Праведник аще постигнет скончатися, в покои будет. Старость бо честна не многолетна, ниже в числе лет иссчитается. Седина же есть мудрость человеком, и возраст старости житие нескверное. Благоугоден Богови быв, возлюбен бысть и живый посреде грешник преставлен бысть. Восхищен бысть, да не злоба изменит разум его или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга: Угодна бо бе Господеви душа его. Сего ради потщася от среды лукавствия. Людие же видевше и не разумевше, ниже положише в помышлении таковое, яко благодать и милость в преподобных Его и посещение во избранных Его.
Праведницы во веки живут, и в Господе мзда их, и попечение их у Вышняго. Сего ради приимут Царствие благолепия и венец доброты от руки Господни, зане десницею покрыет я и мышцею защитит их. Приимет всеоружие рвение Свое и вооружит тварь в месть врагом. Облечется в броня правды и возложит шлем суд нелицемерен. Приимет щит непобедимый, преподобие, поострит же напрасный гнев во оружие, споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы и, яко вихорь, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте: навыкните судии концев земли: Внушите, держащии множества и гордящиися о народех язык, яко дана есть от Господа держава вам и сила от Вышняго.
Посрамил еси диавола и слуг его, благоверне воине Феодоре, богоугодным своим житием и ратными подвиги, Царство Небесное в себе стяжав, и славу Отечеству доставил еси. Ныне молися Христу Богу нашему о спасении душ наших.
О христоноснии народи, возопием любовию к дивному заступнику нашему: О благоверне и всечестне Феодоре, непрестанно воздвигни руце к Богу, и молися за святители, монахи и зя вся люди, избавити грады и вся страны Российския от нашествия иноплеменник и междоусобныя брани и даровати воинству нашему на враги победы и одоление, и церквам благостояние мирно устрой, и моли о душах наших.
Яко корабль непотопляем, тя, Феодоре, обретаем заступника в бедах: в мори плавающии и на земли пребывающии, сущии далече и близ обретающиися. Темже сошедшеся вопием: молися ко Господу, яко да всякаго избавимся обстояния.
Радуйся и веселися о Господе, обитель санаксарская, светло торжествуй и ликуй, Христова Церковь, со священноиноки и иноки, имущи честное сокровище, святыя мощи преславного заступника, праведнаго Феодора. Приидите, вернии, тецыте, собравшиеся, и ликующе сице рцыте: радуйся, святче Феодоре, Отечеству нашему и обители сей утверждение и нам, верным, спасение.
Праведне богомудре Феодоре, чистая твоя душа, правоверным смыслом сияющи, облистает добродетелей светлостию и озаряет верных исполнение, бесов тьму отгоняющи. Темже, яко причастника невечерния благодати, тя благочестне вси почитаем, досточудне.
Стих: Праведник, яко финикс, процветет, яко кедр, иже в Ливане, умножится.
Имея душу милостиву, и чист помысел, и сердце бодрое, веру неблазненную, и любовь воистину нелицемерную, от земли преставился еси к небесным и с лики праведных водворяешися. Темже чтем тя священными песньми и благочестно вси ублажаем, святче Феодоре.
Стих: Возвеселится праведник о Господе и уповает на Него.
О, преславнаго чудесе! Непреборимый воин, небесным стратигом подобен, нам является днесь. Удивляются вси концы земнии, ужасаются варварстии полцы. О, каковый споборник нас даровался! Имже, Христе, спаси души наша, яко един благоутробен.
Богомудре Феодоре, великий воине, блажен еси, яко блаженство небесное наследовал еси, егоже ради милосердия плоды творя, нищия и болящия удовлил еси. Сирот питатель, пленных свободитель быв. Тем в непрестаемую радость вшел еси Господа твоего, Емуже со ангелы предстоя, моли верою поющим тя изобилие щедрот подати и грехов оставление.
Державе Российстей архистратиг непобедимый явился еси, агарянскую злобу нивочтоже вменив и разорив: ни славы мирския, ниже богатства взыскуя, но Богу и ближнему послужил еси. Моли, святе Феодоре, воинству нашему даровати на враги одоление, Отечеству во благочестии непоколебимому пребыти и сыновом российским спастися.
Житейское море со многими подвиги и труды преплыв, и в пристанище мысленное покоя пристал еси: сосуд благочестия явлься, блаженне воине Феодоре, требующия милости обогащай, Христа Бога моля даровати нам велию милость.
