Твердыя и Боговещанныя проповедатели, верх апостолов Твоих, Господи, приял еси в наслаждение благих Твоих и покой: болезни бо онех и смерть приял еси паче всякаго всеплодия, Едине, сведый сердечная.
Уясни мой язык, Спасе мой, разширив моя уста и исполнив я, умили сердце мое, да, яже глаголю, последую и, яже убо учу, сотворю первее: всяк бо творя и уча, рече, сей велик есть. Аще бо глаголю, и не творю, яко медь звенящая вменюся; темже рещи ми подобная и творити полезная даруй, Едине, сведый сердечная.
Ирмос:На поле Деире иногда мучитель пещь постави на мучение богоносных, в нейже три отроки песнословяху Единаго Бога, троично воспеваху, глаголюще: отцев Боже, благословен еси.
Бысть, Христе, печать и венец апостолов Твоих, иже напоследок званный времен, тщанием же всех превозшед, с нимже людие церковнии поют Тебе: отец наших Боже, благословен еси.
Аще и гонив первее Церковь Твою Павел узник, но премину древнюю дерзость Твоею ревностию последи. Собра бо, Христе, языки, зовущия: отец наших Боже, благословен еси.
Ты из Иерусалима проповедав всем Евангелие, объят же окрест всю землю, Павле, даже до конец Иллирика, уча, взывал еси: отец наших Боже, благословен еси.
Во ужасе взят быв, третие достигл еси Небо, пребогате, и, услышав неизглаголанная словеса, вопиеши: слава превышнему Отцу и Сыну, сияние же сопрестольно испытающаго яве Духа Божия глубины.
Богородичен: Якоже на руно дождь, на Тя сниде, Дево, Христос Бог, и Плотоносец из Тебе пройде, соединяя прежде разстоящая, мир на земли и на Небеси даруя: отец наших Боже, благословен еси.
Ирмос:На горе святей прославльшася и в купине огнем Приснодевы Моисеови тайну явльшаго, Господа пойте и превозносите во вся веки.
Срастворися любовию Твоею Павел, добрым же изменением изступи: не себе бо живяше славный, имяше же, Щедре, живуща Тя в себе во вся веки.
Ты обручил еси, якоже невесту, представити Жениху Христу Церковь: невестовождь бо сея показался еси, Павле Богоносе. Темже тя славит во вся веки.
Подвизался еси добрым подвигом и, скончав течение твое законно, сокровище веры соблюл еси. Темже венцев, Павле, сподобился еси правды.
Богородичен: Радуйся, престоле огнезрачный Господень; радуйся, Невесто Неневестная, Дево, радуйся, облаче, Солнца возсиявшая правды, Егоже превозносим во вся веки.
Ирмос:Уставы прешла еси естества, Содетеля заченши и Господа, и дверь спасения мирови была еси. Тем Тя, Богородице, непрестанно величаем.
Твоим покланяемся веригам, яже за Христа, яко злодей, носил еси, язвы же, Павле, облобызаем, яже на славнем твоем и победоноснем носиши телеси.
Ныне разрешился еси, апостоле, ко Иже тобою непрестанно Желаемому, с Нимже яко служитель водворяяся, непрестанными мольбами твоя рабы к себе привлецы.
Ныне никакоже в гаданиих, ниже в зерцале Христос тебе зрим есть, лицем же паче зрится к лицу, совершенне тебе разум открывая Божества.
Богородичен: Ты, Пресвятая Богомати, похвала Христовых апостолов была еси, мучеников же слава и пророков основание. Темже, вернии, Тя вси достодолжно величаем.
Апостолов вси верх воспоем, Петра и Павла Божественныя, вселенныя светильники, проповедники веры, богословныя трубы, учений сказатели, церковныя столпы и разорители лести.
Канон преподобному Паисию Великому (поемый за избавление от муки без покаяния умерших)
Глас 6:
Ирмос:Помощник и Покровитель бысть мне во спасение, Сей мой Бог, и прославлю Его, Бог отца моего, и вознесу Его, славно бо прославися.
