Не устыде́ся Всеблаги́й Бог / плотски́м обре́занием обре́затися, / но даде́ Самаго́ Себе́ о́браз и начерта́ние всем ко спасе́нию, / и́бо зако́на Творе́ц зако́нная исполня́ет / и проро́ков прорече́ния, я́же о Нем. / И́же вся содержа́й го́рстию и пелена́ми пови́выйся, / Го́споди, сла́ва Тебе́.
Тропарь святаго, глас 1:
Во всю зе́млю изы́де веща́ние твое́, / я́ко прие́мшую сло́во твое́, / и́мже боголе́пно научи́л еси́, / естество́ су́щих уясни́л еси́, / челове́ческия обы́чаи украси́л еси́, / ца́рское свяще́ние, о́тче преподо́бне, / моли́ Христа́ Бо́га / спасти́ся душа́м на́шим.
Слава, и ныне, праздника, глас тойже:
На Престо́ле огнезра́чнем / в Вы́шних седя́й со Отце́м Безнача́льным и Боже́ственным Твои́м Ду́хом, / благоволи́л еси́ роди́тися на земли́ / от Отрокови́цы Неискусому́жныя, Твоея́ Ма́тере, Иису́се, / сего́ ра́ди и обре́зан был еси́, я́ко Челове́к осмодне́вный. / Сла́ва всеблаго́му Твоему́ сове́ту, / сла́ва смотре́нию Твоему́, / сла́ва снизхожде́нию Твоему́, Еди́не Человеколю́бче.
И отпуст.
На повечерии кондак святаго. Сла́ва, и ны́не, праздника. Полунощницу же поем, по обычаю, с кафизмою. По 1–м трисвятом тропарь праздника. По 2–м трисвятом кондак праздника же. Молитвы же Помяни́, Го́споди, в наде́жди Воскресе́ния: не глаголем, точию: Го́споди, поми́луй, 12. И отпуст.
НА УТРЕНИ
На Бог Госпо́дь: тропарь праздника, дважды. Сла́ва святаго, и ны́не, праздника.
По 1–й кафизме седален, глас 5.
Подобен: Собезнача́льное:
Я́ко ца́рское украше́ние Це́ркве, Васи́лия вси да восхва́лим, / уче́ний сокро́вище неоску́дное, / си́ми бо той наказа́ нас Тро́ицу почита́ти Святу́ю, / соедине́ну у́бо Существо́м, разделе́ну же Ипоста́сьми.
Слава, глас 1.
Подобен: Гроб Твой:
Васи́лие прему́дре, предстоя́й Тро́ице, / моли́ся получи́ти в День суда́ нам, пою́щим тя и чту́щим па́мять твою́, / благода́ть, ми́лость и очище́ние прегреше́ний, / я́ко да усты́ прославля́ем и се́рдцем Еди́наго Человеколю́бца.
И ныне:
Всех Творе́ц и Влады́ка ми́ра, / Сый со Отце́м и Ду́хом горе́, / я́ко Младе́нец обре́зуется на земли́ осмодне́вен. / И́стинно Боже́ственна же и чу́дна дела́ Твоя́: / Ты бо, Влады́ко, нас ра́ди обре́зался еси́, / я́ко Сый зако́на исполне́ние.
И чтем во Евангелии толковом поучение Великаго Василия монахом.
По 2–й кафизме седален, глас 8.
Подобен: Прему́дрости:
Неизрече́нныя прему́дрости Богови́дне поче́рпл еси́ бога́тство та́йное, / всем источи́л еси́ правосла́вия во́ды, / ве́рных у́бо сердца́ Боже́ственне веселя́щия, / неве́рных же веле́ния досто́йне потопля́ющия. / Отню́дуже обою́ду благоче́стия по́ты / показа́лся еси́ непобеди́м Тро́ицы побо́рник, святи́телю Васи́лие. / Моли́ся Христу́ Бо́гу прегреше́ний оставле́ние дарова́ти / пра́зднующим любо́вию святу́ю па́мять твою́.
Слава, глас 3.
Подобен: Боже́ственныя ве́ры:
Всю напои́л еси́ вселе́нную, я́коже вода́ми, / уче́нии твои́ми, благоче́стия собра́нными догма́ты, / жи́зни бо Исто́чник в тебе́ препочива́ше вои́стинну, Васи́лие. / Его́же моли́, я́ко дерзнове́ние стяжа́вый, Богодохнове́нне, / дарова́ти нам ве́лию ми́лость.
И ныне, глас 4:
И́же естество́м Неви́димый, ны́не ви́дим есть пло́тию: / Сло́во Несозда́нное, ны́не из Де́вы Чи́стыя ражда́емо, зи́ждется. / Те́мже и по зако́ну нас ра́ди, челове́ков, / я́коже осмодне́вен, обре́зуется Младе́нец. / Тому́ у́бо поклони́мся, я́ко Спа́су на́шему.
