{21} иже обогатея изо обиды о имении чюжаго, и умориша алчющаго гладомъ, не могоша насытити, и не могуща одети, съвлекоша нагия. Иже не познаша Творца своего, но поклониша ся богомъ суетным, зижюще образы, поклоняют ся ручному творению. И сим всемъ уготовано есть место се в достоание вечное”.
4 небо
И воздвигоста мя на 4-е небо, и показаста ми се ту вся шествиа и вся луча солнца и месяца. И размерихъ шествие ею, сложих светъ ею, и видех седмогубный свет имат солнце, паче месяца.{22} Круг еа и колесница, на немже ездитъ кождо ею, яко и ветръ ходя, и несть има покоя: день и нощь ходящема и възвращающима ся има. И четыре звезды великыи высящихъ одесную колесница солнца, 4 ощуюю солнцемъ выину. И аггели ходяща пред колесницею солнечною, дусе летяще, 12 крилъ комуждо аггелу, иже мчатъ колесницу солнцу, носяще росу и зной, егда повелит Господь снити на землю с лучами солнечнями.
И несоста мя мужа ко востоку небесе и показаста ми врата, имиже выходитъ солнце по уставнымъ временемъ и по обхожениемъ месяца лет всего, и по малению, прихождению дни. 6 вратъ единъ отвръстый о стадий 1 тридесятого испытана,{23} великоту же их измерих и не могох разумети великоты их. Теми иже ими входитъ солнце, идетъ на запад: пръвыми враты исходит дни 42, вторыми дни 35, третими дни 35, четвертыми дни 35, пятыми дни 35, шестыми дни 42 и паки възвращаа ся шестыми враты. По объшествию временному и входитъ пятыми враты дни 35, четвертыми враты дни 35, третими враты дни 35, вторыми дни 35, и скончають ся дньи лета по возвратомъ временным.{24}
И възведоста мя мужа на запад небесе, и показаста ми ту врата шестера велика отвръста, по обходу небесных восточных противу имиже заходит солнце; по входу восточных вратъ и по числу деньному — тако заходитъ западными враты. И егда изыдет от западных вратъ, и возмут и четыре аггели венецъ его, и възнесутъ Господеви, а солнце обратит колесницу свою и иде без света, и възложат на нь тамо венецъ. Се ращение показаша ми солнца и враты, имиже входитъ и исходитъ, си бо врата сотворитъ Господь. Часоборие летовное солнце сказаетъ.
А лунное другое ращение. Показасте ми вся шествиа еа и вся обхожение ея, показаста ми мужа врата, и указасте ми 12 врата{25} къ встоку, показаста ми венца, имиже входитъ и исходитъ луна по обычным временемъ: пръвыми враты къ востоку дни 31 известно, а вторыми 35 день известне, а третимъ днемъ 31 изящен, а четврътыми день 30 известо, а пятыми день 31 изряденъ, а шестыми день 31 известенъ, 7 день 30 известно, осмыми день 31 изрядно и 9-ми день 31 испытно, а десятыми день 30 известно, 11-ми день 31 изященъ, 12 враты входитъ и двадцать вторыи день известне. Ти тако и западными враты по обходу и по числу восточных вратъ. Тако входитъ и западными враты, и свръшаетъ лето деньми 365.{26} (…) Егда кончает ся западнаа врата и възвращаетъ, идетъ на восточныа со светом своим. Тако ходитъ день и нощъ кругомъ, коло его подобно небесе. И колесница, на нюже възлазитъ, ветръ ходя влекуще. Колесница еа дусе же еа летяще, шесты крил коемуждо аггелу. Се есть разщинение лунное.
Постреде же небеси видех вооружены воа, служаще Богови в тимпанех и органех непрестанным гласомъ, и насладих ся послушая их.
5 небо
И взяста мя оттуду мужа, и вознесоста мя на пятое небо. И видех ту многа воя игригорьи,{27} видехь 200. Яко видениа человеческо, величество же ихъ вяще чюдовъ великых, и лица их дряхла, и молчание устъ ихъ, и не бе служениа. И глаголахъ мужема, сущима со мною: “Что делма суть дряхло зело и уныла лица их, и уста их молчаща, и несть службы на небесе им?” И отвещаста ко мне мужа: “Си суть григории, иже отторгу от Господа. (…) И снидоша на землю, и преторгу обещание на раме горе Ермонониа,{28} осквръняти ся женами человеческами, и осквръниша ся. И осуди а Господь, и се рыдают о братьи своей, и окаризни бывшим”. Аз же глаголахъ григоромъ: “Аз видех братию вашу, и творениа их разумех, и молениа ихъ се видя, и молих ся о них. И се осудил есть Господь под землю, дондеже скончают ся небеса и земля. Да воскую ждете братиа своеа, а несте служаще в лице Господне? Поставите службы бывшия, служите во имя Господне! Егда како разгневаете Господа Бога вашего, свръжет вы с места сего”.
Стоащу мне въструбиша въ 4 трубы вкупе и вослужиша григоре, яко единемъ гласомъ взиде глас их в лице Господне.
