Избранный от Христа Бога сосуд, послан был еси в землю Русскую и язык наш святим крещением просветил еси святителю отче Михаиле, темже Владыце своему на небеси ныне предстоя, тому молися прилежно, от всяких бед и напастей избавитися стаду твоему, да зовем тебе:
Радуйся, Михаиле, великий иерарше, Церкве Русския преславный первопрестольниче.
Архангелов и ангелов Царь, и всея твари Создатель и Промыслитель, милосердие Свое яви к людем страны нашея, во тме идолослужения ходившим, и тя, святителю Михаиле, яко апостола посла, да сия просветиши светом истиннаго богопознания. И се твоими ученьми, яже первее жертвы бесом приношаху, ныне души своя дароносят Христу. Тебе же благодарственная сия возносят песнопения:
Радуйся, веры Христовы усердный насадителю.
Радуйся, идолослужение искоренивый;
радуйся, бесовския жертвы упразднивый.
Радуйся, свете, от востока возсиявый;
радуйся, тму идолобесия разгнавый.
Радуйся, учением Христовым люди просветивый;
радуйся, идольския требы крестом разрушивый.
Радуйся, ниву Христову добре возделавый;
радуйся, благоплодная семена на ней всеявый.
Радуйся, медоточная уста Христова;
радуйся, свирель благозвучная Духа Святаго.
Радуйся, Михаиле, великий иерарше, Церкве Русския преславный первопрестольниче.
Видел еси, святителю Михаиле, плоды трудов твоея проповеди граждане бо славнаго града Киева, истине твоего учения всею душею и сердцем внемлюще, увероваша во Христа истиннаго Бога, мерзских же идолов отвратишася и овых убо сокрушаху, иных же с поруганием в реку вметаху, в нихже беси: “О люте нам”, вопияху. Зря сия, блаженне отче, радовался еси духом твоим, благодарно поя Богу: Аллилуиа.
Разум богодухновенен имея, досточудне отче Михаиле, буия люди божественным твоим учением добре наказав, и гладом душевным тающия, евангельским слова хлебом напитав, Христови сия привел еси: Ему же, святителю, молися, о похваляющих тя сице:
Радуйся, Церкве красото;
радуйся, архиереев доброто.
Радуйся, Православия светило;
радуйся, благочестия правило.
Радуйся, людей русских великий учителю;
радуйся, пророчествия во апостолех Первозваннаго славный совершителю.
Радуйся, лика Богоизбраннаго отцев Печерских предстоятелю;
радуйся, равноапостолам Кириллу и Мефодию равностоятелю.
Радуйся, дванадесять сынов Владимира купелию Крещения отродивый;
радуйся, тем всей земли его усердно послуживый.
Радуйся, веру Христову распространивый;
радуйся, прелесть демонскую низложивый.
Радуйся, Михаиле, великий иерарше, Церкве Русския преславный первопрестольниче.
Силою богоугодных молитв твоих, святе, праотцем нашим пособивый в Единаго Истиннаго Бога уверовати, ложныя же боги отринути и сокрушити душевныя кумиры наши: гордость убо смирением, сребролюбие же нестяжанием, блуд целомудрием, гнев кротостию, чревоугодие воздержанием, зависть доброжеланием, уныние же крепким на Бога упованием. Да тако избывше перунов духовных, возможем Богу предстати, Ему же ты, отче, научил еси нас веровати и пети непрестанно: Аллилуиа.
Имущи квас веры во Христа, жена, богомудрая княгиня Ольга, оный в сатех людей русских сокры. Тобою же, по воле Всемогущаго, все тесто державы Владимировы сквасив, возрасте в веру Христову. Сего ради приими от нашего усердия достойныя похвалы тебе:
Радуйся, Божие к Руси благоволение;
радуйся, молитв святыя Ольги исполнение.
Радуйся, славнодержавнаго Владимира великий советодателю;
радуйся, новоизбранных людей Христовых мудрый назидателю.
Радуйся, имже царие наши и вси людие русскии спасаются;
радуйся, имже архиереи наши, священницы же и монаси хвалятся;
радуйся, имже нищии от Бога богатеют и прославляются;
радуйся, имже претружденные старцы чрез веру Христову в раи упокоеваются.
Радуйся, имже младенцы преставившиися “Осанна в вышних” вопиют;
радуйся, имже души сынов русских, яко искры, по стеблию к небеси текут.
Радуйся, земли нашея прекрасное благословение;
радуйся, преславнаго града Киева освящение.
Радуйся, Михаиле, великий иерарше, Церкве Русския преславный первопрестольниче.
Бурю идолов сокрушающую ощутивше, беси рыдающе вопияху: “О люте нашему окаянству. Яко прежде почитаемы от всех быхом, ныне же поругание от единаго подъемлем пришельца, иже учит человеки во Христа убо веровати, нас же сокрушати, Единому Богу поюще: Аллилуиа”.
Слышим древле от Божественнаго Писания, яко падоша стены Иерихонския, Иисусом Навином, кивоту обносиму: ныне же вемы, яко идоли падоша тебе, святителю Михаиле во страну Русскую пришедшу. Темже мы, чада твоя, тобою в пресветлую Крещения одежду одеяннии, благодарно восхваляем тя сице зовуще:
Радуйся, светильниче на горах Киевских светло возсиявый;
радуйся, из тмы к свету люди приведый.