Припев:Преподобне отче Паисие, моли Бога о нас.
Иже вся умудряющему Богу молися, преподобне отче, о рабе своем, да отверзет ми устне недостойнии, и двигнет ми язык недоуменный, тесноту же и худогласие, отче, разверзи благодатию иже в тебе Святаго Духа, к пению чудес твоих.
Припев:Преподобне отче Паисие, моли Бога о нас.
Начну убо достохвальное и душеполезное житие твое от младенства, иже древле Египет великаго во пророцех произнесе Моисея, иже к Богу присвоением и великими чудесы прославися, тако и ныне вторицею прославлен показася Египет, тебе ради, отче Паисие, честным именем твоим и многими добродетельми обогатися, еже дарова тебе Господь, Егоже моли, да спасет души наша.
Слава: В Царство Небесное вшед узким путем и прискорбным по заповеди Владыки своего Христа, преподобне отче Паисие, широкий и пространный путь возненавидев, распространьшийся мрак ума моего отжени, да возмогу малое мое моление принести в пречестную память твою.
И ныне: Дух сокрушен подаждь ми, Благая, смиренно сердце, уму же чистоту, и житию исправление, и прегрешением оставление.
Ирмос:Утверди, Господи, на камени заповедей Твоих подвигшееся сердце мое, яко един Свят еси и Господь.
Припев:Преподобне отче Паисие, моли Бога о нас.
Каменю веры, Петру апостолу, уподобился еси, распятся мирови во всей жизни своей, преподобне Паисие, и нозе свои невозвратно к небесному шествию управил еси, и Горняго Иерусалима достигл еси, со святыми предстоя Святей Троице, моли о мне Единаго Благаго Человеколюбца.
Припев:Преподобне отче Паисие, моли Бога о нас.
Благочестиваго корени пресветлая отрасль, тебе избра Господь, Ангел рече матери твоей: сей Богу угоден. Ты же, от младенства крест свой взем, невозвратным путем Тому последова и возрасташе леты и разумом купно и благодатию Божиею. Моли дати ми отпущение грехов.
Слава: О, Владыко Господи, Иисусе Христе, кто не удивится Твоему человеколюбию, егда прииде желание преподобному иноческое житие получити к деланию заповедий Твоих, Твоею благодатию, яко агнец непорочен, изведеся в пустыню, и достиже словесных овец, и введеся к пастырю, блаженному Памве, и облечеся во иноческий образ, в немже утверди и мене, Господи, молитвами преподобнаго Паисия, к деланию заповедий Твоих.
И ныне: Лютых мя мук, и тьмы кромешныя, и геенны Твоими молитвами свободи, Дево, имаши бо волю и силу, Господа рождшая, Единаго Преблагаго.
Душу связав любовию Христовою и земная возненавидев вся, мудре, водворился еси, отче преподобне, в пустынях и горах, разумнаго древа вкусив, славне, ангельски просиял еси. Темже и мрак прошед плоти своея, тьму отгнал еси бесов, Паисие, инокующим первый, моли Христа Бога грехов оставление подати, чтущим любовию святую память твою.
Слава, и ныне:
Богородичен: Скорый покров, и помощь, и милость покажи на рабе Своем, Чистая, и волны укроти суетных помышлений, и падшую мою душу возстави, Богородице, вем бо, вем, яко можеши, елико хощеши.
Ирмос:Услыша пророк пришествие Твое, Господи, и убояся, яко хощеши от Девы родитися и человеком явитися, и глаголаше: услышах слух Твой и убояхся, слава силе Твоей, Господи.
Припев:Преподобне отче Паисие, моли Бога о нас.
Законострадальческое житие от мягких ногтей восприем, богомудре Паисие, даже до конца пребыл еси, яко божественен доблественник, венец приял еси победы от всех Царствующаго, молитвами своими избавляти от муки грешники, от нихже первый есмь аз, не забуди мене.
