Глава 21. О еже когда глаголются изобразительная, и когда антифоны.
Изобразительная глаголются во дни воскресныя во весь год, и во владычни и богородичны праздники, в нихже несть антифонов. Такожде в предпразднствах и попразднствах, и во всю пятьдесятницу. Подобне же и святых имущих бдение и полиелей, и выход, и славословие, и емуже указует песнь во уставе на Литургии. [Смотри] Антифоны же глаголются септемвриа в 14 день: Декемвриа в 25 день: ианнуариа в 6 день: Августа в 6 день: В четыредесятнице: В неделю ваий: В пятьдесятнице: В неделю пасхи, и во всю светлую седмицу: В четверток вознесения господня: В неделю 8–ю: собственныя праздников. Во все же лето по вся дни, в нихже не указует святаго на блаженнах песни, глаголются антифоны повседневныя: благо есть: с прочими. Аще же и указует коему святому, прокимен, апостол, евангелие, и причастен, кроме песни, и в те дни глаголются антифоны же вседневныя.
Глава 22. Подобает ведати, когда кадит иерей.
Кадит вечер, на Господи воззвах, в стихирах и в начале утрени, и на 9–й песни. Кадит же и на непорочнах, в субботу и неделю. Кадит же и на праздники господския, в начале великия вечерни. Кадити же иерею, или диакону сице: Первее став пред святою трапезою, и творит крест кадилом. И тако от полуденныя страны став, такожде творит крест. Подобно же и от восточныя и от полунощныя, крестовидно кадит святую трапезу, и весь святый олтарь, и жертвенник: и исходит северными дверьми. И пришед пред царския двери, и тамо творит крест кадилом: И идет и кадит святыя иконы, по южней стране образ спаса Христа, и храма, и прочия тоя страны: подобне и левей, образ пресвятыя Богородицы, и прочих, таже предстоятеля. Аще ли несть настоятеля, кадит образ на месте его. И тако кадит весь правый лик братий, по дважды, воздвизая пред киимждо кадило праве и преки, творя крест. И егда покадит весь лик, и став прямо их посреде: аще поет та страна стих, ожидает дондеже другая страна свой стих начнет. Сему же лику умолчавшу, тогда творит крест кадилом на весь лик, и поклонение творит к ним благочинно, ко всем едино, и они к нему вси такожде творят поклонение: подобне и левый лик, и всю братию стоящую в церкви кадит. И исходит в притвор, и тамо кадит по чину, творит крест кадилом, пред красными враты. Таже кадит на обе страны, святыя иконы, и братию всю по чину их. Последи же возвращься к красным вратом, зря к западу, кадит крестовидно всех. И егда внити во храм из притвора, творит крест кадилом, пред царскими дверьми: и потом кадит икону спаса Христа, и на левой, Богородицы, и на аналогии, и настоятеля. И входит во святый олтарь южными дверьми, и творит крест пред святою трапезою, и отлагает кадило.
Глава 23. О завесе святаго олтаря, когда отверзается, и когда затворяется.
отверзается завеса в начале вечерни, и стоит отверзена даже до отпуста. На Утрени, такожде с начала и до конца. На часех же егда чтутся кроме литургии, отверзается ко чтению апостола, и стоит до отпуста отверзена. По отпусте же затворяется. В начале же литургии отверзается завеса, и стоит отверзена, даже до великаго входа. По входе же паки затворяется, дондеже иерей, или диакон возглаголет: Двери двери, премудростию вонмем. Тогда отверзается, и стоит отверзена до возглашения: святая святым. И тогда паки затворяется. По причащении же паки отверзается, и стоит отверзена до конца святыя литургии. Но отпусте же литургии совершенне затворяется. егда же молебен поется, от начала и до отпуста отверзена бывает. [Смотри] Ведомо буди, яко святыя двери никогдаже отверзаются, токмо в начале великия вечерни, егда бывает бдение, и кадит священник, и во вся входы, сиречь вечерни, и литургии, и святаго евангелиа: такожде отверзаются и от появления святых таин, даже до исполнения божественныя литургии.
Глава 24. О вжигании свещ,
како подобает в церкви вжигати, в неделю, и на праздники христовы, и Богородицы, и святых, и прочия дни.
На велицей же вечерни, прежде каждения иереева, должно есть вжигати свещи якоже указася на малей вечерни, и пред владычним образом в тябле, аще имать святый бдение. И по 1–м антифоне кафисмы, в начале Господи воззвах, вжигати и прочия свещи: угашати же на конечном трисвятом. На Утрени, на Бог господь, подобает вжигати свещи, якоже прежде изъявися. В начале же полиелеа подобает вжигати вся свещи, и оставляти я горети до скончания 3 песни, и тогда паки погашати я. И на 8 песни вжигаем паки вся, и оставляем я горети до конца великаго славословия. На Литургии, прежде начала литургии, во олтаре вжигати свещу на жертвеннице. И егда иерей облачится в ризы, и приспевшу времени звона, прежде вжигати свещу на престоле, таже в церкви, якоже предречеся. В начале же святаго евангелиа, вжигати вся свещи, и оставляти я горети до заамвонныя молитвы.
Глава 25. О вседневном вжигании свещ.
