Во единъ же отъ днии собрашася вси людие града того и идоша ко царю своему, глаголяще: «Что сотворимъ — яко погибаемъ злѣ оть змия сего?» Глагола имъ царь: «Азъ, еже ми явиша бози, то и возвѣщаю вамъ, да сотворимъ убо совѣть сии: кийждо васъ во вся дни сына своего или дщерь свою да подасть на снедение змию по ряду, дондеже и на мя приидеть число. Дамъ и азъ единородную мою дщерь». И годѣ бысть сей совѣть всѣмъ людемъ, отьвѣщавше рекоша ко царю: «Воистину, о царю, сердце твое въ рукахъ боговъ есть; благодать же исповѣдуемъ имъ, отькрывшимъ тобѣ совѣть сей». И шедше по ряду творяху повелѣние царево, наченше оть большихъ князь и до нижнихъ, и по вся дни чада своя даяху на пищу змиеви при край езера, овъ убо сына своего, другый же дщерь свою, кричаще и плачюще зѣло. Исхожаше змий и восхищаше и ядяше.
Егда же вси людие отьдаша своя чада, абие пришедше, рекоша ко царю: «Владыко, вси мы отьдахомъ своя чада единъ оть другаго, каждо насъ по ряду. Что убо велиши по сихъ?» И отвѣщавъ царь и рече: «Дамъ и азъ единородную мою дщерь, и по сихъ, еже ми явять безсмертнии бози, то паки и совѣщаемъ». Призвавъ же царь единородную свою дщерь и облече ю въ багряницю и облобызавъ ю, и плакася много, и повелѣ вести ея на погибель ко змию. Приведше же и поставиша ю при езерѣ.
Святый же и великый мученикъ и сграстотерпець Христовъ Георгие, почтенный оть небеснаго царя воинъ, и по смерти живый, сияя великыми чюдесы, по смотрению убо Божию хотя спасти насъ погыбающихъ и избавити града нашего оть великыя бѣды, въ той убо часъ приста на мѣстѣ томъ, якоже некий воинъ, грядый оть рати и со тщаниемь во свое отечество идый. Видѣвъ же отроковицю великый и преславный мученикъ Георгий при край езера, и вопроси ея, глаголя: «Что зде стоиши, отроковице?» Она же рече ему: «Отойди, господи мой, отсюду, скоро отойди, да не зле умрѣши». Отьвещавъ же святый Георгий, и рече ко отроковици: «Что глаголеши, о дѣвице, разбойници ли суть здѣ или ино что?» Отроковица же рече: «Змий есть страшенъ, внутрь гнездяся во езере семь; ныне убо молю тя, господи мой, отьступи отсюду: вижу убо добрый твой зракъ и возрасть, и свѣтлость, да не зле умреши». Глагола ей святый и великый мученикъ Георгий: «Ты же почто седиши зде, а не отьходиши?» Глагола отроковица: «Много есть слово мое, еже изрещи тобѣ и сказати, еже о мнѣ, еда како приидеть змий и тебе со мною восхытить». И глагола ей святый и великый мученикъ Георгий: «Рци ми, отроковице, истину, не бойся — не оставлю тебѣ». И отвеща ему отроковица трепещущи: «Видиши ли, господи мой, яко градъ сей великъ и добръ есть зѣло, и велие угобзение его во всемъ: и не хощеть отець мой изыти и оставити градъ сей. Есть убо здѣ змий великъ и страшенъ зѣло во езере семь, и снедаеть людей много, и совѣщаша гражане со царемь отцемь моимь; и даша по вся дни кийждо ихъ по ряду чада своя въ пищу змиеви; прииде же рядъ и на царя, отца моего, и мене, единородну имѣя дщерь едину и не хотя разорити повелѣния своего, повелѣ и мене дати на снѣдение змию. И уже, господи мой, вся тебъ исповедахъ; отъиди отсюду скоро, преже даже не приидеть змий и не восхитить тя».
