Молитва 1
Пресвятая Владычице Богородице, свете помраченныя моея души, надеждо, покрове, прибежище, утешение, радование мое, благодарю Тя, яко сподобила мя еси, недостойнаго, причастника быти Пречистаго Тела и Честныя Крове Сына Твоего. Но рождшая истинный Свет, просвети моя умныя очи сердца; Яже источник безсмертия рождшая, оживотвори мя, умерщвленнаго грехом; Яже милостиваго Бога любоблагоутробная Мати, помилуй мя, и даждь ми умиление, и сокрушение в сердце моем, и смирение в мыслех моих, и воззвание в пленениих помышлений моих; и сподоби мя, до последняго издыхания, неосужденно приимати Пречистых Таин освящение во исцеление души же и тела. И подаждь ми слезы покаяния и исповедания, во еже пети и славити Тя во вся дни живота моего, яго благословенна и препрославленна еси во веки. Аминь.
Молитва 2
(Богородичен)
Богородице, христианом Помощнице, Твое предстательство стяжавше раби Твои, благодарно Тебе вопием: радуйся, Пречистая Богородице Дево, и от всех нас бед Твоими молитвами всегда избави, едина вскоре предстательствующая.
Покаянные молитвы к Пресвятой Богородице
Молитва 1
Нескверная, Неблазная, Нетленная, Пречистая, Неневестная Богоневесто, Богородице Марие, Госпоже мира и Надежде моя! Призри на мя, грешнаго, в час сей и Егоже из чистых кровей Твоих неискусомужно родила еси Господа Иисуса Христа, милостива мне соделай матерними Твоими молитвами; Того зревшая осужденна и оружием печали в сердце уязвившаяся, уязви душу мою Божественною любовию! Того в узах и поруганиях горце оплакавшая, слезы сокрушения мне даруй; при вольном Того ведении на смерть душею тяжце поболевшая, болезней мя освободи, да Бога славлю, достойно славимую во веки. Аминь.
Молитва 2
Пресвятая Владычице Богородице, единая чистейшая душею и телом, единая превысшая всякой чистоты, целомудрия и девства, единая всецело соделавшаяся обителию всецелой благодати Всясвятаго Духа, самыя невещественныя силы здесь еще несравненно превзошедшая чистотою и святынею души и тела, призри на мя мерзкаго, нечистаго, душу и тело очернившаго скверною страстей жизни моей, очисти страстный мой ум, непорочными соделай и благоустрой блуждающие и слепотствующие помыслы мои, приведи в порядок чувства мои и руководствуй ими, освободи меня от мучительствующаго надо мною злаго и гнуснаго навыка к нечистым предразсудкам и страстям, останови всякий действующий во мне грех, омраченному и окаянному уму моему даруй трезвение и разсудительность для исправления своих поползновений и падений, чтобы, освободившись от греховной тьмы, сподобился я с дерзновением прославлять и песнословить Тебя, единую Матерь истиннаго Света – Христа, Бога нашего; потому что Тебя одну с Ним и о Нем благословляет и славит всякая невидимая и видимая тварь ныне и всегда и во веки веков. Аминь.
Молитва 3
Заступнице усердная, благоутробная Господа Мати! К Тебе прибегаю аз, окаянный и паче всех человек грешнейший: вонми гласу моления моего и вопль мой и стенание услыши. Яко беззакония моя превзыдоша главу мою и аз, якоже корабль в пучине, погружаюся в море грехов моих. Но Ты, Всеблагая и Милосердая Владычице, не презри мене, отчаяннаго и во гресех погибающаго; помилуй мя, кающагося во злых делех моих, и обрати на путь правый заблуждшую окаянную душу мою. На Тебе, Владычице моя Богородице, возлагаю все упование мое. Ты, Мати Божия, сохрани и соблюди мя под кровом Твоим ныне и присно и во веки веков. Аминь.
