О создании твари
— Преже, даже все не бысть испръва, еликоже сотворих от небытиа в бытие,{39} и от невидимих въ видении, и аггелом моимъ не възвестих тайны моеа, ни поведах имъ съставлениа их, ниже бесконечныа моа и неразумныа разумеша твари, — и тебе възвещаю днесь. Преже, да иже не быша вся видимая, отвръзе ся свет, аз же среде света яко единъ прояждях в невидимых, якоже солнце яздитъ от востока до запада, от запада на востокы, солнце же обрящет покой, аз же не обретохъ покоа, зане все бе-створя.{40}
Умышле же поставити основание, створити тварь видиму. Повелех въ преисподних, да взыдетъ едино невидимых видимо. Изыде Адоилъ, превелики зело,{41} и смотрих его, и се то имый въ чреве века великаго.{42} И рех аз к нему: "Раздруши ся, Адоилъ, и буди видимое разрешаемое ис тобе". И разреши ся, и изыде из него великый векъ, а тако носяща всю тварь, юже азъ хотех сотворити. И видех, яко благо.{43} И поставих себе престолъ, и седох на немъ, светови же глаголахъ: "Взыди ты выше и утвръди ся,{44} буди основание вышнимъ". И несть превыше света ино ничтоже.
И узрех, восклоних ся от престола моего, и возвах во преисподних второе их — изыдете от невидимыхъ твердь и видимо.{45} Изыде Арухазъ{46} с твердию, тяжекъ и чрънъ зело. И видех, яко лепо. И рех к нему: "Сниде ты долу, и утвръди ся, и буди основание долнимъ". И сниде, и утвръди ся, и бысть основание долнимъ. И несть подо тмою иного ничтоже.
Обив же ефера светомъ, утолстих, прострохъ връху тмы ея. А от вод утвръдих камение велико. Мглам же безднымъ повелех исхнути, наркох же "упадь до бездны". Море събравъ на едино место, связах е игомъ, дахъ море пределъ веченъ, не перетергнет ся от вод.{47} Твръду въдружих и основахъ връху вод.{48}
Ко всим же воимъ образовахъ небесемъ солнце от света великого, и поставих е на небеси, да светит по земли.{49} От камениа усекох огнь великый и огня створих вся воа бесплотных и вся воя звездныа. И херувимы, и серафимы, и офанимъ — и се все от огня иссекохъ.
Земли же велех возрастити древа всяка, и гору всяку, и всяку траву животну, и всяко семя живо, сеай семя,{50} — преже, да иже не сотворих душь живъ, пищу имъ уготовах.{51}
Морю же повелел: породитн своя рыбы и всяк гад, плазащи по земли, и всяку птицу парящую.{52}
Егда скончах все, повелех моей премудрости створити человека.{53}
Ныне же ти елика сказахъ, и елико виде на небесех, и елико виде на земли, и елико написа въ книгахъ — премудростию моею и хитроствовах се, сътворихъ от нижнаго основаниа и до горняго.{54} И до конца ея несть светника, ни следника. Азь самъ веченъ, нерукотворенъ.{55} Беспременна мысль моя — съветник есть, и слово мое дело есть, и очи мои съгладаета все: аще ли отвращу лице мое, то всеа потребят ся, аще ли призираю, то стоятъ.{56}
Положи умъ свой, Еноше, и познай глаголющаго ти, и возми книги, яже написа. И даю ти Семеила и Расуила, възведшая тя ко мне, и сниди на землю и скажи сыномъ своимъ, елико глаголахъ к тобе, елико видехъ от нижняго небесе и до престола моего, — вся воинества аз сотворихъ, несть противя ся мне или не покоряа ся, и вси покаряют ся моему единовластию и работаютъ моей единой власти. И вдай же имъ книги рукотворениа твоего, и почтутъ и познаютъ Творца ихъ, и разумеют и те, яко несть творца иного развее мене.{57} И раздай книги рукописаниа твоего чадомъ и чаду чадомъ, и поучи ужикы и род в род. Яко дам ти ходатаа, Еноше, архистратига моего Михаила, зане рукописание твое и рукописание отець твоих и Адама и Сифа не потребят ся до века последняго,{58} яко аз заповедах аггеломъ Ариоху и Мариоху, яже поставих на земли хранити ю и повелевати временным, да снабдятъ рукописание отець твоих, да не погибнетъ в будущий потопъ, иже азъ творю в роде твоемъ. Аз сведе злобу человеческу: яко не понесут ярма, иже въздвигнух имъ, ниже сеютъ семя, яже дах имъ, но отвръгу яремъ мой, и яремъ инъ въсприимут, и всеютъ семена пустошнаа, и поклонят ся богомъ суетным, и отринутъ единовластье мое, и вся земля съгрешит неправдами, и обидами, и прелюбодействы, идолослужении. Тогда потопъ наведу на землю, и земля сама съкрушит ся в тимение велико. И оставлю мужа правдива от племени твоего,{59} со всем домом его, иже сътвори по воли моей. И от семени их востанетъ род последний, многъ и несытъ зело. Тогда во изводе рода того явят ся книгы рукописаниа твоего и отецъ твоихъ, имже стражие земстеи покажуть я мужемъ вернымъ, и скажут ся роду тому и прославят ся в последокъ паче, неже в первое.
