Добродетельми светяся, отче, паствити Христовы овцы поставляемь и Преподобнаго Сергия красен храм внутрь епископии воздвигл еси. Яко душею любя того, подвиги его почитая и смолитвенника себе о стаде твоем ко Господу полагая, ныне срадуешися Ему, отче священне, моли спастися душам нашим.
Обновила еси, Чистая, Божественным Рождеством Твоим истлевшее во страстех земнородных мертвенное существо и воздвигла еси вся от смерти к жизни нетления. Темже Тя по долгу блажим вси, Дево Препрославленная, якоже прорекла еси.
Ирмос: Любве ради, Щедре, Твоего образа на Кресте Твоем стал еси, и растаяшася языцы: Ты бо еси, Человеколюбче, крепость моя и хваление.
Божественнаго Предтечи, великаго Иоанна, храм священный воздвигл еси, яко верен, душу тому и тело в снабдение возлагая, отче священне.
Яко рачитель и подражатель тепл Крестителю Господню показался еси, темже в храме его, егоже тому создал еси, тело твое полагаеши, и во дворы его приятися желая.
Слава: Возлюбил еси, архиерею, священных мужей песньми восхваляти священныя их памяти, яко рачитель доброты их и подражатель деяний Боголюбезных.
И ныне: Имея Тя Помощницу, кого убоюся когда или устрашуся? Кто же, хотя скорбная навести рабу Твоему, и не устрашится Тебе, Пречистая, и не падет под нозе?
Ирмос: Нечестивии не узрят славы Твоей, Христе, но мы Тя, Единородне, Отеческия Славы Сияние Божества, от нощи утренююще, воспеваем Тя, Человеколюбче.
Приносимое яко честно возложение Богу и освященно первопрестольником Российским, Ионою, твое священное пастырства возведение, яко пасущу ти Господни люди, Ионо святителю, преподобием и кротостию.
Аще и на преставление митрополитом Ионою зовом самем погребсти его, отрекся еси старости ради приити, Ионо священне, обаче обещался еси ему видети того по своем преставлении во свете Христове.
Слава: Песньми почел еси память иерарха, Ионы митрополита, и хвалами, яко достойно, ублажил еси того: сам ныне, иерарше Ионо, причаствуеши похвалам его и по сотворению твоему к ближнему восприемлеши.
И ныне: Низложи, Владычице, врагов моих шатание, Пренепорочная, Тя бо имам и Предстательницу, и надежду, и помощь крепкую. Ты мя соблюди, Чистая, навета вражия, избавляющи лаяния тех.
Ирмос: Пучиною житейскою деяньми моими снидох во ад, но, яко от кита Иона, тако вопию: из глубины зол возведи, молюся, Сыне Божий и Слове.
Прильпе любовию душа твоя к Господню Крестителю, святителю Богоблаженне, темже тело твое честное в честнем храме его нетленно во многа лета соблюдено явися.
Красота говения твоего еже ко Господу привлече благодать благолепию души твоея, священне, и возведе тя Великому Новуграду отца и первопрестольника, Господня священства преподобна показа.
Слава: Прослави тя Господь, Ионо, тело твое соблюде во многа лета нетленно, являя тя общника раб Своих, ихже подражатель в житии был еси, сим и по смерти достойно соублажаешися, блаженне.
И ныне: Всесвятая Дево, Предстательнице и покрове всех верных, предстани и избави ны враг наших нападения, и от всякия скорби, и Страшнаго Суда испытания, да верою присно пою Тя.
Свыше приял еси Божественную благодать ходатайствовати Богу и человеком, яко архиерей возношение вознося, и мир людем твоим снося, и обилие плодов, Ионо блаженне; ты бо еси Великаго Новаграда похвала и сущих о нем радость.
Похвалим достойно ныне иерарха, яко от чрева матере своея избран Богу во освящение, и, отрочищ еще сый, пронаречен во архиерейство граду своему от Бога. Темже не от человек произведен архиерей, но свыше пронаречен и Духом помазан, священнодействуя Богоприятно, и умирение, и тишину молитвами своими дарует, и обилие плодов. Той бо Великаго Новаграда слава и всех, иже о нем, радость.
Ирмос: Авраамстии иногда в Вавилоне отроцы пещный пламень попраша, песньми взывающе: отец наших Боже, благословен еси.
Зиждеши Божественному Имени Богатною рукою в пустынях удалено, Ионо, священныя храмы великих Богоугодник, Божественных архиерей с преподобными.
Нову обитель составляеши великих триех иерарх и монашестей черте благоутишно пристанище, отче, местным же удалением обручая им безмолвие.
Слава: Виноград насаждая Богу, ограду священную, вино износящую веселящее, в священных храмех Божественное пение, Иже в Троице Единому, хвалиму и благословиму Богу отец наших.
И ныне: Едину Всесвятую, Единому Богу вселение едино пречисто, от Иоакима и Анны раждаему, священным храмом почитая, яко в нем воспевати всепетое Девы Рождество.
Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.