На всякий день от начала вечерни подобает свещи вжигати прежде пред иконою спаса Христа, и егоже есть храм на десней стране, и пред образом пресвятыя Богородицы, на левей. Аще имать святый, блажен муж: вжигаем и пред аналогием, и пред образом спаса Христа в тябле, и во олтаре у престола. Аще ли не имать, вжигати по стихологии: угашати же по конечном трисвятом. На повечерии по преждеписанному, пред спасовым, и богородичным. На Утрени свещи вжигати, якоже прежде на вечерни изъявися, и на Бог господь, вжигати, и пред аналогием, и в тябле. Аще же имать святый полиелей, вжигати и вся свещи, и оставляем горети их и до 3 песни, и угашати. На 8–й же песни паки вжигати, и оставляем их горети до конца славословия. В начале святыя литургии вжигати свещи, якоже прежде изъявися в неделю. О праздницех рождества Христова, и богоявления, и прочих праздников господских и богородичных, и во всю светлую седмицу, и святых имущих бдение, вжигаются свещи, якоже прежде в неделю изъявися.
Глава 26. Подобает ведати, в кое время братии в церкви не стояти с жезлами.
На Утрени егда глаголется шестопсалмие, и на Величит душа моя Господа, и на достойне всегда. На Литургии, на евангелии всегда, и на Херувимской песни, и в явлении святых таин.
Глава 27. О канонарсе.
Подобает ведати, яко должно есть канонарху по еже творити поклонение, и начати канонархати, ожидати конца стихиры, и тогда творити поклонение равно вкупе с братиями: И в другую страну отшед, и тамо творит такожде. На конечный же стих: яко утвердися милость его на нас: егда начинается стихира, собираются оба лика насреди равно, ни единому предходящу, другому же на месте стоящу, или единому поклонение творящу, другому же небрегущу: но вкупе собравшимся обема ликома по обычаю своему, и ставшим отсюду и отонуду. И канонарху посреде стоящу, творит благочинно всем поклон. Такожде и оба лика творят поклон, яко от единаго телесе изсылающе купно, равне и благочинне, не преклоняюще колена, но выю свою со благоговением, и воздвизающе повышше глас, и поюще: яко утвердися милость его на нас: Слава, и ныне, богородичен, подобен гласа стихир минеи. По скончании же, паки всем с канонархом сотворшим поклонение, и на своя места отходящим, равно и благочинно поступающе, тойже канонарх прокимен поет, и аллилуиа, откровенною главою, и должен есть ожидати, дондеже совершится прокимен, и аллилуиа: и тогда поклонение по обычаю творит. Такожде, и на стиховну подобает всем сходитися на среди, и сотворше равно поклонение, поют стиховну стихиру, ожидати же канонарху подобно, якоже и прежде. И скончавшуся богородичну, такожде творит поклонение, и на место свое отходит. Подобает же ему покровенною главою канонархати, изряднее же, егда насреди стоит, благочиния ради.
Глава 28. О безчинных воплех.
Безчинный вопль поющих в церкви, не прияти того к церковному пению. Такоже и прилагаяй к церковному пению, не приятен есть: да извергутся сана своего, и паки в церкви да не поют. Подобает бо пети благочинно, и согласно возсылати владыце всех и господу славу, яко едиными усты от сердец своих: преслушающии же сия вечней муце повинни суть, яко не повинуются святых отец преданию и правилом.
Глава 29. О откровении глав.
Ведомо же буди, яко На Литургии открываем главы своя на входе, и на слышании святаго евангелиа, и на херувимской песни великаго входа, и на словеса Христова, и на Достойно есть, и на Отче наш, и во явление святых таин, и на входе на вечерни.
Глава 30. О еже не творити бесед в церкви.
Потребно есть ведати и сие братиям, еже не творити бесед, стоящим в лицех церковных: всяко бо и сие возбранено есть от святых отец: но ниже исходити кому, или входити, дондеже поставлено будет чтение. Не точию же, но ниже входити кому на место свое, егда поет лик, в немже стоит: Но егда начнет другий лик пети, тогда входит на место свое, творя поклон братии.
Глава 31. О еже како подобает имети будильника.
В великую четыредесятницу повелевает предстатель единому от братий возбуждати братию в церкви, иже на коеждо чтение, по еже почести мало чтущему, востает от своего места, и творит три поклоны насреди, и тако обходит братию молчя: и коегождо аще обрящет дремлюща, возбуждает его тихо: он же востав приходит в среду, и творит коленопреклонения 3, и к ликом по единому: и отшед сядет на месте своем. Сие же ныне не бывает, и во множайших уставех не обретается, мнится же ми, яко за леностное наше прилежание, и зане не терпим с любовию обличения, сего ради умолчано некиими. Тойже будильник и во все лето возбуждает братию по келлиам в церковь.
Глава 32. О велицей четыредесятнице, яже должен всякий христианин хранити.
Во святую и великую четыредесятницу, 1–я недели первый день, сиесть в понедельник, отнюд ясти не подобает, такожде и во вторый. В среду же по совершении преждесвященных, трапеза поставляется, и ядим хлеб тепл, и от снедей овощных теплых, дается же и укроп с медом. Не могущии же сохранити дву дней первых, ядят хлеб, и квас по вечерни, во вторник: Подобне же и старии творят. В субботы же и недели разрешаем на елей точию, и вино. В прочих же седмицах постимся, до вечера 5 дней, и ядим сухоядение, кроме суббот и недель: рыбы же во всю святую четыредесятницу никакоже дерзнем ясти, кроме праздника благовещения пресвятыя Богородицы, и недели цветоносныя. В пяток 1–я недели, и в среду великаго канона, и в великий четверток, аще нецыи уставы и повелевают на елей разрешати, но не творится за честность дней. В навечерие же праздника благовещения, прежде субботы святаго праведнаго лазаря, разрешаем на елей и вино. И аще монах святую четыредесятницу своим лакомством разорит, еже ясти рыбу, кроме праздника благовещения, и недели цветоносныя, то не причастится святых таин и на святую пасху: по друзии две недели покается, а поклонов на день, и на нощь 300.