но судьбами Божиими царствова во Египте, и нехотящим египтяном. И сия убо от начала в древних до Христа по плоти с небесе сошествия. По Христове же на землю пришествии, во благодати православием сияющих наипаче обретаются по степенем в римских и греческих крестьянских преданиях. От них же первый, православием сияя яко солнце равноапостолом Констянтин, сын великого Консты кесаря Римского, иже прежебывшаго тирона, еже есть воин при Диоклитиане и Максимьяне царема Римскима; сей убо великий первый крестьянский царь Констянтин, во царех первый к Богу правоверием просия яко солнце, тщание же и изыскание о кресте Христове толика показа, яко же инии кто же, и обрете его, много же и святых мощей произыска и собра, идолския же требы до конца разори и много ина исправления по Бозе показа, и с небесе свидетельствован знамением креста Господня, отнюду же победу взем враги побеждаше, и многи языцы во Христа веровати приведе; и сего ради от Бога не земным токмо царьствием, но и небесным одарован бысть, и во крестьянских царех первый и в лик апостольский учинен. Потом вторый царь, благочестия поборник, нечестия обличитель, Феодосий великий, не телесным точию видом, но и славою предмногою высок, иже от Гратьяна царя в порфиру царьскую одеян быв и венцем царствия венчан, от сигклита предъизбран; при нем же вторый святый Вселенский собор бысть. Подобен же сему великому Феодосию царю и Маркиян, великий царь благочестием и верою, храбрьством же и мудростию изящен зело, преже в чину воинственном бысть, потом Феодосием царем малым на царьство возведен, по извещению Ивана Богослова; при сем бысть четвертый святый Вселенский собор. Подобен же сим царема Феодосию и Маркияну, Иустин малый и Тивирий: царьствующу убо сему Иустину малому в Цареграде, супружницу имея зело милостиву, подобну своему нраву, яко же и сам милостив есть, именем Софию, не б же има сына ни дщери; у него же бе советник Тиверий, благоверен зело, красен видом, лицем светел, милостив и долготерпелив, в воинстве храбр велми; красоты же ради его и храбрости, царь Иустин возлюби его прием во усыновление; и первие украшает его кесарским венцем, потом же собрав патриарха и сигклит свой и весь народ, и поучив доволно скифетроцарствия самодержавствия венцем венча его, еще жив сый в житии сем; Иустин же царь, венчав Тивирия на царьство, успе сном вечным; по умертвии же Иустинове, благочестивый царь Тивирие, богодатную свою матерь царицу Софью жену Иустинову, зело почте и яко матерь себе имея, под областию же его сущим недугующим и стражущим и нищим отверз сокровища своя, старым бысть вожь, печальным утеха во всех бедах помощник, и толико яко всем людем прехвально вопити о нем: втораго, рече, Августа Римского кесаря дал нам Бог днесь. Бе же у него две дщери, едину даде за Маврикия: той, убо, Маврикий в воинстве храбр зело, его же сочтания ради дщере своея, Тивирий царь, в кесарский сан устрой; помалеже, по преставлении своем, и царьство свое вручи ему. Любезно же чтущии божественная Писания, многих во царех обрящут скифетроцарствия имущих, в порфиру государьственную облачащихся, добре правящих царственная по Бозе, благочестно и праведно, понеже бо Господь достойная приемлет, недостойных же вон измещет: мнози, убо, звани, мало же избранных. Рече бо Господь: не всяк глаголяй Ми: Господи! Господи! внидет в царьство небесное, но творя волю Отца Моего, Иже есть на небесех. Его же бо суд обыдет Божий, будет ему; мнози бо и нехотящии приидоша в не же звани быша от Бога: не вы бо действующе сия, но творяй в вас Дух Святый. Яко же пишет: всяко добро бываемо, кроме Бога не сотворяется, ниже сотворитися может; яко же рече Господь: без Мене не можете сотворити ничесоже». По сем же убо святейшему Иеву патриарху от божественных Писаний свидетельствовавши государю же Борису Федоровичу отнюд к молению непреклонно пребывшу, и по вся дни многижда святейши Иев патриарх наедине с государем Борисом Федоровичем особь моляше со слезами и прещаше ему государю, дабы не ослушался повеления Божия и утолил бы плачь и рыдание и вопль многонародный, и восприял бы скифетродержавия Росийского царьствия; государь же Борис Федорович никакоже повинуяся глаголемым, но всячески слезным рыданием отрицашеся. И паки святейши Иев патриарх с митрополиты, и с архиепископы, и с епископы, и с архимариты, и с бояры, и весь царьский сигклит, по многи дни моляху государя Бориса Федоровича со слезами, не презрети слез их моления и всенароднаго множества плача и рыдания. Государь же Борис Федорович никакоже преклонися к их молению. Дворяне же, и приказные люди, и дети боярские, и служивые люди, и гости и торговые люди, и все православное християнство, с женами и с детми и с сущими младенцы, безотступно со многим слезным рыданием у государя Бориса Федоровича милости прошаху, чтоб надо всем православным християнством милость показал, не дал их в расхищение, был им милосердым государем царем и великим князем всея Русии самодержцем, по тому же, как их всех православных християн своим милосердым правительством содержал, при великом государи царе и великом князе Федоре Ивановиче всея Русии; и святейшему Иеву патриарху и всему вселенскому собору, безпрестани неотходно в день и в нощь со слезами вопияху, чтобы святейший Иев патриарх и весь вселенский собор молили государя Бориса Федоровича и милости просили, чтобы их не оставил сирых и не дал бы их в расхищение. Государь же Борис Федорович не преклонися никакоже к молению их. Святейши же Иев патриарх Московски и всея Русии, о сем положи на Бога упование и на Пречистую Богородицу и на великих чудотворцов, дондеже исполнится Четыредесятница блаженные памяти благовернаго царя и великого князя Федора