[958], тако лишаяй или уемляй, рекше, умаляяй мзду делателя и зде казним бывает от Бога, и в будущем веце. Грех бо сей есть присно от Бога отмстителен. За сим и сами между себе[959] друг друга, паче же святых домов – церквей и монастырей – не обиждайте. К селом и домом своим границ, сиречь меж, не прелагайте, и соседних нив, и домов (Л. 71) к своим не присовокупляйте, и обидящым иныя воспрещайте: «Не бо едини вселистеся на земли». «Увы же присовокупляющым село к селу и дом к дому, да ближняго что отимут». «Запустошатся[960] бо велиции и добрии доми, – глаголет Господь Саваоф[961], – и не будут живущии в них»[962]. Не моя суть сия словеса, но Самаго Бога, чрез Исаиа пророка глаголющаго.
Князи, и боляре, и вси учинении судие земстии: праведно суд судите. Изимити обидима из руки обидящаго, разсмотряйте между винным и невинным опасно, никого щадяще в суде, ни богата, ни убога не стыдящеся, ниже боящеся лица силных. Сам убо глаголет Бог: «Не судите по лицу, но праведен суд судити»[963]. И «творяй неправеднаго праведна, проклят есть, мерзок же и ненавистен от Господа»[964]. Суд бо праведный – суд есть Божий, зане «Бог праведен есть и правду возлюби»[965]. А неправедное суждение – сатанинское есть угождение. «Творяй же и любяй неправду, ненавидит свою (Л. 71 об.) душу»[966]. Ниже убо мздою очеса своя ослепляйте: «Мзда бо и дары слепят очи и мудрых»[967]. И любящии дары – общници суть татем и разбойником[968]. И «увы неправеднаго оправдающым даров ради»[969]. Зде убо дароприемцев вещественый[970] огнь домы пожигает, в будущем же и сами дароимцы в неугасном огни горети будут вечно.
Емлющии оброки и дающии иным: не творите в приятии излишества[971] и во отдатии умаления[972], ниже продающий и купующий – неправды в лактех, или аршинех, в мерах, в черпалах, в весах, в фунтех, пудех, безменех и подобных, яко еже в ину меру или вес купити, в ину же продавати. Но да будет вам всякая мера, черпала, рекше корцы, ковши, и весы, и лакти праведни и едини, в яже приимати и отдаяти, куповати и продавати: вес бо и мера сугубая мерзостна пред Господем, и творяй, и употребляяй тая.
Воини, сущии всякаго чина[973]: благочестивым царем верно служите и борбствуйте за православную веру и за все (Л. 72) благочестивое царство, повинующеся началником своим полководцем и должную честь им воздавающе. Воеводы же и чиноначалници: мните учиненныя под вами воины не яко порабощеныя некия вам, но яко цареви подчиненныя слуги, и имейте я́ в любви, никогоже обиждающе, но доволни бывайте своими оброки; винныя же наказуйте с разсмотрением, яко отцы детей, яко началници подначалствуемыя[974].
Вся обще молю и завещаваю именем Господа нашего Иисуса Христа: удаляйтеся, православнии, от проклятаго пианства, убивающаго душу и тело. Невинно убо вино, но ненавистно и проклято пиянство. Аще бо язычници невернии своих винопийц и табакопийц ненавидят, и гнушаются, и велми наказуют, колми паче нам, христианом, подобает от проклятаго пиянства и шкаредомерзкаго и злосмраднаго табакопийства гнушатися и отбегати, и иныя пиянствующыя и нехотящыя (Л. 72 об.) трезвы быти воздержавати и наказывати узами, и ранами, и иными томленми. Пияницы не Царство Божие, но муку вечную наследят. В пиянстве не токмо блуд телесный содевается, но и всякое пребеззаконие, и всяка злоба, и сатанинская, а не Божия, воля. Колици пияници погибоша душами с телесы своими! Овии обнищаша, инии же безвременно и безпокаянно нуждными смертми помроша, о нихже ниже Безкровная Жертва приносится, ниже церковная молитва Богу возносится. Того ради себе самоволно не губите; место света тма не бывайте; не дайте себе врагом, и неверным, и еретиком в посмех и ругание. Корчмы, сиречь кабаки или аптеки, – доми суть губителнии: от Бога и от своих домов тамо ходящих отлучают и в адскую бездну и в геенну низвлачают. Премнози бо омрачени от диавола, оставлше Божию церковь, на кабакы и в аптекы пририщут. Горе же упивающымся, зане огнем сожжени будут! Испиют бо в День Судный из чаши гнева Божия!
