Избранный святителю Господень, исповедниче и мучениче Христов, / верою и любовию до конца Владыце своему послуживый, / подвиги многи совершив, страдание велие за Христа мужественно претерпевый, / лику небесному страстотерпцев российских благочестно совокупивыйся, / заступай нас молитвами твоими, досточудне, да велегласно вопием ти: Радуйся, священномучениче Петре, архипастырю Соловецкий.
Ангельски над миром мятежным к высоте небесней возлетел еси крилами богоданными, святителю отче Петре, херувимски созерая бездну милосердия Божия, серафимскою любовию пылая ко своему Создателю, прославлял еси Того глаголом вдохновенным. Темже и от нас приими благодарныя любве воздаяния, да радующимся сердцем и умиленною душею воспеваем ти: Радуйся, пламенем божественныя любве от юности возжженный; Радуйся, многими добродетельми от младости украшенный. Радуйся, отрасле добрая корене благочестиваго; Радуйся, сыне славный отечества многотерпеливаго. Радуйся, любовию Христовою неотступно назираемый; Радуйся, во благонравии тою мудре соблюдаемый. Радуйся, властию Господнею на путь священнаго служения наставленный; Радуйся, десницею Вышняго в Царство Небесное управленный. Радуйся, священномучениче Петре, архипастырю Соловецкий.
Видя Господь велию веру и усердие твое к Нему, яко измлада прилежал еси божественней службе и всякому благочестию, образом ангельским почти тя, и на служение постави. Ты же подвиг сей добльственне совершал еси, выну воспевая благодателю Богу: Аллилуиа.
Разумом богопросвещенным в познании истины преуспевал еси, достоблаженне, мудростию духовною обогащаяся, исполняяся крепости божественныя, добродетели евангельския невозвратно души своей присвояя. Темже мы, покланяющеся милосердному Богу, такова дивна сокровища тебе даровавшему, во умилении глаголем ти: Радуйся, благодатию Божиею освященный; Радуйся, премудрости Того всещедро наученный. Радуйся, разум свят смирением твоим стяжавый; Радуйся, данная ти Господем сторицею Тому воздавый. Радуйся, ко ангельскому чину от юности причтенный; Радуйся, во имя апостола Петра во иночестве нареченный. Радуйся, подвигом онаго о Господе поревновавый; Радуйся, путь скорбный и сладостный страданий о Христе избравый. Радуйся, священномучениче Петре, архипастырю Соловецкий.
Силе духовней, от тебе исходящей, дивляхуся людие, пастыря добраго и милосердаго утешителя тя обретше: любовию твоею согреваеми, к тебе благодарением простирахуся, радостию воспевающе Богу: Аллилуиа.
Имея сердце, велия веры ко Господу исполнено, трепещуще словес божественных, достоин показался еси, отче Петре, сана архиерейскаго: воньже и возведе тя сердцеведец Бог, властию и благодатию святительскою облекая тя. Темже покланяющеся достоинству и дарованием твоим, от Бога сущым, поем ти таковая: Радуйся, зову божественнаго учителя радостию повиновавыйся; Радуйся, о славе Его небесней духом разгоравыйся. Радуйся, ко служению святительскому душу свою уготовивый; Радуйся, себе апостолу первоверховному ревностию по Бозе уподобивый. Радуйся, сладость словес Господних в сердце всегда хранивый; Радуйся, игу благому Христову выю подклонивый. Радуйся, благодать архипастырскую от десницы Тихона первосвятителя российскаго приемый; Радуйся, якоже и той, подвиг исповедничества и мученичества на рамена свои подъемый. Радуйся, священномучениче Петре, архипастырю Соловецкий.
Буря беззаконий поколеба державу российскую в годину испытаний лютых, за грехи нашя нам от Бога попущаемых: злоба и уныние, скорбь и рыдания исполниша многострадальное отечество наше. Тобою же, святителю, и тебе единонравными, церковь русская от погибели избавися, и враты адовыми не одолена сохранися. Людие же, видяще непоколебиму веру твою, и светильник твой присно горящ, воспеваху Богу: Аллилуиа.