Припев:Преподобне отче Паисие, моли Бога о нас.
Имуще тя молитвенника крепка, блаженне Паисие, и обещника[197] печальным, предстателя, и поборника, и ходатая благочестна, от всяких спасаемся бед, напастей и обстояний.
Слава: Велию судеб бездну имеяй, Той тебе рече: се бо даю ти дар, да вся, еже просиши от Отца Моего во имя Мое, дастся тебе, о коем-либо грешнице помолишися, оставятся греси того; сего ради припадаю тебе, отче Паисие, имея бездну согрешений, да отпустит твоими молитвами, иже тебе обетова, яко Благ и Человеколюбец.
И ныне: Глагол провещай, егда право имам судитися, Богородительнице, к Своему Сыну, Пренепорочная, да обрящу Тя тогда прибежище и заступление, мук всех избавляющи.
Ирмос:От нощи утренююща, Человеколюбче, просвети, молюся, и настави и мене на повеления Твоя, и научи мя, Спасе, творити волю Твою.
Припев:Преподобне отче Паисие, моли Бога о нас.
Постом удручая тело свое, отче Паисие, иногда по причащении Тела и Крови Христовы, яко Ангел седмьдесять дней без пищи телесныя пребыл еси, Божественную державу неизреченную имея, и возмог в себе животную содержати силу благодатию, паче пищнаго укрепления, слава державе Твоей, Господи.
Припев:Преподобне отче Паисие, моли Бога о нас.
Яко Иоанн Креститель, узким и прискорбным путем ходити произволил еси, но той на Иордане, узрев Зиждителя своего, устрашися и вопияше: не смею приступити, сено, Огню; ты же, отче Паисие, в пустыни иногда явльшагося Господа не могий пречистаго лица Его зрети, паде, трепетом одержимь. Он же ти рече: не устрашайся, сию пустыню наполню спостники тебе. С нимиже молим тя, отче: не забуди нас, молитвенник твоих, помилованным быти.
Слава: Аз бо в начале моя пред Тобою зрю согрешения, и о моих беззакониих молю Твое милосердие, да простиши и покрыеши благоутробием Твоим множество грехов моих, и даждь ми прочее жизни сея время безгрешно проводити, да, удобь на спасения стезю потек, безпреткновенно к доброму концу достигну Твоею помощию, кроме бо Твоея помощи и наставления ничтоже совершити, и милость у Тебе получити кто может.
И ныне: Рабское приношу Ти моление, неразумный аз, и к Твоему прибегаю благоутробному милосердию, не отврати мене, Чистая, посрамлена.
Ирмос:Возопих всем сердцем моим к Щедрому Богу, и услыша мя от ада преисподняго и возведе от тли живот мой.
Припев:Преподобне отче Паисие, моли Бога о нас.
Бездушная тварь, Иордан, своего Творца устыдеся, вопияше: не могу Безгрешнаго омыти. Святый же, виде Господа, приим воду, прикоснуся Неприкосновенному, умы нозе Его и, пив воду, прия дар целити недуги и прогонити от человек бесы, сего ради и мы припадаем тебе, отче: молитвами твоими помилуй нас от всяких бесовских наведений.
Припев:Преподобне отче Паисие, моли Бога о нас.
По слову Господа нашего Иисуса Христа, обретохом тя, отче Паисие, великое прибежище, и заступника, и тепла молитвенника о гресех наших, якоже первее не отверже инока преставльшася и христианства отчуждившася, и во глубину адову пагубным безверием низведся, и, егда ощутився, притече к тебе, да умолиши Всемилостиваго. Щедрый же Господь явися тебе и глагола: угодниче Мой, добро есть Моей любви подобяся, печешися о грешных, изволяяй муки прияти за их избавление.
Припев:Преподобне отче Паисие, моли Бога о нас.