Величание Обрезанию:
Велича́ем Тя, Живода́вче Христе́, / и почита́ем пречи́стыя пло́ти Твоея́ / зако́нное обре́зание.
Величание святителю общее:
Велича́ем тя, / святи́телю о́тче Васи́лие, / и чтим святу́ю па́мять твою́, / ты бо мо́лиши за нас / Христа́, Бо́га на́шего.
Или сие:
Велича́ем тя, / святи́телю Христо́в Васи́лие, / благоче́стно Це́рковь Христо́ву сохра́ншаго.
Псалом избранный:
Услы́шите сия́ вси язы́цы, внуши́те вси́, живу́щии по вселе́нней. / Уста́ моя́ возглаго́лют прему́дрость, и поуче́ние се́рдца моего́ ра́зум. / Прииди́те, ча́да, послу́шайте мене́, стра́ху Госпо́дню научу́ вас. / Благовести́х пра́вду в це́ркви вели́цей. / И́стину Твою́ и спасе́ние Твое́ рех. / Пове́м И́мя Твое́ бра́тии мое́й, посреде́ це́ркве воспою́ Тя. / Услы́шати ми глас хвалы́ Твоея́ и пове́дати вся чудеса́ Твоя́. / Го́споди, возлюби́х благоле́пие до́му Твоего́, и ме́сто селе́ния сла́вы Твоея́. / Возненави́дех це́рковь лука́внующих, и с нечести́выми не ся́ду. / Я́ко сохрани́х пути́ Госпо́дни, и нече́ствовах от Бо́га моего́. / Уста́ пра́веднаго поуча́тся прему́дрости, и язы́к его́ возглаго́лет суд. / Пра́вда Его́ пребыва́ет в век ве́ка. / Свяще́нницы Твои́ облеку́тся пра́вдою, и преподо́бнии Твои́ возра́дуются. / Блаже́ни живу́щии в дому́ Твое́м, в ве́ки веко́в восхва́лят Тя.
Сла́ва, и ны́не: Аллилу́ия (3).
По полиелеи седален, глас 8.
Подобен: Прему́дрости:
Си́лою слове́с Боже́ственных е́реси низложи́л еси́ мра́чныя, / вся шата́ния Евно́миева погрузи́л еси́, / челове́ком бо Ду́ха Бо́га бы́ти пропове́дал еси́ / и рук возде́нием враги́ умертви́л еси́. / Все прогна́л еси́ Саве́ллиево служе́ние, / вся же мудрова́ния Несто́риева упраздни́л еси́, / святи́телю Васи́лие. / Моли́ся Христу́ Бо́гу / прегреше́ний оставле́ние дарова́ти / пра́зднующим любо́вию святу́ю па́мять твою́.
Слава:
Благода́ть слове́с твои́х Боже́ственных и догма́т высота́ та́инственная / Боже́ственнаго нам бысть восхожде́ния ле́ствица: / Ду́ха бо, о́тче, стяжа́вый трубу́, / то́ю пропове́дал еси́ Боже́ственная уче́ния. / Те́мже и на ме́сте всели́лся еси́ зла́чне, / мзды по́двигов твои́х прие́м, преподо́бне иера́рше Васи́лие. / Моли́ся Христу́ Бо́гу / прегреше́ний оставле́ние дарова́ти / пра́зднующим любо́вию святу́ю па́мять твою́.
И ныне:
Вся́ческих Влады́ка и Творе́ц, из пречи́стыя утро́бы Твоея́ плоть прие́мый, / Предста́тельницу Тя показа́ челове́ком, Всенепоро́чная. / Сего́ ра́ди вси к Тебе́ прибега́ем, / очище́ния прегреше́ний прося́ще, Влады́чице, / и ве́чнующия изба́витися му́ки, / и вся́каго озлобле́ния лю́таго мироде́ржца. / Сего́ ра́ди вопие́м Ти: / Моли́ся Твоему́ Сы́ну и Бо́гу / прегреше́ний оставле́ние дарова́ти / покланя́ющимся ве́рою всесвято́му Рождеству́ Твоему́.
И чтем надгробное слово Григория Богослова, еже о Велицем Василии, на четыре части.
Степенна, 1–й антифон 4–го гласа.
Прокимен, глас 4: Уста́ моя́ возглаго́лют прему́дрость, / и поуче́ние се́рдца моего́ ра́зум. Стих: Услы́шите сия́, вси язы́цы, / внуши́те, вси, живу́щии по вселе́нней.
