(трижды) и святому Воскресению.
В вел. пяток и субботу, тропари, гл. 2
Благообразный Иосиф, с древа снем Пречистое Тело Твое, плащаницею чистою обвив и вонями во гробе нове покрыв положи.
Слава: Егда снисшел еси к смерти, Животе бессмертный, тогда ад умертвил еси блистанием Божества: егда же и умершия от преисподних воскресил еси, вся силы небесныя взываху: Жизнодавче, Христе Боже наш, слава Тебе.
И ныне: Мироносицам женам, при гробе представ Ангел, вопияше: мира мертвым суть прилична, Христос же нетления явися чужд.
На литургии Великой Субботы Вместо херувимской песни: Да молчит всякая плоть человеча, и да стоит со страхом и трепетом, и ничтоже земное в себе да помышляет. Царь бо царствующих, и Господь господствующих приходит заклатися, и датися в снедь верным. Предходят же Сему лицы Ангельстии со всяким началом и властию, многоочитии херувими и шестокрылатии серафими, лица закрывающе, и вопияще песнь: аллилуиа (трижды).
Из цветной триоди святой пятидесятницы
В святую и великую Неделю Пасхи
Стихира при крестном ходе перед утреней: Воскресение Твое, Христе Спасе, Ангели поют на небесех: и нас на земли сподоби чистым сердцем Тебе славити.
Тропарь Христос воскресе из мертвых, смертию смерть поправ и сущим во гробех живот даровав.
Ирмосы канона
1. Воскресения день, просветимся, людие: Пасха, Господня Пасха: от смерти бо к жизни и от земли к небеси, Христос Бог нас приведе, победную поющия.
3. Приидите, пиво пием новое, не от камене неплодна чудодеемое, но нетления источник из гроба одождивша Христа, в Немже утверждаемся.
Ппакои, гл. 4: Предварившия утро яже о Марии, и обретшия камень отвален от гроба, слышаху от Ангела: во свете присносущнем Сущаго, с мертвыми что ищете яко человека? Видите гробныя пелены: тецыте и миру проповедите: яко воста Господь, умертвивый смерть, яко есть Сын Бога, спасающаго род человеческий.
4. На Божественной стражи, богоглаголивый Аввакум да станет с нами и покажет светоносна Ангела, ясно глаголюща: днесь спасение миру, яко воскресе Христос яко всесилен.
5. Утренюем утреннюю глубоку, и вместо мира песнь принесем Владыце, и Христа узрим правды Солнце, всем жизнь воссияюща.
6. Снисшел еси в преисподняя земли и сокрушил еси вереи вечныя, содержащия связанныя, Христе, и тридневен, яко от кита Иона, воскресл еси от гроба.
Кондак, гл. 8: Аще и во гроб снисшел еси, Бессмертие, но адову разрушил еси силу и воскресл еси яко победитель, Христе Боже, женам мироносицам вещавый: радуйтеся! и Твоим Апостолом мир даруяй, падшим подаяй воскресение.
7. Отроки от пещи избавивый, быв человек, страждет яко смертен, и страстию смертное в нетления облачит благолепие, един благословен отцев Бог и препрославлен.
8. Сей нареченный и святый день, един суббот царь и господь, праздников праздник и торжество есть торжеств, в оньже благословим Христа во веки.
Припев: Ангел вопияше Благодатней: Чистая Дево, радуйся! и паки реку: радуйся! Твой Сын воскресе тридневен от гроба, и мертвыя воздвигнувый: людие, веселитеся!
9. Светися, светися, новый Иерусалиме: слава бо Господня на тебе воссия: ликуй ныне и веселися, Сионе! Ты же чистая красуйся, Богородице, о восстании Рождества Твоего.
Ексапостиларий Плотию уснув яко мертв, Царю и Господи, тридневен воскресл еси, Адама воздвиг от тли и упразднив смерть: Пасха нетления, мира спасение.
Стихиры, гл. 5
Стих: Да воскреснет Бог, и расточатся врази Его.
Пасха священная нам днесь показася: Пасха нова, святая, Пасха таинственная, Пасха всечестная, Пасха Христос Избавитель; Пасха непорочная, Пасха великая; Пасха верных, Пасха двери райския нам отверзающая; Пасха всех освящающая верных.
Стих: Яко исчезает дым, да исчезнут.
Приидите от видения, жены благовестницы, и Сиону рцыте: приими от нас радости благовещения воскресения Христова; красуйся, ликуй и радуйся, Иерусалиме, Царя Христа узрев, из гроба яко жениха происходяща.
Стих: Тако да погибнут грешницы от лица Божия, а праведницы да возвеселятся.
Мироносицы жены, утру глубоку представша гробу Живодавца, обретоша Ангела на камени седяща, и той, провещав им сице глаголаше: что ищете Живаго с мертвыми? что плачете Нетленнаго во тли? шедша, проповедите учеником Его.
Стих: Сей день, егоже сотвори Господь, возрадуемся и возвеселимся в онь.
Пасха красная, Пасха, Господня Пасха! Пасха всечестная нам воссия! Пасха! радостию друг друга объимем! О, Пасха! избавление скорби: ибо из гроба днесь яко от чертога воссияв Христос, жены радости исполни, глаголя: проповедите Апостолом.
Слава, и ныне: Воскресения день и просветимся торжеством, и друг друга объимем, рцем: братие! и ненавидящим нас, простим вся воскресением и тако возопиим: Христос воскресе из мертвых, смертию смерть поправ и сущим во гробех живот даровав.
