Возбранной Воеводе Владычице нашей Богородице, Млекопитательнице Спаса нашего, похвальное пение приносим мы, недостойнии, о явлении чудотворныя иконы Твоея, Всеблагая; Ты же, яко имущая милосердие неисчетное, соблюди и спаси от всяких бед рабы Твоя, с верою и любовию вопиющия Ти: Радуйся, Благодатная Богородице Дево, Млекопитательнице Спаса душ наших.
Архангел Гавриил послан бысть к Тебе, Богородице, благовестити нетленное рождение от Тебе Бога Слова, иже и рече Тебе со страхом и любовию: «Радуйся, Благодатная, Господь с Тобою!», емуже подражающе и мы, смиреннии, дерзаем вопити к Тебе таковая:
Радуйся, человеков спасение.
Радуйся, пророческих глагол исполнение.
Радуйся, средостение вражды древния разрушившая.
Радуйся, вочеловечению единаго от Троицы непорочно послужившая.
Радуйся, Творца небесе и земли воплотившая.
Радуйся, Питателя вселенныя млекопитавшая.
Радуйся, чудесы божественными просиявшая.
Радуйся, знамения силою Сына Твоего сотворшая.
Радуйся, мира горняго утешение.
Радуйся, мира дольнаго заступление.
Радуйся, Благодатная Богородице Дево, Млекопитательнице Спаса душ наших.
Видяще Тя на иконе Твоей святей, Богомати Владычице, Богомладенца Христа на руках Твоих держащую и от сосцу Твоею Его млекопитающую, умиляемся душами нашими и, благоговейно покланяющеся Тебе и рождшемуся от Тебе Господу, рабски Ему вопием: Аллилуиа.
Разум человеческий превосходит велие таинство воплощения от Тебе, Богородице, Единаго от Троицы, Христа Жизнодавца, Егоже ни Ангели небеснии постигнути могут; мы же, земнии и перстнии, Непостижимому дивящеся и крайнее снисхождение Владычне прославляюще, Тебе, Служительнице таинства и Млекопитательнице Жизни нашея, благоумиленно глаголем:
Радуйся, Иоакима и Анны прозябение святое.
Радуйся, неплодныя утробы плод богодарованный.
Радуйся, в зачатии Твоем чудесы прославленная.
Радуйся, в рождении Твоем благодатию Божиею осененная.
Радуйся, в благовещении Твоем смирение святое показавшая.
Радуйся, девство и матерство пречудно в Себе сочетавшая.
Радуйся, Спасителя миру нетленно рождшая.
Радуйся, яко младенца Его млекопитавшая.
Радуйся, велие вселенныя чудо.
Радуйся, непостижимая разумению тайно.
Радуйся, Божества кивоте освященный.
Радуйся, Святая Святых большая.
Радуйся, Благодатная Богородице Дево, Млекопитательнице Спаса душ наших.
Сила Вышняго осени Тя, Марие Богоневестная, и Дух Святый найде на Тя с благовещением архангеловым, емуже смиренномудренно внемлющи, зачала еси во утробе Твоей Предвечнаго Бога и явилася еси палата преукрашенная воплотившагося Слова, Емуже, яко Творцу и Создателю нашему, бренными усты вопием: Аллилуиа.
Имущи любовь велию к людем, искупленным честною Кровию Сына Твоего и Бога, Владычице Преблагая, прияла еси от Него власть строити и покрывати род христианский, емуже во утешение и цельбу икону Твою святую милостиво даровала еси, чудес благодатию прославленную во вселенней. О сем убо благодаряще Тя, яко Благодетельницу нашу, сице Тебе зовем:
Радуйся, Звездо пресветлая, являющая нам Солнце правды.
Радуйся, одеянная в боголепную ризу милосердия и щедрот.
Радуйся, приемшая власть превыше всякия власти.
Радуйся, получившая велие дерзновение к Сыну Твоему и Богу.
Радуйся, выну ходатайствующая пред Ним за род христианский.
Радуйся, присно умоляющая Его за людская согрешения.
Радуйся, скорая наша Помощнице.
Радуйся, милостивая наша Заступнице.
Радуйся, грешных Споручнице.
Радуйся, бедствующих Избавительнице.
