да избавитеся от реченных врагов и протчих, убивающих душу и тело, сиречь[993] смерть, суд, геенну, Царство Небесное: трех трепещуще, четвертаго же – желающе. И тако без великаго труда спасетеся.
(Л. 75)
Врачуйте, чадо духовная, болезнующая ваша душы частым исповеданием грехов своих ко отцем духовным в четыре посты уставленыя и Пречистых Таин причащением, по разсмотрению духовных отцев, со всеми своими домочадцы (не брегий бо о сем, аще умрет, не достоин есть погребения христианскаго[994][995]. Яко да душетлителная беззаконий рубища и ветхия преступления гнилости обнажитеся, и грязную грехми плоть теплых слез и воздыханий иссопом омыети, и паче снега убелити, и в чистыя одежды благих и богоугодных дел облечетеся, да готови будете всегда смерти, посецающей вся равно, яко татю, якоже видехом и на всяк день видим внезапно и нечаянно от нея посечены, но увы, увы неготовым, от нея посецающымся: не есть бо потом покаяние!
И сего ради, о чада моя, прежде посечения оныя лютыя и борзыя смерти, наполнивши свети(Л. 75 об.)лники вашя елеем нещадныя милостыни к неимущим при животе своем, кийждо по силе своей[996], и, возжегше огнем непрестанных молитв, яко мудрыя девы, имейте готовы, да с надеждою отидите в жизнь вечную, неугасны имуще светилники вашя до дне[997], воньже испытаются дела благая и злая, зане смерти посечение страшно и люто грешнику, праведнику же – радостно и покойно.
Егдаже будет Пришествие Страшное Сына Божия на Суд в неизреченней славе, и ангели Божии вострубят – «востаните мертвии на Суд!», – колик тогда страх будет! Колик трепет грешником, праведником же – радость неизреченная! Тогда и вы, имуще светилники своя неугасны, изыдите во мнозей радости и веселии, и станете одесную, и глас оный блаженный услышите, глаголющ: «Приидите, благословеннии Отца Моего, наследуйте уготованное вам Царствие от сложения мира». Грешником же: «Отидите от мене, проклятии, во огнь вечный»[998].
(Л. 76)
Таже сподобитеся внити во Царствие Его Небесное и видети неизреченную и пречудную славу Немерцающаго Света, егоже око ваше не виде, ухо не слыша, и на сердце человеческое не взыде, и поклонитеся Седящему на Престоле в Пребожественней славе, Праведному Судии, Сыну Божию, славяще, хваляще и благодаряще Его купно со Безначалным Его Отцем, и Пресвятым и Благим и Животворящим Его Духом, в безконечныя веки, еже буди всем нам и вам получити. Аминь.
Се аз, смиренный[999] архипастырь ваш, подражая истинному моему Архипастырю Христу, и[1000], не терпяй смешаватися вам, простым сущим овцам, с человекы, ходящими в кожи овчей, иже внутрь суть волци хищници, иже суть еретици и раздорници, купно же и имеяй попечение присное о спасении душ ваших, христоподражателно всем вам обще сия спасителныя увещания от святых (Л. 76 об.) отец, тщанием моим собранная, и[1001] наставляющая вас ко спасению, в число дне и нощи двадесяти четырех часов, мерящих коегождо человека жизнь, издав, предложих вам, и в типографии нашей напечатати повелех.
Вы же, яко чада моя во Господе духовная, приемше сия моя словеса любезно, потщитеся часто прочитати, и на скрижалех сердец ваших написати, яко да на всяк день поучаетеся заповедем Господним и творите волю Его святую: читаяй убо и не творяй сугуб грех приимет, и на сыны непокорства гнев Божий приходит. Вы же стойте тверди и держите, еже апостоли заповедаша, и святии отци определиша и научиша, сие бо есть добро и благоугодно пред Спасителем нашим Богом. Да тихое, и безмолвное, и безбедное житие поживете в единомыслии святыя правословныя веры, удаляющеся от всяких еретических примешений и общений, во всякой правде, чистоте, мире и любви о надежди будущих благ во Христе Иисусе, Господе нашем, от Негоже вам, хранящым (Л. 77) заповеди Его и творящым волю Его, яко сыновом и дщерем, благодать, милость и мир да умножится. Нашея же мерности, яко послушным Святыя Восточныя Церкве и нашего архиерейскаго наказания хранителем, архипастырская молитва и благословение да будет от ныне и во веки. Аминь.
ОР ГИМ. Син. 596. Л. 64–77. Опубл. по списку 1757 г. (Архив СПбИИ РАН. Ф. 115. Оп. 1. Д. 393. Л. 30 – 46 об.): Есипов Г. В. Раскольничьи дела XVIII века. Т. 2. СПб., 1863. Приложение № 4. С. 76–96.
