Архиепискуп же Феодорит со всем освященным собором, и бояре и всенародное множество з женами и з детми, в великом сумнении и ужасе быв, паки моляще великого государя царя и великого князя Михаила Федоровича всеа Русии, глагола; «Милосердый государь Михайло Федорович! Не буди противен Вышнего Бога промыслу, повинися святой Его воле; никто же бо праведен бывает, вопреки глагола судбам Божиим. И прежние убо цари, предизбранные Богом, царствоваху, и сих убо благочестивый корень ведеся до благочестиваго и праведнаго, великого государя царя и великого князя Федора Ивановича, всеа Русии самодержца, на нем же и совершися и конец прия; в него же место Бог сию царскую честь на тебе возлагает, яко по свойству свойственному царского семени Богом избранный цвет. Его же бо Бог предъизбра, того и возлюби; и его же пронарече, сего и оправда; его же оправда, того и прослави. Якоже рече святый Деонисей Ареопагит: превысокою, рече, дражайшею чесгию предпочтил есть Бог человеческий род еже, рече, предпочтением царским; его же бо дарованием сим одарити Бог восхощет, на сем же во чреве матерне честь сию возложи, и из младенства на сие предустроит. Тем же тебя убо, превеликий государь Михайло Федорович, не по человеческому единомышлению, ниже по человеческому угодию предъизбра; но по праведному суду Божию сие царское избрание на тебе, великом государе, возложи. Последуем убо хрестьянских царей древних преданием, яко искони мнози хрестьянстии цари недоведомыми судбами Божиими, и не хотяше скифетроцарствия предержати, царствоваху, на се наставляющу народ единогласие имети, о нем же Бог во ум положити им изволи, якоже пишет: «глас Божий глас народа». Приводим же к сему и свидетелство от древних божественных писаний, еже глаголет о великом царе Давыде: «сей убо царствия рогом помазан бысть, царь силен и славен во Израили, предъизбран Богом, и толи к преславен бысть, яко имянем ево вес Израиль хваляшеся, и в толику высоту достиже, яко Христу прародителе бысть, и Богоотец наречеся». Такоже Иосиф прекрасный от праведнаго семени Авраамля произыде, аще и неволею влеком, но судбами Божиими царствова во Египте и нехотящим Египтом. И сия убо от начала в древних до Христова во плоти с небеси сшествня. По Христове же на землю пришествии, во благодати православием сияющих ноипаче обретаютца по степенем в Римских и в Греческих хрестьянских преданиях, от них же первый православием сияя, яко солнце, равноапосталом Констентин, сын великого Консты, кесаря Римского, иже преже бывшего тирона, еже есть воин при Диклитьяне и Максимьяне, царема Римскима. Сей убо великий, первый хрестьянский царь Костентин, во царех первый к Богу правоверием сияя, яко солнце, тщание же и взыскание о кресте Христове толико показа, яко же ин никто же и обрете его; много же и святых мощей произыска и собра, идолские же требы до конца разори, и многа и ина исправления по Бозе показа, и с небесе свидетелствован знамением креста Господня, отнюду же победу взем, враги побеждайте, и многи языцы во Христа веровати приведе; и сего ради от Бога не земным толко царством, но и небесным дарован бысть, и во крестьянских царех первый в лик апостолский учинен. Потом же благочестия поборник, нечестия обличитель, царь Феодосей Великий, не телесным точию видом, но и славою премногою высок иже от Гратияна царя в порфиру царскую одеян быв и венцем царствия, венчан, от синклит предъизбран. Подобен же сему великому Феодосию царю и Маркиян великий, царь благочестием и верою, храбрством же и мудростию изящен зело, преже в чину воинственном бысть, потом Феодосием царем Малым на царство возведен, по извещению Иванна Златаустаго. Подобен же сим царем Феодосию и Маркияну Иустин Малый и Тивирий. Царствующу бо сему Иустину Малому во Цареграде, супружницу имея зело милостиву, подобну своему нраву, якоже и сам милостив есть, имянем Софию, не бе же има ни сына, ни дщери. У него же бе советник Тивирий благоверен зело, и красен видом, лицем светел, милостив и долготерпелив, в воинстве храбр велми; красоты же ради его и храбрости царь Иустин возлюби его, прием во усыновление, и первие украшает ево цесарским венцем; потом же собрав патриархи и синклит свой и весь народ, и поучив доволно скифетрацарствия, самодержавствия венцем венча ево, еще жив сый в житии сем. Иустин же царь, венча Тивирия на царство, успе сном вечным. По умертвии же Иустинове благочестивый царь Тивирий Богом даную матер свою, царицу Софию, жену Иустинову, зело почте, и яко матерь себе имея ю; подо областию же его сущим недугующим, и страждущим и нищим отверз сокровища своя; старым бысть вож, печалным утеха, во всех бедах помощник, и толико, яко всем людем прехвално вопити о нем: фтораго, рече, Августа Римскаго кесаря дал нам Бог днесь. Бе же у него две дщери, едину даде за Маврикея, той убо Маврикий в воинстве храбр зело; его же, сочтания ради дщери своея, Тивирий царь в кесарский сан устрой, по мале же по преставлении своем, и царство свое вручи ему. Любезно же чтуще и божественная писания, многих во царех обрящут скифетроцарствия имущих, в порфиру государственную облачащися, добре правящих царственная по Бозе благочестно и праведно; понеже бо Господь достойныя приемлет, недостойный же вон измещет. Мнози убо звании, мало же избранных; рече бо Господь; «не всяк бо глаголяй ми, Господи, Господи, внидет во царство небесное, но творяй волю Отца Моего, иже есть на небесех. Его же бо суд обыдет Божий, будет ему, в нем же аще судит Бог бытии. Мнози бо и нехотящии приидоша, в неже звани быша от Бога. Не вы бо действующе сия, но творяй в вас Дух святый». Якоже пишет «всяко добро бываемо кроме Бога не сотворяетца, ниже сотворитися может», якоже рече Господь; «без Мене не можете сотворит ничесоже». Такоже и ты, великий государь Михайло Феодорович, не ослушайся Божия повеления, и утоли плач и рыдание и вопль многонародный, восприми скифетродержание Росийскаго царствия». Бояре ж, и дворяне и вес царский синклит, и гост и торговые люди, и все православное крестьянство, з женами и з детми и с сущими младенцы безотступно со многим слезным рыданием у государя Михайла Федоровича милости прошаху, чтоб надо всем православным крестьянством милость показал, не дал их врагом в расхищенье, был им милосердым государем царем и великим князем всеа Русии; и молиша безпрестанно от третья го часа дни и до девятаго.
