184. Прысну море полунощи; идутъ сморци мьглами. Игореви князю Богъ путь кажетъ изъ земли Половецкой на землю Рускую, къ отню злату столу.
185. Погасоша вечеру зари. Игорь спитъ, Игорь бдитъ, Игорь мыслiю поля мѣритъ отъ Великаго Дону до Малаго Донца.
186. Комонь въ полуночи Овлуръ свисну за рѣкою – велить князю разумѣти: князю Игорю не быть кликну!{123}
187. Стукну земля, въшумѣ трава, вежи ся Половецкiи подвизашася.
188. А Игорь князь поскочи горнастаемъ къ тростiю и бѣлымъ гоголемъ на воду.
189. Въ(з)връжеся на бръзъ комонь и скочи съ него босымъ влъкомъ.
190. И потече къ лугу Донца, и полетѣ соколомъ подъ мьглами, избивая гуси и лебеди завтроку и обѣду и ужинѣ.
191. Коли Игорь соколомъ полетѣ, тогда Влуръ влъкомъ потече, труся собою студеную росу: претръгоста бо своя бръзая комоня.
192. Донецъ рече:
193. «Княже Игорю! Немало ти величiя, а Кончаку нелюбiя, а Руской земли веселiа!»
194. Игорь рече:
195. «О Донче! Немало ти величiя, лелѣявшу князя на влънахъ, стлавшу ему зелѣну траву на своихъ сребреныхъ брезѣхъ, одѣвавшу его теплыми мъглами подъ сѣнiю зелену древу;
196. стрежаше е‹го› гоголемъ на водѣ, чайцами на струяхъ, чрьнядьми на ветрѣхъ.
197. Не тако ли, рече, рѣка Стугна: худу струю имѣя, пожръши чужи ручьи и стругы ростренакусту{124} уношу княз‹я› Ростислав‹а› затвори днѣ пр‹и›{125} темнѣ березѣ.
198. Плачется мати Ростиславля по уноши князи Ростиславѣ.
199. Уныша цвѣты жалобою, и древо с(я) тугою къ земли прѣклонило».
200. А не сорокы в(c)троскоташа: на слѣду Игоревѣ ѣздитъ Гзакъ съ Кончакомъ.
201. Тогда врани не граахуть, галици помлъкоша, сорокы не троскоташа,
202. полозiю{126} ползоша только; дятлове тектомъ путь къ рѣцѣ кажутъ; соловiи веселыми пѣс(н)ьми свѣтъ повѣдаютъ.
203. Млъвитъ Гза къ Кончакови:
204. «Аже соколъ къ гнѣзду летитъ, соколича рострѣляевѣ своими злачеными стрѣлами».
205. Рече Кончакъ ко Гзѣ:
206. «Аже соколъ къ гнѣзду летитъ, а вѣ соколца опутаевѣ красною дивицею».
207. И рече Гзакъ къ Кончакови:
208. «Аще его опутаевѣ красною дѣвицею, ни нама будетъ сокольца, ни нама красны дѣвице, то почнутъ наю птици бити въ полѣ Половецкомъ».
209. Рекъ Боянъ и Ходына{127} Святъславля пѣснотворца стараго времени Ярославля, Ольгова коганя хоти:
210. «Тяжко ти головы кромѣ плечю, зло ти тѣлу кромѣ головы» – Руской земли безъ Игоря.
211. Солнце свѣтится на небесѣ – Игорь князь въ Руской земли.
212. Дѣвици поютъ на Дунаи, вьются голоси чрезъ море до Кieва.
213. Игорь ѣдетъ по Боричеву къ Святѣй Богородици Пирогощей.
214. Страны ради, гради весели.
215. Пѣвше пѣснь старымъ княземъ, а по томъ молодымъ пѣти.
216. Слава Игорю Святъславличь, буй-туру Всеволодѣ, Владимiру Игоревичу{128}.
217. Здрави князи и дружина, побарая за христьяны на поганыя плъки.
218. Княземъ слава а дружинѣ. Аминь{129}[10].