Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди, поми́луй, трижды.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии и оставле́нии грехо́в раба́ Бо́жия [или рабы́ Бо́жия], имярек.
Лик: Го́споди, поми́луй, трижды.
О е́же прости́тися ему́ [или ей] вся́кому согреше́нию, во́льному и нево́льному, Го́споду помо́лимся.
Лик: Го́споди, поми́луй, трижды.
Возглас от священника: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Диакон: Го́споду помо́лимся:
Лик: Го́споди, поми́луй.
Священник молитву:
Безнача́льне, Ве́чне, Свя́те святы́х, Единоро́днаго Твоего́ Сы́на низпосла́вый, исцеля́ющаго вся́кий неду́г, и вся́ку я́зю ду́ш и теле́с на́ших, низпосли́ Свята́го Твоего́ Ду́ха, и освяти́ еле́й сей, и сотвори́ и́ помазу́ющемуся Твоему́ рабу́ [или помазу́ющейся Твое́й рабе́], имярек, в соверше́нное избавле́ние грехо́в его́ [или ея́] в насле́дие Ца́рствия Небе́снаго.
Ведомо буди, яко нецыи молитву убо сию даже до зде токмо глаголют, с возглашением: Твое́ бо есть е́же ми́ловати:
Нецыи же даже до конца глаголют:
Ты бо еси́ Бог ве́лий и ди́вен, храня́й заве́т Твой и ми́лость Твою́ лю́бящим Тя, дая́й избавле́ние грехо́в, Святы́м Твои́м О́троком Иису́сом Христо́м; па́ки рожде́й нас от греха́, просвеща́яй слепы́я, и исправля́яй низве́рженныя, любя́й пра́ведныя и гре́шныя ми́луяй; па́ки изведы́й нас от тьмы и се́ни сме́ртныя; глаго́ляй су́щим во у́зах: изыди́те, и су́щим во тьме: откры́йтеся. Возсия́ бо в сердца́х на́ших свет ве́дения лица́ Его́, отне́леже нас ра́ди на земли́ яви́лся есть и с челове́ки поживе́; прие́мшим Тя дал есть власть ча́дом Бо́жиим бы́ти; ба́нею пакибытия́ сыноположе́ние нам дарова́л есть, и неприча́стны нас сотвори́л есть от наси́льства диа́воля. Поне́же не благоволи́л еси́ кро́вию очи́ститися, но еле́ем святы́м дал еси́ о́браз Креста́ Его́, во е́же бы́ти нам Христо́ву ста́ду, ца́рскому свяще́нию, язы́ку свято́му, и очи́стивый ны водо́ю, и освяти́вый Ду́хом Твои́м Святы́м. Сам, Влады́ко Го́споди, даждь благода́ть нам в служе́ние Твое́ сие́; я́коже дал еси́ Моисе́ови уго́днику Твоему́, и Самуи́лу возлю́бленному Твоему́, и Иоа́нну избра́нному Твоему́, и всем, во вся́ком ро́де и ро́де благоугоди́вшим Тебе́; си́це сотвори́ и нас бы́ти служи́телей Но́ваго Твоего́ Заве́та над еле́ем сим, его́же усво́ил еси́ Честно́ю Кро́вию Христа́ Твоего́; да совле́кшеся мiрски́х похоте́й, у́мрем греху́, и поживе́м пра́вде, обле́кшеся в Него́ пома́занием освяще́ния хотя́щаго еле́а навести́ся. Бу́ди, Го́споди, еле́й сей, еле́й ра́дования, еле́й освяще́ния, оде́жда ца́рская, броня́ си́лы, вся́каго диа́вольскаго де́йства отгна́ние, печа́ть ненаве́тная, ра́дование се́рдца, весе́лие ве́чное, да и сим помазу́емии па́ки рожде́ния, стра́шни бу́дут сопроти́вным, и возсия́ют во све́тлостех святы́х Твои́х, не иму́ще скве́рны или́ вра́ски; и да прии́мутся в ве́чныя Твоя́ упокое́ния, и восприи́мут по́честь го́рняго зва́ния.
Твое́ бо есть, е́же ми́ловати и спаса́ти ны, Бо́же наш, и Тебе́ сла́ву возсыла́ем, со Единоро́дным Твои́м Сы́ном, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.
