О, воине Феодоре, Моисею подобяся, пса Магомета проповедников со всеми корабли в пучине морстей, яко войско древняго фараона иногда, потопляеши.
Воспрянем от сна уныния, братие, и помолимся ко благоверному воину Феодору непобедимому, да испросит душам нашим от Господа мужество во бранех, долготерпение и велию милость.
Богородичен: Устави душ наших свирепыя бури, Боже всех щедрый, мольбами рождшия тя Богородицы, благовернаго воина Феодора и всех святых Твоих.
Седален, глас третий:
Буди скорый в бедах утешитель, во бранех предстатель, во градех и странах вся люди неисчетною милостию покрывая, праведне Феодоре, молися Христу Богу о чтущих святую память твою.
Слове Божий, иже рождейся от Девы Богоотроковицы, Тоя ходатайствы священными и праведнаго Феодора Твоего, Спасе, всякаго обстояния и всякия нужды избави души наша.
Ирмос: Разумех, Всесильне, Твое смотрение и со страхом прославих Тя, Спасе.
Господи, услышахом дивныя, яже сотворил еси велиим Феодором, и ужасохомся.
Восхваляем благость Твою, еюже исполнил праведнаго Феодора, разумеем, Всесильне, смотрение Твое и ублажаем Феодора предивнаго.
Твою поминаем, Боже, милость, юже явил еси в Феодоре человеколюбием.
Богородичен: Кто изочтет силы Твоя, Чистая; но пощади нас, изми из глубины греховныя и настави на благое покаяние безвозвратно.
Помяни, диаволе, огнь, имже сожжена бысть Капудания, и глубину морскую, в нейже изгибе ополчение твое, и вострепещи, окаянный, езере огненнаго и жупельнаго, тебе уготовленнаго на день судный.
О, султане юродивый, флота твоего несть ктому, се бо воин Феодор яко дух бурен не фарсийския, обаче магометанския корабли на Понте Эвксинстем сокрушает и могущество нечестивых в ничто обращает.
О, селения исмаилитска, о агаряне зломудреннии, восплачте и возрыдайте, и познайте суетство веры магометовы, и преклонитеся пред Сотворившим видимое и невидимое, и Сыном Его Иисусом Христом, и Духом Его Святым.
Богородичен: Страстей волнение смущает нас и сластьми погружает, Дево Пренепорочная, кормчию Христа рождшая, руку нам помощи простри и спаси нас.
Ирмос: Яко просвещение наше сый, Христе, просвети нас, Защитителю жизни нашея, сохрани ны, надеющияся на Тя.
Просвети твое житие всю вселенную, святе Феодоре, правоверными делы сияющее, яко солнце, Триличнаго Божества зарею просвещаем.
Иже на мори быв флотоводец искусен и непреборим, испроси наследию твоему мужество и веру непоколебиму, отгоняя присно врагов шатания.
Завистию и злобою одержими лжесоюзницы, козни деяху тебе, ты же из глубины сердца вопиял еси: сохрани мя, надеющагося на Тя.
В жизни временней никаяже рана коснуся телеси твоему, обаче по преставлении поругание многое от злых человек потерпеша честныя мощи твоя, умножающе тебе, Феодоре, славу на небесех.
Богородичен: Воспойте, вся земля, пойте же воссиявшему из чрева благолепно неискуснобрачныя и Сию верным показавшему тверду надежду и похвалу.
О, како, неложный Боже, на островех Керкирских оружием благоволения венчаеши доблего Феодора, да низложит безбожие галльское, да не пребудут беззаконницы пред Очима Твоима во веки!
Положу на мори руку его и на реках десницу его: се бо, Господи Иисусе Христе, от лица вернаго раба Твоего, благовернаго воина Феодора, иссекаеши вся враги его и ненавидящия его во адриатстей пучине потопляеши.
Господи, днесь на западе солнца врази Твои паки возшумеша и ненавидящии Тя паки воздвигоша главу, на люди Твоя лукавноваша, на Тя завет с диаволом завещаша.
Богородичен: Пречистая Владычице, рождшая человеком кормчию Господа, страстей наших непостоянное и лютое утоли смущение и тишину подаждь сердцам нашим.
Ирмос: Обыде нас последняя бездна, несть избавляяй, вменихомся яко овцы заколения. Спаси люди Твоя, Боже наш: Ты бо крепость немощствующих и исправление.
Православную страну российскую благомилосердо пощади, и милостивно утверди, Боже наш, и мир, и любовь, и здравие со всеми сотвори, Феодора молитвенника имея ходатая о нас.
Укроти, воеводо святый Феодоре, находы злотворных человек и из рук их исхити, гонящих и расхищающих немилостивно.
Молитвами предваряя к Богу и Тому предстоя со ангелы, за весь мир молися, брань неприязненную всю потребити и победу известну дати на супостаты воинству нашему.
Богородичен: На небеси архангели и ангели, херувими и серафими славят, на земли же вси людие раболепно покланяются рождеству Твоему, сего ради молим Тя, Владычице, Спаси души наша.