Пажить древнюю потреби человекоубийственную утроба Девича, Христа рождши: темже вся тварь радуется ныне, Пречистая, яко оживльшися, и согласно воспевает Твоего Сына и Бога.
Огня свирепство видимых врагов и невидимых, возстающих на наследие твое, богоприятных твоих молитв, Феодоре победоносче, залей водами, да спасшеся от них, прославим Бога, дивнаго в чудесех.
Смири, Владычице, врагов вознесенную выю велеречующих, советы и злонравия и сердца поучающихся злым на ны по вся дни: крепость же и победу подаждь призывающим тя, Мати Божия, радость скорую подающи.
Радуйся, российская похвало: радуйся, церкве Божия украшение: радуйся, славо и заступниче русския земли: радуйся, сирым прибежище: радуйся, богомудре Феодоре: радуйся, жителю рая: радуйся, верным забрало: радуйся, доме и жилище Святыя Троицы, юже моли о почитающих всечестную память твою.
О Тебе радуется, Благодатная всякая тварь, ангельский собор и человеческий род, освященный храме и раю словесный, девственная похвало, из Неяже Бог воплотися, и Младенец бысть, прежде век сый Бог наш: ложесна бо Твоя престол сотвори и чрево Твое пространее небес содела. О Тебе радуется, благодатная, всякая тварь, слава Тебе.
Прокимен, глас девятый: Праведник, яко финикс, процветет яко кедр, иже в Ливане, умножится.
Стих: Возвеселится праведник о Господе и уповает на Него.
Оружием твоих молитв, праведне Феодоре, охраняй и ныне Отечество наше и людей православных от всяких бед и напастей.
Ирмос: Поим Господеви песнь новую, непроходимое бо оземленив Чермное, пешествовати сотвори сыном израилевым, и сопротивныя враги покры море.
Просвети ми ум и озари моя чувства, согрешений мрак души моея отгнав, Христе Боже, да чистою совестию возмогу песнь составити возвеличити Твоего угодника, праведнаго воина Феодора.
Архистратиже непобедимый Российския земли, якоже второе солнце, деяньми сияя, всех нас поминай, совершающих память твою, Феодоре многославне.
Воистину в мори путие твои, победоносче Феодоре, и стези твоя безбожным агаряном на разорение в водах многих, и следы твоя, архистратиже земли русския, врагом не познаются.
Богородичен: Законов кроме естественных, Дево, родила еси Законодавца Бога, Человека бывша. Того яко Бога, моли, Всенепорочная, наша беззакония презрети.
Всесвятая Троице, Боже и содетелю всего мира, поспеши и направи сердце, ум и уста наша достойно воспети славу добляго воина Твоего, благовернаго адмирала флота Российскаго, Феодора непобедимаго.
Помянем, братия, како Божиею благодатию благоверный Феодор во граде Херсонстем душу свою за ближних своих полагает, и от смертоносныя болезни многих спасает, и любовь ко злым и благим делом являет.
Яко волны морския на нас восташа беззакония наша, яко кораблец в пучине вси мы обуреваемся от прегрешений многих, но в тихое пристанище настави нас, Господи, покаянием и предстательством благовернаго воина Феодора, и спаси нас.
Богородичен: Спаси нас, Мати истины, обуреваемых люте от страстей и от сатрапов мысленных и часто погружаемых, и исправи нас, Чистая, ко спасения благоутишному пристанищу.
Ирмос: Да утвердится сердце мое в воли Твоей, Христе Боже, иже над водами небо утверждей второе и основавый на водах землю, Всесильне.
Предстояще Господу со бесплотными силами, неизреченною славою блистающе, праведне Феодоре, за ны молися, творящия честную и преславную память твою.
Милование стяжал еси христоподражательное, раздавал еси богатство требующим, небесное богатство ходатайствующее тебе, еже и получил еси, Феодоре.
Ни молва мирская, ни чинов и наград вручение, ни слава тленная твоея яже по Бозе простоты уставиша, Феодоре, но благоволил еси воистину божественным деянием.
Избавляеши обитель твою от лютых обстояний и чтущия тя от потопления в водах, яко предстатель верен и молитвенник изряден, Феодоре преславне.
Богородичен: Яко воистину Господь воцарися в Царствии неотпадающее и облечеся псаломски из Тебе, Богомати, в красное благолепие, плоть святую, еюже смерть прият и разруши ея царство.
Да постыдятся и смятутся вси врази земли русския, се бо Бог благовернаго Феодора яко оружие Свое очищает и уготовляет, яко фиал ярости Своея соделовает и супротив агарян нечестивых направляет.