Радуйся, Отрадо наша пресвятая.
Радуйся, Надеждо наша всеблагая.
Радуйся, Благодатная Богородице Дево, Млекопитательнице Спаса душ наших.
Бурею недоумения и радости одержим, первосвятитель сербский Савва благоговейно прият чудотворную икону Твою «Млекопитательницу», Богородице Дево, от рук преподобных отцев Великия Лавры великаго во отцех Саввы Освященнаго, по егоже завету икона сия от них ныне ему даровася, и благодарно славляше сей многопетое имя Твое, зовя рождшемуся от Тебе Христу Богу: Аллилуиа.
Слышавше иноцы Святыя Горы Афонския, яко чудотворная икона Твоя «Млекопитательница», Богородице Владычице, от Иерусалима к ним грядет, с радостию и благоговением текоша в сретение ея и, узревше ю, рукама святителя Саввы носимую, усердно ей покланяхуся и с веселием духовным сице Тебе вопияху:
Радуйся, Радосте наша святая.
Радуйся, Утешительнице наша благая.
Радуйся, Гору Афонскую в жребий Себе избравшая.
Радуйся, иконы Твоя чудотворныя в ней умножившая.
Радуйся, от Иерусалима утешение нам в иконе Твоей ниспославшая.
Радуйся, оною обитель Хилендарскую облагодетельствовавшая.
Радуйся, странствия нашего тихое прибежище.
Радуйся, спасения нашего небурное пристанище.
Радуйся, иноков Покровительнице.
Радуйся, пустынножителей Посетительнице.
Радуйся, отшельников Собеседнице.
Радуйся, затворников Укрепительнице.
Радуйся, Благодатная Богородице Дево, Млекопитательнице Спаса душ наших.
Боготечная звезда икона Твоя святая, Богомати Пречистая, от Иерусалима на Афон пренесенная святителем Саввою, в типикарнице пустынней от него поставлена бысть, в нейже и доныне пребывает, и исцеления недужным источает, подвизающи верных славити Тя и пети прославльшему Тя Богу: Аллилуиа.
Видяще, Владычице, зде на земли святую икону Твою, исцелений струи точащую, познаем величие и всемогущество Твое на небеси и к славословию милостей и чудес Твоих возбуждаемся, моляще усердно, да, якоже ныне Тя зрим на иконе, тако да узрим Тя по смерти в Сионе горнем, матерски на нас взирающу и милости Твоея не лишающу, и тако Тебе да поем:
Радуйся, Сиона горняго первейшее украшение.
Радуйся, живущих долу благонадежное заступление.
Радуйся, дев непорочных присное величание.
Радуйся, матрей детородящих нетрудное разрешение.
Радуйся, вдов Попечительнице.
Радуйся, сирот Окормительнице.
Радуйся, нищих призрение.
Радуйся, болящих исцеление.
Радуйся, заблуждших Путеводительнице.
Радуйся, юных к целомудрию Наставнице.
Радуйся, немудрых Вразумительнице.
Радуйся, даров благодатных независтная Подательнице.
Радуйся, Благодатная Богородице Дево, Млекопитательнице Спаса душ наших.
Проповедует милости и чудеса Твоя Свято-Афонская обитель святаго пророка Илии, стяжавши икону Твою чудотворную, «Млекопитательница» именуемую, Богородице Всеблагая, от неяже исцелений множество излияся и помощь Твоя благодатная подается всем требующим, верно вопиющим Сыну Твоему Христу Богу: Аллилуиа.
Возсияла еси лучами предивных чудес, Богородице Дево, от иконы Твоея святыя не токмо в обители Свято-Ильинстей на Афоне, но и на Руси, в нюже пренесеся сия от благоговейнаго инока Игнатия на благую потребу обители его святыя и множество исцелений источи недужным, о нихже благодаряще Тя, Целительницу Благую, хвалебно Тебе зовем:
Радуйся, от горних высот всех нас матернею любовию Твоею назирающая.
Радуйся, юдоль земную многоскорбную благодеянии Твоими посещающая.
Радуйся, старца смиреннаго и безкнижнаго к прославлению иконы Твоея святыя избравшая.
Радуйся, чрез него многия милости Твоя людем проявившая.