Молитва 4
(преподобного Нила Сорского)
О всемилостивая Дево Богородице, Мати щедрот и человеколюбия, прелюбезная надеждо и упование мое! О Мати пресладкаго, перворожденнаго и всяку любовь превосходящаго Спасителя, Господа Иисуса Христа, Человеколюбца и Бога моего, Свете помраченныя души моея! К Тебе аз многогрешный припадаю, и Тебе молюся, источниче милосердия и пучину щедрот и человеколюбия рождшая: помилуй мя, вопию Ти болезненно, помилуй мя, всего уязвленнаго, в лютые разбойники впадшаго, и от одежды, в нюже облече мя Отец, увы мне, обнаженнаго. Темже возсмердеша и согниша раны моя от лица безумия моего. Но, Владычице моя Богородице, молю Тя смиренно: воззри на мя милостивым Своим оком и не возгнушайся мене, всего помраченнаго, всего оскверненнаго, всего в тине сластей и страстей погруженнаго, люте падшаго и возстати не могущаго: умилосердися на мя и даждь ми руку помощи, во еже воздвигнута мя из глубины греховныя. О Радосте моя! Избави мя от обышедших мя; просвети лице Твое на раба Твоего, спаси погибающаго, возстави падшаго люте: можеши бо вся, яко Мати Бога Всемогущаго. Излей на мя елей милосердия Твоего и вино умиления точити ми подаждь; Тебе бо воистину едину надежду стяжах в житии моем. Не отрини убо мене, к Тебе притекающаго, но виждь скорбь мою, Дево, и души желание, и сие приими и спаси мя, Ходатаице спасения моего.
Молитва 5
(канон покаянный ко Пресвятой Богородице)
Глас 6-й, песнь 1
Яко по суху пешешествовав Израиль по бездне стопами, гонителя фараона видя потопляема, Богу победную песнь поим, вопияше.
Пресвятая Богородице, спаси нас.
Всяко моего рыдаю жития сквернаго, и множества безмерных моих зол: что же исповем Ти, Чистая, недоумею и ужасаюся: но помози ми, Владычице.
Откуду начну глаголати лукавая и лютая моя падения страстный аз; увы мне, что буду прочее; но Владычице, прежде конца ущедри мя.
Слава Отцу и Сыну и Святому Духу. Смертный убо час и судище страшное всегда помышляю, Пречистая, обычаем же всезлым прельщаюся люте: но помози ми.
Ныне и присно и во веки веков. Благих тлитель, смотряя мя ныне нага Божественных добродетелей и далече отступльша и отчуждена от Бога, поглотити мя устремляется: Владычице, предвари.
Песнь 2
Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Душу окалях скверно от безмерных зол моих страстный аз, Богородице Владычице: и камо прочее пойду, отчаянием весь одержим.
И еже по образу себе окалях, Чистая, и по подобию: делом, и словом, и помыслом содеях безместная.
Слава Отцу и Сыну и Святому Духу. Несть ин в человецех, иже неподобная содеяв, ни родися в мире, якоже аз, Благая, помрачен умом: ибо крещение Божественное оскверних.
Ныне и присно и во веки веков. На конец достигох злых, Пресвятая Дево, Ты помози ми вскоре: небо и земля вопиют горце от безместных деяний неподобных.
Песнь 3
Христос моя сила, Бог и Господь, честная Церковь боголепно поет, взывающи от смысла чиста, о Господе празднующи.
Ангельстии чинове и воинства небесных сил Твоего Сына ужасаются державы, Чистая: ныне же и аз, отчаявся, безстрашием одержим есмь.
Удивися вся земля и ужасеся, зрящи лютая и злая творящу ми, и безместная: и Твоего Сына многому милосердию чудится.
Слава Отцу и Сыну и Святому Духу. Церковь осквернив зле телесную и Церковь Господню, в нюже человецы трепещуще входят, аз же, блудный, без студа взожду: увы мне.
Ныне и присно и во веки веков. Не яви, Владычице, не яви странна мя, устраншася крова Сына Твоего, всяко недостойнаго, но омый мене от скверны прегрешений моих.