Слышав непрестанно глас Божий в сердце твоем, ко исповеданию истины и пасению овец Христовых призывающий, слуга Господень верен и безстрашен явился еси: гонений и прещений вражиих не убоявся, до конца святительское и пастырское служение исполнял еси, достоблаженне Петре. Тем покланяющеся величию души твоея, во умилении глаголем ти: Радуйся, огненный столпе, во мраце безбожия светло сияяй; Радуйся, камень веры Христовы, в нейже паству российскую утверждаяй. Радуйся, от раздирания и разорения русскую церковь хранивый; Радуйся, многия волны мятежа церковнаго силою духа твоего укротивый. Радуйся, к службе божественней любовь велию и ревность имевый; Радуйся, иоты единыя в ней николиже презревый. Радуйся, устава церковнаго строгий блюстителю; Радуйся, божиих дел совершителю. Радуйся, священномучениче Петре, архипастырю Соловецкий.
Богоизбранный воине Христов, оружием веры и огненным мечем словес божественных посекал еси всякое нечестие, разрушал еси козни вражыя, защищая достояние церковное, сохраняя от падения православную святыню: Богу же, вспомощствующу тебе и на брань святую вдохновляющу, воспевал еси выну: Аллилуиа.
Видевше враги рода христианскаго тя истинна поборника веры отец наших, и Церкве Православныя защитителя, болезньми и скорбьми люте уязвляху тя, погубити тщащеся. Ты же яко святый Павел, не могий не проповедати Христа, и во узах сый, воздвизал еси благовествующий глас твой, уловляя душы во спасение. Сего ради песнословим твоя подвиги, любовию Христовою содеваемыя, и приносим ти хваления сицевая: Радуйся, многи скорби, изгнание и заточение претерпевый; Радуйся, временныя жизни покой, правды Божия ради презревый. Радуйся, истинную радость во страданиих о Господе обретавый; Радуйся, сими страдании в подвизе Христовы любве возраставый. Радуйся, узником и стражем темничным отрада и утешение бывый; Радуйся, образ терпения и себе отречения добльственне явивый. Радуйся, сокровища сердца своего людем открыти готовый; Радуйся, силою любве твоея многих обративый ко истинней вере Христове. Радуйся, священномучениче Петре, архипастырю Соловецкий.
Проповедует церковь российская благодарною памятию Христиан православных величие добродетелей и подвигов твоих, святителю Петре, дары любве своея тебе приносящи: Богу же, даровавшему нам тебе, пастыря дивнаго, поющи: Аллилуиа.
Возсия тобою слава подвига святительскаго, истинный служителю Христов, священне Петре: идеже бо труждался еси на ниве духовней, всюду чудная дела совершал еси, добрую память о себе оставляя. Тем воспевающе благодателя твоего Бога, во умилении глаголем ти: Радуйся, правило веры, и благочестия образе всесовершенный; Радуйся, пламень, благодатию Божественнаго Духа возжженный. Радуйся, земли нижеградския и тверския похвало, и воронежския церкве отрадо; Радуйся, всея российския страны неугасимая лампадо. Радуйся, гласе, в пустыни безбожия о Бозе вопияй; Радуйся, путеводителю, сквозе терние и волчцы к земли обетования преводяй. Радуйся, тихий свет любве на всех обильно изливаяй; Радуйся, множество людей окрест себе спасаяй. Радуйся, священномучениче Петре, архипастырю Соловецкий.
Хотя спасти церковь русскую от раскола и ересей, и избавити от отчаяния люди, в пучине злобы сатанинския пребывающыя, вся силы твоя приложил еси к тому, премудре Петре, непрестанно Господу служа и Того проповедуя. Тем мнози воспряша тобою к Богу, воспевающе Ему радостию: Аллилуиа.
Новаго тя исповедника и мученика Христова позна великая многострадальная Россия, ранами безчисленными изъязвленная, кровию мученическою обильно напоенная, увенчанная славою множества святых своих. Почитающе тя яко единаго от сих достойнейших и славнейших сынов российских, пение хвалебное приносим ти: Радуйся, святителю, Христа безстрашно исповедавый; Радуйся, боязни и страха человеческа не ведавый. Радуйся, пастырю, душу за овцы твоя полагавый; Радуйся, наемником лукавым паствы твоея расхитити не давый. Радуйся, святыню Церкве православныя ревностно хранивый; Радуйся, врагов ея тем в трепет приводивый. Радуйся, к кончине жития твоего мученичестей всецело уготовивыйся; Радуйся, прияти ту всерадостне сподобивыйся. Радуйся, священномучениче Петре, архипастырю Соловецкий.
Странник земный был еси, святителю, якоже мнози от единоплеменник твоих, не имый пристанища во отечествии твоем, гонимь и поношаемь от враг Христовых, не терпящих твоея святыни. Ты же славил еси о всем единаго истиннаго Бога, сердцем и усты поя небесную Ему песнь: Аллилуиа.