Господи Иисусе, верный раб Твой адмирал Феодор непобедимый помощию Твоею вся оплоты галльския разоряет, и вся твердая их в страх и поношение окрестным языком полагает, и безбожие их в конец уничтожает.
Радуйся, нищих и сирых питателю и покровителю, радуйся, вдов защитниче, радуйся, юности наставниче, болящих утешение, плененных отрадо и нам всем молитвенниче предивный!
О, воине Феодоре! Услыши ны, во истине тя призывающия, и прииди от горних селений к нам, во гресех утопающим, якоже Христос сквозе ветр дыхающ и мраз и тьму нощную ко учеником Своим, и помози нам.
Богородичен: Яже, от источник источившая воду оставления, Пренепорочная, сердца наша напой, иссохшая всякими преступлениями.
Архистратиже российский, служителю народа Божияго, нищих и угнетенных свободителю, нечестивых наказателю, полезнаго нам проси и велия милости, яко споборник наш, праведне Феодоре.
Всечестную память почтим угодника Христова, великаго Феодора, храбраго воина и кормчаго благоутишна, и радостными глаголы от сердца воззовем к нему, сице вопиюще:
Радуйся, дела благая со тщанием творивый:
Радуйся, управителю мудрый и терпеливый.
Радуйся, врачу усердный и милостивый:
Радуйся, молитвенниче теплый и неутомимый.
Радуйся, воеводо праведный и непобедимый:
Радуйся, рабе Божий, кроткий и человеколюбивый.
Радуйся, враги злочестивыя смиряяй и устрашаяй:
Радуйся, и ныне со ангелы и всеми святыми за ны моляйся.
Радуйся, воине Феодоре, архистратиже державы Российския.
Ирмос: По множеству милости Твоея, Человеколюбче, сотвори с нами, да Тебе верно все воспевающе поим, якоже отроцы: благословен еси, Боже отцев наших.
Велия подвиги совершил еси, несумненную веру имея, споспешествуемый молитвами сродника твоего, преподобнаго Феодора, взывающаго: благословен еси, Боже отец наших.
Кротостию и простотою душевною к себе привлекая, и царицу сим удивил еси, и дары от нея почтен, взывал еси: благословен еси, Боже отец наших.
Скорбьми утесняем отовсюду, терпел еси вся, и на Человеколюбца надежду возложив, вопиял еси: благословен еси, Боже отец наших.
Богородичен: Надеждо всем, Госпоже Богородице, разгони, Владычице, враги души моея и направи на стезю праву. Пощади, Помощнице и Надеждо христианская, Сыну Своему зовущи: благословен еси, Боже отец наших.
О, чудесе! Якоже древле Давид пред сенным ковчегом, тако и ты, воине Феодоре, пред мощми дивнаго во святых святителя Спиридона Тримифунтскаго главу свою преклоняеши и крестным ходом истинное правоверие на Керкире паки утверждаеши.
О камение и горы, падите на мя и покрыйте мя, рече ересиарх латинский, услышав слух о воех твоих, о Феодоре, в Рим ветхий входящих и супротив галлов зловредных, якоже Гедеон супротив Амалика иногда, храбро ополчающихся.
Кто возможет сказати о милосердии твоем, о благоверный воине Феодоре; блажен еси, разумеваяй на нища и убога, воистину в день лют избави и сохрани тя Господь.
Богородичен: Вод источник молитвенный Тя, Богородительницу, ведуще вси, источающ верным струи душам и телесем, темже Тя непрестанно славим.
Ирмос: Песнь тебе приносим бесплотных, якоже отроцы в пещи, и поюще глаголем: Благословите, вся дела Господня, Господа.
Пищи бессмертныя, Тела и Крови Христовы, сподобился еси причаститися, богомудре, душу твою Небесному Царю и Владычице предал еси, взывая: благословите, вся дела Господня, Господа.
Украшен мудростию и разумом просвещен, смирением сердца лепотствуя, к мысленным прешел еси двором, идеже воспеваеши: благословите, вся дела Господня, Господа.
Тобою, праведне Феодоре, земля темниковская вельми хвалится: в ней бо последния дни благочестно пожив, спасение соделав, Бога всещедраго и милостиваго чтити научил еси, зовый: благословите, вся дела Господня, Господа.
Богородичен: Его родила еси, Владычице присно моли работы избавити мя страстей и осуждения, и одержащаго мя лютаго отчаяния, и оскорбляющих мя удержания, Чистая Богорадованная.
Под конец жизни твоея во окрестностех обители Санаксарския водворяешися, зде речеши, покой мой, зде тихое пристанище, зде вселюся во век века.
Течение твое скончал еси, веру соблюл еси, сего ради Бог жизнь твою близ мощей преподобнаго Феодора санаксарскаго, сродника твоего, скончавает и сосуд тя избранный ко Царству Небесному приуготовляет.
Ущедрил еси Твое создание, Владыко, очистил еси твоим благоутробием, душе его вожделенное Отечество даровал еси, тело же многотрудное в санаксарских стенах упокоил еси.
Богородичен: Водами животочными, Дево, напой истаявшия души наша зноем греховным, яко да класы плодоносны возрастим, Чистая, божественнаго умиления.