На Утрени, поем Аллилуиа, и троичны гласа, и обычныя кафисмы, и прочее поем на Утрени и на часех, якоже указася прежде в ряду в 24–й день.
МРК Аще случится предпразднство благовещения в среду 4–ю постов, еже есть крестопоклонную.
Вечер, и утро поем все с поклоны. Во вторник вечера, кафисма рядовая. На Господи воззвах, стихиры триоди 3, и предпразднства 3. Слава, креста: И ныне, предпразднства. Прокимен, и чтения дне. На стиховне стихиры триоди. Слава, креста: И ныне, предпразднства. На Утрени, в среду канон триоди со ирмосом на 6: и предпразднства на 4: [Смотри] А идеже трипеснец, поем канон креста со ирмосом на 4: и предпразднства на два: по два тропаря за един, и трипеснец на 8: последи ирмос трипеснца. По 3–й песни, кондак предпразднства и седален дне: Слава, и ныне, предпразднства. По 6–й песни, кондак и икос креста. По 9–й песни, светилен троичен гласа. На хвалитех стихиры креста, писаны на Господи воззвах, оставшия. На стиховне триоди: Слава, креста: И ныне, предпразднства. На 1–м часе, бывает поклонение креста, по обычаю. Сице поем службу предпразднства, и креста, и в пяток, аще случится, тояже недели.
МРК Аще случится предпразднство благовещения в четверток 4–я недели постов.
В среду вечера, на Господи воззвах, стихиры на 10: триоди на 6: и предпразднства на 4. Слава, креста: И ныне, предпразднства. Таже вход, и прочее преждесвященных. На Утрени же, поем все, якоже указася на ряду в 24–й день.
[Смотри] Подобает ведати, аще случится благовещение пресвятыя Богородицы в среду 5–я недели постов.
И предпразднства благовещения, поем службу, стихиры и канон в понедельник, на ряду: минеи же святаго поем на повечерии.
[Смотри] Аще ли же случится предпразднство благовещения пресвятыя Богородицы в четверток 5–я недели постов.
И поем службу предпразднства, стихиры и канон напреди в среду на ряду, великаго ради канона: рядоваго же святаго службу такожде поем на повечерии.
МРК Аще случится предпразднство благовещения пресвятыя Богородицы в неделю 4–ю, или 5–ю постов.
На Велицей Вечерни, стихиры воскресны 3: и анатолиевы 3: и предпразднства 4. Слава, предпразднства: И ныне, богородичен гласа, и прочее по обычаю. На Утрени, на Бог господь, тропарь воскресн дважды. Слава, и ныне, предпразднства: и прочее воскресно и до канона. Канон воскресн со ирмосом на 4: и Богородицы на 2: и триоди на 4: и предпразднства на 4. Катавасиа: отверзу уста моя: По 3–й песни, кондак предпразднства: и седален триоди. Слава, и ныне, предпразднства. По 6–й песни, кондак и икос воскресн. По 9–й песни, светилен воскресн: Слава, и ныне, предпразднства. На хвалитех стихиры воскресны по обычаю. Посем глаголем припев: воскресни Господи Боже мой: и поем самогласен триоди: Слава, паки тойже. И ныне, Преблагословенна еси: Славословие великое. И прочее по обычаю. На 1–м часе, тропарь воскресн: Слава, предпразднства: И ныне, богородичен часов. святых же службы, Иоанна лествичника, и марии египтяныни, в сия недели оставляются, и поются егда екклисиарх разсудит.
МРК Аще случится предпразднство благовещения в субботу пятую акафиста.
В пяток вечера, на Господи воззвах, поем стихиры, самогласен дне, дважды: и мученичен: и акафиста на 4: и предпразднства, 3. Слава, предпразднства: И ныне, акафиста. Вход, прокимен, и чтения дне. Да исправится: и прочее преждесвященных. [Смотри] Четверопеснец же триоди поем на повечерии. На Утрени, на Бог господь, тропарь акафиста, дважды. Слава, и ныне, предпразднства: и обычныя кафисмы. Кондаки и икосы акафиста, по чину их. Канон предпразднства, со ирмосом на 6: и акафиста на 8. Катавасиа: отверзу уста моя: По 3–й и по 6–й песни, кондаки и икосы по обычаю. По 9–й песни, светилен акафиста дважды. Слава, и ныне, предпразднства. На хвалитех стихиры акафиста на 4, глас 4. Подобен: яко добля: Слава, и ныне, глас 4: Языка егоже не ведяше: Славословие великое, и отпуст.
