Суть три вещи у турков страшны христианом: множество люду безчисленное, страх в воинстве неотменный и грозный, оружие и брони неизреченный. Убо множество воинства аще средствии своими и обыче чинити нестроение и того ради всегда болшия воинства уступали меншим, но турецкое великое воинство в таковом ходит управлении и стройстве, яко в том превосходят и малыя [аще средствии своими могли бы быти стройнее] неприятелския. И тако восприемлют победы и мужеством, и разумом.
Искуство же им в воинских делех тако изрядно устроено, яко превосходит в том и древних римлян, не токмо иных коих, и содержится во многих вещех. Первое, в воздержании, ибо доволствуются малою частию хлеба печенаго под углием и кашею с толченым мясом, сушеным на солнце; вина не пиют никогда.
Во обозе будущи, всякий десяток турков имеет началника, его же должни суть слушать без всякаго противления. Не обретается с ними в воинстве женска полу. Молчание обретается предивное, и толикое множество воинства помованием руки или лица управляется.
В нощи же, дабы не сотворили мятежа, попущают иногда и пленником уходити. Паче же всего казнят за грабление и кражу. В шествии ни мало смеют отлучитися в карчмы или на сеяния, в полях будущее. Смерти ни мало боятся и ни во что ставят, разумеющи, яко прилучается коемуждо попущением Божиим и несть мощно укрытися от нея.
Мужественно подвизавшыяся надеждны воздаяния, а ленивыя и непотребныя ожидают наказания. Никогда ставятся полками во граде, ниже попущают кому ночевать в город входити. И дабы непрестанно искушало ся воинство в делех воинских, обыкоша султаны турецкия идеже ни есть непрестанныя войны имети.
Но обаче немного поможет ни страх без обороны, ни множество людей без оружия. Ибо и гигант без обороны и оружия, аще бы и лютейший и силный был, побежден бывает от отрока, оружие имущаго. И тако султаны турецкия исходят на войну с таковым убранием, с таковым довольством пушек, и с такими стройствы воинскими, и со всем тем, еже потребно к стрелбе и воинскому промыслу, яко и списати о том трудно.
И яко тии ни о чем ином не мыслят, всяк то познати может, егда узрит падшия сокрушенныя от них стены, идеже аще и обратят своя силы. Такожде и от обладания стран и государств пространных, островов великих и градов предивно крепких, их же тии несытыя онагры, султаны турецкия, воинъскими промыслы и непрестанным к тому прилежанием под власть свою приведоша [несогласия ради, и прохладнаго пребывания, и лености началников областей христианских], их же исчитающи и описующи едва возмогл бы кто, множества ради, подлинно исписати.
Уже бо в трех частях света, то есть во Асии, Европе и Африке, яко речеся, едва не лучшими и богатыми обладаша странами. Имеют убо во обладании своем Анатóлию, то есть Меншую Асию, Элеспóнт, Фриги́ю, Килики́ю, Финики́ю, Галлатию и Памфилию, Пóнт, Армению Малую и Великую и Трапезóнт, Лиди́ю и Лики́ю, Вифини́ю и Каппадокию, Кадию, и Ефóлию, и Персиды немалую часть.
В Европе Ромáнию, Фраки́ю, Бóлгарию, Ахáню, Македóнию, Епирус, Албáнию, Акарнáнию, Рáсцыю, Бóсны, Дáцыю, Сéрбы, Карвáты, Волóхи, Молдáвию и часть великую Венгерскаго кралевства, и островы Пелепонес или Аммóрию, Кáндию или Кри́т, Ки́пр и Нигропóнт, Рóдис и прочих неисчетно; к тому Таврику Херсонскую, идеже Крым.
Во Африке Еги́пет, и Ассирию, и Сирию, и Палести́ну, и Вавилонскую страну, и Аравии немало. И аще бо который государь и градов имел толико, могл бы можным имяноватися государем, а сия объявленныя области каяждо имеет в себе много градов крепких и богатых, и пространства немало, и имела пред сим едва не каяждо особнаго владетеля.
Вся убо сия, несогласия ради христианскаго, ныне суть во власти нечестиваго паганина подъемлют тяжкия нужды и неизреченныя бедства, о них же некто древний пиита сице пишет.
«Сие несогласие христиан принесе,
Яко поганых на главы своя вознесе.
Государства бо, стоящия немалый век
Взяша, и днесь у них в неволи всяк человек.
Полнится там плач Иеремии пророка
Егда текут слезы от христианска ока.
Увы! Воплят сербы и болгари в неволе.
Бóсны и далмáти, яко жиды в Вавилоне.
Воздыхают с плачем христианския народы,
Братиа наша в плене, лишася свободы,
От Бога убо за грехи порабощени
Турку и тяжкими нужды отягощени.
Плачут египтяне, грéки же и армяне,
И с ними вéнгрове, карвáты и мултяне.
Островы морския с плачем вод примножают:
Кипр, Крит, Родос, Патм, их же турки окружают.
Епирус, Аммóриа, Албáния с ними,
Алкаир, Византи́я с царствы честными.
Трапезóнт, Бáктриа, Нéксос и Галлатиа,
Аравиа, Понт, купно и Каппадокиа.
Еще Таврицка царства, где из христианства
Исполнися всюду злолютаго поганства.