Принесеся молитва твоя и слезы к Богу, яко благовонный фимиам и жертва непорочна и благоприятна, и мене не забуди ходатайством твоим ко Пресвятей Богородице, слезы умиления даси ми, омый грехов моих бездну, избави мя от смертныя глубины, и ненадеющимся подаждь велию милость, и прости им согрешения.
Слава: Весь недоумением одержим есмь, егда прииму во уме той час страшный испытания Судии и Бога, и плачуся, и сетую, и рыдаю, поминая бездну зол моих. Темже спаси, Человеколюбче, молитвами Твоего угодника преподобнаго Паисия и избави мя муки, яко Благоутробен.
И ныне: От сердца стенания приношаю Ти, Пренепорочная, Твое прося благопребытное заступление. Помилуй всестрастную мою душу, умилосердися, Мати Многомилостиваго Бога, избавити мя Суда и езера огненнаго.
Житейских молв оставль, безмолвное житие возлюбил еси, Крестителю подобяся всеми образы, с нимже тя почитаем, отче отцев Паисие.
Христов глас услышав, шествовал еси во след Того заповедей, наг жития быв, отверг попечения, и вся стяжания, и имения, и братий своих, и любве матере, богоносне Паисие, един в пустынях Богови беседуя разумом, дарования приял еси, еже ми посли, в песнех поющему, отцев начальниче Паисие.
Ирмос:Согрешихом, беззаконновахом, неправдовахом пред Тобою, ниже соблюдохом, ниже сотворихом, якоже заповедал еси нам, но не предаждь нас до конца, отцев Боже.
Припев:Преподобне отче Паисие, моли Бога о нас.
Многих грехов исполнен аз, и твоя молитва, яко кадило благовонно, исправися, отче, бездну грехов моих потреби, и буяющее море злаго жития иссуши, и напоение гневное отжени, и целомудренный ум молитвами твоими утверди, отче Паисие.
Припев:Преподобне отче Паисие, моли Бога о нас.
Наставника тя и молитвенника тепла имущи и скораго помощника, яко стену тверду, и забрало недвижимо, и воеводу крепка и непобедима, молим тя: не забуди молитвенник твоих, избавляя от всякия печали и навет вражиих.
Припев:Преподобне отче Паисие, моли Бога о нас.
О, чудо велие, во един от дней седящу ти, отче Паисие, в пещере, бысть ти глас, глаголяй: мир тебе, возлюбленному Моему угоднику. Ты же, возстав со страхом и трепетом одержим, паде, поклонися и рече: се раб Твой, Господи. Сего ради молим тя: моли Человеколюбца, да спасет души наша.
Слава: Даждь ми, Христе, разум и терпение, еже не осуждати согрешающих с кичением фарисейским, но, яко мытарево покаяние, приими, и, яко блуднаго сына, Боже, вечери Твоея достойна мя яви, молитвами преподобнаго Паисия, и грехов прощение ми даруй.
И ныне: Возникни, о страстная душе, возстани, окаянная, бий из глубины в перси и испусти слез источники, да тя помилует, окаянную, Милосердая Мати Христа Бога.
Ирмос:Егоже воинства небесная славят и трепещут Херувими и Серафими, всяко дыхание и тварь, пойте, благословите и превозносите во вся веки.
Припев:Преподобне отче Паисие, моли Бога о нас.
Благодарно приносимое тебе пение сие не презри, отче Паисие, но паче приими и радости духовныя исполни, да без закоснения поклонюся твоему образу, идеже есть написан, исцеления всем подавающ.
Припев:Преподобне отче Паисие, моли Бога о нас.
Всепреподобному житию поревновав богоугодных отец, иже от века поживших, отче Паисие, во смирении и постничестве Христа ради, всю жизнь свою мученически скончал еси, и от бесов нападения много претерпел еси, и сих победив. Сего ради молю тя, отче: буйство, ярость и небрежение молитвами твоими отрини от мене.