Радуйся, не токмо на Афоне, но и в Руси чудесы икону Твою прославльшая.
Радуйся, немало время тамо иконе Твоей пребыти благоволившая.
Радуйся, в сиротстве от нея обитель Твою не оставльшая.
Радуйся, икону Твою в ню милостивно возвратившая.
Радуйся, лицезрением чудотворнаго образа Твоего доныне нас утешающая.
Радуйся, его святым осенением от всяких бед нас спасающая.
Радуйся, Церкви Христовы сияющая лепото.
Радуйся, христиан православных крепкое упование.
Радуйся, Благодатная Богородице Дево, Млекопитательнице Спаса душ наших.
Хотящим нам, Владычице, благоговейно лобызати чудотворный образ Твой, не возбрани нам сие грехов ради наших, Всеблагая, но сице и недостойных с любовию приими, и благослови, и вся прошения наша во благо исполни; вемы бо, Царице, милосердие Твое неисчетное, и сего ради со упованием благим к Тебе припадаем и, славяще чудеса Твоя, поем Богу: Аллилуиа.
Дивно прославила еси чудесы икону Твою, «Млекопитательница» именуемую, Богородице Дево, на нейже доброту Твою девственную созерцающе и рукама Твоима держимаго, краснейшаго паче сынов человеческих, Богомладенца Иисуса видяще, на славословие Твое подвизаемся и сице Тебе зовем:
Радуйся, девства Цвете Неувядаемый.
Радуйся, матерей похвало и славо.
Радуйся, мироположнице благоухания Христова.
Радуйся, алавастре врачевания, на всяк недуг врачевство содержай.
Радуйся, светоносная палато святейшаго Слова.
Радуйся, преукрашенная ложнице Царя царей.
Радуйся, горо святая, снитием Божиим прославленная.
Радуйся, всезлатая стамно манны божественныя.
Радуйся, клеще таинственная.
Радуйся, купино неопалимая.
Радуйся, глубино неудобозримая.
Радуйся, Невесто Неневестная.
Радуйся, Благодатная Богородице Дево, Млекопитательнице Спаса душ наших.
Странствие наше земное, многоскорбное и многомятежное, услаждаеши нам, Владычице, иконою Твоею святою, на нюже взирающе с верою и любовию, уверяемся, яко имамы Тя на небеси Матерь и Покровительницу Всеблагую, присно готовую помогати нам в жизни, в смерти и по смерти; о сем убо радующеся и благодаряще Тя из глубины души, вопием Создателю нашему: Аллилуиа.
Весь мир христианский славит Преблагословенное имя Твое, Марие Богородице, и всякому верному сладостно и утешительно есть взирати на пречистую Твою икону, от неяже обыкла еси являти многия милости и чудеса бедствующим и болящим человеком. Сего ради и мы, смиреннии, чудотворному образу Твоему благоговейно покланяемся, Владычице Всеблагая, и с любовию сице Тебе зовем:
Радуйся, святостию Херувимы превыщающая.
Радуйся, чистотою Серафимы превосходящая.
Радуйся, яко горняя и дольняя поют рождеству Твоему немолчныя хвалы.
Радуйся, яко небо и землю воедино совокупила еси.
Радуйся, кающихся грешников с Богом примирение.
Радуйся, райских дверей отверзение.
Радуйся, Хлеба, сшедшаго с небес, Трапезо Пресвятая.
Радуйся, ниво неоранная, Клас спасительный миру израстившая.
Радуйся, лозо благословенная, Грозд святый плодопринесшая.
Радуйся, чаше драгая, в нейже нас ради уготовася Плоть и Кровь Христова.
Радуйся, источниче божественный, воду жизни нам источивый.
Радуйся, облаче легкий, имже к нам Сын Божий прииде.
Радуйся, Благодатная Богородице Дево, Млекопитательнице Спаса душ наших.
Всяку похвалу превосходит слава Твоя, Преблагословенная и Препрославленная Мати Господа нашего, недоумеют и умове безплотнии пети Тя по достоянию, паче же нам, земным и перстным, сие неудобно есть; но, любовию Твоею побеждаеми, дерзаем приносити Тебе смиренное пение хвалы и благодарения за премногую милость Твою к роду человеческому, егоже возлюбила еси и емуже благотворити не престаеши, Всеблагая, и сим подвизаеши нас благодарно пети Богу: Аллилуиа.