И по молитве вземлет иерей стручец и, омочив и́ во святый елей, и помазует болящаго крестообразно, на челе, на ноздрях, на ланитех, на устех, на персех, на руках на обе стране, глаголя молитву сию:
О́тче Святы́й, Врачу́ душ и теле́с, посла́вый Единоро́днаго Твоего́ Сы́на, Го́спода на́шего Иису́са Христа́, вся́кий неду́г исцеля́ющаго и от сме́рти избавля́ющаго, исцели́ и раба́ Твоего́ [или рабу́ Твою́] имярек, от обдержа́щия его́ [или ея́] теле́сныя и душе́вныя не́мощи, и оживотвори́ его́ [или ю́] благода́тию Христа́ Твоего́; моли́твами Пресвяты́я Влады́чицы на́шея Богоро́дицы, и Присноде́вы Мари́и; предста́тельствы честны́х Небе́сных Сил Безпло́тных; си́лою Честна́го и Животворя́щаго Креста́; честна́го сла́внаго проро́ка, Предте́чи и Крести́теля Иоа́нна; святы́х сла́вных и всехва́льных апо́столов; святы́х сла́вных и добропобе́дных му́чеников; преподо́бных и богоно́сных оте́ц на́ших; святы́х и исцели́телей безсре́бренников Космы́ и Дамиа́на, Ки́ра и Иоа́нна, Пантелеи́мона и Ермола́я, Сампсо́на и Диоми́да, Фо́тиа и Аники́ты; святы́х и пра́ведных богооте́ц Иоаки́ма и А́нны, и всех святы́х.
Я́ко Ты еси́ исто́чник исцеле́ний, Бо́же наш, и Тебе́ сла́ву возсыла́ем, со Единоро́дным Твои́м Сы́ном, и Единосу́щным Твои́м Ду́хом, ны́не и при́сно, и во ве́ки веко́в, ами́нь.
Сия молитва глаголется от единаго коегождо священника по еже рещи Евангелие и молитву, помазующаго вкупе елеем недугующаго.
(На помазании лик припевает по обычаю:
Услы́ши ны, Бо́же; / услы́ши ны, Влады́ко; / услы́ши ны, Святы́й.
Поми́луй ны, Бо́же; / поми́луй ны, Влады́ко; / поми́луй ны, Святы́й.
Исцели́ ны, Бо́же; / исцели́ ны, Влады́ко; / исцели́ ны, Святы́й.)
Диакон: Во́нмем.
Священник вторый: Мир всем.
И чтец: И ду́хови твоему́.
Диакон: Прему́дрость, во́нмем.
Прокимен, глас 2:
Кре́пость моя́ и пе́ние мое́ Госпо́дь, / и бысть мне во спасе́ние. Стих: Наказу́я наказа́ мя Госпо́дь, сме́рти же не предаде́ мя.
Диакон: Прему́дрость.
Чтец: К Ри́мляном посла́ния свята́го апо́стола Па́вла чте́ние.
Диакон: Во́нмем.
Апостол, к Римляном, зачало 116.
Бра́тие, до́лжни есмы́ мы си́льнии не́мощи немощны́х носи́ти и не себе́ угожда́ти. Ки́йждо же вас бли́жнему да угожда́ет во благо́е к созида́нию. И́бо и Христо́с не Себе́ угоди́, но я́коже есть пи́сано: поноше́ния понося́щих Тебе́ нападо́ша на мя. Ели́ка бо преднапи́сана бы́ша, в на́ше наказа́ние преднаписа́шася, да терпе́нием и утеше́нием писа́ний упова́ние и́мамы. Бог же терпе́ния и утеше́ния, да даст вам то́жде му́дрствовати друг ко дру́гу о Христе́ Иису́се; да единоду́шно еди́ными усты́ сла́вите Бо́га и Отца́ Го́спода на́шего Иису́са Христа́. Те́мже прие́млите друг дру́га, я́коже и Христо́с прия́т вас во сла́ву Бо́жию.
Священник вторый: Мир ти.
Чтец: И ду́хови твоему́.
Диакон: Прему́дрость, во́нмем.
Аллилуиа, глас 5.
Стих: Ми́лости Твоя́, Го́споди, во век воспою́.
Диакон: Прему́дрость, про́сти, услы́шим свята́го Ева́нгелия.
Священник: Мир всем.
Лик: И ду́хови твоему́.
Священник: От Луки́ свята́го Ева́нгелия чте́ние.
Лик: Сла́ва Тебе́, Го́споди, сла́ва Тебе́.
Диакон: Во́нмем.
Евангелие от Луки, зачало 94.
