Летописная статья «А се князи Русьстии»
А СЕ КНЯЗИ РУСЬСТИИ
Сынъ Володимеровъ Мономахъ, правнукъ великого князя Володимера. Сии поставилъ град Володимерь Залешьскыи в Суждальскои земле и осыпа его спомъ (л. 10), и созда первую церковь святого Спаса за 50 лет до Богородичина ставления. Потомъ приде из Киева въ Володимерь сынъ Мономашь Юрьи Долгая Рука и постави другую церковь, каменну, святого Георгиа, за 30 лет до Богородичина ставлениа.
В лето 6663 [1155]. Приде из Киева смереныи и христолюбивыи на великое княжение въ град Володимирь князь великыи Андреи Юрьевичь безъ отчя повелениа, егоже лестию подъяша Кучковичи, и поставишя град Боголюбныи, а обешался святеи Богородици животворнои, юже ему о неи сказашя в Вышегороде въ женьскомъ манастыри, что крилошяне входять в церковь, а та чюднаа икона из места своего вышед стоить и особе среде церкве своеи. И помолися князь Андреи тои чюднеи иконе матери божии, и взя нощию святую ту икону безъ отчя повеления, и поеха на Русскую землю съ своею княгинею и съ своимъ дворомъ, и поятъ съ собою крилошаны вышегородскыя: попа Микулу и зятя его Нестера диакона, и съ ихъ попадьами; и многа чюдеса (л. 10 об.) бышя, идущемъ имъ до Володимеря, от чюдные иконы матере божии; и постави еи храмъ на реце Клязме, 2 церкви каменны во имя святыя Богородица, и сътвори град и нарече ему имя: се есть место Боголюбимое. Ту же коня много били, а конь с того места съ иконою не идеть; и створи ту многы церкви, 30. И потомъ минуло 11 лет, и угобзися святому Андрею нива душевнаа, и положися ему большаа мысль въ сердце, и начя съзидати другыи град Володимеръ, и заложи третьюю церковь камену святыя Богородиця о единомъ версе, месяца маиа въ 8, на память святого Иоанна Богослова, и верхь ея позлати. И потомъ създа четвертую церковь каменну въ имя святыя богородица Положение честныя ризы, Златаа врата. Оканныи же злоначялныи диавол, не могыи тръпети добродетели его, и вселися сотона въ Якима зловернаго, якоже и въ Июду Скариотьскаго на христа, убииствомъ: тако и сии оканнии Кучковичи съвещашя на святого князя оканною своею мыслию (л. 11) и убишя его въ суботу, въ канонъ Петрову дни. И въ перьвое лето мстилъ обиду братъ его Михалко. Того же лета и умре. На третии год приде изъ замория из Селуня братъ его Всеволодъ, нареченыи въ крещении Дмитрии Юрьевичь, и седе на великое къняжение, и мсти обиду брата своего Андрееву: Кучковичи поималъ, и в коробы саждая, въ озере истопилъ, якоже рече Пророкъ: потребишася въ Ендоре, рекше въ безлепици, и бышя аки гнои земныи, и погыбе память ихъ съ шумомъ. Сии же благоверныи князь Всеволод Юрьевичь пристави святеи Богородици 4 верхы и позлати, занеже ималъ дань и до Орды на Тотарехъ. И потомъ Всеволод постави церковь камену на своемъ дворе святого Дмитрия, въ свое имя. И потомъ Всеволод постави манастырь Рожество святыя Богородиця о единомъ версе. И княжи летъ 37. А княгини его Мариа Всеволожа Щварновна, дщи князя Чешьского, постави церковь Успение святыя Богородиця, новыи манастырь великымъ (л. 11 об.) княгинямъ. И посади Всеволод сыны своя на княжение: Ярослава въ великии Новгород, Костянтина в Ростовъ, а по собе благослови на великое княжение сына своего Юриа. На сего же Юрья царь поганыи Батыи приде в лето 6745 [1237], и поплени всю землю Русьскую, и князя