Приложение № 3[1692–1693 гг.] – Проект проповеди патриарха Адриана о греховности брадобрития, написанной братьями Иоанникием и Софронием Лихудами (Слово, «еже не брити брад по законом») [1002]
(Л. 60) Учителей Иоанникиа и Софрониа Ликудиевых Слово поучателное, еже не брити брад по законом[1003].
Божественное Писание имать началника Самую Живущую Мудрость Бога и Отца, Господа нашего Иисуса Христа, человеческаго ради рода восприявшаго плоть носити, и ея учители и проповедникы, пророкы и апостолы, и сих преемникы постави, и дá сий дар учителства всем. Тверд представи Господь наш, во благовестии зело добре изъясни, глаголя: «Слушаяй вас, Мене слушает, и отметаяй вас, Мене отметает, и отметаяй Мене, отметает пославшаго Мя»[1004]. Сей же дар апостолскаго учителства и преемства и наша мерность чрез благодать Ея, Живущия Мудрости, Богочеловека Иисуса и Пресвятаго Духа благоволением Отца восприявши. Да некогдá небрежения осуждение нам будет, яко во обращение согрешившыя не научихом, во исправление не запретихом, и в правоту шествия не принесохом!
Аки дело самое, якоже прияхом от святых апостол в заповедании их, сие (Л. 60 об.) кроме всякаго лицеприятия ныне начинаем, глаголюще: «испытайте писания»[1005], «блюдитеся, како опасно ходите»[1006] и «якоже изначала приясте, тако держите»[1007]. Вижду бо вас кроме преданий, и закона, и заповедания ходите, и не во всех, еже не буди, но в неких. Обаче малое, в начале аще не искоренится, в велие восходит. И о сем мое поучение есть, о сем попечение, и, яко рещи вкратце, печаль сердца. Хощу бо о вас, чада моя, о Господе любезная, во всем слово отдати в День Судный.
Что же сие, о немже ныне хощу вы научите и на правоту шествия возвести? Кроме узаконения естественнаго, кроме заповеданий же и преданий древняго же и новаго закона благодати, щавственно овии убо власы брады своея остригоша, женским лицем облекшеся, оставиша праведное подобающее и честное мужеска лица, овии же, по подражению сего ненавистнаго дела от Бога и человек, еже брити брады, сами подвизаются.
И како? Подобает негли сие мужем? Бога пророцы видеша, власы (Л. 61) образне имуща[1008]. В честь убо естества и по разумению Божию в нас власы, темже кроме разумения Божия творят и в безчестие естества, голящии браду. Но и беззаконно сие, еже брити браду, зане в Левитской книзе, главе 19, повелевает Бог, яко «не сотворите сисоин от власов главы вашей, ниже растлите вид брады вашея»[1009]. Отнуду же и Аммон царь во укоризну и безчестие посланных от Давыда к нему остриже половины брады[1010].
Но, аще рекли бысте, противоглаголюще нам, яко «сия закони суть и обыкновения в Ветхом Завете, ныне же ино время, время благодати, время сладости и веселия, преиде бо сень законная, благодати пришедшей, негли мы подлежим сеновному оному закону; мы имамы, яже Духа, не блюдем писмене; Дух животворит, писмя же убивает; оставляем сия сыновом сени, Ветхаго, глаголю, закона; мы сынове благодати есмы. Покажи нам, святейший отче наш, сия утвержденая от закона благодати, егоже и сынове есмы, и тогда покоримся». И добре рекосте, (Л. 61 об.) чада моя во Господе любезная, и о сем благодарствую вам: свет бо солнца по тме нощи сладший и радоснший есть, и по противности явившееся, светлее и известнее бывает.
Се прочее и от закона благодати, таяжде утвержденая, вам приношу явленнейши. Первое – в «Заповедех святых апостолов» (книга первая, глава третия) сице: «Подобает же ниже брады власов растлевати и образ человеч над естество изменяти. Не голите бо, глаголет закон, брад ваших. Сие же женам лепосоздавый сотвори Бог, мужем же неприлично суди. Ты же, сия творя угождения ради, противяся закону, мерзостен будеши Богу, создавшему тя по Образу Своему. Аще убо хочеши Богу угождати, ошаявайся всех, ихже ненавидит Той, и ничтоже дей неугодных Тому»[1011]. Сия суть от заповедей святых апостолов, от закона благодати.
Но ино, согласное сего, тебе приношу от святых наших отец, много последи, но по всем единомудренно сему: святаго [В]селенскаго Шестаго Синода, иже в Трулле, канона 96, в толковании (Л. 62) Иоанна Зонара сице глаголет: «Елицы во Христа крестистеся, во Христа облекостеся, – великий Павел глаголет. Иже чрез Божественное Крещение во Христа облекшеся, по оному долженствуют жителствовати» и прочая. И нижше, в конце канона, о острижении брады глаголет: «Отнуду же низнесшееся, зло бысть всенародно, и яко некий недуг пришедший, втвердившийся христоименитым, вся негли услаждает»