И ны́не: Деторо́дию Твоему́, Де́вою и по рождестве́ пребы́вшу, дивлю́ся, Богоро́дице; удиви́ у́бо и на мне́ ми́лость Сы́на Твоего́, да, поми́лован Тобо́ю, пою́: благослове́н Бо́г, ублагослови́вый Тя́, Ма́терь Свою́, во ве́ки.
Ирмо́с:Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.
Победи́телие непобеди́мыя твоея́ ве́ры мучи́теле тща́шеся бы́ти, сосца́ твоя́ неща́дно отре́зоваху, ты́ же, тве́рдо терпя́щи, млеко́м уче́ния о Бо́зе напои́ла еси́ предстоя́щия и благословя́щия Христа́ во ве́ки.
Победи́ла еси́ му́жеством твои́м, му́ченице Варва́ро, вся́ мучи́тельская ухищре́ния. Моли́ у́бо Влады́ку Христа́, мо́лим тя́, все́м ве́рным на враги́ побе́ду да́ти, пою́щим: благослови́те вся́ дела́ Го́спода, и превозноси́те Его́ во ве́ки.
Сла́ва: Победи́тельница суро́ваго отца́ твоего́ яви́лася еси́ му́ченице: о́н бо небе́сным огне́м во а́дский о́гнь низведе́ся, ты́ же на не́бо возшла́ еси́, е́же и мне́ исхода́тайствуй, от огня́ избавля́ющи мя́ во ве́ки.
И ны́не: Победи́, Пречи́стая, враго́в ви́димых и неви́димых, низложи́ти на́с тща́щихся, и страсте́й мя́ вся́ких изба́ви, да пою́ торже́ственне: благослови́те, вся́ дела́, Го́спода и превозноси́те Его́ во ве́ки.
Ирмо́с:Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.
Вои́стинну Бо́га испове́дающи, му́ченице, черто́г небе́сный насле́дила еси́, его́же и на́с сподо́би, да с Тобо́ю Христа́ ве́чно велича́ем.
Вои́стинну на тебе́, Варва́ро, испо́лнися Христо́во прорече́ние: преда́ст оте́ц ча́до на сме́рть, е́юже ты́ ве́чный живо́т обрела́ еси́.
Сла́ва: Вои́стинну никто́же притека́яй к тебе́, страстоно́сице, то́щ благода́ти твоея́ отхо́дит, ея́же и мене́ испо́лни, молю́ся.
И ны́не: Вои́стинну и́стиннаго Бо́га пло́тию, Богоро́дице, родила́ еси́, Его́же ми́лостива на́м в де́нь Суда́ соде́лай, да безконе́чно с Ни́м Тя́ велича́ем.
Я́ко шипо́к красне́йший из терно́внаго израсла́ еси́ ко́рене де́во Варва́ро, твое́ю за Христа́ излия́нною обагри́вшися кро́вию. И ны́не Боже́ственную твою́ па́мять соверша́ющыя любо́вию, спаса́й от бе́д.
Сла́ва, и ны́не: Вои́стинну Тя́ испове́дуем Влады́чице, Тобо́ю спаса́емии: и́бо Бо́га неизрече́нно родила́ еси́ разори́вшаго Кресто́м сме́рть, и к Себе́ привле́кшаго пра́ведных собо́ры, с ни́миже восхваля́ем Тя́ Де́во.
Канон преподобному Варлааму Хутынскому
глас 2
Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.
Припев: Преподобне отче наш Варлааме, моли Бога о нас.
От Света Свет, Христе мой, от Отца прежде век рождейся, сый в начале со Отцем и Духом, согрешений мрак души моея отгнав, озари ум мой, молюся, да возмогу пети Варлаама, Твоего угодника.
Преподобне отче наш Варлааме, моли Бога о нас.
От корене благаго блажайшая отрасль прозябл еси, земных маловременнаго жития избегл еси. Тем, ныне чистоты венец приемля, со Ангелы Христу воспеваеши: поим Господеви, яко прославися.
Слава: Земная и мимотекущая, яко уметы, вменив, Христа Единаго приобрел еси, Егоже союзом любве уязвив душу твою, и Того потщался еси обрести ненасыщаемыя доброты.
И ныне: Услыша Ева прамати: в печалех родиши чада. Ты же, Чистая Дево, услышала еси: Господь с Тобою, радуйся, и радованным гласом, Богоневесто, печаль праматере потребила еси.
Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен, паче Тебе, Господи.
Преподобне отче наш Варлааме, моли Бога о нас.
По апостолу, отче, Вышних ища, и мудрование имея еже к Богу, вся, яже на земли, оставил еси и паче естества доброты сподобился еси.
Преподобне отче наш Варлааме, моли Бога о нас.
Светом Божественным осияемь о нем, и путь, к жизни ведущ, познал еси, отче наш Варлааме, и равноангельнаго ради жития чудотворец нареклся еси.
Слава: Законы питаяся всех Творца и Владыки, темже и невечерним облиставаемь Светом, светлое солнце явился еси и премудрости сокровищем, мир обогащая.
И ныне: Во иных женах мати, дондеже дева, не познася, ни мати по рождестве девствовати сподобися, на Тебе же, Дево Богомати, обое сбыстся. Тем веселием духа воспеваю: несть непорочны, паче Тебе, Владычице.
Господи, помилуй (трижды).