Ныне же, Еноше, даю ти рок преждания 30 дний, сътворити в дому твоемъ и глаголати сыномъ своимъ от мене и домъчадцемъ своимъ. И всякъ, иже есть храняй сердце свое, и да прочтутъ и разумеютъ, яко несть развее мене. И по три десяти днехъ аз пошлю аггелъ по тя, и возмут тя ко мне от земля, и от сыновъ твоих; возмут тя ко мне, яко место уготовано ти есть, и ты будеши пред лицемъ моимъ отселе и до века. И будеши видя тайны моя, и будеши книжникъ рабом моимъ, зане будеши написая вся дела земная и сущих на земли и на небесех, и будеши ми въ свидетелство Суда Великаго Века”. Все глагола Господь ко мне, якоже глагола мужь къ искренему своему".
ПавучаннеЕноховесваім сынам
И ныне, чада моя, слышите глас отца своего, еликоже аз заповедаю вамъ днесь: да ходите пред лицемъ Господним, и елико ти сътворити есть по воли Господни. Аз бо есмь пущенъ от устъ Господень к вамъ глаголать к вамъ, елико есть и елико будетъ до Дни Суднаго. И ныне, чада моя, не от устъ моих вещаю вамъ днесь, но от устъ Господень, пущешаго мя к вамъ.
Вы бо слышите глаголы моя из устъ моих, точно здана вамъ человека, аз же слышах от устъ Господень, огненъ, яко уста Господня пещь огнена, и глаголы его пламы огненый исходя. Вы же, чада моя, видите лице мое, подобно вама здана человека, аз же видех лице Господне, яко железо от огня раждеженно, искры отпущающи.{60} Вы бо зрите очию точна вамъ здана человека, аз же зрех очию Господню, яко луча солнца светяще ся, ужасающи очи человеку. Вы же, чада, видите десницу мою, помавающи вамъ — равна творена вамъ человека, аз же видех десницу Господню, помавающи ми — исполняющи небо. Вы же видите обьятие тела моего, подобна вашему, аз же видех обьятие Господне, безмерно, бесприкладно, емуже несть конца. Вы бо слышите словеса устъ моих, аз же слышах глаголы Господня, яко грома велика, непрестанным облаком мятение. Ныне, чада моя, слышите беседующа о цесари земнемъ — боязнено и бедно стати же пред лицемъ цесари земнеме, страшно, зане воля цесаря — смерть, и воля цесаря — жизнь. Стати же пред лицемъ Цесаря, — кто постоитъ бесконечную боязнь или зноя велика? Но возва Господь от аггелъ своих старейших, грозна, постави у мене, и видение аггела того снегъ, а руце его — лед, и устуди лице мое, зане не тръпяхъ страха, зноа огненаго. Ти тако глагола Господь вся глаголы своя ко мне.
Ныне убо, чада моа, аз всяческаа свемъ: ово от устъ Господень, ово очи мои видесте; от зачала до конца, и от конца до възвращениа{61} аз все свем. И написахъ книги до конца небесе и полности их, аз измерих хожениа их, и воинесътва ихъ аз сведе, исполних звезды много множество бесчислене. Который смыслитъ человекъ превратныа их обходы или шествиа их, или възвраты их, или водителя их, или водимыя? Ни аггели сведятъ ни чисмени ихъ, — аз же имена ихъ написах. И солнечный кругъ аз измерих, и луча ихъ изчтох, и входы его и исходы его, и вся шествиа его, имена их написах. И лунный круг аз измерих, и хожениа ихъ по вся дни изщтох, света еа на всякъ день и час, и въ книгах имена ея же исписах. Облачная жилища и устав ихъ, и крила их, и дождя их, и капля ихъ аз иследовах. И написах тутенъ громный и дивъ молниный, и указаша ми ключехранителя их, въсходы их; доже ходятъ в меру: узою въносят ся, узою спущают ся, да не тяжкою яростию сдергнутъ облакы, и погубят еже на земли. Яз написах сокровища снежнаа и хранилница голотнаа,{62} и въздухы студеныя, аз соглядахъ, на время како ключядръжца их наполняют облаки, и не истощат ся съкровища. Аз написах ветреняа ложнища, аз смотрих и видех, како ключаре их носятъ привесы и меры, первое же влагаютъ въ перевесы, второе же в меру, и мерою же испущает на всю землю, да не тяшкым въздыханиемъ землю въсколеблетъ.
Адъ. Оттуде сведенъ бых, и приидохъ на место судное, и видех ад отвръстъ, и видех ту некоторые боле, яко ужницу, — суд без меры. И снидох, и написах вся суды судимиих, и вс