[Смотри] Аще случится предпразднство благовещения в субботу лазареву.
И поется предпразднства служба прежде в четверток тояже седмицы, якоже указася сего месяца в 24 день.
25. (+) благовещение пресвятыя владычицы нашея Богородицы и приснодевы марии.
Начинается от четвертка 3–я недели святых постов, и восходит до среды светлыя седмицы, и аще есть пост, начинаем вечерню без кафисмы и без поклонов. На Господи воззвах, ставим стихов 10: и поем в триоди самогласен дне дважды, и подобны 3: и праздника 3: повторяюще две, глас 6. Подобен: Всю отложивше: Совет превечный: Слава, и ныне, глас тойже: Послан бысть: Вход. Свете тихий: Прокимен, и чтения дне, и праздника 3: 1- е, Бытия, Изыде иаков от студенца: 2–е, пророчества иезекиилева: Будет от дне осмаго: 3- е, Притчей: Премудрость созда себе дом: Таже, да исправится: и поклоны 3 великия: и прочая преждесвященных. [Смотри] Аще же несть преждесвященных, на Господи воззвах: стихиры подобны 3, триоди: и праздника 5. Слава, и ныне: Послан бысть: Вход, прокимен, и чтения дне и праздника 3. Таже, Сподоби Господи: На стиховне самогласен дне, дважды: и мученичен. Слава, и ныне: Днесь радость: По Ныне отпущаеши: тропарь праздника. ектениа, и 3 поклоны великия: и отпуст. На трапезе же разрешаем на вино и елей, в кийлибо день случится, во славу пресвятыя Богородицы. При часе же 1–м нощи ударяет в великий кампан довольно, и потом во вся. И собравшеся во храм, благословившу иерею, и кадящу, поем повечерие великое, и С нами бог: с пением, на глас 8, на оба лика, и обычныя тропари: День прешед: По 1–м трисвятом, тропарь праздника: Днесь спасения нашего: По 2–м кондак праздника: Взбранной воеводе: И по Слава в вышних: творим исхождение в притвор, и бывает литиа по обычаю, и поем стихиры праздника, самогласны 3, глас 1. Аще суббота или неделя, Слава, глас 8: Да веселятся небеса: И ныне, глас 2: благовествует гавриил: Аще же день постен, Слава, и ныне: благовествует гавриил: Таже молитвы обычныя бдения. И вшедше во храм, поем На стиховне стихиры праздника, глас 4, с припевы праздника: Первый, благовестите день от дне спасение бога нашего. Вторый, Воспойте господеви песнь нову, яко дивна сотвори господь. Слава, и ныне, глас тойже: Днесь радость благовещения: На благословении хлебов,
Тропарь, глас 4: Днесь спасения нашего главизна, и еже от века, таинства явление: сын Божий, сын девы бывает, и гавриил благодать благовествует. темже и мы с ним Богородице возопиим: радуйся благодатная, Господа с тобою. трижды.
И Буди имя господне: с пением, трижды. и псалом 33: благословлю Господа: до Не лишатся всякаго блага. И раздаются благословенныя хлебы братии по обычаю, и чтение праздника. На Утрени, на Бог господь: тропарь праздника трижды. и глаголем три кафисмы. По 1–й кафисме, оба седальны в триоди, без ектении: и чтение. По 2–й кафисме ектениа, и седален праздника, глас 1. Подобен: Гроб твой: Великий воевода: Слава, и ныне, тойже: и чтение праздника. По 3–й кафисме, седален праздника, глас 3. Подобен: Красоте девства: Днесь вся тварь радуется: Слава, и ныне, тойже. По чтении же даются свещи братии. По полиелеи седален, глас 4. Подобен: удивися: Гавриил с небесе: Слава, и ныне, глас тойже: Послан бысть гавриил к деве: и чтение праздника. Степенна, 1–й антифон 4–го гласа. Прокимен, глас 4: благовестите день от дне спасение бога нашего. Стих: Воспойте господеви песнь нову: Всякое дыхание: евангелие луки, зачало 4: Воставши мариам: По 50–м псалме стихира праздника, глас 2: благовествует гавриил: Канон праздника, глас 4: ирмос по дважды, тропари на 12. Катавасиа праздника. А идеже трипеснец, и поем канон праздника, со ирмосом на 6: и трипеснец, на 8. Катавасиа, ирмос триоди, оба лика вкупе. По 3–й песни, седален праздника, глас 8: Слово божие: Слава, и ныне: Послан бысть: По 6–й песни,
Кондак, глас 8: Взбранной воеводе победительная, яко избавльшеся от злых, благодарственная восписуем ти раби твои Богородице: но яко имущая державу непобедимую, от всяких нас бед свободи, да зовем ти: радуйся невесто неневестная.
