{86} несть ему исцеления в веки. А вреяй человека в суд, не оскудеетъ суд его в век.
Ныне убо, чада моя, храните сердце ваше от всякия неправды, иже възненавидитъ Господь,{87} паче же от всякия души живы, елико сотвори Господь. Якоже проситъ человекъ души своей от Господа, тако сътворитъ всякой души живей. Зане въ Веце Велицемъ многа хранилища уготована суть человеку: храмины добрыи зело, храмины злы бес числа. Блаженъ, иже отидетъ въ благословеныя домы, и во злых бо несть обращениа.
И человекъ егда положитъ глаголъ на сердци принести даръ пред лице Господне, и руце ему не сотворятъ того, тогда отвратитъ Господь труд рукъ его, и не обретениа. Егда сотвористе руце его, ти поропщетъ сердце его, ни престаетъ болезнь сердца его, пороптание спешно. Блаженъ человекъ, в терпении своемъ принесетъ даръ пред лице Господне, яко обрящетъ отдание, и человекъ егда дасть время нарока от устъ своих принести даръ пред лице Господне, ти сотворить е — то обрящетъ отдание; аще ли минетъ время нарочетное, въвратит глаголъ свой, покаание есть не благословит ся. Зане все преждание съблазнъ творитъ.
И человекъ, егда прикрыетъ нага, алчну дасть хлебъ, обрящетъ отдание. Аще ли поропщетъ сердце его, то погубление творитъ, и не будетъ обретения.{88} И нищий, егда насытнт ся сердце его, и презорствит, тогда погубитъ все благодеание свое и не обрящет, зане мръзуетъ Господь всякого мужа презорива".
И бысть, егда глагола Енохъ сыномъ своимъ и княземъ людскымъ, слышите вси людие его и вся ближникы его, яко зоветъ Господь Еноха, и съвещаша ся, глаголюще: "Идемъ и целуимъ Еноха". И сниде ся до двою тысящь муж, и приидоша до места Азуханъ,{89} идеже бяше Енох и сынови его, и старци людстеи, и целоваше Еноха, глаголюще: "Благословенъ есть Господеви, Царю Вечному, ныне благослови люди своя и прослави на лици Господни, яко тя избра Господь поведателя, отяти грех нашихъ".
Отвеща Енохъ к людемъ своим, глаголя: "Слышите, чада моя. Преже, да иже вся не бышя, преже, да иже не оста вся тварь, постави Господь века тварнаго,{90} и по томъ сътвори всю тварь свою, видимую и невидимую, и по том же всем созда человека по образу своему, и вложи ему очи видети, и уши слышати, и сердце помышляти, и умъ съветовати.{91} Тогда разреши Господь век человека ради, и раздели на времена и на часы, да размышляетъ человекъ временъ премены, и конца зачала летъ, и конци месяць, и дний, час, и дасть свою жизнь и смерть. Егда скончает ся вся тварь, юже сотвори Господь, и всякъ человекъ идетъ на Суд Господень Великый, тогда времена погибнут, и летъ к тому не будетъ, ни месяци, ни дни, и часа к тому не почтут ся, но станетъ векъ единъ. И вси праведници, иже убегнутъ суда великаго Господня, прикупят ся Веце Велицемъ, купно прикупят ся праведницех, и будутъ вечнеи. К тому не будетъ в них труда, ни болезни, ни скорби, ни чааниа нужна, ни усилиа, ни нощи, ни тмы, но светъ великъ будет имъ выину. И стена неразорима, и рай великъ будетъ имъ кровъ жилища вечна. Блажени праведници, иже избежать Суда Великаго Господня, зане просветят ся лица яко солнце.
Ныне убо, чада моя, съхраните душа ваша от всякоа неправды, елико возненавиде Господь;{92} пред лицемъ Господним ходите и тому единому служите, и всяко приношение приносите пред лице Господне.{93} Аще бо возритъ — то ту Господь, яко сотвори Господь небеса; аще призрит на землю и на море и помыслить подъземнаа, — то и ту Господь, зане Господь сотвори всячьскаа, и не укрыет ся всяко дело от лица Господня.{94} В долготръпение, въ кротости и в озлоблении, и въ скорби ваших изидете болезнаго века сего".{95}
О восхищении Енохове
Внегда беседовааше Енох людемъ своим, и пусти Господь мрак на землю, и бысть тма, и покры тма стоащаа мужа съ Енохом. И ускориша аггели, и поаша аггели Еноха, и възведоша на небо вышнее. И прия Господь, и постави пред лицемъ своимъ въ векы. И отступи тма от земля, и бысть свет. И видеша людие, и уразумеша, како взятъ бысть Енохъ, и прославиша Бога, идоша въ храмы своя.
И ускори Мефусаломъ и братиа его, сынове Енохове, и создаша жертвеникъ на месте Азухани, отнюдуже взят бысть Енох, и пояша бравы и говяда, и пожроша в лице Господне. И созваша вси людие, пришедшая с ними на веселие. И принесоша людие дары сыномъ Еноховым. И сотвориша веселие и радость 3 дни.
