Обнови́ла еси́, Чи́стая, Боже́ственным рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся́ от сме́рти к животу́ нетле́ния. Те́мже Тя́ по до́лгу блажи́м вси́, Де́во препросла́вленная, я́коже прорекла́ еси́.
На Кресте́ Тя́ возвы́шена я́ко узре́ Пречи́стая Ма́ти Твоя́, Сло́ве Бо́жий, ма́терски рыда́ющи, веща́ше: что́ но́вое и стра́нное сие́ чу́до, Сы́не Мо́й? Ка́ко, Жи́знь все́х, вкуша́еши сме́рти, оживи́ти ме́ртвыя хотя́, я́ко Милосе́рд?
Ирмо́с:Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.
Хотя́й вся́ спасти́ Госпо́дь от и́га тя́ рабо́ты священноде́йственника, блаже́нне, поставля́ет, священноде́йствующа честно́е, богоявле́нне, Ева́нгелие.
Сы́н ты́ бы́л еси́ Бо́жий благода́тию, Того́ возвеща́я Единоро́дное Сло́во Присносу́щное, с пло́тию су́щим на земли́ пресла́вно прибли́жшася.
Сло́вом суда́ и боже́ственным пома́занием свяще́нства, я́ко святи́тель, всему́дре, пожи́л еси́, и терпе́нием лю́тых боже́ствен му́ченик бы́л еси́.
Богоро́дичен: Естество́м Безнача́льный Сы́н и Безле́тный вре́менное от Де́вы Отрокови́цы нача́ло во́льно прие́млет, су́щия под ле́том от тли́ обнови́ти промышля́я.
Ирмо́с:Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Ума́ острото́ю и души́, блаже́нне, чистото́ю, вра́жия прелете́в се́ти, возвы́сился еси́ к небе́сным селе́нием, криле́ богоразу́мия прие́м.
Тво́й апо́стол, Бла́же, плотско́е Твое́ к челове́ком прише́ствие пропове́да, заблу́ждшия к позна́нию наставля́я и просвеща́я заре́ю ве́ры.
Хра́м яви́лся еси́ всеблаголе́пен, вну́трь име́я, я́ко све́щник, сия́ние Боже́ственныя благода́ти, зда́нием Боже́ственнаго Ду́ха основа́н, блаже́нне Они́симе.
Богоро́дичен: Греха́ моего́ плени́цы Твои́м хода́тайством и предста́тельством, Де́во, расто́ргни: Ты́ бо отча́янных еси́ наде́жда, ве́рою притека́ющих в боже́ственный кро́в Тво́й.
Ирмо́с:Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.
Облиста́в, я́ко со́лнце, с небесе́ зва́нный, просвеще́нием благода́ти оста́ви тебе́ зарю́, издале́ча благомо́щно отгоня́щу неве́дения мра́к, всеблаже́нне.
Све́тло обличи́л еси́ беззако́нных гнила́я и злочести́вая шата́ния, благоче́стия веща́я вои́стинну Боже́ственная уче́ния, святи́телю Госпо́день всече́стне.
Богоро́дичен: Сы́й пови́нен грехо́м и лю́те уя́звлен, окая́нный, к Тебе́, Богома́ти, ми́лостивей прибега́ю, моля́ся стру́пы очи́стити прегреше́ний мои́х.
Я́ко луча́, возсия́л еси́ вселе́нней, заря́ми сия́я со́лнца, блаже́нне, всесве́тлаго Па́вла, ми́р просвети́вшаго, те́мже тя́ почита́ем, Они́симе сла́вне.
Ирмо́с:Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Блаже́нную прия́л еси́, Они́симе, кончи́ну и неги́блемое безсме́ртие наде́ждею, блаже́нне, чи́стою и пое́ши, ра́дуяся, Христу́: благослове́н еси́, Бо́же оте́ц на́ших.
Тве́рдым твои́м мудрова́нием, Они́симе, пре́лести кова́рства попра́л еси́, благоче́стия сия́ низложи́в ору́диями, богому́дре, вопия́: благослове́н еси́, Бо́же оте́ц на́ших.
Богоро́дичен: Я́ко су́щи Всенепоро́чная, Богоневе́сто, Сло́во Бо́жие зачала́ еси́, неразлу́чно в не́дрех Отца́ Су́ща, рука́ми же держи́мо Твои́ми, благослове́нна Богома́ти Неискусобра́чная.
Ирмо́с:Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Со а́нгелы лику́я, блаже́нне Они́симе, муче́ния венце́м украша́емь, престо́лу же све́тло Влады́чню предстои́ши: Его́же превозно́сим во вся́ ве́ки.
Апо́столу Бо́жию служа́, боже́ственне Они́симе, неизрече́нных чуде́с име́л еси́ де́йство, пропове́дник и́стинен Христо́в, блаже́нне, бы́в: Его́же превозно́сим во вся́ ве́ки.
Исцеле́ний благода́тию от незави́стна исто́чника Спа́сова обогати́вся, все́м препода́л еси́, Сего́ повину́яся, блаже́нне, Боже́ственным веле́нием: Его́же превозно́сим во вся́ ве́ки.
Богоро́дичен: Научи́вшеся чудеси́ Твоего́ Рождества́, воспева́ем я́ко Боже́ственно па́че смы́сла, Всесвята́я, Чи́стая, Богома́ти Пренепоро́чная, та́инство, Тя́ превозноша́юще во вся́ ве́ки.
