[889], и святаго Епифаниа, архиепископа Кипрскаго, обличение на ересь массалианов[890], чуждо быти глаголющее Кафолическия Святыя Церкве власорастение и брадобритие, и закон богоданный[891], и предание святых апостолов, списаное Климентом святым, учеником святаго апостола Петра, возбраняющая таковая[892], к сим и богомудраго мужа философа Максима Грека послание к великому князю всея России самодержцу Иоанну Василиевичу на брадобриющыя[893], и мучение святых самобратий, триех мучеников, в Вилне пострадавших за брадобритие[894], и показася оттуду, яко, еже[895] брити брады, идолослужителей есть, огню служащих, еже еще пребывает в тартарех крымских и нагайских и иных народех, не христианех сущих.
Яже вся сия размотривши, судихом зде сущым христианом брадобриющым[896], (Л. 435) и власы на главах растящым, и усы отпущающым без брад по подобию безсловесных животных – котов и псов – первее: возвестити оным чрез иерей, сослужители[897] наши, ихже духовныя отци, да престанут от таковаго еллинскаго блудническаго обычая и в прочее да не налагают на брады своя бритв или стригал, власов же на главах долгих да не растят, ниже плетений да творят, но яко православнии христиане, послушници Святыя Церкве, да хранят богоданный закон, и предания святых апостолов, и по них бывшых святых отцев, преемников достоинства и власти их, ихже достоинство и богоданная власть доиде и до нашея мерности, и да каются, продерзателе, о прежде деянных ими, и таковии прощения да сподобятся, и с правоверными всеми всякаго церковнаго и входа, и молитвы, и благословения, и общения да удостоятся. Не покаряющыяся же сему нашему соборному суду и изречению, паче же святых апостолов и святых Богоносных отцев древлнему преданию, но упорно творящая еллинский оный (Л. 435 об.) блуднический обычай брадобрития и на главах власоращения во имени Иисуса Христа, Бога нашего, данною нам властию от Всесвятаго и Животворящаго Духа вязати и решити[898] отлучаем таковыя церкве святыя входа, и с правоверными стояния, и молитвы, и благословения, и Святых Таин общения, яко еллиноподражатели, «и аще кто таковых в непокорстве умрет, не повелеваем того христиански погребати, и молитв об нем, и [свеч] приношения, и просферы[899] приносити, но в пустых и несвященных местех повергати»[900]. Аще же кии священници сие наше соборное изречение, паче же святых апостолов и святых преждебывших отцев предания начнут презирати, и детей своих духовных о сем не имут наказовати, или непослушных в церковь пущати, или молитву и благословение подаяти, или в непокорстве умершыя у церкви погребати, таковии да извергутся всякаго священнослужения и действа. Аще же людини[901] несвященнии таковым брадобрийцем и власорастителем в чесом либо общи(Л. 436)тися или содружебствоватися и соясти не престанут, таковыя отлучению купно с теми подлагаем.
Известнаго же ради вéдения всем православным сыновом Святыя Церкве закона Божественнаго заповедь, и святых апостолов, и святых отцев предания вкратце, и сие наше соборное изречение и суд печатным тиснением издахом, да не в невежестве кто священных впадет извержению, несвященнии же человеци – отлучению от Святыя Церкве, и неблагословению, и Святых Таин необщению повинни будут.
Прочие[902], хранящии богоданный закон и предание святых апостолов и святых отцев, да будут благословени[и] от Господа Бога всяким благословением, и в мире сем долговременни и благополучни да будут. Непокорников же, по псалмопевцу, «да будут дние мали»[903] и, последовная сто осмаго псалма, «не восхотеша бо благословения»[904] и прочая, тамо глаголанная Духом Святым, – тому слава со Безначалным Отцем, и Единородным Того Сыном, Господем нашим Иисусом Христом, в безконечныя веки. Аминь.
ГИМ. Син. II (1196). Л. 433–436.
Приложение № 2[1690 г. сентябрь.] – Проект Окружного послания патриарха Адриана в 24 «увещеваниях» с правкой Евфимия Чудовского [905]
(Л. 64) Адриан, милостию Божиею архиепископ царствующаго великаго града Москвы и всея Росии и всех северных стран патриарх[906].