Ивановича, всея Русии самодержца, и до времени как съедутся со всея земли Росийского государьства митрополиты, и архиепископы, и епископы, и весь освященный собор, еже на велицех соборех бывают, и съедутся государьские дети розных великих государьств, которые под царьскою высокою рукою были, служили великому государю царю и великому князю Федору Ивановичу всея Русии, и весь царьский сигклит всяких чинов, и царьства Московского служивые и всякие люди; и посла по митрополитов, и по архиепископов, и епископов, и по архимаритов, и по игуменов, и по бояр, и по воевод, и по дворян, и по приказных, и по служивых, и по всяких людей; и всего Росийского государьства митрополитом же, и архиепископом, и епископом, и всему освященному собору, и бояром, и дворяном, и приказным и служивым людям, и гостям, и всем православным крестьяном всего Росийского государьства, которые на Москве, приказал, чтобы все единодушно молили Господа Бога и Пречистую Его Матерь и всех святых, чтобы Господь Бог устроил всему православному крестьянству полезная, яко же весть святая Его воля, и помыслили б все обще кому у них государем быти. Минувше Четыредесятнице по великом государе царе и великом князе Федоре Ивановиче всея Русии самодержце, и всем вкупе сошедшимся в царствующий град Москву, митрополитом, и архиепископом, и епископом и всему освященному собору, и боляром, и дворяном, и всяким чиновным людям, и христолюбивому воинству, и гостем, и всенародному множеству, февраля в 17 день, в пяток на мясопустной неделе, святейший Иев патриарх Московский и всея Русии, велел у себя быти на соборе о Святем Дусе сыновом своим, пресвященным митрополитом, и архиепископом, и епископом, и архимаритом и игуменом, и всему освященному собору вселенскому и боляром, и дворяном, и приказным и служилым людям, всему христолюбивому воинству, и гостем, и всем православным крестьяном всех городов Росийского государьства. И говорил им на соборе: что по преставлении блаженныя памяти, святаго, и праведнаго, и милостиваго, и храбраго, и счасливаго, великого государя царя и великого князя Федора Ивановича, всея Русии самодержца, били челом и со слезами молили благоверную государыню царицу и великую княгиню Ирину Федоровну всея Русии, чтобы она государыня милость показала, скифетроцарствия содержала, а нас бы нищих и сирых не оставила; и великая государыни, аки крепкий адамант душею, не изволила престол свой содержати, а изволила прияти святый иноческий ангельский образ; и мы били челом ей государыни, чтоб она государыня показала нам нищим богомолцом своим и всему православному християнству милость, благословила в свое место на царьство нам государя брата своего, государя нашего Бориса Федоровича; и государыня царица и великая княгиня инока Александра Федоровна всея Русии, за умножение грехов наших, милости не показала ж, брата своего государя нашего Бориса Федоровича на царьство не благословила; а государю Борису Федоровичу тако ж били челом, и молили и просили слезным рыданием по многие дни безотступно, чтобы нам был милосердым государем; и государь Борис Федорович не пожаловал, о государьстве отказал; и аз Иев патриарх и со мною весь освященный вселенский собор, да и вы, бояре, и дворяне, и приказные и служилые люди, и гости, и всех чинов и всякие люди всея земли, о том о великом деле положили на Божию волю и отсрочили до Четыредесятницы; и ныне, по правилам святых апостол и святых отец, по великом государе царе и великом князе Федоре Ивановиче, всея Русии самодержце, Четыредесятница совершилася, а святая его царьская праведная душа в вечное блаженство небеснаго царьства со всеми святыми вселися: и вы бы, преосвященные митрополиты, и архиепископы, и епископы, и архимариты и игумены, и весь освященный собор, и боляре и дворяне, и приказные люди, и гости, и дети боярские, и всех чинов всякие люди царьствующаго града Москвы и всея Росийския земля, все православные крестьяня, о том о великом деле нам и всему освященному собору мысль свою объявили и совет дали: кому на великом преславном государьстве государем быти? А у меня Иева патриарха, и у митрополитов, и у архиепископов, и у епископов, и у архимаритов, и у игуменов, и у всего освященнаго вселенского собора, и у бояр, и у дворян, и у приказных и у служилых у всяких людей, и у гостей, и у всех православных крестьян, которые были на Москве, мысль и совет всех единодушно, что нам мимо государя Бориса Федоровича иного государя никого не искати и не хотети. Слышавше же сия митрополиты, и архиепископы, и епископы, и архимариты и игумены, и весь освященный собор, и боляре, и дворяне, и приказные и служивые люди, и гости, и все православные крестьяне, которые приехали из дальних городов в царьствующий град Москву, велегласно аки единеми уста глаголаху: наш совет и желание то ж единомысленно с тобою, отцем нашим великим господином, Иевом патриархом Московским и всея Русии, и со всем освященным собором, и с бояры, и с дворяны, и со всеми православными крестьяны, еже неотложно бити челом государю Борису Федоровичу, а опричь государя Бориса Федоровича на государьство никого же не искати. И сие во свидетельство приводяще: «По Божию ж изволению и по своему милосердию, великий государь царь и великий князь Иван Васильевич, всея Русии самодержец, сочтал за сына своего за великого государя нашего царя и великого князя Федора Ивановича, всея Русии самодержца, великую государыню нашу царицу и великую княгиню Ирину Федоровну всея Русии, благозаконным браком, а взял ее государыню в свои царьския полаты не в совершенном возрасти седми лет, и была питома в его царьских полатах до сочетания брака; а государь наш Борис Федорович при его царьских пресветлых оче