Ирмо́с:Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.
Свети́льник пресве́тел показа́лся еси́, све́тлыми заря́ми сия́я духо́вными, мирски́я концы́ освеща́я све́том богоразу́мия, блаже́нне Они́симе. Те́мже со апо́стольскими ли́ки тя́ велича́ем.
Плоды́ духо́вными ты́ укра́шен, на небеса́ взя́лся еси́, богоявле́нне, ра́дуяся, Христо́в апо́стол яви́лся еси́ че́стен, прему́др святи́тель, му́ченик непобеди́мь, пропове́дник и́стинен су́щих па́че ума́, богоблаже́нне.
При́сно предста́ни пою́щим тя́ всегда́ и твое́ восхваля́ющим торжество́, Влады́це предстоя́, Они́симе, ве́сь просвеще́н, ве́сь пресве́тел, ве́сь отону́дными блиста́яся светлостьми́.
Богоро́дичен: Изба́влен бы́в Рождество́м Твои́м, Неискусобра́чная Ма́ти Бо́жия, дре́вняго ко́жнаго умерщвле́ния, и кля́твы, и тли́, и сме́рти, ю́же от греха́ оттря́с, с небе́сными во́и при́сно сла́влю Тя́.
Канон святому апостолу Павлу
глас 8
Творение преподобного Иоанна Дамаскина
Ирмос:Посеченный несекомаго пресече, и виде солнце землю, юже не виде, лютаго врага вода потопи, и непроходимое пройде Израиль, песнь же воспевашеся: Господеви поим, славно бо прославися.
Якоже сущая нарицая не сущая Христос Божественным разумом, Павле всеблаженне, Той из матерня чрева тя избра понести пред языки Божественное Его Имя, еже паче всякаго имене: славно бо прославися.
Будущее возвещая тебе сияние благочестия, Павле, и лести очищение, Христос явлься на горе молниезрачен, очи убо помрачает плотския, душевныя же вразумляет Троическим разумом: славно бо прославися.
Обрезание убо совершая осмодневное и ревнитель отеческих, Павле, преданий, от семене еврейска, колена Вениаминова, по закону же фарисей явлься, вменил еси вся уметы и Христа приобрел еси: славно бо прославися.
Богородичен: Чистая Мати Бога Вседержителя, от царскаго колена, Владычице, израстши и едина Бога, всеми царствующаго, рождшая плотию паче естества, от бед мя спаси, Сыну Твоему поюща: славно бо прославися.
Ирмос:Ты еси утверждение притекающих к Тебе, Господи, Ты еси свет омраченных, и поет Тя дух мой.
Ты камень основания верным душам положился еси многоценен, краеуголен Спаса и Господа.
Павле всеблаженне, на основании твоем, молися, добродетелей всехвальных наздатися светлости.
Всегда мертвость Иисусову на твоем теле совершенно, Павле, обносяй, сподобился еси истинныя жизни.
Богородичен: Тя вси стяжахом прибежище и стену нашу, христиане, Тя славословим немолчно, Безневестная.
Ирмос:Всел еси на кони, апостолы Твоя, Господи, и приял еси рукама Твоима узды их, и спасение бысть еждение Твое верно поющим: слава силе Твоей, Господи.
Вседе, якоже лев, яровидно погубляя Христову Церковь, Савл иногда, ят же быв Божественным гласом Агнца Божия, Егоже гоняше, стадо яко пастырю вручает.
Хотяй просветити вселенную омрачается, Анания же к сему послася, душевное же просвещение даяй и телесное от Божественнаго явления, сосуд избран показав того.
Павлом достойно Дамаск напояется: от сего бо, якоже от рая иногда, вод Божественных сей произыде великий источник и упои всю Богоразумием независтно землю.
Богородичен: Низложи сильныя со престол Господь, Дева и Мати якоже рече, алчущия же Божественных благ исполни, верою зовущия: слава силе Твоей, Господи.
Ирмос:Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.
Ты истинную избрал еси, Павле, похвалу, Крест Царя Христа присно нося, якоже победу, апостоле.
Тебе еже жити, Христос, и еже умрети, приобретение изрядно: любовию бо сраспялся еси Распеншемуся нас ради, Павле преславне.
Радуешися воистину о Господе, Павле честный, изшед из телесе и отшед ко Христу, Жизнодавцу Богу.
Богородичен: Моли присно Сына Твоего и Бога нашего, Неискусобрачная Марие Чистая, послати нам, верным, милость.
Ирмос:Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.
Вся пренебрег красная мира, уязвлен Владычнею любовию и общаго спасения желанием, свидетельствовати тому изволив, о Павле блаженне, и ныне о вселенней молися.
Яко изрядный Владыце подобник и в Того одеян, Павле, воистину всем был еси всяк, да вся приобрящеши и спасеши люди, и спасл еси яко воистину, Христу уловив концы.
Достойно тебе дарова Христос житие, апостоле Павле, на Небесех: пребывающаго бо зде не возжелал еси града, блаженне, верен служитель быв и строитель таин Его.
Богородичен: Призре на Тя Господь, мое обновляя существо, яко Силен, величия сотворь, Богородительнице, якоже рекла еси, Всенепорочная, и спасе мя Тобою из тли Бог мой, яко Милосерд.