И икос, и чтем пролог. На 9–й песни паки вжигают свещи братия. честнейшую не поем, но поем припев праздника: благовествуй земле: Таже ирмос: яко одушевленному: подобне и 2–й лик припев, и ирмос: и к прочим тропарем праздника, тойже припев. у трипеснца же к тропарем припев: Слава тебе Боже наш, слава тебе. И последи ирмос триоди, и праздника припев, и ирмос оба лика вкупе. Светилен, праздника дважды. Подобен: Со ученики: Ангельских сил: Слава, и ныне: еже от века днесь познавается: На Хвалитех, Всякое дыхание: и поем стихиры, на 4: глас 1. Подобен: небесных чинов: Слава, и ныне, глас 2: еже от века таинство: [Аще есть суббота или неделя, славословие великое, и ектении, и отпуст.] Аще же день постен, поем на стиховне триоди, самогласен дне дважды, и мученичен. Слава, и ныне, праздника: Да веселятся небеса: Таже, благо есть: единожды. По Отче наш: тропарь праздника. ектениа, и 3 великия поклоны, без отпуста утрени, и дается святый елей братии, поется же и стихира самогласна. И час 1–й с кафисмою. Тропарь и кондак праздника. И в конец 3 поклоны великия, и молитва: Христе свете истинный: и отпуст. В 3–й же час дне исходим со кресты с литиею вне монастыря: и возвращшеся входим в трапезу, и поем час 3–й и 6–й с кафисмами, без поклонов. Тропарь и кондак праздника. На часех же, в кампан не ударяем. На 6–м часе, поем тропарь паремии триоди, и прочая по чину их: и паремиа, и чтем слово, емуже начало: Паки радость благовещения: Присовокупляем же и 9 час с кафисмою и чтением. Посем блаженна скоро без пения и без поклонов: Помяни нас Господи: Лик небесный: Слава: Лик святых ангел: ослаби, остави: По Отче наш, кондак праздника. Господи помилуй, 40: Слава, и ныне, честнейшую: и поклоны 3 великия, и молитва: Всесвятая Троице: и отпуст.
26. (:. Собор архистратига гавриила: Вечерню поем без кафисмы, и без поклонов. На Господи воззвах, поем триоди самогласен дне, дважды, без мученична: и подобны триоди 3, и праздника 3, глас 4, самогласны стиховныя: В шестый месяц: и архангела 3, глас 1. Подобен: Всехвальнии мученцы: К 11 же стиху припев: Творяй ангелы своя духи: Слава, и ныне, праздника: Послан бысть: иерей же творит проскомидию в стихиры. Вход со евангелием. Свете тихий: Прокимен, и чтение дне, и праздника две. 1–е, Исхода, Вниде моисей: 2–е, Притчей, Господь созда мя: Таже ектениа малая, и возглас трисвятаго: яко свят еси Боже наш: и трисвятое. Прокимен, глас 4: благовестите день от дне спасение бога нашего. Стих: Воспойте господеви песнь нову: Апостол ко евреем, зачало 307: святяй и освящаемии: Аллилуиа, глас 1: Снидет яко дождь на руно: Стих: Будет имя его благословено во веки. евангелие луки, зачало 3: Зачат елисавет: и прочая божественная литургиа златоустаго. Вместо Достойно, поем ирмос: яко одушевленному: Причастен: Избра Господь сиона, и изволи его в жилище себе.