Песнь 4
Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Житие мое блудно, душа моя сквернава и живот весь окаянен, тело же мое все во злых люте окалях: темже потщися, Дево, помощи ми.
Конец предста и не терплю, Благая, совесть обличает мя: предстоят бо ми деяния лукавая, и житие блудное, и судища ужасающая Сына Твоего, Чистая.
Слава Отцу и Сыну и Святому Духу. Плоти моея разжжение, река огненна страшна и неугасима ждет воистину и червь неусыпаяй: но угаси ми сия молитвами Твоими, Пречистая.
Ныне и присно и во веки веков. Ныне трепетом одержим есмь, Благая, и ужасаюся лукаваго ловления: прежде бо конца хощет мя тлитель убити, держа мя яко пленена всего и нага добродетелей.
Господи, помилуй. Господи, помилуй. Господи, помилуй.
Слава Отцу и Сыну и Святому Духу.
Ныне и присно и во веки веков.
Седален, глас 6-й
Упование и стена, и пристанище людем Твоим, Дево: из Неяже родися безстрастно Спас всяческих: якоже плачася Твоего Сына при кресте, Того и ныне моли избавити от тли вся, поющия Тя.
Песнь 5
Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.
Седмь седмерицею пламень разжже ми страстьми лукавый, и любодеяньми сердце мое всегда умерщвляет: темже токами моих слез угаси его, Мати Божия, и спаси мя.
Окаляема тиною прегрешений моих не отрини мене, Владычице Благая: ибо зря мя во отчаянии суща, смеется прелукавый враг: но Сама, Твоею державною рукою возстави.
Слава Отцу и Сыну и Святому Духу. Страшное убо судище, страстная душе моя и нечувственная, и мучение же не кончаемое и грозное: но обаче ныне припади к Матери Судии твоего и Бога и не отчайся сама.
Ныне и присно и во веки веков. Омрачихся страстный множеством безмерных зол и оскверних душу и тело же и ум: темже, Пречистая, светом Твоих сияний, к безстрастию сладости скоро введи мя.
Песнь 6
Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.
Яже от Троицы единаго Бога рождшая и на руку носившая, Дево Мати: угаси страстей огнепальную пещь и слезными токи омый душу мою.
Прихода смертнаго ужасаюся, Пречистая, и суда онаго весь ныне убояхся: дея же злая, никакоже стыждуся: ущедри мя прежде конца молитвами Твоими, Дево.
Слава Отцу и Сыну и Святому Духу. Стенания немолчная, Владычице, даруй ми, и слез тучи даждь, да омыю моя прегрешения многая, и неисцельныя язвы: яко да улучу жизнь вечную.
Ныне и присно и во веки веков. Зол моих множество Тебе исповедах, Владычице, яко ни един в мире ин, прогнева тако Бога, Сына и Господа Твоего: Сего ми на милость вскоре премени, Дево.
Песнь 7
Бога человеком невозможно видети, на Негоже не смеют чини Ангельстии взирати: Тобою же, Всечистая, явися человеком Слово Воплощенно, Егоже величающе, с небесными вои Тя ублажаем.
Се прихожду Ти, Пречистая, со страхом многим и любовию, крепость ведый многую молитвы Твоея, раб Твой, много бо может воистину, Владычице, мольба Матерня к Сыну: милосердием бо преклоняется.
Лики приими Архангел же, и множество вышних воинств Зиждителя моего, Апостол же и Пророк соборы, и Мученики, и Преподобныя и Священномученики: и молитву сотвори, Чистая, за нас к Богу.
Слава Отцу и Сыну и Святому Духу. И ныне, и тогда Твою помощь да обрящу, Чистая, в час в оньже изыдет дух мой: вскоре изъимающи избави мя бесовскаго мучительства, Пренепорочная, и не остави мене, Благая, предану быти им.
Ныне и присно и во веки веков. Судии щедраго чаю, и человеколюбиваго Твоего Сына: Чистая, не презри мене, но Того ми сотвори благопременна, поставити мене одесную тогда, Всенепорочная, пречистому судищу Его, на Тя бо уповах.