Кроткое и молчаливое нрава твоего восприем, Господь, блаженне, постави тя пастыря людем Своим, на кого бо призрит? Но на кроткаго и молчащаго, трепещущаго словес Его.
Уста вдов благословиша тя, заступления от тебе сподобльшеся, иерарше блаженне, благо угождающаго Богу, по непорочному Иову, и обидимыя от насилия изимающаго.
Слава: Людие твои, священноначальниче преподобне, сетоваху сиротства своего в твоем к Богу отшествии, добраго пастыря своего, ныне же священною памятию твоею возрадовашася всяческая.
И ныне: На Тя всю надежду спасения моего возложих, Богомати Неискусобрачная, и Тя призываю присно на помощь: спаси мя от напастей и печали врага, разреши пленицу зол моих и Суда мя исхити.
Ирмос: Сотвори державу мышцею Своею, низложи бо сильныя со престол и вознесе смиренныя Бог Израилев. В нихже посети нас Восток с высоты и направил ны есть на путь мира.
Блаженнаго Евфимия престол наследовал еси, священне Ионо, яко подражатель добродетелей его был еси и, песньми сего ублажив память изрядно, сам ныне обществуешися хвалам его, яко соводворяешися ему во Свете незаходимем.
В землю кротких со архиереи достойно вселился еси, иерарше Ионо, кроткаго Учителя учениче. Тому предстани о нас, поющих память твою, и испроси нам соблазнов оставление, и шуия части в день Суда избавление, и лютыя геенны, блаженне.
Слава: Не изнеможет всяк глагол, иже от Бога, убога тя и сироту Отец сирот приемлет, Бог, Иже на престоле со князи посади тя, людем Своим яко достойна пастыря производя, отца сиротам и заступника вдовам тепла положи тя, Ионо блаженне.
И ныне: Просвети, Чистая, любовию чтущих Тя и величающих, разреши страсти наша. Тем, Дево, устави бурю, лукаваго соблазны от среды отжени, варвары покори православным людем молитвами Твоими.
Канон первый преподобному Иосифу Волоцкому
глас 2
Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть, Препрославленный Господь, славно бо прославися.
Тебе твоего, блаженне, учения долг приносяще, воздаяния простираем, венец похвальный плетуще: ты же любовию увязен, пребогате, твоими святыми молитвами, благодать нам подаждь духовную.
Всегубительное стремление страстей, отче, увядил еси, словесным объят Богомудрием, благопребытен был еси, и благогласен, кроток же и смирен, словом же премудрости, преподобне отче Иосифе, и разумом венчан.
Священно украсил еси себе, преподобне отче, детельным разумом благодати, Богоглаголиве Иосифе, желая венца славы Христовы, и своея надежды изрядно, блаженне, не погрешил еси.
Целомудрие удержал еси яве, крайнюю же кротость, и высокогласное смирение: имиже возвышаемь, трудов твоих действом и видением радуяся принесеся, венец неувядаемый приим трудов твоих воздаяния.
Богородичен: Тварей явилася еси Чистая, всех видимых и невидимых превышши Всенепорочная, Зиждителя бо родила еси, якоже изволи воплотитися во утробе Твоей. Егоже со дерзновением моли спасти поющия Тя.
Ирмос: Процвела есть пустыня, яко крин Господи, языческая неплодящая церковь, пришествием Твоим, в нейже утвердися мое сердце.
Даждь, Христе Спасе, прощение многих наших согрешений, яко да и мы почитаем память Твоего угодника преподобнаго Иосифа, его же молитвами спаси ны.
Твоими молитвами Милостиваго умоляй Бога, преподобне отче наш Иосифе, и греховный мрак печали нашея разори, и благодушия утешение низпосли.
От младенства ты, блаженне Иосифе, познан был еси Богом, и на Того надеялся еси, наставляемь на спасительная Его повеления. Емуже ныне предстоя, со дерзновением о нас молися.
Богородичен: Единаго Святыя Троицы, Слова Сына родила еси, Дево Пречистая. Егоже с преподобным Иосифом о рабех Твоих моли, верою просящих грехов прощения.
Христова угодника, Евангельскаго учения послушника, светло празднуем преподобнаго Иосифа память, приидите ублажим странноприимца суща, сиротам и вдовам заступника тепла, и нищим дателя нескудна, целомудрия хранителя, и добродетелей делателя, и ересей обличителя непостыдна, и светильника русскаго, егоже ради просяще от Христа душам нашим спасения, и миру велия милости.
Ирмос: Пришел еси от Девы, не ходатай ни ангел, но Сам, Господи, воплощся, и спасл еси всего мя человека. Тем зову Ти: слава силе Твоей, Господи.
Ты, преподобне Иосифе, монашествующих был еси венец, не камением многоценным украшен, но добродетельми обложен, и явился еси, блаженне, благодарованное воистину украшение.
Божественную, Богомудре, почтил еси Мудрость, яже тя даровании благими обогати, славу вечную тебе исходатайствовавши, преподобне отче Иосифе, всечестне.