Государь же Михайло Федорович никако повинуяся глаголемым, и на моление народа не уклонися, но всячески с слезным рыданием отрицашеся, глаголя: «как есми вам прежее сего говорил и ныне тоже говорю: не мните себе того, что мне помыслит на такова великого государя моего, пресветлаго и праведнаго царя и великого князя Федора Ивановича, всеа Русии самодержца, превысочайшую царскую степень, на высоту царствия его; и в разум мой о том не прииде. Выше моей меры на мя бремя возлагаете: еще есми не в совершенных летех, а Московское государство ото врагов и от гонителей нашей истиной православной хрестьянской веры, и от искони вечных недрузей, от Жигимонта короля Полского и великого князя Литовского, и от его подданных, Полских, и Литовских, и Неметцких людей, и от межусобные брани в конечном разоренье, и во оскудении и в запустении; и царские многие неисчетные сокровища, собрание прежних великих государей царей Роснйских, и их царское всякое достояние без остатка, что вы сами своими очима видели, в расхищении и в разграблении от Полских и от Литовских людей бысть; а отец мой, великий государь, Филарет митрополит, за нашу истинную непорочную веру, и за все православное хрестьянство стражет у Полского короля в великих утеснениях, и в бедах и скорбех. И мне как на такое великое дело помыслить, и отца своего, великого государя, в конечном зле видети, и без его благословения на такое превысочайшее государство дерзнут? И как такое великое преславное Московское государство в таком разоренье, а мне, еще будучи в младых летех, управити? И чем всяких служилых людей, видя их разоренье, и многую службу и кровь за святые Божии церкви, и за нашу истинную православную хрестьянскугю веру, и за все Московское государство, против врагов наших Полских и Литовских людей, жаловати, и против недрузей Полских и Литовских и Неметцких людей чем стоят? И отторжение грады от Московского государства великий Новгород, и Смоленеск и иные городы, как и чем к Московскому государству привратити? И то прошение ваше никак исполнится на мне не может».
Архиепискуп же Феодорит и весь освященный собор, и бояре Федор Иванович Шереметев с товарыщи, и дворяне и все православное хрестьяство о сем в недоумении мнозе бысть, и во мнозей скорби и в плачи неутешимом, еже прошения своего не получиша, и недоумевахуся, како у великого государя царя и великого князя Михаила Федоровича всеа Русин и у матери его, у великие государыни старицы иноки Марфы Ивановны, милости просити и бита челом. И ин совет благ учиниша: совокупившеся все во едино, воздвигше честные и животворящие кресты Господни, и чюдотворные иконы пречистые Владычицы нашея Богородица и Приснодевы Мария с превечным Младенцем, и великих Московских чюдотворцов Петра, и Олексея, и Ионы и прочих святых, приидоша к месту, идеже стоит великий государь царь и великий княз Михайло Федорович всеа Русии и мать его, великая государыня, старица иноко Марфа Ивановна. Великий же государь Михайло Федорович, видев честные кресты и чюдотворные иконы к себе грядуще, со многим плачем и рыданием глаголя: «почто толи кий подвиг животворящим крестом и честным Божиим иконам, и себе многой труд сотворяете, и неначаемое дело выше моея меры на мя возлагаете, чего и в разум мой о том не может принта?» Архиепискуп же и весь освященный собор с великими слезами глагола ему: «Не буди, государь, одержим печалию, но утеши сердце свое упованием Божиим, и пречистые Богородицы милостию и великих чюдотворцов; вся тебе и твоему царствию подаст благая, толко не буди, государь, противен воли Божии. Отец же твой, великий государь наш, преосвященный Филарет, митрополит Ростовский и Ярославский, по своей к Богу великой вере и правде, от таковаго злато плененения и скорбей и бед вскоре свобожен будет; а милость и благословение его, великого государя, на тебе, великом государе, единороднем сыне его, ныне и всегда есть и будет. А еже глаголеши, яко талик подвиг мы воздвигохом, повемы же та истинну, глаголя: не мы сей подвиг сотворихом, якоже глаголеши, но пречистая Богородица с великими чюдотворцы возлюби тебе, и святую волю Сына своего и Бога нашего изволи исполнити на тебе, государе нашем. Тем же, государь, устыдися пришествия честнаго Ея образа; послушай, якоже Бог изволи и пречистая Богородица и великие чюдотворцы, и не буди противен воли Божии; повинися святой воле Ево безо всякого размышления. Бог творит, елико же хощет, и строит вся благая Своим святым хотением и волею; якоже Пророк рече: "аще не Господь созиждет дом, всуе трудишася зиждущей надеющейся на Господа, яко гора Сион, не подвижитца во веки"».