Юрья уби, Всеволожа сына, великого. И по Батыи приде на великое княжение из Новаграда великого сынъ Ярославль, внукъ Всеволожь, правнукъ Юрьевъ Долгые Рукы, въ град Володимерь Александръ великии, храбрыи, Невьскыи, иже ему была брань шестью с Немци, и поможе ему богь, и короля уби; и того ради князи русстии держать честно имя великого князя Александра Ярославичя, внука Всеволожа. Царь Батыи слышавъ его мужьство, и възлюби его паче всехъ князеи, и призва его к собе любовно, и первое и другое, и отпусти его с великою честью, издаривъ. Иотсегокнязя Александра пошло великое княжение Московьское. Александръ роди 4 сыны: Данила Московьскаго, Дмитриа Переясла (л. 12) вьскаго, Василия Костромьскаго, Андрея Городецкого. Отъ сего Андреа пошло колено Суждальскыих князеи: Андреи роди Василия и Александра Суждальского. Василии роди Костянтина. Костянтинъ роди Дмитриа и братию его; у него же оженися князь великии Дмитрии, сынъ Ивана Ивановичя. Асе Данилович и великии князи: Юрьи Даниловичь, Иванъ великии князь, Семеон Ивановичь, Иванъ Иванович, Дмитрии Иванович, Василии Дмитриевичь. Асе колено пошлотферьскых князеи: Ярославъ, великого Новагорода, великого Александра отець, Всеволода Дьмитриа внукъ. Тои Ярославъ посади на княжении во Тфери сына своего Ярослава, брата великого Александра. И сии роди князя великого Михаила Тферьскаго. Михаилъ роди Александра, иже убилъ Шевкала Деденевичя. Потомъ приходила рать Туралкова, а воевода Федорчюкъ, а темниковъ 5, и пленишя Тферь. И по Турлакове рати поидошя князи в Орду, и Озбякъ поделилъ княжение имъ: князю Ивану Даниловичю Новъгород и Кострому, половина княжениа; (л. 12 об.) а Суждальскому князю Александру Васильевичю далъ Володимеръ и Поволожье, и княжи полътретья году. Сии князь Александръ из Володимеря вечныи колоколъ святеи Богородици возилъ въ Суждаль, и колоколъ не почялъ звонити, якоже былъ в Володимере; и помысли в себе князь Александръ, яко съгруби святеи Богородици, и повеле его пакы вести въ Володимерь; и привезьше колоколъ, поставишя и въ свое место, и пакы бысть гласъ богуугоденъ. И по смерти сего Александра поиде въ Ворду князь великии Иванъ Даниловичь, и царь его пожаловалъ и далъ ему княжение великое надо всею Русьскою землею, якоже и праотець его великии Всеволод Дмитрии Юрьевичь; а правилъ княжение ему Албуга. И оттоле пошли русскыи князи. Въ всихъ сихъ прославимъ въ троици единого бога и православныихъ великыихъ князеи, заступниковъ нашихъ всея Русьскыя земля. А Иванова княжения Даниловичя до преставлениа князя Ивана Васильевичя и тогды минуло великому князю Ивану Данильевичю 100 летъ и 8. А митрополитъ былъ Петръ, иже бе пришелъ из Волыня на Суждальскую землю, на Москву, в лето 6824 [1316], и приа его князь великии Иванъ Даниловичь съ честию великою.
Публикация: ПСРЛ. Т. III. С. 467–469.
Аналогичный текст читается в Летописи Авраамки.
Публикация: ПСРЛ. Т. XVI. Летописный сборник, именуемый Летописью Авраамки. М., 2000. Стб. 309–312.
Владимирский летописец
«И сесь князь великии Всеволод пристави 4 верхи съборнои церкви святеи Богородици в Володимери и позлати ю; а на Татарехъ имал дань и много о земли Рускои пострада; а княгини его Мария, дщи князя Четского, създа церковь камену Успение святеи богородици в Новом манастыри» (в некрологе Всеволода Юрьевича).