Всего себе воли Господни предав, страдания Его ради за честь почитал еси, досточудне: тем преселение во оток соловецкий и в темнице заточение, яко от десницы Божия восприял еси. Мы же, покланяющеся мужеству и долготерпению твоему, хваления приносим ти таковая: Радуйся, во святыя отоки соловецкия обращенными безбожники в место мучения изгнанный: Радуйся, отоком сим на утешение и утверждение в Бозе дарованный. Радуйся, ко множеству архиереев и священник, тамо томящихся, причтенный; Радуйся, священномучениче чудный, и страстотерпче совершенный. Радуйся, и во изгнании сый, достоинство архиейское хранивый; Радуйся, силою духовною и властителей безбожных покоривый. Радуйся, божественную тишину и мир невозмутимь в души всегда имевый; Радуйся, от Господа ти данный крест любовию и радостию претерпевый. Радуйся, священномучениче Петре, архипастырю Соловецкий.
Всякое ангельское естество удивися чудным подвигом твоим, Богоблаженне, ты бо яко един от оружник небесных, добльственне воинствовал еси на духи злобы за Владыку твоего Христа, воспевая Тому с лики безплотных: Аллилуиа.
Ветии суемудреннии не могут разумети высоты добродетелей твоих, ниже глубины божественныя твоея любве: тоя ради многая страдания благодушно претерпел еси, еже от Господа ти неразлучену быти. Мы же, чтущии святость души твоея и силу духовною, Богом ти дарованную, во умилении глаголем: Радуйся, томления и труды тяжки в заточении терпевый; Радуйся, о осквернении всея Руси святыя и соловецкия обители скорбевый. Радуйся, утешение души твоей в молитве обретавый; Радуйся, божественную службу со священными соузники твоими неотступно совершавый. Радуйся, за всю страну российскую благопрятну жертву Богу приносивый; Радуйся, о покаянии ея в сердчнем сокрушении Господа моливый. Рядуйся, служителю Христовы Церкве и молитвенниче самоотреченный; Радуйся, "архиепископ соловецкий" соузники твоими нареченный. Радуйся, священномучениче Петре, архипастырю Соловецкий.
Спасти хотя душу свою, Богомудре, смирение крестное вкупе со иными добродетельми в дар Господу принесл еси, уничижающым и гонящым тя николиже противляяся; пристанище последнее земнаго жития твоего во отоце анзерстем обрел еси, аможе приведе тя человеколюбец Бог, жертвы новыя всещедрыя твоея желая. Ты же благопокорне принесл еси оную, любовию воспевая Господеви: Аллилуиа.
Стену необориму имел еси благодать Господню, благий отче, защищаюшу тя от враг невидимых, не могущих души твоея погубити: достоин бо тоя благодати явился еси богоугодными труды твоими и умиленными молитвами, имиже умножил еси славу сего дивнаго отока. Сего ради покланяющеся всемилостивому Богу, воспеваем тя, единаго от избранных Его, хвалении таковыми: Радуйся, в безмолвии отока анзерскаго яко пустынник поживый; Радуйся, святыню мученичества твоего к сокровищем богоизбраннаго отока приложивый. Радуйся, в месте подвигов пустыннолюбнаго Елеазара и любобезмолвнаго Иова пребывавый; Радуйся, к тайнам сокровенным их ангельскаго жительства духом приникавый. Радуйся, преподобному Герману, первоначальнику соловецкому, незримо беседовати сподобивыйся; Радуйся, вышним изволением стихословие акафистное сотворити тому удостоивыйся. Радуйся, к помощи святых сея славныя земли во страданиих твоих прибегавый; Радуйся, святую память твою со отоки соловецкими навеки связавый. Радуйся, священномучениче Петре, архипастырю Соловецкий.
Пение всеумиленное благодарною душею возносим ти, всесвятый Владыко, Архиерею небесный, яко даровал еси нам сего дивнаго пастыря, святаго Петра, на утешение и спасение душам нашым и избавление от погибели православныя России. Того подвиги песнословяще, тебе Богу нашему славу возсылаем пением хвалебным: Аллилуиа.