Вси сии плачут зело, потеряв свободу,
Ибо в своих отечествах купят и воду.
В домех си не имут где главы приклонити,
Ни един час тогда могут без плача быти!
Всех бо сих поганый яко псов удручает,
За малу вину казнит и зле умучает.
К тому от коегождо главы по златому
И днесь рожден должен дати султану злому.
И на куюждо пять лет детей избирают
От всякаго дому, которых потурчают.
Тии уже отца и матерь забывают
И в поганском законе крепко пребывают.
В них лучшую оборону султан имеет,
Против христиан бы в стену ставить смеет.
Они его избирают и пред ним ходят,
Грады емлют, страны под власть его приводят.
Из христиан тамо муж ко всему потребный,
Пашá, сенжáк, чаýш и иной чин хвалебный»
И паки во ином месте той же еще о том же:
«Что прежде христиане имели в свободе,
То ныне дорого купят в поганском народе,
Иже во отечествах их разпространися,
Воистину яко песок морский явися!
Византиа – Греческа царства престол давный;
Днесь тамо содержится турков скипетр славный.
Госпожа стран – бысть днесь плачевною вдовою
И подножком поган, сущи света главою.
Иерусалим, Вифлием – места святыя;
Ими днесь владеют турки проклятыя.
Где Христос родися и со ученики ходил,
Страдал, и воскрес, и нас от ада свободил —
От гроба его ныне турок дань збирает,
И без тоя никто тамо внити дерзает.
Да зрим убо: где днесь Ассирийское царство?
Где сильное Вавилонское государство?
Где Сириа, Понт и Антиохиа?
Где Ливиа, Херсон и обоя Индиа?
Где Венгерско царство? Оно облако злато,
Прежде цветущее, ныне попрано в блато!
Где безчисленны христианские народы?
Вси пожерть от поган за свои незгоды!
Смирився бо поганцы – брани воздвизаху
И тако безвездно христиан побеждаху.
Той бо злый народ хитростию вознесеся,
И во время премирных лет власть их простреся.
Тако прежде во Асии власть разширили,
С единым смиряся, иных покорили.
И сим вымыслом едва не три части света
Обладаша поганцы не во многия лета.
Горе и увы христиан тамо постиже,
И сицевый плач на коегождо достиже:
Пришелцы Отечеством нашим обладаша,
Лютых врагов руце у сирот хлеб отъяша.
Воду свою у поган сребром откупаем
И дрова в неволи такожде обретаем.
Над главами у нас стоят мучители злыя,
Утружденным не дают покоя проклятыя.
Раби наши худыя нами обладают
И во отечествах наших нам разсуждают!».
Сицевыя тамо песни, христианского народа то мусикия, то веселие, то браки, то торжества, то утешение в нуждах и печалех! Достоит убо нам о всем господа Бога сокрушенным сердцем прилежно молити, дабы благоволил на сие призрети. И показав своя щедроты убогим оным христианом, под тяжким яремом поганским вопиющым, вся христианския силы на свобождение их от оныя нестерпимыя нужды обратити изволил, яже превосходит Египетскую неволю и Вавилонское изгнание, Ассирийское пленение и Иерусалимское разорение! И аще бы оныя народы предведали о толиких тяжких скорбех, еже ныне на них приидоша, то бы изволили тысящу смертей прияти, нежели в толикой неволе быти.
Но доколе той бич ассиров над верными и избранными Божиими высети имать? Доколе бусурмане над стадом Христовым началствовати будут? Доколе виноград Господень насажденный искореняти имут? Доколе Исмаил во отечествии Исакове распространятися будет? Без сумнения достоит о сем верити, яко приближается время, в не же то нечестивое отаманское обладательство [волею Божиею] упасти имать!
Имеют убо о том и сами турки древнее провещание и исполнения его ожидают от часа до часа и от времяни до времяни. Да иже, многомилостивый Боже, дабы время то приити могло во время благополучнаго царствования пресветлейших и державнейших благочестивых наших государей, содержателей непорочныя христиа нския веры!
И тогда бы возбуждени будущи от Всясвятаго Духа, приняв в руце свои непобедимое оружие, крест Господень, воздвигли своя крестоносныя хоругви и уготовали многообразное тмочисленное оружие, собрав многочисленныя полки христианскаго воинства и имеюще согласие со окрестными христианскими государствы, изыти подщилися на оных несытых псов бусурманских, своим их провещанием осужденных.
Уже бо тамо нас убози христиане, братия наша, с радостию и с надеждою ожидают, готови суще на своих и нашых супостатов помощь подати. Иже аще мнози страха ради не дерзают явно христианския веры тамо имети, обаче тайныя молитвы к ведущему тайная сердец и испытающему сердца и утробы радостно непрестанно со слезами возсылают, в покаянии и плачи смиривши души своя, надеждею веселящися, помощы и свободы ожидают, яко же оныя евреи, иже за грехи своя в плен будущи отведени, потом вразумившися покаянием и плачем, за оныя Бога милостива сотворили.
Тогда всемилостивый господь Бог посла оным избавление и паки во свободу возвращение. Тако оным христианом, под тяжким ярмом поганским вопиющим, и нам вскоре имать с высоты помощь послати, точию мы да прибегнем к нему с твердым упованием и несумнителною верою.