Публикация: ПСРЛ. Т. XXX. Владимирский летописец. Новгородская вторая (архивская) летопись. М., 2009. С. 83.
Тверской сборник
[В лето 6709 (1201)] «Тоя же зыми преставися княгины Ярославля Володимерича, дочи Шварнова, Ческого короля, свесть великого князя Всеволода; и положена бысть въ Володимери у Пречистыа, въ сестрине манастыри».
Публикация: ПСРЛ. Т. XV. Рогожский летописец. Тверской сборник. М., 2000. Стб. 290 (второй пагинации).
[Въ лето 6713 (1205)] «По отпущении же князя Костантина, марта 2, на память святаго священномученика Феодота, пострижеся великаа княгины Всеволожа Мариа, дщи Шварлова Ческаго, въ черници и въ скиму, въ Володимери въ манастыри святыа Богородица, иже бе сама създала, и нарекоша имя ей Мариа; въ то же бе имя и крещена въ Володимери, а приведена ис Чехъ не крещена».
Публикация: Там же. Стб. 301 (2-й пагинации).
Никифоровская и Супрасльская летописи
«…Андрея, Кучковичи поби, а иных бояр за Юрьевым изыма и поби. Сии же князь великыи пристави святеи Богородици съборнои 4 врьхы и позлати, святаго Дмитриа на своем дворе постави и позлати, а княгыни его Мария дева Ориева (так в рукописи), дъщи чесскаго князя, постави церковь камену святую Богородицу в новом манастыри».
Публикация: ПСРЛ. Т. XXXV. Летописи Белорусско-Литовские. М., 1980. С. 19. Л. 251.
«Потомь на третее лето приде Вълодимерь с Киева. Князь великыи Дметреи Всеволъд и мсти кров брата своего Андрея, Кучьковичи поби, а иных бояр за Юръвым изыма и поби. Сии же князь велики пристави святеи Богородици съборной 4 верхы и позолоти, святого Дметрея на своемь дворе постави и позолоти, а княгини его Мара два Ориева (так в рукописи), дщи ческого княжя, постави церков камену святую Богородицю в новъм манастыри».
Публикация: Там же. С. 36. Л. 4–4 об.
Степенная книга
«Глава 10. О богородномъ терпении великия княгини Марии Всеволожи и о монастыриея. Прежде сего за мало время боголюбивая великая княгини Мария, иже бысть благоплодная супружница сего [бого]хранимаго самодержьца Всеволода Димитрия Юрьевича, Щьварнова дьщи князя Чешьскаго, памяти дело достойно сотвори, подражающи нраву праведнаго Авраама: купи ценою часть земьли на строение церкви и монастыря въ славу Богу и Пречистеи Богородицы, идеже супружникъ ея, сий великий князь Всеволодъ церковь камену постави Успение Пречистыя Богородицы, идеже и доныне есть новий монастырь великихъ княгинь. Божиими же судьбами посещена бысть болезнию великою. Пребысть же въ той немощи лежащи седмь летъ и никогда же хульна словеси изглагола, но со благодарениемъ терпяше скорбь и нужу велию, поминающи терпение праведнаго Иева, и вольныя страсти Христовы за мирьский животъ и спасение. Со Иовомъ же глаголаше: „Аще благая прияхомъ отъ руки Господня, злаго ли мало не стерпимъ“. Прилагаше же и апостольское слово, яко „недостойны суть страсти нынешьняго времени противу будущей славе явитися въ насъ“. И тако доблественно пострада седьмочисленое то время летъ въ велицей бо болезни, въ ней же всегда благодарствуя Бога и сыны своя призывая къ себ и, наказуя ихъ, глаголаше: „Возлюбленная моя чада! Се азъ, яко видите мя, вельми болезнующа; по мале же отиду света сего маловременнаго ко отьцемъ своимъ. И вы убо, донъдеже пребудете въ суетнемъ семъ житии, первие же имейте веру и любовь къ Богу и Пречистей Его Богоматере, истинней Богородицы, и всею силою подщитеся страхъ Божий име въ себе. Святителемъ же и