Витии суемудрии человечестии не могут постигнути велию тайну Твоего приснодевства, Богородице: како в рождестве и по рождестве Дева пребыла еси; утаи бо сие Господь от премудрых мира и верою откры смиренным, трепещущим словес Его, от нихже православно и несумненно Приснодева быти проповедуешися. Приими убо о сем и наше исповедание вседушевное, о Мати и Дево, и укрепи нас последовати Тебе непорочным житием и сердечною чистотою, да возможем неосужденно пети Тебе:
Радуйся, святых обителей покрове и снабдение.
Радуйся, иноков и инокинь благое вразумление.
Радуйся, ревнующим о целомудрии и чистоте присная Покровительнице.
Радуйся, девственных полков святая Предводительнице.
Радуйся, Едина непорочная и добрая в женах.
Радуйся, нетленная и неискусобрачная Агнца и Пастыря Мати.
Радуйся, о Тебе бо радуется Ангельский собор.
Радуйся, о Тебе бо торжествует человеческий род.
Радуйся, в ложеснах Твоих Бога нетесно вместившая.
Радуйся, Сего яко младенца млекопитавшая.
Радуйся, обителе прекрасная Духа Святаго.
Радуйся, таиннице Пресвятыя и Единосущныя Троицы.
Радуйся, Благодатная Богородице Дево, Млекопитательнице Спаса душ наших.
Спасительное прибежище в скорбех и бедах являешися христоименитым людем, Богородице Дево, и иконою Твоею святою утешение и помощь нам подаеши яко Мати Всеблагаго Бога. Темже поем чудеса Твоя и славим неисчетную милость Твою к христианскому роду, зовуще о Тебе благих Подателю Господу: Аллилуиа.
Стена еси девам, Богородице Дево, и иноческим соборам, Тобою хвалящимся и на Тя по Бозе все упование спасения возлагающим, икону же Твою святую благоговейно чествующим, Тебе бо даровася от Господа благодать всемирнаго заступления и верных в девстве и чистоте утверждения. Темже иноческаго жития рачителие под матерний Твой покров от бури страстей прибегают и благоотишие душевное обретают, верно к Тебе взывающе:
Радуйся, преподобных трудов Ходатаице блаженнаго упокоения.
Радуйся, иноком благоподвизающимся Подательнице вечнаго радования.
Радуйся, в тайне Богу работающих тайное награждение.
Радуйся, юношей и дев к святому девственному житию приведение.
Радуйся, неверных в веру чудесы Твоими обращающая.
Радуйся, верных благодатными дары ущедряющая.
Радуйся, всяк возраст матерняго благопопечения Твоего сподобляющая.
Радуйся, коемуждо по его потребе вся благоподавающая.
Радуйся, благочестивых домов и семейств благословение.
Радуйся, враждующих любвеобильное примирение.
Радуйся, обидимых и гонимых присно готовое заступление.
Радуйся, обидящих всегрозное обличение.
Радуйся, Благодатная Богородице Дево, Млекопитательнице Спаса душ наших.
Пение хвалебное приносим Ти, Всепетая Владычице, о явлении чудотворныя Твоея иконы и светло празднуем праздник Твой всечестный, возвещающе милости Твоя и чудеса, имиже обогатися вся вселенная. Ты же, Всеблагая, Сама научи нас благоприятно славити Тя, да не явимся пред Тобою безответны и изженемся от пречистаго лица Твоего яко недостойнии, но да прославим Тя с достойными, зовуще Богу: Аллилуиа.
Светлыми лучами чудес Твоих, Богородице Владычице, благодатно озаряеши мрак греховный, нас обдержащий, и на стезю спасения приводиши блуждающих в дебрех страстей. Молим убо Тя, Всеблагая: приведи нас к тихому пристанищу благочестиваго и богоугоднаго жития, да в мире глубоце принесем Ти песни таковыя:
Радуйся, величием чудес Твоих превосходящая разум человеческий.
Радуйся, сиянием славы Твоея удивляющая умы Ангельския.
