Утвержде́ние ми́ бу́ди и стена́, му́чениче, непобеди́ма, не́мощь и гни́лость ума́ моего́ утвержда́я, Фео́доре, твои́ми предста́тельствы и сохраня́я невре́дно.
Во́инства тлетво́рнаго и тле́ннаго отре́клся еси́, во́инство же жи́зни, всеблаже́нне Фео́доре, до конца́ возлюби́л еси́, в не́мже победоно́сец показа́лся еси́, досточу́дне.
Богоро́дичен: Возсия́ от Сио́на Вы́шняго благоле́пие прия́тием пло́ти по соедине́нию неизглаго́ланному, из Тебе́, Неискусобра́чная, оде́явся, и ми́р просвети́.
Ве́ру Христо́ву, я́ко щи́т, вну́трь прии́м в се́рдце твое́м, проти́вныя си́лы попра́л еси́, многострада́льче, и венце́м небе́сным венча́лся еси́ ве́чно, Фео́доре, я́ко непобеди́мый.
На престо́ле све́та Носи́маго, благода́рственно ве́рою воспева́ем Тя́, я́ко дарова́ние боже́ственное дарова́л еси́ — до́бляго во страда́нии Фео́дора, в житии́ треблаже́ннаго, я́ко побо́рника су́щаго и́стины, благочести́вым по́мыслом Тя́ жела́юща, Христе́, кре́пка победи́теля на льсти́ваго, я́ко непобеди́мый.
Ирмо́с:От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Тя́, живота́ моего́ предста́теля, и засту́пника и́мам спасе́ния моего́, и храни́теля, богому́дре, утвержде́ние даю́ща ве́рою зову́щим: оте́ц на́ших Бо́же, благослове́н еси́.
Я́ко красно́ заколе́ние са́м себе́ Го́сподеви и свяще́ннейшее приве́л еси́, всеблаже́нне, и огне́м муче́ний всесоже́глся еси́, сла́вне, вопия́: оте́ц на́ших Бо́же, благослове́н еси́.
Живо́тнаго вдохнове́ния насыща́яся, блаже́нне, Боже́ственнаго Ду́ха, ду́хи отгоня́еши, неду́ги исцеля́еши и зове́ши, ра́дуяся: оте́ц на́ших Бо́же, благослове́н еси́.
Богоро́дичен: Из утро́бы Твоея́ про́йде, вопло́щься, вся́ческих, Де́во, Госпо́дь. Те́м Тя́, Богоро́дицу, му́дрствующе правосла́вно, Сы́ну Твоему́ взыва́ем: оте́ц на́ших Бо́же, благослове́н еси́.
Ирмо́с:Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Вся́ческими, прехва́льне, треволне́нии окружа́еми и напа́стьми жите́йскими содержи́ми, предста́теля скоре́йша, и помо́щника, и спобо́рника, вси́ ве́рнии, тя́ моли́твенника Влады́це приво́дим, вопию́ще: не преста́й моли́ти о воспева́ющих всечестну́ю твою́ па́мять.
Грехо́вными вери́гами свя́зан, пребога́те, и прегреше́ний мои́х плени́цами око́ван, прибега́ю к покро́ву твоему́, венцено́сче, разреше́ния прося́, но я́ко чу́дно ко Влады́це все́х, богому́дре, дерзнове́ние име́я, моли́ спасти́ся Христа́ пою́щим во ве́ки вся́.
Му́ченическими светлостьми́ просвеще́н, всехва́льне, а́нгельским счи́слился еси́ чино́м, с ни́миже ра́дуяся и слику́я, му́чениче, при́сно, чудотво́рными исцеле́нии уясня́еши любо́вию тя́ чту́щия и ве́рно пою́щия: лю́дие, превозноси́те Христа́ во ве́ки вся́.
Богоро́дичен: Пло́тию приобщи́ся к челове́ком, я́ко Благоутро́бен, Соде́тель и Творе́ц тва́ри, из Тебе́, Неискусобра́чная Богороди́тельнице, сию́ прие́м: те́мже Богоро́дицу, ве́рнии, Тя́ и́стинно сла́вим, вопию́ще и ве́рно пою́ще: лю́дие, превозноси́те Христа́ во ве́ки вся́.
Ирмо́с:Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вом вои́стинну Бо́га, вы́шшую пречи́стых си́л, немо́лчными славословле́нии велича́ем.
Бо́дра тя́ храни́теля, великому́чениче, стяжа́вше, враго́в злоу́мие удо́бь отгоня́ща и Це́рквам подаю́ща ми́р, страстоте́рпче, непреста́нно ублажа́ем.
Кре́пость тебе́ на де́моны дарова́ Влады́ка, стра́сти же души́ и телесе́ исцеля́ти, блаже́нне, всеблагочести́вейшим дерзнове́нием, моля́ся Спа́су, те́мже тя́ вси́ ублажа́ем.
Зарю́ Трисо́лнечную и еди́нственную созерца́яй, Еди́но в Тре́х Божество́, и нача́ло пренача́льное, и исто́чник бла́гости, страстоте́рпче, тя́ пою́щия сохраня́й.
Богоро́дичен: Изми́ мя́, Всенепоро́чная, мы́сленнаго плене́ния, избавле́ние воздаю́щи, Влады́чице, Сы́на Твоего́ распя́тие, е́же за все́х бы́вшее, избавле́ние, и ми́р, и спасе́ние пою́щим Тя́.