презвитеромъ и всему священническому чину не стыдитеся, ни гордитеся главы своея поклоняти, понеже служители суть самого Бога и Пречистыя Богородица и пастырие словесных овецъ. Почитая бо священники Божия, самого Бога почитаеть, а преобидяй священники Божия, самого Бога преобидить. Вся же иноки чьтите и потребными издоволяйте ихъ и никогда же ихъ оскорбите. Имейте же тихость и кротость и смиреномудрие и любовь и милость. Алчьныя насыщайте, жадныя напаяйте, нагия одевайте, больныя посещайте и себе въ чистоте соблюдайте. Милостыню всегда творите: та бо поставить васъ предъ Богомъ. Всякого человека не мините не привечавши. Сами же межю собою имейте нелицемерную любовь, и Богъ мира и любве будеть въ васъ и сохранить васъ отъ всякого зла и покорить враги ваша подъ нозе ваши. Аще ли же въ ненависти и въ распряхъ и въ которахъ будете межу собою, то сами погибнете и благословеное наследие державу отьчества вашего изгубите юже праотьцы ваши и отецъ вашь и протьчее сродство ваше многимъ трудомъ и потомъ приобретоша. Темъ же пребывайте мирно и любовно межю собою, брать брата своего послующе. Старейшаго же вашего брата Констянтина имейте, яко отьца и главу. Ты же, старейший сыне мой Костянтине, имей братию свою, яко сыновы и милуй ихъ, яко свой удъ. Слыши Иванна Евангелиста и Богослова глаголюша: «Аще кто рече: „Бога люблю“, а брата своего ненавидитъ – ложь есть». И того ради пребывайте въ любви, понеже любовь есть Богъ и пребываяй въ любви во Бозе пребываеть и Богъ в нем пребываетъ“. Старейший же сынъ ея Костянтинъ сладостне насыщаяся отъ устъ ея учение, яко губа воды напаяема внимаше и на сердцы своемъ полагая вся словеса ея, ибо отъ корени благаго благий возрасте плодъ. Его же во благоверии наказа и научи заповедемъ Божиимъ, яко исполнь ему сущу теломъ мужескяго возраста, паче же духовныя мудрости. Прилуче же ся ему тогда ити въ Новъгородъ Великий гсподьствовати и отъ отьца своего послану сущу, и пришедъ къ матери своей, въ велицей болезни лежащи ей, и приятъ благословение отъ нея и иде в Новъградъ. Мати же его уразуме иже къ Богу свое отшествие, и пострижеся во иноческий чинъ, и претворено бысть имя ей Марфа, и пребысть въ монастыри своемъ 18 дний и съ миромъ преставися къ Богу въ лето 6713 месяца марта 19 день, и положена бысть въ церкви Пречистыя Богородицы и Честнаго Ея Успения въ честней Ея обители, юже сама создала, въ приделе Благовещения на правой стране. У нея же последи положена бысть и вторая супружьница Всеволожа, дьщи Витепьского князя. Сущу же въ Новеграде Констянтину, и увиде, яко мати его Мария преставися во иноческомъ чину. Онъ же возрыдавъ плакася вельми и глаголаше: „Увый мне! Какова богатесьства лишихся, яко своима рукама не опрятахъ святое тело матери моея и гробу не предахъ“. И много о семъ плакашеся, понеже любимъ бысть отъ нея. Въ монастыри же ея въ приделе Христова Рожества отъ юга на правой стране положени быша великия княгини Александра да великая княжьна Евдокия, а на левой стране великая княгини Василиса, а в приделе Благовещения отъ севера на правой стране великая княгини инока Марфа Щьваровна, да великая княгини Анна, а на левой стране мученикъ Авраамий».
Публикация: ПСРЛ. Т. XXI. Ч. 1. Книга Степенная царского родословия. СПб., 1908. С. 226–229. Л. 388 об. – 391 об. См. также: Степенная книга царского родословия по древнейшим спискам: Тексты и комментарии. Т. 1. М., 2007. С. 456–459.