Вся́кое дыха́ние:
Евангелие от Иоанна, зачало 36:
Рече́ Госпо́дь ко прише́дшым к Нему́ иуде́ем: Аз есмь дверь: Мно́ю а́ще кто вни́дет, спасе́тся, и вни́дет, и изы́дет, и па́жить обря́щет. Тать не прихо́дит, ра́зве да укра́дет, и убие́т, и погуби́т: аз приидо́х, да живо́т и́мут и ли́шше и́мут. Аз есмь па́стырь до́брый: па́стырь до́брый ду́шу свою́ полага́ет за о́вцы. А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы. А нае́мник бежи́т, я́ко нае́мник есть и неради́т о овца́х. Аз есмь па́стырь до́брый, и зна́ю Моя́, и зна́ют Мя Моя. Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы. И и́ны о́вцы и́мам, я́же не суть от двора́ сего́, и ты́я Ми подоба́ет привести́: и глас Мой услы́шат, и бу́дет еди́но ста́до, и еди́н па́стырь.
По 50–м псалме, стихира самогласна, глас 6:
Излия́ся благода́ть во устна́х твои́х, преподо́бне о́тче, / и был еси́ па́стырь Христо́вы Це́ркве, / уча́ слове́сныя о́вцы / ве́ровати в Тро́ицу Единосу́щную / во Еди́ном Божестве́.
Канон праздника. Творение Стефаново. Ирмос по дважды, тропари же на 4, глас 2.
Песнь 1
Ирмос: Гряди́те, лю́дие, / пои́м песнь Христу́ Бо́гу, / разде́льшему мо́ре и наста́вльшему лю́ди, / я́же изведе́ из рабо́ты еги́петския, / я́ко просла́вися.
Осмери́ца дней, нося́щая о́браз бу́дущаго, / Твое́ю, Христе́, просвеща́ется и освяща́ется во́льною нището́ю, / в сей бо зако́нно обре́зался еси́ пло́тию.
Обре́зание прие́млет осмодне́вное Христо́с Своего́ рождества́, / и сего́ днесь сень спря́тает, / свет возсиява́я но́выя благода́ти.
Ин канон святителя Василия, на 8. Творение Иоанна Дамаскина, глас и ирмос тойже.
Твоему́ гла́су подоба́ше приити́, Васи́лие, нача́ти хотя́щим хвалы́ твоя́, / но, о́тче, мольбу́ прие́м, благода́ть подава́й незави́стно нам.
Доброде́телей ты жесто́кий ше́ствовал еси́ путь, / в гла́дкий дости́гл еси́ и несопроти́вный Небе́сный восхо́д / и всем яви́лся еси́ о́браз, Васи́лие.
Страстно́е взыгра́ние, томя́щее плоть, любому́дрия жела́нием наказа́л еси́, / те́мже в нетле́нных водворя́ешися Ца́рствиих, / о́тче Васи́лие.
Душе́вныя стра́сти благопотре́бно, Васи́лие, / вку́пе же и теле́сныя, духо́вным посе́кл еси́ мече́м, / себе́ же Влады́це же́ртву прине́сл еси́.
Ты, быв неизрече́нных таи́нник, Васи́лие, / Христо́ву Ца́рствию тайнонаучи́л еси́, свяще́нне о́тче, / я́ве Тро́йческий свет облиста́л еси́ нам.
Богородичен: Кто изрещи́ Твое́ по досто́инству возмо́жет, е́же па́че сло́ва зача́тие? Бо́га бо родила́ еси́ пло́тию, Всечи́стая, / нам я́вльшася Спа́са и Го́спода.
Катавасия: первый лик поет ирмос: Глубины́ откры́л есть дно / и су́шею Своя́ влече́т, / в ней покры́в проти́вныя, / кре́пкий во бране́х Госпо́дь, / я́ко просла́вися.
Другий лик, ирмос: Ше́ствует морску́ю волня́щуюся бу́рю, / су́шу а́бие Изра́иль я́вльшуюся. / Чермны́й же понт триста́ты еги́петския покры́ ку́пно, / водостла́нен гроб, / си́лою кре́пкою десни́цы Влады́чни.
Песнь 3
Ирмос: Утверди́ нас в Тебе́, Го́споди, / Дре́вом умерщвле́й грех, / и страх Твой всади́ / в сердца́ нас, пою́щих Тя.
Сло́во вопло́щшееся Пресу́щественное в преста́тие зако́на обре́зася, / нача́ток же Боже́ственныя благода́ти и жи́зни нетле́нныя нам подаде́.
Зако́на исполни́тель, не я́ко сопроти́вен Бо́гу сый, Христо́с воплоти́выйся показа́ся / и сподо́бися во́лею обре́затися осмодне́вен.