(Л. 73)
Родителие: дети своя воспитавайте не в своеволстве их, но в наказании, и чистоте телесней, и научении Божественнаго Писания: да всякое повествование их будет в законе Высочайшаго[975]. Самоволства же им от юности не давайте, но склоняйте выю их, мягку еще сущу, да не когда ожесточавше не покорятся вам. «Любяй бо сына своего, – по мудрому некоему, – учащает ему раны»[976]. «Щадяй же жезл, ненавиствует сына своего»[977], бияй же его жезлом, душу его от смерти избавит и страх Божий в него вкоренит, от негоже раждаются всякая благая.
Господие: имейте рабы и рабыни своя во всяком доволстве, призирающе на нужды их благоразсмотрително; доволное же и праведное давайте; броков их летних или подневных не лишающе, ниже уемлюще[978], и страху Господню научайте я́, обаче не жестокостию, но кротостию и любезностию. И подданныя вам земледелцы безмерными оброки, и великими податми, и трудами не отягчевайте, и налогов излишних на них не налагайте, якоже нецыи ненаказаннии творят жестокосердо, сами немилостивно хищающе и отягощающе, и рабы своя на тоежде попущают. Имате (Л. 73 об.) убо и вы Господа на небесех, у негоже обиновение лица не есть[979]. «Блажени бо милостивии, тии помиловани будут»[980], «не милостивым же и суд от Бога немилостив»[981], и «силнии силне истязани будут»[982].
Раби же и рабыни: почитайте господей и госпожей своих, работающе им со всяким тщанием, и верностию, и усердием, и во всех их благих повелениих повинующеся, не пред очесы точию, яко человекоугодници, но в простоте сердца, боящеся Бога, ведяще, яко от Господа приимите воздаяние.
Всякаго чина духовнаго же и мирскаго повсюду православнии: сребра в лихву (сиречь в рост)[983] не давайте: проклато бо сие и от Бога возбранено. В лихву дающии бо сребро, или пищу, или иныя вещи претися и крамолитися не престанут, наипаче иже прежде долгу лихвы емлют, отсюду правде их начало великия неправды. И сего ради лихвящии «сквернави» и «безчеловечни» именуются и суть мерзостни бо пред Богом и человекы. Вем аз некыя, (Л. 74) яко ради приобретения лихвы с душею и главы отщетишася. Лют недуг есть богатство хранимо: погибает бо таковое богатство, зане вся дни во тме, в сетовании, и гневе мнозем, и тузе, и труд их ветр развевает[984]. Отступите, молю, аще кто точен[985], от мерзостнаго сего примышления лихв, да мирно и безмолвно поживше, благоугодити Господу Богу. За сим никакова сана куплею и дародаянием стяжавайте, велми бо и сие грешно и пребеззаконно, и отлучению и извержению достойно. Мздою убо пристяжаная честь не есть честь, но безчестие и напасть, и в таковой чести сый, яко по стремнинам ходяй[986], присно бедствует пасти, и аще падет, не есть[987] возставляяй, зане не от Бога прия, но мздою стяжа. Истинную же честь никто приемлет[988] собою самем, токмо званный от Бога, и «во еже кто зван, в том да пребывает», – по апостолу[989]. «Ищите же[990] прежде Царствия Божия и правды его, – по слову Христа Спасителя, – и вся приложатся вам»[991].
(Л. 74 об.)
Над всеми же сими предложенными молю обще: блюдитеся опасно от сетей диаволских – повсюду простирающихся смертных грехов, глаголю, яже и́ тщитеся побеждати мужественно, а не побеждатися от слабости вашея и малодушства, яко безсловеснии. Гордость убо побеждайте смирением. Ненависть – братолюбием. Сребролюбие – милостынею. Пиянство лютое, яки змию ядовитую отреяйте, еже ныне грех ради наших велми преумножися, от негоже вся злая происходят, – побеждающе воздержанием и молитвою прилежною и частою во церкви, в дому, на пути, и на всяком месте, молящеся по неложному Христову словеси: «Бдите и молитеся на всяк час, да не внидете в напасть»[992]. К сему же имейте присно во уме известную оборону,