье давати велит счетверти кождого году водлуг звычаю давнаго, а есть ли что прибавлено не отвластных господарей и неводлуг их достойности, або есть ли у которых убавлено, без вины, о том господарь его милость будет рачить нарадится и намовить с бояры думными: и якая рада або намова их будет, его господарьская милость так втом поступати будет рачить яко се годить, и лготу где спустошоны отчизны и поместья учиняти будет рачить нарадившисе с бояры; а дворяном и детем боярским которые жалованье господарьское берут с городов, господарь его милость давати им жалованье господарьское кажет водлуг службы, яко передтым бывало за перших господарей.
7. На Москве и в городех ружником и оброчником, которые при перших великих господарех для их службы бывали в Москве и в городех, жалованье денежное и хлебное господарь его милость давати велит по першему с господарьской казны.
8. Суды мают быти суженые и отправованы водлуг звычаю и судебника; а будет ли хотеть поправы вчом для укрепленья судов и справедливости, то волно будет бояром и всей земле, а господарь его милость поправы судов позволяти рачит, что бы было до святое справедливости потребно.
9. Против всех неприятелей, которые б одно хотели наступовать на королевство Полское и на великое княжество Литовское, албо на господарьство Московское, слушная речь против тых стоять обоими господарствы за одно.
10. Так же теж на татарских украйнах яко людей ховать обоих господарьств, яко бы себе помогать могли, есть то речь случная, але о тых речех надобет намовы станов корунных и литовских с бояры думными московскими; а як оны промеж себе приговорят и постановят, господарь на то позволит рачит.
11. Есть ли хто провинит с якого кольвек стану и каранье заслужить в господарьских земских делех, кого господарь его милость водлуг вины и выступку карати мает, осудивши перве и справедливо с бояры и с думными людми; а жены, дети, братья которые того учинку непомогали и неведали, албо непрозволяли, казнены быти немают, и овсем при звоих отчизнах и поместьях и маетностях и дворех зостават мают, а подошедши выступку и неосудивши судом с бояры всеми, никого некарати, чести, с них небрати, на везенье незасылати, поместья и отчизны и дворов неодымати, и великих станов невинне непонижати, а меньшей стан подносити водлуг заслуг; отчизн теж и маетностей ни вкого не брати, але естьли хто без потомства сойдет, то на близких повинных спадати мает; а все то господарь его милость чинити будет спорадою и намовою бояр думных, а без рады и намовы бояр думных господарь его милость ничего чинити небудет. До Литвы теж и до Полши никого по неволне господарь его милость водити небудет рачит. А для науки вольно каждому с народу московского людям ездити в иншие господарьства христианские, опричь бусурманских поганских, а господарь его милость отчизны и маетности и дворов у них за то отдымовати не будут.
12. Которых дворянских и боярских и всяких служивых и неслуживых людей братья и жены и дети в теперешние розрухи взято вполон до Полши и до Литвы, росказать раче король его милость вернуть родству их скоро бы одно пан Бог дал успокоение.
13. Полским и литовским паном на Москве и по городах воеводств и врядов недавать, а тых что при великом господаре зостать будут мусели, денежным жалованьем и поместьями и вотчинами нагорожати, однак сполною обоих господарьств радою, якобы на украинных замках для людей сполных народов уряды певные до сконалаго успокоенья господарьства того, и при людех наших зоставали, с боярами думными намовать се будет рачит господарь его милости на часе своем.
14. Пожитки и доходы господарьские всякие с городов, сволостей, такж с кабаков и стамги гроши велит господарь его милость отбирать по давному, як было за прошлых великих господарей, а над давные звычаи некажет ничего новаго прибавлять. А которые городы от войны спустошили, да тых пошлет господарь его милость списати и доведатсе, многоль чего убыло, а доходы брать зоселых роскажет водлуг описанья и дозору, а на незвоеванный город естьли что на першие подати прибавить, о том збояры и с думными людьми намовитсе будет рачит господарь его милость.
15. Купцом полским и литовским в Московском господарьстве, а руским московским в Полше и в Литве торги мают быти волные, а не толко всвоих господарьствах во всех, всякими товары торговать, але и до чужих земель через Полшу и Литву купцам руским для торгов ездити позволяти рачит его королевская милость. А тамги с них на Москве и во всех городах Московского господарьства так же в Полше и в Литве роскажет брать водлуг стародавнего обычаю, як бирано передтым, ничего болши надто не прибавляючи, а ни упоминков не вымогаючи.
16. Мужиком хрестьяном до Литвы с Руси, а с Литвы до Руси, и на Руси всяких станов людем руским промежь себя выхожденья не кажет король его милость допущать.
17. Холопов невольников боярских заховать рачит господарь его милость при давных звычаях, абы бояром албо панам своим по першому служили, а волности им господарь его милость давать не будет рачить.
18. На Волзе, на Дону, на Яике и на Терке казаков есть ли надобе, албобо не надобе, намовит се о том будет рачит господарь его милость с бояры и думными людьми.
А чего втых артикулах недоложено, а даст Господь Бог его господарская милость будет под Москвою и на Москве, и будет его господарской милости о которые артикулы бити челом Московского господарьства патриарх и весь освещенный собор и бояре и дворяне и всех станов люди, тогды о тых артыкулах его господарьской милости мовити и становити и конец учинити с московского звычаю господарьства с патриархом и со всем освещенньим собором и с бояры и совсею землею. Писан на стану нашем под Смоленском, лета от нароженья Иисус Христа Сына Божьего 1610 месяца февраля 14 дня.