Два началства величайшая устрои Бог на земли – священство, глаголю, и царство: ово убо Божественным служащо, ово же человеческими владущо и пекущося. От Единаго бо и Тогожде началства обоя сия происходят к человеческаго жития украшению. Царство убо власть имать точию на земли, еже между человекы праведныя суды управляти; защищения обидимых и отмщения обидящым творити; царства разширяти; от врагов иноплеменных обороняти; Церкви Святей Православней во всяких случаех и требах[907] помощь подаяти, наипаче же еретикы, и расколникы, и всякыя наветникы отгоняти; злодеи укрочати[908] и наказовати; добродетелным благотворение, и похвалу, и подобная показовати; судии поставляти и тыя, неправедно (Л. 64 об.) судящыя, возсуждати и отмщати[909]. Священство же власть имать и на земли, и на небеси: еже убо «яже свяжет на земли, будут связана и на небеси, и яже разрешит на земли, будут разрешена и на небеси»[910].
Мерность наша благодатию Всесвятаго и Всесовершителнаго Духа учинен есть архипастырь, и отец, и глава всех: патриарх бо есть образ Христов и глава всех. Убо вси православнии сынове мои суть по духу – царие, князи, велможи и силнии, воины и простии, богатии и убозии, мужие и жены, всяк возраст и чин правоверных: «моя овцы суть и знают мя», и гласа моего архипастырскаго слушают, и аз знаю их, и душу мою должен есмь полагати[911] за ня, иже и последуют мне. «Чуждему же гласу не последуют, но бежат от него, яко не знают чуждых гласа»[912]. О всех сих имам дати слово Богу в День правосудия Божия, аще и един [от] врученных мне погибнет, аще умолчу и слова, архиерейству моему должнаго, не изреку, и яковая ли бо (Л. 65) видя в ком неисправления или самочиния, паче же безчиния и погрешения, умолчу: глаголати бо и пред цари свободноустно и не стыдетися долг имам. Не слушающии же гласа моего архипастырскаго не нашего суть двора, не суть от моих овец, но[913] козлища суть, волкохищина суть, о нихже в пасомстве вины не имам, зане долг мой отдах, слово рекох и волю Господню всем возвестих – сие убо мой есть долг[914]; послушати же или ни – ваше и оных есть. Слушаяй бо мене Христа слушает, а отметаяй мене и не приемляй глагол моих, рекше не слушаяй мене, Христа Бога отмещет и не слушает, яко сам Христос рече: «И слово[915], глаголаное от Мене, оно судити имать в День Судный»[916]. Аз же чист есмь от погибели не слушающих: не обинуяся бо, елико возмогох, всем сказах.
Того ради убо[917] потщахся, в первых, царем благочестивым, яко помазанником Господним, таже архиереем, архимандритом, игуменом, иереем, и монахом, и прочым церковнаго чина, (Л. 65 об.) и мирскаго сословия чиновником, и всем православным христианом потщахся[918] предложити увещания, нужная ко спасению, о еже како подобает быти в соединении святыя веры и согласии церковнем по восточному благочестию, и поучатися закону Господню день и нощь, и творити заповеди его, и любезно со друг други единоверным жителствовати. Вижду бо некыя, кроме закона, и заповедания, и предания своеволно[919] ходящыя, и уклоняющыяся в чужестранныя некыя обычаи, паче же прелести еретическыя, и содружествующыяся, и сообщащыяся с самеми ими, еже аще в начале, яко быль малая, не искоренится, удобно в великое возрастает; и яко древо, вкоренившееся, и со многим трудом не истерзаемо, но секирою таковое гнева Божия безвременно[920] посекаемо бывает. О сем сия возвещения моя, яже и постлашася написанно в числе двадесяти четырех увещаний.
(Л. 66)
Архиереем, приимшым от Господа чрез мерности нашея хиротонию, священнослужение и строение Священных Таин: в первых, подобает правити право слово истинны и жителством своего архиерейства быти образу во всех ко всем. Чины же и предания древняя церковная, от святых отец преданая, хранити непретворно и ненарушно, а нововводных чужестранных обычаев, помалу вкрадывающихся тайно во Святую нашу Православную Восточную Церковь от еретиков – латин, и лютеров, и иных, – не приимати и учение их всякое возбраняти и не попущати. За сим своея епархии, коемужду врученую ему паству, наипаче же иереи поучати закону Господню и прилежное попечение творити о их спасении, да не нерадением коего погибнут души их.