Священник вторый: Во вре́мя о́но, прии́де Иису́с во Иерихо́н. И се, муж нарица́емый Закхе́й, и сей бе ста́рей мытаре́м, и той бе бога́т; и иска́ше ви́дети Иису́са, Кто есть, и не можа́ше от наро́да, я́ко во́зрастом мал бе. И предыте́к возле́зе на я́годичину, да ви́дит, я́ко туде́ хотя́ше мину́ти. И я́ко прии́де на ме́сто, воззре́в Иису́с, ви́де его́, и рече́ к нему́: Закхе́е, потща́вся сле́зи, днесь бо в дому́ твое́м подоба́ет Ми бы́ти. И потща́вся сле́зе, и прия́т Его́ ра́дуяся. И ви́девше вси ропта́ху, глаго́люще, я́ко ко гре́шну му́жу вни́де вита́ти. Став же Закхе́й, рече́ ко Го́споду: се, пол име́ния моего́, Го́споди, дам ни́щим, и а́ще кого́ чим оби́дех, возвращу́ четвери́цею. Рече́ же к нему́ Иису́с: я́ко днесь спасе́ние до́му сему́ бысть, зане́ и сей сын Авраа́мль есть. Прии́де бо Сын Челове́чь взыска́ти и спасти́ поги́бшаго.
Лик: Сла́ва Тебе́, Го́споди, сла́ва Тебе́.
Таже диакон глаголет ектению:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди, поми́луй, трижды.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии и оставле́нии грехо́в раба́ Бо́жия [или рабы́ Бо́жия], имярек.
Лик: Го́споди, поми́луй, трижды.
О е́же прости́тися ему́ [или ей] вся́кому согреше́нию, во́льному и нево́льному, Го́споду помо́лимся.
Лик: Го́споди, поми́луй, трижды.
Возглас от священника: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Диакон: Го́споду помо́лимся:
Лик: Го́споди, поми́луй.
Священник молитву:
Бо́же вели́кий и вы́шний, от всея́ тва́ри покланя́емый, прему́дрости исто́чниче, бла́гости вои́стинну неизсле́димая бе́здно и благоутро́бия неопределя́емая пучи́но; Сам, Человеколю́бче Влады́ко, преве́чных и ди́вных Бо́же, Его́же никто́же от челове́к помышля́яй мо́жет пости́гнути, при́зри, услы́ши нас, недосто́йных рабо́в Твои́х, и иде́же о вели́цем и́мени Твое́м еле́й сей прино́сим, низпосли́ Твоего́ да́ра исцеле́ния, и оставле́ние грехо́в; и исцели́ его́ [или ю́] во мно́жестве ми́лости Твоея́. Ей, Го́споди благопремени́телю, еди́не ми́лостиве и человеколю́бче, ка́яйся о зло́бах на́ших; ве́дый, я́ко належи́т по́мысл челове́ка на лукавая от ю́ности его́; не хотя́й сме́рти гре́шника, но я́ко обрати́тися и жи́ву бы́ти ему́; гре́шных ра́ди спасе́ния вочелове́чивыйся Бог сый, и созда́выйся за созда́ние Твое́. Ты еси́ реки́й: не приидо́х призва́ти пра́ведныя, но гре́шныя в покая́ние; Ты еси́, овча́ взыска́вый заблу́ждшее; Ты еси́, поги́бшую дра́хму приле́жно взыска́вый и обреты́й. Ты еси́ реки́й, я́ко гряду́щаго ко Мне не изжену́ вон; Ты еси́, и́же блудни́цы честне́и Твои́ но́зе слеза́ми омочи́вшия не возгнуша́выйся; Ты еси́ реки́й: ели́жды а́ще паде́ши, воста́ни, и спасе́шися; Ты еси́ реки́й, я́ко ра́дость быва́ет на небеси́ о еди́ном гре́шнице ка́ющемся. Сам при́зри, благоутро́бный Влады́ко, с высоты́ святы́я Твоея́, соосени́в нас, гре́шных и недосто́йных рабо́в Твои́х, благода́тию Свята́го Ду́ха в час сей, и всели́ в раба́ Твоего́ [или в рабу́ Твою́] имярек, позна́вшаго [или позна́вшую] своя́ согреше́ния, и присту́пльшаго [или присту́пльшую] к Тебе́ ве́рою; и прии́м Свои́м Ти человеколю́бием, а́ще что согреши́л есть [или согреши́ла есть] сло́вом, или́ де́лом, или́ помышле́нием, прости́в очи́сти его́ [или ю́] и чи́ста [или чи́сту] сотвори́ от вся́каго греха́, и при́сно спребыва́я ему́ [или ей], сохрани́ про́чее ле́то живота́ его́ [или ея́], ходя́ща [или ходя́щу] во оправда́ниих Твои́х во е́же не ктому́ бы́ти ему́ [или ей] посмея́ние диа́волу: я́ко да и в не́м [или в ней] просла́вится Пресвято́е и́мя Твое́.