На литургии
Антифон 1-ый: Воскликните Господеви вся земля, пойте же имени Его, дадите славу хвале Его. Молитвами Богородицы…
Рцыте Богу: коль страшна дела Твоя, во множестве силы Твоея солжут Тебе врази Твои. Молитвами Богородицы…
Вся земля да поклонится Тебе, и поет Тебе, да поет же имени Твоему вышний. Молитвами Богородицы, Спасе, спаси нас.
Слава, и ныне: Молитвами Богородицы…
Антифон 2-ой: Боже ущедри ны и благослови ны, просвети лице Твое на ны и помилуй ны. Спаси ны, Сыне Божий, воскресый из мертвых, поющия Ти: аллилуиа.
Да познаем на земли путь Твой, во всех языцех спасение Твое. Спаси ны…
Да исповедятся Тебе людие, Боже, да исповедятся Тебе людие вси. Спаси ны…
Слава, и ныне: Единородный Сыне…
Антифон 3-й: Да воскреснет Бог, и расточатся врази Его, и да бежат от лица Его ненавидящии Его. Христос воскресе…
Яко исчезает дым, да исчезнут, яко тает воск от лица огня. Христос воскресе…
Тако да погибнут грешницы от лица Божия, и праведницы да возвеселятся, да возрадуются пред Богом. Христос воскресе…
Входное: В церквах благословите Бога, Господа от источник Израилевых. Христос…
Предварившия утро… Слава, и ныне… Аще и во гроб…
Прокимен, гл. 8: Сей день егоже сотвори Господь, возрадуемся и возвеселимся вонь.
Стих: Исповедайтеся Господеви, яко благ, яко в век милость Его.
Аллилуиа, гл. 4: Ты воскрес ущедриши Сиона.
Причастен: Тело Христово приимите, источника бессмертнаго вкусите.
На вечерни Прокимен, гл. 7: Кто Бог велий, яко Бог наш? Ты еси Бог творяй чудеса.
Понедельник Светлой седмицы
На литургии
Прокимен, гл. 8: Во всю землю изыде вещание их, и в концы вселенныя глаголы их.
Стих: Небеса поведают славу Божию, творение же руку Его возвещает твердь.
Аллилуиа, гл. 4: Исповедят небеса чудеса Твоя, Господи.
Причастен: Тело Христово приимите…
На вечерни Прокимен, гл. 1: Бог наш на небеси и на земли, вся, елика восхоте, сотвори.
Вторник Светлой седмицы
На литургии
Прокимен, гл. 3: песнь Богородицы: Величит душа моя Господа, и возрадовася дух мой о Бозе, Спасе моем.
Стих: Яко призре на смирение рабы своея, се бо отныне ублажат мя вси роди.
Аллилуиа, гл. 8: Воскресни, Господи, в покой Твой, Ты, и кивот святыни Твоея.
Причастен: Тело Христово…
На вечерни Прокимен, гл. 8: Гласом моим ко Господу воззвах, гласом моим к Богу и внят ми.
Среда Светлой седмицы
На литургии
Прокимен, гл. 6: Помяну имя Твое во всяком роде и роде.
Стих: Слыши, дщи, и виждь, и приклони ухо твое.
Аллилуиа, гл. 3, песнь Богородицы: Величит душа моя Господа, и возрадовася дух мой о Бозе, Спасе моем.
Четверг Светлой седмицы
На литургии
Прокимен, гл. 3: Пойте Богу нашему, пойте, пойте Цареви нашему, пойте.
Стих: Вси языцы, восплещите руками, воскликните Богу гласом радования.
Аллилуиа, гл. 4: Наляцы и успевай и царствуй, истины ради и кротости и правды.
Пятница Светлой седмицы
На литургии прокимен и аллилуиа как в понедельник Светлой седмицы.
Суббота Светлой седмицы
На литургии
Прокимен, гл. 3: Господь просвещение мое и Спаситель мой, кого убоюся?
Стих: Господь защититель живота моего, от кого устрашуся.
Аллилуиа, гл. 5: Господь воцарися, в лепоту облечеся, облечеся Господь в силу и препоясася.
Неделя 2-ая по Пасхе: о Фоме
Тропарь, гл. 7
Запечатану гробу, Живот от гроба воссиял еси, Христе Боже, и дверем заключенным, учеником предстал еси, всех воскресение, дух правый теми обновляя нам, по велицей Твоей милости.
Кондак, гл. 8 Любопытною десницею, жизноподательная Твоя ребра Фома испыта, Христе Боже: созаключенным бо дверем яко вшел еси, с прочими Апостолы вопияше Тебе: Господь еси и Бог мой.
На утрени Прокимен, гл. 4: Похвали, Иерусалиме, Господа, хвали Бога Твоего, Сионе.
На литургии
Прокимен, гл. 3
Прокимен, гл. 3: Велий Господь наш, и велия крепость Его, и разума Его несть числа.
Стих: Хвалите Господа, яко благ псалом, Богови нашему да усладится хваление.
Аллилуиа, гл. 8: Приидите, возрадуемся Господеви, воскликнем Богу Спасителю нашему.
Причастен: Похвали, Иерусалиме, Господа, хвали Бога Твоего, Сионе.
На вечерни Прокимен, гл. 6: Кто Бог велий яко Бог наш? Ты еси Бог творяй чудеса.