Слышав же сия великый мученикъ и страстотерпець Христовъ Георгий, и глагола къ женѣ«Не бойся, отроковице!» Абие же возрѣвъ на небо рабъ Божий и помолися, глаголя: «Безначальне, живоначальне, Боже всего мира, не имый начала ни конца, положивый времена и лѣта, солнце на область дний, луну же на просвещение нощи, по-слушавый святыхъ твоихъ апостолъ, пославъ имъ духъ той святый, послушай и мене, недостойнаго раба твоего, и покажи на мнѣ древняя твоя милости и покори лютаго сего звѣря под ногама моима, да видять и вѣру имуть вси, яко ты еси единъ Богь и развѣ тебе иного не вѣмы». И прииде ему гласъ съ небеси глаголя: «Дерзай, Георгие!»
Внезапу же отроковица возопи, глаголющи: «Бѣжи, о человѣче, отсюду: се бо змий свища грядеть». И абие, мало поступивъ, святый мученикъ Христовъ Георгие зря езеро возмутившеся, и взяться превеликий змий, воздвиже главу свою, грядый, рыкая на святаго понеже и на дЬвицю. Сотвори же абие знамение Христово на земли святый Георгий и рече: «Во имя Иисуса Христа, Сына Божия, покорися, горкий зверю, и гряди во слѣдъ мене». И абие силою Божиею и великаго мученика и страстотерпьца Христова Георгия паде подъ коленьми ногъ его страшный онъ змий. И глагола святый и великый мученикъ Георгий отроковици: «Отрешивши поясь твой и уже узды коня моего и свяжи змия за главу; влеци его и поиди во градь». Она же сотвори, якоже повелѣ ей святый и великый мученикъ Христовъ Георгий. И идяше вослѣдъ ея страшный онъ змий, пресмыкался по земли, яко овца на заколение. Отроковица яге влечаше его радующися и веселящися.
Царь же, отець ея, и мати ея въ той день рыдающе бяху и плачуще зѣло отроковица ради. И внезапу видѣвше отроковицю, влекущу змия, и чюдотворца святаго Христова и великаго мученика и страстотерпьца Георгия, преди идуща, ужаснувъ же ся зѣло начать бѣжати. Святый же и великый мученикъ Христовъ и чюдотворець Георгий возгласи имъ велиимь гласомь, глаголя: «Не бойтеся! Аще вѣруете во Христа, въ него же азъ вѣрую, узрите свое спасение днесь». Царь же срѣтъ его и глагола ему: «Како нарицаеться имя твое, господи мой?» Он же рече ему: «Георгие нарицаеться». Тогда воздвигоша людие вси единъ гласъ, глаголюще: «Тобою вѣруемъ во единаго Бога Вседержителя и во Единороднаго Сына Его, Господа нашего Иисуса Христа и во Святый Животворящий Духъ». Тогда святый и великый чюдотворець Георгие простеръ руку и извлекъ мечь свой, отсѣче главу лютаго оного звѣря. Тогда видѣвъ царь и вси людие, приступиша абие и поклонишася ему, хвалу воздающу Богу и угоднику его великому чюдотворцю Георгию. И повеле царь создати церковь во имя преславнаго и великаго мученика и страстотерпьца Георгия и украси церковь ону златомь и сребромь и камениемь драгимъ. И повеле память его творити месяца апреля в 23 день.
Видѣвше же святый и великый мученикъ Христовъ Георгий вѣру ихъ, яко отъ всея душа своея вѣроваша въ Господа нашего Иисуса Христа, глагола къ нимъ святый: «Покажю вамъ и ино чюдо и знамение и силу Господа Бога моего». И егда создана бысть церковь она и скончаша ея зиждущие, посла имъ щитъ свой и повѣле повѣсити его верху святыя трапезы, олтаря. Силою же дѣйствиемь Святаго Духа и до днешняго дне висить на воздусѣ, недержимъ никимъ же, во времена и лета на вѣру невѣрнымъ. Такова суть страшна и преславна чюдеса преславнаго и великаго чюдотворца и мученика Христова Георгия.