Красоты мирския от младых ногтей, преподобне, возненавидев, единаго же Христа от сердца возлюбил еси и Тому всею душею прилепился еси; яко безплотен, на земли пожив с плотию, славу же мимотекущую и богатство в ничтоже вменив, Небесное богатство восприял еси и славу вечную. Темже ублажаем святое твое успение и, в нем торжествующе, вопием ти: Богомудре отче наш Варлааме, моли Христа Бога грехов оставление даровати чтущим любовию святую память твою.
Слава, и ныне: Яко Всенепорочная Невесто Творца, яко неискусомужная Мати Избавителя, приятелище яко сущи Утешителя, Всепетая, беззаконию мя суща скверное обителище и демоном игралище в разуме бывша, потщися от тех злодейства мя избавити и светлое жилище добродетелей соверши. Светоносная, Нетленная, отжени облак страстей и вышняго причастия сподоби, и Света Невечерняго молитвами Твоими.
Ирмос: Пою Тя, слухом бо, Господи, услышах и ужасохся: до мене бо идеши, мене ища, заблуждшаго. Тем многое Твое снизхождение, яже на мя, прославляю, Многомилостиве.
Преподобне отче наш Варлааме, моли Бога о нас.
Яко в порфиру, и виссон, и в царскую багряницу одеяся тобою великая Российская земля: днесь убо, светло торжествующи, веселится, Варлааме, имеющи тя в себе, яко неистощимое сокровище.
Преподобне отче наш Варлааме, моли Бога о нас.
Мира любве отрекся, достигл еси Горний Иерусалим, идеже Христос со Отцем и Духом, и, венцев от Него сподобився, со Безплотными лики поеши, приемля Его сияние.
Слава: Аще убо, отче, тесный и болезненный путь шествовал еси в житии, но обаче нетленную жизнь наследовал еси, отонудными светлостьми богатно просвещался, Богоблаженне Варлааме.
И ныне: Истинно Тя сень свидетельствова многоразличными образы, яве показующи Воплощеннаго из Тебе, Единаго Троицы, Пречистая, неизменно, Богомати Владычице, и мир обновивша.
Ирмос: Света подателю и веков Творче, Господи, во свете Твоих повелений настави нас, разве бо Тебе, иного бога не знаем.
Преподобне отче наш Варлааме, моли Бога о нас.
Ярем Господень от юности, мудре, взем, последовал еси Христу скорбьми и слезами, преподобне, мысленно око к Нему имея, дондеже и святых селений достигл еси, обрет покоище Горняго Града.
Преподобне отче наш Варлааме, моли Бога о нас.
Страстей отгнав мглу яве зарями, отче, добродетелей, просвещение Духа в сердцы прием, Варлааме, имже попалил еси вся демонская ополчения и постническим ликом причтался еси.
Слава: Насажден во дворех Господних и в дому Бога нашего процвел еси. Прием Небесное семя, Богодухновенне, сердечною браздою клас сторичествующ принесл еси, темже обогатился еси венцем чудес.
И ныне: Управи ум мой, Владычице, труждающийся в пучине скорбей и потопляемь нашествием тлетворных страстей, и спаси, Богородице, к Тебе прибегающия: иныя бо Помощницы, Чистая, разве Тебе, не знаем.
Ирмос: В бездне греховней валяяся, неизследную милосердия Твоего призываю бездну, от тли, Боже, мя возведи.
Преподобне отче наш Варлааме, моли Бога о нас.
Море житейское, любомудрием испытав и разумев суетно сущо и яко вскоре погибающо, отвергл еси, единому прилепился еси Христу. Егоже ради и тяготу дневную понесл еси, о всех Тому восхождения в сердцы своем полагая.
Преподобне отче наш Варлааме, моли Бога о нас.
Ветрилом окриляемь воздержания, и оттуду достигл еси в пристанище благоутишное, пощением питая душу твою, преподобне, и светлу всех Творцу представил еси ю. Темже и Христос прият ю, яко светозарную звезду, и Своей славы сопричастну содела.
Слава: Ангельская воинства сущему во плоти житию твоему удивишася, отче Варлааме, бури бо страстей отбегл и совершеннаго ради жития, ветрилом воздержания достигл еси в благоутишное пристанище Христово.
И ныне: Обетшавшия ны горьким древле древа вкушением и падшия поползновением, Пречистая, обновила еси, Зиждителя рождши, Слово Ипостасное, Девомати Владычице.
Господи, помилуй (трижды). Слава, и ныне:
Якоже другий Илия, отче, дождь с небесе свел еси, он убо огнь сведе и царя удиви, ты же люди твоя возвеселил еси и торжествовати устроил еси. Великий бо Новград вельми тобою хвалится, имея мощи твоя в себе, егоже сохраняй от враг непоколебима, да зовем ти: радуйся, преподобне Варлааме, отче наш.
Аще и человек естеством был еси, преподобне отче, но вышняго Иерусалима явился еси согражданин и, человек убо естеством, Безплотных чести сподобился еси. Темже и самая, зряще, чудеса похвальная удивляют нас и научают звати тебе таковая: радуйся, благочестива отца отрасле; радуйся, матере благоговейныя ветве; радуйся, смирения высото; радуйся, яко к познанию Бога вся приводя; радуйся, яко многа чудеса о Христе сотворил еси; радуйся, целомудрия столпе, имже демонская свирепства искоренишася; радуйся, светильниче многосветлый; радуйся, яко увядил еси плотская мудрования; радуйся, яко дождь молитвою свел еси и, паки наводнению бывшу, молитвою водоточныя облаки востягл еси; радуйся, Великаго Новаграда похвала и утверждение, егоже и сохрани от враг непоколебима до конца, да зовем ти: радуйся, преподобне Варлааме, отче наш.