Радуйся, низлагающая бесов и всю их темную силу.
Радуйся, подвижников благочестия укрепляющая в брани духовней со враги невидимыми.
Радуйся, в час кончины помогающая любовь и веру к Тебе имущим.
Радуйся, на мытарствах воздушных заступающая Тя славящих.
Радуйся, Судии Праведнаго известное умоление.
Радуйся, стяжавшая к Нему матернее дерзновение.
Радуйся, при Кресте Сына Твоего всех нас усыновившая.
Радуйся, благочестно верующим в Него Мати по благодати явльшаяся.
Радуйся, от востока и до запада непрестанно славимая.
Радуйся, от Ангел и человек превозносимая.
Радуйся, Благодатная Богородице Дево, Млекопитательнице Спаса душ наших.
Благодать и милость испроси нам, Всеблагословенная Владычице, у Сына Твоего Христа Бога и, простерши к Нему богоприемныя руце Твои, умоли Его вся ны спасти и избавити от погибели вечныя: много бо может молитва Твоя матерняя ко благосердию Владыки и ничтоже невозможно всесильному пред Ним ходатайству Твоему, о немже радующеся, поем Триединому Богу: Аллилуиа.
Поюще преславная чудеса Твоя, Богородице Дево, от иконы Твоея святыя явленная и присно являемая, хвалим, славим и величаем Тя, возвеличившую род наш непорочною Твою чистотою. Ты же, Всеблагая, освяти и спаси славящия Тя и сподоби нас причастники быти славы небесныя, да радостно Тебе взываем:
Радуйся, голубице кроткая и незлобивая.
Радуйся, Мати чадолюбивая.
Радуйся, Агнице, Агнца Божия во чреве Твоем упасшая.
Радуйся, от сосцу Твоею Его млекопитавшая.
Радуйся, пророческая светлая похвало.
Радуйся, апостольская нетленная славо.
Радуйся, мучеников укрепление.
Радуйся, святителей утешение.
Радуйся, преподобных пречестный венче.
Радуйся, праведных непрестающее удивление.
Радуйся, всех святых присное радование.
Радуйся, христиан непостыдное прибежище.
Радуйся, Благодатная Богородице Дево, Млекопитательнице Спаса душ наших.
О Всепетая Мати и Млекопитательнице Святых Святейшаго Слова! Нынешнее наше приемши хвалебное пение, пред святою Твоею иконою днесь приносимое, от всякия свободи муки всех верно Тя славящих и вопиющих Сыну Твоему, Христу Богу: Аллилуиа.
(Этот кондак читается трижды, затем икос 1 и кондак 1)
Молитва
Приими, Госпоже Богородительнице, слезная моления рабов Твоих, к Тебе притекающих. Зрим Тя на святей иконе, на руках носящую и млеком питающую Сына Твоего и Бога нашего, Господа Иисуса Христа. Аще и безболезненно родила еси Его, обаче матерния скорби веси и немощи сынов и дщерей человеческих зриши. Темже тепле припадающе к цельбоносному образу Твоему и умиленно сей лобызающе, молим Тя, Всемилостивая Владычице: нас, грешных, осужденных в болезнех родити и в печалех питати чада наша, милостивно пощади и сострадательно заступи, младенцы же наша, такожде и родившия их от тяжкаго недуга и горькия скорби избави. Даруй им здравие и благомощие, да и питаемии от силы в силу возрастати будут, и питающия их исполнятся радостию и утешением, яко да и ныне предстательством Твоим из уст младенец и ссущих Господь совершит хвалу Свою. О Мати Сына Божия! Умилосердися на матери сынов человеческих и на немощныя люди Твоя: постигающия нас болезни скоро исцели, належащия на нас скорби и печали утоли, и не презри слез и воздыханий рабов Твоих. Услыши нас в день скорби пред иконою Твоею припадающих, и в день радости и избавления приими благодарная хваления сердец наших. Вознеси мольбы наша к престолу Сына Твоего и Бога нашего, да милостив будет ко грехом и немощем нашим и пробавит милость Свою ведущим имя Его, яко да и мы, и чада наша прославим Тя, милосердую Заступницу и верную Надежду рода нашего, во веки веков. Аминь.