6 небо
И възведоста мя оттуду мужа, и вознесоста мя на 6-е небо. И видех ту 7 аггелъ, сочтанъ, светелъ и славен зело: и лица их, яко луча слъночна блещаща ся, несть различия лицу, или обдержаниа, или соприодръжаниа одръжа. Си строятъ, изучаютъ мирское благочинение: звездное хожение, солнечное и лунное, и те вожа аггелы, и гласы небесныа. И все житие смиряетъ небесное. Строят же и заповеди, и поучениа, и сладогласное пениа, всяку хвалу и славу. И аггели же суть над времены и леты, и аггели же и на реках, и на морех, аггели над плоды и травою, и кипящимъ всемъ;{29} и аггели людий всех, и все житие те строятъ и пишутъ пред лицемъ Господнимъ. И постреди ихъ — 7 фуникъ, и 7 херувимъ, 7 шестокрилець,{30} единоглаголюще к собе и поюще к собе, несть повести пениа их. Радует ся Господь подножиемъ своимъ.
7 небо
И въздвигоста мя оттуду мужа и вознесоста мя на седмое небо. И видех свет великъ и вся огненыа воя бесплотных, архаггели, аггели, и светлое стоание офанимское.{31} И убоях ся, и встрепетахъ, и пояста мя мужа въ стреду ихъ, и глаголаша ко мне: "Дръзай, Еноше, не бой ся!"
Показаша ми издалеча Господа, седяща на престоле своемъ,{32} и вси вои небеснеи, съчтании на степень, наступающи покланяху ся Господеви, и пакы отхожаху, и идяху на места своя в радости и во веселии, во свете безмерне. А славнии служаще ему, нощию не отступающе днесь; стояще пред лицемъ Господнимъ, творяще волю его. И вси вои херувимстеи окрестъ престола его, не отступающе, и шестокрилецъ покрывающе престолъ его, поюще пред лицемъ Господнимъ.
И внегда видех се все, и отидоста от мене мужа, и к тому не видех ею. Поставиша мя на конецъ неба единаго, и възбоях ся, падох на лици моемъ. И посла Господь единаго от славных своих ко мне — Гаврила,{33} и рче ми: “Дръзай, Еноше, не бой ся! Въстани и пойди со мною, и стани пред лицемъ Господнимъ во веки”. И отвещах к нему, и рекох: “Увы мне, господи, отступи душа моя из мене от страха. И взови ко мне мужа, приведоша мя до сего места, зане тема поведах, и с тема иду пред лице Господне”.
И восхити мя Гаврил, якоже восхищаеть листъ ветром, и мча мя, и постави мя пред лицемъ Господнимъ.
О видении Господа
Видехъ Господа, лице его силно, и преславно, и страшно. Кто есть исповедати, обьяти сущее лице Господне, силное и престрашное, или многоочное его и многогласное, и безрукотвореный превеликый престолъ Господень, или стояние еже есть о немъ херувимстей и серафимстей вои, или непременное, или неисповедаемое, немолчное и славное его служение.
И падох ницъ, и поклоних ся Господеви. И Господь усты своими възва мя: “Дръзай, Еноше, не бой ся! Востани и стани пред лицемъ моим въ векы”. И въздвиже мя Михаилъ, архаггелъ великый Господень,{34} и приведе мя пред лице Господне. И искуси Господь слуги своя, глагола к ним: “Да вступит Енох стояти пред лицем моем въ веки”. И поклониша ся славнии, и реша: “Да вступит”.
Глагола Господь Михайлови: “Поими Еноха, и совлечи со земных риз, и помажи елеемъ благымъ, и облечи в ризи славны{35}”. И совлече мя Михаил с риз моих, и помаза мя масломъ благимъ. И видение масла паче света великаго, масть его — яко роса блага, и воня его, яко измурно, и луча его яко солнечныи. И зглядах вся самъ: и бых, яко единъ от славных, и не бяше различиа взорнаго.{36}
И воззва Господь Веревеила, единаго архаггела своего,{37} иже бяше мудръ, написая вся дела Господня. И глагола Господь Веревеилови: "Возьми книгы от хранилницъ, и вдай же трость Енохови, и поглаголи ему книги". И ускори Веревеилъ, и принесе мне книги, изощрени змурениемъ.{38} И вдасть ми трость из руки своея, и бе глаголя ми вся дела Господня: и земля, и море, и всех стухий шествия и житиа, и премене лет и дний шествиа, и земныа заповеди и поучениа, и сладкогласное пение, и входы облакъ, и исходы ветръ, и языкъ еврейский, и всякъ языкъ, песнь новую оруженных вой — и все, елико подобаетъ поучати ся, и исповеда ми Веревеилъ. 30 дний и 30 нощий и не премолкоша уста его глаголющи. И яз не почих 30 дний и 30 нощи, пиша вся знамениа. И яко конча, глагола ко мне Веревеилъ: “Сяди, напиши, елико ти исповедах”. И седох сугубъ 30 дний и 30 нощий, и написахъ известо, и исповедах 300 и 60 книгъ.
И възва мя Господь, и постави мя ошуюю себе ближе Гаврила, и поклоних ся Господеви. И глагола ко мне Господь: “Елико же виде, Еноше, стоаща и ходяща, и свръшена мною, аз же възвешу тебе”.