И въ 3 день время вечера глаголаша старци людстеи к Мефусалому, глаголющи: "Гряди и стани пред лицемъ Господнмъ и лицем людий своих, и въ лице требника Господня, и прославиши ся въ людехъ своихъ". И отвеща Мефусаломъ къ людемъ своимъ: "Господь Богъ отца моего Еноха то самъ себе въздвигнетъ ерея над людми своими". И преждаша людие нощь ту всю на месте Азухани. И пребысть Мефусаломъ близ олтаря, и помоли ся Господеви, и рече: "Господь века всего, сына избравый от отца нашего Еноха? И ты, Господи, яви ерея людемъ своимъ, и в неразумие сердца бояти ся славы твоея и сотвори по воли твоей все!" И успы Мефусаломъ, и яви ся ему Господь въ видении нощнем, глагола ему: "Слыши, Мефусаломъ. Аз есми Господь Богъ отца твоего Еноха, слышай глас людей своихъ. И стани в лице их и в лице олтаря моего, и прославлю тя в лице людий моих сихъ и по вся дни живота твоего". И въстав Мефусаломъ от сна своего, и благослови явльшаго ся ему.
И утреневаша старци людстеи к Мефусалому, и направи Господь Богъ сердце Мефусалому слышати гласа людска, и глагола к ним: "Господь Богъ наш благое очима его да сотворит на люди своих сихъ". И ускори Сарсанъ, и Хармис, и Зазас, и старци людстеи, и облекоша в ризу изрядну Мефусалома, и възложиша венец светелъ на главу его. И ускориша людие, и приведоша людие бравы и говяда, и от птицъ все известовано, пожрети Мефусалиму в лице Господне и в лице людско.
И взиде Мефусалимъ на жрътвище Господне, яко денница въсходящи, и вси людие грядущи въ след. И ста Мефусалом у олтаря, и вси людие окрестъ олтаря. И поимше, старци людстеи связаша бравы и говяда по 4 ногы и положиша на главе олтаря. И глаголаша людие к Мефусалиму: "Возми си ножь и заколи известовано си в лице Господне". И простръ Мефусаломъ руце свои на небо, и призва Господа, глаголя: "Увы мне, Господи, кто есмь аз стати на главе жрътвеника твоего, на главе всих людий твоих, и на вся испытаниа? И даждь благодать рабу твоему в лице людий сих, да разумеют, яко ты еси! Повели ерея людем своим!"
И бысть, внегда молящу ся Мефусалому, — стрясе ся олтарь, и воста ножь от олтаря, и вскочи ножь Мефусалому в руце пред лице всих людей. И въстрепеташа вси людие, и прославиша Господа. И честен бысть Мефусалом в лице Господне и в лице всих людей от дни того. И прия Мефусаломъ, и искла все пришедше из людий. И възрадоваша ся людие, и веселиша ся пред лицемъ Господнимъ и в лице Мефусалома въ день тый, и по том отидоша в домы своя.
А Мефусалом ста на главе олтаря и на главе всих людей от дни того 492. Наследова всю землю и изиска вся, веровавшая Господеви, и пременъшая ся наказа и обрати, и не обрете ся человекъ, пременяя ся от лица Господня, вся дни, иже поживе Мефусаломъ. И благослови Мефусалома Господь о жрътвах, и о дарех его, и о всей службе, еюже послужи в лице Господне.
И по скончании дний Мефусаломли и яви ся ему Господь въ видении нощнем, и глагола ему: "Слыши, Мефусаломе, азъ есми Богъ отца твоего Еноха. Видите волю, яко кончаша ся денье живота твоего, и приближи ся день почиваниа твоего. Взови Нира, сына сыну твоему Ламеху,{96} втораго, и облеци в ризы своя священыя, и поставиша у олътаря моего, и глаголеши ему все, елико ему будетъ во дни его. Зане приближают ся времена погибелныя всей земли и всего человека, и всего движущаго ся по земли, яко во дни его будетъ нестроение велико по земли. Зане взненавидит человекъ искренему своему, и людие на люди съгрезят ся, и языкъ на языкъ възмутитъ рать, наполнит ся вся земли крови и нестроениа зла.{97} К тому же оставят Творца своего, поклонят ся утвръженым на небеси, и хожение по земли, и волнам морским. И възвеличит ся противникъ, и порадует ся о делех ихъ. В ражделение мое, вся земля приемлет премены устроение свое, и весь плод, и вся трава пременяет времена своя, почают бо времени погибелнаго. И вси языци изменят ся на земли, в съжаление мое. И тогда азъ повелю бездне изринет ся на землю, и сокровища вод небесных изринет ся на землю.{98} (…) И погыбнет все составление земляное, и сотрясет ся земля вся, и лишит ся крепкаго своего и от дни того. Тогда аз преблюду Ноа,{99} сына сыну твоему Ламеху, пръвенца, и воставлю от семени его мира иного, и семя его пребудет в векы".
И въспрянувъ Мефусалом от сна своего, и оскорбе о сне зело; призва вся старца людскыа, и поведа все, елико глагола Господь к нему, и видение, к нему явльшаго ся от Господа. И оскоръбеша людие о видении его, отвеща к нему: "Господь владееть творити по воле своей. Ныне сотвори все, якоже глагола Господь к тобе".
Возва Мефусаломъ Нира, сына Ламефова втораго, и облече в ризы святительства пред лицемъ всих людей, и постави у главы олтарныа, и научи всему, елико сътвори в людех.