Искуси́вся, я́коже зла́то, огне́м и му́ками, досто́ин яви́лся еси́ да́р Бо́га Вы́шняго, Фео́доре страстоте́рпче, о на́с ны́не моли́ся.
Сла́ва, и ны́не, богоро́дичен: Держа́вным Твои́м покро́вом от враго́в наве́та на́с, Чи́стая, Твоя́ рабы́, сохрани́ вся́ невреди́мы, Тя́ бо стяжа́хом, еди́ну прибе́жище в ну́ждах.
Канон первый преподобному Феодосию
глас 8
Ирмос: Колесницегонителя фараоня погрузи чудотворяй иногда Моисейский жезл, крестообразно поразив и разделив море, Израиля же беглеца, пешеходца спасе, песнь Богови воспевающа.
Богоугодный подвиг стяжав, отче Феодосие, Боговидец явился еси. Темже молися Богу, Емуже угодил еси, отгнати мрак неведения моего, слово же блаженное вдохнути, воспети тя.
От матерня чрева прилепился еси Богу, преподобне, яко премудрый Павел и пророк же древле Иеремия. Темже тя Божественная благодать устнами, Феодосие, Божия слугу нарече.
Спасителя заповеди послушав от юности, мудре, жизнь сию нивочтоже положив, крест желая носити на раменах твоих, вся земная возненавидел еси, на Небесная взирая, Феодосие.
Богородичен: Воплощся от пречистых Твоих ложесн, Дево Пресвятая, Божие Слово всем просвети Богоразумия любовь и человеков торжество лику Ангельскому сподоби, на Небесная возведе.
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.
Нетленными дары и духовными, святе, Божественная твоя и блаженная обогащена душа, видети возжелел еси гроб Господень, но свыше был еси возбранен Божиим смотрением.
Жертва совершенна, истинна и непорочна восхотев быти Агнца, вземлющаго, блаженне, пречистою кровию грехи всего мира, безкровную жертву приносил еси Ему.
Уставов ты стяжатель от версты юностныя, отче, быв и самодержец ума, мирския пучины избежав, наставление приял еси от Божественнаго Духа.
Богородичен: Радуйся, рождшая Едина всех Господа; радуйся, человеком радость провозвестивши; радуйся, скиние и несекомая горо, верных утверждение, Едина Препетая.
Паче ума человеча явился еси, преподобне, на земли, Божий сад священный, посреде дому Господня стоя, подаеши плод болезней твоих учеником твоим: от уст бо твоих благодать Духа возрастил еси, образ быв подвигов и устав любящих Господа. Егоже ныне молити не престай спастися поющим тя.
Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.
Благодать Духа возрасте в тебе, отче, егда рождшую тя видел еси, плачущуся и рыдающу крепце, ты, предстояв струями слезы точащей, непоколебим столп и неподвижим пребыл еси.
Лютыми человеки враг вселукавый тщашеся отторгнути тебе, Феодосие, от гнезда преукрашенна, желаема тобою, но ты сего нивочтоже вменил еси, полки сего отгоня молитвами твоими и поя: силе Твоей слава, Человеколюбче.
Окропляя себе дождем духовным, и животным источником напояяся, и языком наставника Антония, клас Божественный прозябл еси и питаеши множества, неистощимая воистину Иосифова житница быв.
Богородичен: Кто изрещи достойно возможет чудес Твоих, Чистая, глубину? Тобою бо весь мир, хвалу Ти принося, помилован будет и избавляется от бед лютых и различных зол, враг же и напастей.
Ирмос: Вскую мя отринул еси от лица Твоего, Свете незаходимый, и покрыла мя есть чуждая тьма, окаяннаго? Но обрати мя и к свету заповедей Твоих пути моя направи, молюся.
Добродетельными подвиги возсия исправление твое, отче: жилище бо, бывшее древле худо, пространно сотворил еси, многи привед поклонники Богу, подающему сим всяк довол твоими молитвами.
Светлыми зарями подвигов твоих отгонимо бываше множество бесов от твоего жилища, сшествоваше бо ти всех Творца благодать Духа и славна тя яви, Феодосие.
Спаса Щедраго посреде церкве воспел еси, темже щедроты Своя богатыя посла тебе, оскудения разрешая печаль, приснотекущия же дары источая стаду твоему.
Богородичен: Превышши бысть Вышних сил, Богоблагодатная, заченшая Слово, всяческая словом сотворшее, и рождшая от Отца прежде век неизреченно рождшееся.
Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.
Молитвами, и бдением, и псаломскими пении непрестанно твою душу рай Божественный сотворил еси, живоносное возрастив древо честное яве, Спаса и Господа.
Изволил еси тайное смирение, Владычне нищете подобяся, блаженне: волею твоею путь шествуя, повелением лениваго раба везти воз к Божественному месту приял еси, идеже покланяемь от сретающих познался еси.
Подобяся ноги Умывшему Своим учеником, Богомудре, воду черпати и на раму носити изволил еси и древа своима руками принося и сеча начальника трудов себе монахом показал еси.
Богородичен: Умерщвлен бысть, Богородице, Тобою многокозненный враг, всю тварь прежде тлею погубивый, мертвии же Тобою к жизни взыдохом, ибо родила еси воистину жизнь всех, Господа.
Звезду Российскую днесь почтим, от востока возсиявшую и на запад пришедшую, всю бо страну сию чудесы и добротою обогатившу и вся ны содеянием и благодатию монашескаго устава, блаженнаго Феодосия.