Припев:Преподобне отче Паисие, моли Бога о нас.
Владыко Христе Боже Всещедрый, имиже веси судьбами, даждь ми ненавидети деяния лукаваго, Ты бо еси Бог наш, рекий: просите и приимете. Даждь любовь от всея души моея, молитвами преподобнаго отца Паисия, творити волю Твою спасительную.
Слава: Молютися: на мне, грешнем, долготерпи, Владыко, и не посецы мене, яко неплодное древо, посечением смертным, во огнь отсылая, но плодоносна мя сотвори, молитвами преподобнаго умолен бывая, время покаяния ми даждь, яко Человеколюбец.
И ныне: Струи низпосли слез и стенания от души сотвори ми, Чистая, внегда припадати Твоему покрову, яко да обрящу разрешение грехов моих Твоею милостию.
Ирмос: Еже радуйся от Ангела приимшая и рождшая Создателя Своего, Дево, спаси Тя величающия.
Припев:Преподобне отче Паисие, моли Бога о нас.
Скорый помощник был еси, преподобне, еще в жизни сей, иногда у преподобнаго старца ученику в преслушании умершу, и ведену во ад, он же припадаше прося, да умолиши Всещедраго о ученице его. Ты же, яко скорый послушник и любве хранитель, надежду возложи ко Всещедрому Богу, простреся на молитву, и Той, Многомилостив и во обетех неложный, волю к боящимся Его сотвори и, молитву твою услышав, изведе душу от ада. Того ради и аз, недостойный, припадая, молю тя: отче преподобне, молитвами твоими избави мя муки и огня негасимаго.
Припев:Преподобне отче Паисие, моли Бога о нас.
Бывша мя бесом смех, человеком уничижение, праведным рыдание, Ангелом плач, осквернение воздуху, и земли, и водам, тело окалях и ум оскверних паче слова деяньми, аз враг Богу бых. Увы мне, согреших! Молитвами преподобнаго Паисия прости мя.
Слава: Яко впадый в разбойники и уязвен, тако и аз впадох от многих грехов, и уязвена ми есть душа, к кому прибегну повинный аз, токмо к Тебе, Милосердому душам Врачу, приими молебника тепла преподобнаго Паисия и молитвами его излей на мя великую Твою милость.
И ныне: Прегрешения моя умножишася, прещению и Суду достоин, Чистая, припадая зову Ти: прежде конца подаждь ми очищение, и умиление, и нравом исправление.
Молитва преподобному Паисию Великому
Страстей победителя, душам помощника, о всех молебника, всем спасения ходатая и наставника, из глубины сердца воздыхая, усердно и пламенно молим тя, Паисие преподобне! Внемли и помози нам, не отринь и не презри нас, но абие услыши в смирении сердца притекающих к тебе. Ты, преподобне, к спасению ближних прилежно стремился и многих грешников к свету спасения привел еси. Подвиги чрезмерные успокоением считал по себе, пречудне, и, любовию ко Господу всегда горя, явления Христа Спаса сподобился еси, и Ему, за людей умершему, любовию подражая, и об отрекшихся от Христа молился еси. Услыши нас, Паисие прехвальне, ибо недостойны есмы молитися о даровании нам великой милости Господней, понеже грешны есмы, и уста оскверненныя и сердца отягощенныя имеем, и под бременем прегрешений страждем, и не достигает молитва наша до Господа. Сего ради помолися за нас мольбою твоею крепкою и богоприятною, святый Паисие, да избавлены будут скончавшиеся без покаяния сродники, ближние и знаемые наша от муки вечныя, и молитву твою во благоволении приимет Спас наш и милосердие Свое вместо добрых дел их даст им, свободит их, веруем, от страданий, и вселит в селениях праведных, и нас в покаянии скончатися удостоит, да прославим вкупе Всесвятое и великолепое имя Отца, и Сына, и Святаго Духа, во веки веков. Аминь.