Радуйся, терние многобожия весьма истребивый;
радуйся, теплотою любве Божественныя души отец наших согревый.
Радуйся, усты твоими Христа Сына Божия проповедавый;
радуйся, огненным языком твоим идольское нечестие обличивый.
Радуйся, в Триединаго Бога веровати отцы наши научивый;
радуйся, доброплодная древеса рая Иисусова насадивый.
Радуйся, яко от тебе людие русскии водою благодати умышася;
радуйся, яко тобою душевная очеса их во святей купели открышася.
Радуйся; яко тобою, во славу Божию, церкви многия создашася;
радуйся, яко тобою обители иноков соградишася.
Радуйся, Михаиле, великий иерарше, Церкве Русския преславный первопрестольниче.
Богосияннаго светильника тя, Михаиле богомудре, Великий Владимир во омраченную идолослужением Русскую землю приведе, да и зде твоим пришествием освятятся людие и истинныя веры познанием вразумятся, православно и богоугодно возносити хвалебную песнь Пресвятей Троице: Аллилуиа.
Слышав Патриарх Царьграда, яко Владимир Крещение святое восприя, и его яко святителей предначальника моляше: да мудраго учителя в Корсунь град пришлет и того митрополита земли Русской поставит, возрадовася зело и со освященным собором совет сотворив, избра тя, святе, сие великое послушание исполнити. Люди же русскии тя сретивше и благоговейный зрак лица твоего видевше, седы же твоея сладость слышавше, глаголаху:
Радуйся, благий наш наставниче;
радуйся, апостольския власти и чести преемниче.
Радуйся, во архиереех славный;
радуйся, в вере великий.
Радуйся, в повелениих доброразсудительный;
радуйся, в поучениих пресладостный.
Радуйся, кроткий нравом;
радуйся, высокий по Бозе житием.
Радуйся, правды усердный рачителю;
радуйся, неправды грозный обличителю.
Радуйся, яко твоими молитвами от вечныя смерти уповаем избежати;
радуйся, яко твоими ученьми жизнь вечную веруем стяжати.
Радуйся, Михаиле, великий иерарше, Церкве Русския преславный первопрестольниче.
Проповедник Христовы веры явился еси в Новеграде, Михаиле священне, в онь же пришед, идолы сокрушая, требища разоряя, люди крестил еси, церкви созидал еси и пресвитеры по градом и весям поставлял еси, братолюбию и христианскому житию люди поучая и увещевая, да вси едиными усты и единым сердцем с тобою навыкнут Христу Богу пети: Аллилуиа.
Возсиял еси, святителю Христов, яко звезда пресветлая во Отечествии нашем, и тьму идолобесия светом Божественных твоих учений до конца подавил еси. Сего ради тя, яко ангела Божия, люди русскии почитаху зовуще:
Радуйся, веры нашея во Христа начало;
радуйся, Церкве Божия в Руси основание.
Радуйся, иерархом в проповедании слова Евангельскаго образе.
Радуйся, иноком, в путь богоугоднаго жития текущим, правило.
Радуйся, праведной жизни миряном виновниче;
радуйся, всем добродетельно живущим венечниче.
Радуйся, чистотою душу твою украсивый;
радуйся, путь жития временнаго во смирении духа препроводивый.
Радуйся, делы благими светло просиявый;
радуйся, премногими чудесы люди удививый.
Радуйся, яко слово благо о пастве твоей Пастыреначальнику Христу воздал еси;
радуйся, яко от руку Его праведное воздаяние приял еси.
Радуйся, Михаиле, великий иерарше, Церкве Русския преславный первопрестольниче.
Хотя преблагий Бог новыя люди Себе избрати, первее в познание Божественное великаго во царех Владимира приведе, иже умным сиянием благодати во святей купели освещся, прият тя пастыря вышним откровением, на Русь же овцам Своим, в неверии заблуждшим, приведе. Таже учением и Крещением во имя Отца, и Сына, и Святаго Духа в воде сия омыв во двор Христов привел еси. С ними же ныне престолу Его предстоя, молися да и нас сподобит с тобою на небеси приносити песнь Ему: Аллилуиа.
Новаго тя апостола зрим, архиерее блаженне Михаиле, землю Русскую обтекающа: яко достигнута тебе неко граду Ростову, идеже людей великое множество крестил еси и веровати в Троице Единому Богу научил еси, благочестию и благоразумию тыя наказав и церкви многия воздвиг, пресвитеры же и диаконы им поставил еси, и уставы благочестны тем преподал еси, глаголющим тебе сицевая:
Радуйся, благодатию Крещения главу Руси, аки диадимою увенчавый;
радуйся, православием, аки перстнем, землю нашу Христу обручивый.
Радуйся, сию в благочестие, аки в порфиру царскую облачивый;
радуйся, Евангелие Христово, аки гривну златую на выю ея возложивый.
Радуйся, Крест Господень в державу непобедимую ей даровавый;
радуйся, вся чада ея православная Христу Господу и Пречистей Его Матери усыновивый.