Светоносен светильник во тме безумия и мраце беззакония горяй, вся озарял еси сиянием божественныя благодати, просвещая душы светом истиннаго разума; и до отоков северных достиже свет боголюбивыя души твоея, даже до безмолвныя анзерския пустыни, идеже ты во святей Голгофе, подвиги иноческими прославленней, мученически скончал еси многотрудное житие твое. Сего ради воспеваем долготерпение твое, отче праведне, и любовию простирающеся к тебе, умиленно взываем: Радуйся, в последния дни жития твоего, люте недугуя, сладость вышняго мира паче познавый; Радуйся, в подражание Господу на горе Голгофе в руце Божии душу предавый. Радуйся, жертвою честною твоею священное селение паки освятивый; Радуйся, дивная знамения и чудеса по кончине твоей милостивно явивый. Радуйся, всем сердцем твоим возлюбивый Христа, и вся до конца за того претерпевый; Радуйся, безпреткновенно во обители горния душею возлетевый. Радуйся, судным житием твоим и кончиною праведною Бога прославивый; Радуйся, мощи честныя твоя и священную память твою на земли нам оставивый. Радуйся, священномучениче Петре, архипастырю Соловецкий.
Благодати обитающей в тебе дивящеся, величаем тя, святителю наш незабвенный Петре: веруем, яко дела Божия на земли совершив, и страдания велия претерпев, ныне с Господем во обителех Его почиваеши, призирая на нас с высоты небесныя, и приклоняя к нам вышнее милосердие. На твое заступление надеющеся, и на благодатную помощь твою уповающе, поем дивному во святых своих Богу: Аллилуиа.
Поюще Богоугодное житие твое, благодеяний исполнено, достохвальне Петре, и кончину твою мученическую прославляюще, благодарным сердцем, любовию божественною движимым, ублажаем твою святыню, и память твою светло празднующе, радостию зовем ти: Радуйся, святче, в тайны божественныя посвященный; Радуйся, сыне Царствия Небеснаго благословенный. Радуйся, светильниче, в последняя времена нам Богом дарованный; Радуйся, предстателю о многострадальней стране российстей, Господем избранный. Радуйся, Церкве православныя благоукрашенный венче; Радуйся, Христов предивный исповедниче и страстотерпче. Радуйся, образ страдания и любве ко Господу нам являяй; Радуйся, на узкий путь спасения нас наставляяй. Радуйся, священномучениче Петре, архипастырю Соловецкий.
О преславный и пречудный угодниче Божий, / святый мучениче за веру Христову, / страстотерпче российский, святителю Петре: / приими от нас недостойных и грешных, / сие малое моление наше, благоговейно и трепетно тебе приносимое. / Испроси у всемилостиваго Владыки твоего Христа, / Емуже ныне со дерзновением предстоиши, / прощения и оставления мнозем грехом нашым, / направи нас ко стези покаяния, / да тем избавльшеся лютых страстей, избавимся и мук вечных, и в радости неизглаголанней Царства Небеснаго / воспоим с тобою Христу Богу: // Аллилуиа, Аллилуиа, Аллилуиа.
Сей Кондак глаголи трижды и паки Икос 1, и Кондак 1.
Молитва священномученику Петру, архиепископу Воронежскому, новомученику Соловецкому
О досточудне Петре, священномучениче и страстотерпче славный, един от сонма новомучеников соловецких и всея земли российския, граду Воронежу похвало, пастырю дивный стада Христова, верный служителю Божий, защитителю ревностный Церкве православныя: все житие твое любве ко Господу и страданий о Христе исполнено: многи мучения, болезни и скорби, изгнания и заточения Его ради претерпев, исповедник безстрашен явился еси, и венцем нетленныя твоея славы украсил еси Церковь русскую. Вся предав в руце Божии, добльственне службу твою на земли совершив, в Голгофе анзерстей кончину мученическую прияти сподобился еси, Богоблаженне. Ныне к небесному лику причтенный, в царстве божественныя лювбе пребываеши, со многими жители горняго Иерусалима исполнения жертвы мученическия за Христа ожидая: егда вся, имже належит быти, совершатся в пределех земных. О пресвятый отче наш Петре, помози нам храмину сердца своего незапустевшу хранити, научи нас радость во страданиих о Христе обретати, озари путь наш крестный сиянием твоея святыни. Буди и ныне нам утверждение в вере, да пришед обретет ю Господь не угаснувшу. Умоли Творца всяческих даровати нам силу и крепость: да не устрашившеся страха лукаваго, исповедаем твердо Христа, и Его милосердием части злых избавимся в день страшный воздаяния, и в радость вечную вселимся, славяще о всем вседержителя Бога, и твое благодатное предстательство во веки веков. Аминь.